“Kwakwar 2–8. ‘Ewuradze Frɛɛ No Nkorɔfo Zion’: Moses 7,” Bra, Bɛka Mo Do—Dze Ma Fie na Asɔr: Ahyɛmu Dadaw 2026 (2026)
“Kwakwar 2–8. ‘Ewuradze Frɛɛ No Nkorɔfo Zion’,” Bra, Bɛka Mo Do: 2026
Enoch Sees the Meridian of Time [Enoch Hu Mber Nkyekyɛmu Ntamu], Jennifer Paget yɛɛ nsaano mfonyin no
Kwakwar 2-8: “Ewuradze Frɛɛ No Nkorɔfo Zion”
Moses 7
Abakɔsɛm nyina mu no, nkorɔfo abɔ mbɔdzen dɛ wobenya dza Enoch na no nkorɔfo yɛe no: wɔkyekyer kuw papa bi a ohia anaa basabasayɛ nnyi mu. Dɛ yɛyɛ Nyankopɔn no nkorɔfo no, iyi yɛ hɛn pɛ. Yɛfrɛ no yɛrekyekyer Zion, na dza ɔkã—yɛrohwɛ nkorɔfo a wɔwɔ hia mu na yɛama asomdwee aba—ho nye dɛ yeridzi ahyɛmu horow, yɛrobɔ mu atsena wɔ tseneneeyɛ mu, na yɛnye hɛnho nye Jesus Christ, “Zion Hen no” reyɛ kor (Moses 7:53). Sɛ wiadze no, wo sɔn mu, anaa w’ebusua nnyɛ dza erohwehwɛ ma ɔayɛ no a, ɔyɛ mfaso dɛ ibebisa dɛ, Enoch na no nkorɔfo sii dɛn yɛe? Wosii dɛn benyaa “akoma kor na adwen kor” (Moses 7:18) mpo a nna wentwiwentwi etwa hɔnho ehyia? Nkyerɛkyerɛmu pii a Moses 7 dze ma fa Zion ho no, dza ɔsom bo tsitsir ara ma Latter-day Saintfo no botum ayɛ iyi: Zion nnyɛ kuropɔn ara—ɔyɛ akoma no na sunsum tsebew. Zion, dɛ mbrɛ Ewuradze kyerɛkyerɛɛ no, nye “akoma a no mu tsew” (Nkyerɛkyerɛ na Ahyɛmudzi 97:21). Ntsi bia kwan pa a yɛbɛkyekyer Zion nye yɛbɛhyɛ ase wɔ hɛnara hɛn akoma na efiefi mu.
Adwenkyerɛ horow ma Adzesũa wɔ Fie na wɔ Asɔr
Mubotum maboa akyekyer Zion.
Mber a Nkɔnhyɛnyi Joseph Smith dzii kan sũaa Enoch na no Krɔnkrɔnyɛ Kuropɔn ho asɛm no, okenyaan no. Nna “onyim dɛ da no aba a Ewuradze bɛkyekyer Zion bio wɔ asaase no do” (Saints, 1:108–9), na ɔhyɛɛ n’abrabɔ nyina mu ahwehwɛdze ase dɛ ɔbɛkyekyer Zion. Erekenkan Moses 7 botum enkenyan wo ma akɔ do abɔ dɛm mbɔdzembɔ no ndɛ.
Ibotum dze nsɛmbisa “Zion nye ebɛnadze?” na “Osi dɛn yɛ soronko fi wiadze nkaa no ho?” ahyɛ ase ayɛ nhwehwɛmu. Hwɛ dɛ ebɛkyerɛw nyiano a ɔba wo hɔ no nkorkor ber a isũa Moses 7, tsitsir ara wɔ nyiyimu 16–21, 27, 53, 62–69 mu.
Wo nyiano ma nsɛmbisa yinom no botum ada no edzi pefee dɛ yɛda ho wɔ edwuma pii yɛ dze akyekyer Zion. Ntsi yesi dɛn yɛ? Obotum aboa dɛ ebɔdwendwen mber bi a etsee nkã dɛ enye obi enya “akoma kor na adwen kor” ho (Moses 7:18). Bia nna ɔwɔ ward bi, ebusua, anaa kuw bi mu wɔ edwuma mu anaa skuul. Ebɛnadze na nkorɔfo yɛe dze nyaa tsenenee koryɛ?
Mboa bi so nye yi a ibotum ahwɛ mu dze enya adwekyerɛ horow na nkenyan. Yi kor anaa mboree na sũa, na nkyii kyerɛw dza inya ho nkenyan dɛ yɛ fa kyekyer Zion no to hɔ:
-
Philippifo 2:1-4; 4 Nephi 1:15-18; Nkyerɛkyerɛ na Ahyɛmudzi 97:21; 105:5.
-
Ulisses Soares, “Brothers and Sisters in Christ,” Liahona, Ɔberɛfɛw 2023, 70–73.
-
D. Todd Christofferson, “One in Christ,” Liahona, Esusow Aketseaba 2023, 77-80.
Nyankopɔn pɛ dɛ No nkorɔfo nya “akoma kor na adwen kor” (Moses 7:18).
Jesus Christ nye “Zion ne Hen.”
Ibenya Jesus Christ dɛ wo Hen n’asekyerɛ nye dɛn? Hyɛ Jesus Christ n’edzin horow a ɔwɔ nyiyimu yi mu no nsew. Ebɛnadze na wɔkyerɛkyerɛ wo fa No ho? Edwendwen ho dɛ “nyia ɔfa abow no mu na odua [No] do [fow] no” n’asekyerɛ nye dɛn?
Hwɛ “Come, O Thou King of Kings,” Asɔr Ndwom, nkanee 59 so.
Nyankopɔn sũ—na odzi ehurusi—ma Ne mba.
Nkorɔfo binom hu Nyankopɔn dɛ obi a ɔwɔ ekyirekyir a ɔnntse dza osi hɛn do no nka. Enoch hun Nyankopɔn wɔ kwan soronko mu wɔ enyido-adzehu a wɔkyerɛɛw no wɔ Moses 7 mu no. Ebɛnadze na osũae faa Nyankopɔn ho—na ebɛnadze na isũa—wɔ nyiyimu 28–40 mu? Edwendwen ho a ebɛnadze ntsi na ɔyɛɛ Enoch ahobow dɛ ohun Nyankopɔn a Orusũ? Ebɛnadze ntsi na ohia ma wo dɛ ibohu dɛ Osũ?
Ber a nna enyido-adzehu rokɔ do no, Enoch so sũi. Naaso Nyankopɔn so nye no kyɛɛ siantsir a ɔsɛ dɛ odzi ehurusi. Hwehwɛ no wɔ Moses 7:41–69 mu. Ebɛnadze na isũa fi Enoch n’enyido-adzehu mu a obotum aboa wo ma ama “w’akoma do , na [e]dzi dɛw,” mpo “awerɛhowdzi” a ɔwɔ w’abrabɔ mu nyina ekyir (nyiyimu 44)?
Hwɛ Jeffrey R. Holland, “The Grandeur of God,” Liahona, Ɔberɛfɛw 2003, 70-73 so.
Jesus Christ bɛsan aba bio wɔ nda a odzi ekyir no mu.
Enoch n’enyido-adzehu, tsitsir ara dza wɔakyerɛw no wɔ Moses 7:59–67 mu no, yɛ abakɔsɛm no nkɔnhyɛsɛm a odzi kan mu kor a ɔfa Agyenkwa ne Mbae a Otsĩa Ebien no ho. Ebɛnadze na okenyan wo fa kwan a nyiyimu yinom kã nda a odzi ekyir no ho asɛm? Mfatoho, susu mbrɛ isi nya atsenka dɛ nkɔnhyɛsɛm horow no a ofi nyiyimu 62 mu no rehyɛ mã. Ebɛnadze na nsɛnsin yinom kyerɛkyerɛ wo fa Nyankopɔn n’edwuma ho wɔ nda a odzi ekyir no mu?
Hwɛ Henry B. Eyring, “Sisters in Zion,” Liahona,’’ Ɔberɛfɛw 2020, 67–69 so.
Epɛ bi akã ho a, hwɛ bosoom yi Liahona na For the Strength of Youth [Ma Mbabun Enya Ahoɔdzen] dawurbɔ nkrataa mu.
Adwenkyerɛ horow ma Erekyerɛkyerɛ Mbofra
Nyankopɔn pɛ dɛ yenya “akoma kor na adwen kor.”
-
Ama aaboa wo mbofra ma woesũa Enoch na Zion ho asɛm no, ibotum dze, “Enoch the Prophet” wɔ Old Testament Stories mu (19–21) edzi dwuma anaa “Follow the Prophet” ne nyiyimu a otsĩa ebien no (Children’s Songbook, 110–11). Nkyii ibotum aserɛ wo mbofra no ma wɔaboa wo ma asan akã asɛm no bio a wɔdze hɔnara hɔn nsɛmfua. Enoch no mfonyin a ɔwɔ nhyehyɛɛ yi mu no botum aboa.
-
Kwan kor nye yi a edze bɔboa wo mbofra ma wɔatse wobenya “akoma kor na adwen kor” n’asekyerɛ ase (Moses 7:18): Yɛ krataa akoma na twitwa mu esinesin, ɔdɔɔ sõ yie ma abofra biara benya kor. Ma wɔnkyerɛw hɔn dzin wɔ hɔn sin no do na wɔmbɔ mu nyɛ edwuma mfa nhyehyɛ akoma no mbɔ mu. Ber a wɔyɛ no, ibotum akasa afa ndzɛmba a epɛ wɔ abofra kor biara ho.
-
Boa wo mbofra no ma wɔnkan mpɛn dodow a kasafua “Zion” pue wɔ Moses 7:18–21, 62–63, 68–69 mu. Mber biara a wobohu kasafua no, boa hɔn ma wɔnhwehwɛ dza nyiyimu no kã fa Zion ho (hwɛ Kyerɛwsɛm no Kwankyerɛ, “Zion,” Asɛmpa Nwoma Korabea so). Yebesi dɛn botum abɛyɛ tse dɛ nkorɔfo a wɔakã hɔnho asɛm wɔ nyiyimu yinom mu yie?
Hyɛ ankorkor kyerɛwsɛm adzesũa ho nkuran. Sɛ erekyerɛkyerɛ w’ebusua wɔ fie anaa wɔ adzesũa bea Kwesida, kwan a oye papaapa mu kor a ibotum aboa binom ma woenya gyedzi a otsim daapem wɔ Jesus Christ mu nye ebɔboa hɔn ma wɔakyekyer su no dɛ wobenya ankorankor sũahu wɔ kyerɛwsɛm no mu. Kyɛ sũahu horow a irinya wɔ kyerɛwsɛm no mu, na hyɛ w’ebusua anaa adzesũafo nkuran ma wɔnkyɛ hɔn sũahu horow. Sɛ yɛtse mbrɛ kyerɛwsɛm akenkan no esi rihyira binom a, yɛtaa nya nkenyan dɛ yɛnhwehwɛ nhyira kor ara yinom mfi Ewuradze hɔ. (Hwɛ Teaching in the Savior’s Way, 25.)
Ɔsor Egya pɛ dɛ mesan mu yi dɛ mebɛka No do.
-
Ibobue Moses 7:32-33 enyi ama wo mbofra no, ibotum nye hɔn akã nsanmuyi bi a wɔyɛe nnkyɛree ho asɛm. Nkyii hom botum abɔ mu akenkan nyiyimu no dze ahwehwɛ ehu dza Ɔsor Egya pɛ dɛ yɛsan mu yi. Ebɛn nsanmuyi horow na yebotum ayɛ dze akyerɛ dɛ yɛsan mu yi No? Bia wo mbofra no botum edzi nsesa ayɛ nsanmuyi horow yinom mu kor ho ɔyɛkyerɛ ber a nkaafo no susu ndzeyɛe a ɔdze gyina hɔ ma no.
Jesus bɛsan aba asaase do.
-
Moses 7:59 mu no, Enoch bisa Ewuradze asɛmbisa. To nsa frɛ wo mbofra ma wɔnhwehwɛ, na nkyii bisa hɔn ma wɔnhwehwɛ nyiano no wɔ nyiyimu 60 mu. Ibotum asan so nye hɔn akã mber bi a nna hɔn enyi da kwan dɛ obi bɛsan aba fie ho asɛm. Bisa hɔn atsenka a wonyae na dza wɔyɛe dze yɛɛ krado. Yebesi dɛn botum ayɛ krado ama Jesus asan aba?
-
Susu dɛ edze mber a Agyenkwa no puee nkorɔfo do ho mfonyin ahorow bɛkyerɛ (tse dɛ Gospel Art Book, nkanee, 60, 82, 83, na 84). Ebɛnadze na nkorɔfo no reyɛ wɔ mfonyin no mu? Mber a nkorɔfo no hyiaa Jesus no ebɛn atsenka na bia wobenya? Hom botum so atow Agyenkwa ne Mbae a Otsĩa Ebien ho ndwom, tse dɛ “When He Comes Again” (Children’s Songbook, 82–83), na ebisa mbofra no dɛ wɔdwendwen ho mbrɛ obesi bɛyɛ sɛ Jesus ba bio a. Ma wo mbofra no nkyɛ atsenka a wonya dɛ wobohu Jesus sɛ Ɔba bio a.
Epɛ bi akã ho a, hwɛ bosoom yi Friend dawurbɔ krataa mu.