Ahyɛmu no

Nna Abraham pɛ dɛ ɔyɛ “ndzeyɛtsenenee ne kadofo mapã” (Abraham 1:2), ntsi Nyankopɔn too nsa frɛɛ no wɔ ahyɛmu nkitahodzi mu. Abraham nnyɛ nyia a odzi kan a onyaa pɛ yi, na nnyɛ ɔno na odzii kan dɛ ɔgye ahyɛmu. Osiandɛ nna ɔyɛ ahyɛmudzi a ɔwɔ hɔ daapem. Abraham hwehwɛɛ “egyanom hɔn nhyira” (Abraham 1:2)—nhyira a woduaa ahyɛmudzi do dze maa Adam na Eve na n’ekyir no wɔdze maa nkorɔfo a wɔdze enyimia hwehwɛɛ nhyira yinom.

Nyankopɔn n’ahyɛmu a ɔnye Abraham dzii no bɔɔ nhyira nwanwa ho anohoba: asaase egyapadze, n’asefo bɛyɛ kɛse, obenya asɔfodzi ayɛdze horow ho kwan, na dzin a mbasantsen a wɔbɛba no bedzi no nyi. Mbom ahyɛmu yi no botae no nngyina nhyira a Abraham na n’ebusua benya nko ara do mbom ɔsan so gyina nhyira a wɔbɛyɛ ama Nyankopɔn ne mba nkaa no do. Nyankopɔn paa mu kãa dɛ, “Na ayɛ nhyira,” “na wo mu na wobehyira asaase ebusua ebusua nyinara” (Genesis 12:2–3).

Ana ahyɛmu yi maa Abraham, Sarah, na hɔn asefo ndzinoa gyinabew wɔ Nyankopɔn ne mba mu? Sɛ yɛrekã a dɛ ɔyɛ adom nko dɛ wobehyira nkaafo no. Nna ɔwɔ dɛ Abraham n’ebusua “suo ɔsomdwuma yi nye Asɔfodzi no mu dze kɔ aman nyinara,” a wɔkyɛ “Asɛmpa no ne nhyira mpo, dza ɔyɛ nkwagye ne nhyira no, onnyiewiei nkwa mpo” (Abraham 2:9, 11). Wɔyɛ Nyankopɔn n’ahyɛmu nkorɔfo no nnkyerɛ dɛ woye kyɛn binom; nna ɔkyerɛ dɛ wɔwɔ asɛdze dɛ wɔboa binom ma wɔyɛ nyimpa apapa.

Nna ahyɛmu yi yɛ nhyira a nna Abraham reper hwehwɛ. Onyae ekyir no, Abraham kãa no wɔ n’akoma mu dɛ, “W’akowaa maper ahwehwɛ wo enyiber do; afei mehu wo” (Abraham 2:12).

Dɛm no yɛ mfe mpem ebien a wɔabasen kɔ, naaso wɔdze ahyɛmu yi asan ananmu aba wɔ hɛn nda mu. Na ɔrokɔ do hyɛ mã wɔ Nyankopɔn no nkorɔfo hɔn abrabɔ mu. Ahyɛmu yi ne mãhyɛ no dze ahoɔhar reba nda a odzi ekyir no mu ber a Nyankopɔn n’edwuma rokɔ kan, rihyira ebusua ebusua wɔ wiadze nyina mu. Na obiara a, tse dɛ Abraham, ɔpɛ dɛ ɔyɛ ndzeyɛtsenenee ne kadofo mapã—obiara a ɔhwehwɛ Ewuradze enyiber do no—botum enya mu ho kyɛfa.

Eyɛ ahyɛmu ba. Ber a wonuma wo na ber a idzi sacrament no, enye Nyankopɔn dzi ahyɛmu. Na edze temple ayɛdze krɔnkrɔn no nya ahyɛmu no ne mãhyɛ.

Ɔnam ahyɛmudzi horow na ayɛdze horow yinom do, yɛbɛyɛ Nyankopɔn no nkorɔfo. Yɛdze “daapem nkyekyeree” kyekyer hɛnho fam No. President Russell M. Nelson akyerɛkyerɛ dɛ, “Yɛnye Nyame dzi ahyɛmu ara pɛr a, yefi kwan no ne finimfin ngyinae afebɔɔ. Nyankopɔn renndan N’ekyir mma hɔn a wɔnye No akyekyer dɛm nkitahodzi no. Nokwasɛm, hɔn a wɔnye Nyankopɔn edzi ahyɛmu nyina no wɔ ɔdɔ na ehumbɔbɔr soronko bi ho kwan. … Osian hɛn ahyɛmu a yɛnye Nyame edzi ntsi, Ɔnnkɛberɛ dabiara da wɔ No mbɔdzembɔ mu dɛ Ɔbɔboa hɛn, na N’ehumbɔbɔr abotar a Ɔwɔ ma hɛn no nnkɛpa dabiara da.” Ibohu iyi wɔ Nyankopɔn n’ahyɛmu nkorɔfo abakɔsɛm mu wɔ Ahyɛmu Dadaw no mu, na ibohu no wɔ woara w’abrabɔ mu dɛ eyɛ N’ahyɛmu mba no mu kor.

Iyi nye ntsesee a ɔsom bo a wɔdze ama hɛn osian Abraham ahyɛmu ne Nsanananmu a wɔdze duaa Nkɔnhyɛnyi Joseph Smith do no ntsi. Ntsi no sɛ ekenkan ahyɛmu horow ho asɛm wɔ Ahyɛmu Dadaw no mu a, mma nndwen Nyankopɔn nye Abraham, Isaac, nye Jacob ntamu nkitahodzi ho asɛm ara. Dwendwen nkitahodzi a Ɔnye wo wɔ ho asɛm so. Sɛ ekenkan asefo a wonnkotum akan hɔn dodow anohoba no a, mma nndwendwen ɔpepe a ndɛ wɔfrɛ Abraham hɔn egya ho asɛm ara. Dwendwen Nyankopɔn n’anohoba ma wo fa onnyiewiei ebusua ebusua na onnyiewiei ndɔree ho asɛm so. Sɛ ekenkan asaase egyapadze ho anohoba ho asɛm a, mma nndwendwen asaase a wɔdze bɔɔ Abraham anohoba ho asɛm ara. Dwendwen asaase nankasa ne celestial hyɛbea ho so—egyapadze a wɔdze bɔɔ “abrɛfo’’ no a “wɔtweɔn Ewuradze no’’ anohoba ho(Matthew 5:5; Ndwom 37:9, 11). Na sɛ ekenkan anohoba no dɛ Nyankopɔn n’ahyɛmu nkorɔfo behyira “asaase do ebusua ebusua nyinara’’ (Abraham 2:11), ho asɛm no a, mma nndwendwen Abraham no somdwuma anaa nkɔnhyɛfo a wofii no mu bae ara ho. Dwendwen dza wankasa so botum ayɛ ho—dɛ Jesus Christ n’ahyɛmu kadofo—ma ayɛ nhyira ama ebusua ebusua a woetwa woho ehyia no.