“Bogilem ninga i par ko Tafiney Roem: Fare Mʼag,” Moey, Ngam Lakeg—Fan ko Tabinaew nge Galasia: Bin Kakrom e M’ag 2026 (2026)
“Fare Mʼag,” Moey, Ngam Lakeg: 2026
Bogilem ninga i par ko Tafiney Roem
Fare Mʼag
Ufithik e Bin Kakrom e M’ag, bay’um be’eg fare bugithin ni M’ag. Dabo’ e gadadbe lemnag ni tha’ eba michmich nib thothup ngak Got, machene langgin e bin kakrom fayleng, tha’ erkub ga’fan urogon e gechgech ko girdii’ niyadbe tay ngorad. Fan ko ayuw nge par rorad, girdii’ eb t’uf ningar pagan’uy rad n gorad, ere tha’ e barogon niybe ngomngliy ere pagan’ nem.
Ere napon ninon Got ngak Enoch, Moses, nge boech u marnge’gen epi tha’, be pining rad ningar ngongliyed reb tha’ Ngak. Gadad beyoeg ere tha’ney nibin nib be’ech mab manemus e tha’ fa fare tha’ ku Abraham—nibe yipfan batha’ ni ngongliy Got u thilrow Abraham nge Sarah nge fare be’echnag nikarted u thilrad Isak nge Jacob (nikiyma yoeg ni Israel). Langgin e Bin Kakrom e M’ag, e yimnang nikemus ni “fare m’ag.” Bay muguy ni Bin Kakrom e M’ag e yaten bugi girdii’ niyadbe guyrad niyad e farad ere tha’ney—fapi girdii’ mikar fal’eged fare tha’.
Fare tha’ ku Abraham erib ga’fan e dabo’, kopi Gidii’en Got ko tin Tomur e Rran. Mang fan? Nibchan e gadad e kuboech fapi girdii’ mikad ngongliyed fare m’ag, nidemutrug ko gidad e girdii’ rok Abraham, Isak, Jacob faday. Irerayfan, nirib ga’fan ningan nangfan komang ere tha’ ku Abraham ney nge urogon nibfel’ ngodad e dabo’.
Mange Tha’ ko M’ag ku Abraham?
Abraham e ba adag “ninge mangbe’ nima lek e tin nibfel’” (Abraham 1:2), ere pining Got ngar ngongliyew batha’. Abraham e gathi ir e som’on nike finey e ren’ey, magathi ir e som’on nikefek rebe tha’. Ere, aram rogon, ba m’ag nib manemus. Abraham e i athpeg “fapi taw’ath ko chitamngiy” (Abraham 1:2)—bataw’ath nnipi’ u daken fare tha’ ngak Adam nge Eva nge girdii’ nriyadbe athpeg epi taw’ath ney.
M’ag rok got ngak Abraham e micheg bugi taw’ath riy nibfel’: bayi fanay bangi binaew, bayi yi’or pifak, rayog fapi m’ag ngak ulan gelngin nge mat’won Got, ngab ngochol nibayi ta’fan bugi yanger nibe yib. Machene re tha’ney e gathi kemus nir taw’ath ninge yib ku Abraham nge tabinaew rok machene kub taw’ath nibay rapi’ed kotin kabay pifak Got. “Bay mang bataw’ath,” nike yoeg Got, mu fithikem e gubin e tabinaew u fayleng e bayra taw’athgad” (Genesis 12:2–3).
Re tha’ney epi’ ku Abraham, Sarah, nge girdii’ rorow mot’owrad u fithik pifak Got? Kemus u napon nira taw’ath nag be’. Fare tabinaew ku Abraham e “roegned e gam’ing nge gelngin nge mat’won ko gubin e nam,” fek i yan “fare taw’ath ko fare Gospel, ni fare taw’ath ko yafos, ni yafos nib manemus” (Abraham 2:9, 11). Niyad e girdii’ rok Got e dar yipfan niyad mangil ngak boech e girdii’; be yipfan nibay bamurwel rorad ningar ayweged boech e girdii’ ngar mangil gad.
Re tha’ney e fare taw’ath ni i finey Abraham. Tomuren nifek, meyoeg Abnraham u gum’ircha’en, “Ta pigpig roem e ribe gayem; chiney e Kugpir’egem” (Abraham 2:12).
Bukun mir’ay e duw nike yan, machene re tha’ney ekan sulweg u lane rran rodad. Mabay e chiney u lane yafos ko girdii’ rok Got. Re tha’ney nikan sulweg e ribe papay ulane tin tomur e rran nibe mon’og e murwel rok Got, nabe tawathnag e pi tabinaew u daken e fayleng. Marabay be’, niwoed Abraham, niba adag ninge mangbe’ nima lek e tin nibfel’—demutrug ko mini’ nibe gay Samoel—e rayog ninge unngay.
Mange Be yipfan Ngog fare Tha’ ko M’ag ku Abraham?
I Gur e bitir ko fare tha’. Gabe ngongliy e tha ngak Got u napon nikan tawfe nigem nge napon nibay mukay fare sakrament. Magfek fare tha’ nib piloe’ nib mu’un fare m’ag nib thothup ko temple ngay.
Ufithik epi tha’ nge m’ag ney, kad manged girdii’en Got. Kanm’agdad ngak “ngab m’ag nib manemus.” “Napon nigdadra ngongliy e m’ag ngak Got,” President Russell M. Nelson e yoeg, “kad chuwgad ko rogon e par ko fayleng nib manemus. Got e dariy bi’id mara digey e pi’n nike dugliy ninge laek me fol rok’. Riyul’, gubin e pi’en ni kar ngongliyed e m’ag ngak Got e bay ba t’ufeg nga ba murunguy nrayag ni ngar thapaged. Bachan e m’ag rodad ngak Got, dariy bi’id nira tal i ayuwegdad, ma dariy bi’id nira magaf fa chuwaen’ i pi’ e murunguy rok’ ngodad.” Bay muguy e ren’ey u marnge’gen girdii’en Got u lane Bin Kakrom e M’ag, mabay muguy u lane yafos roem nigur rebe bitir Rok nikam ngongliy fare tha’.
Dab Murus, ke yib rok Dan Wilson
Re manang ney nirib ga’fan e nipi’ ngodad nibchan fare tha’ ko Abraham nikan sulweg u daken fare profet Joseph Smith. Ere baymu be’eg marnge’gen e tha’ ulane Bin Kakrom e M’ag, dabmu tafneynag nikemus marnge’gen e tha’ rok got ngak Abraham, Isak, nge Jacob. Mu Lemnag fare tha’ Rok ngom. Napon nibaymu be’eg marnge’gen fare michmich ni pifak Abraham e bayi yo’or dabmu lemnag nikemus fapi millions e dabo’ niyadbe yoeg ni Abraham e chitmangrad. Mu Lemnag fare michmich ni micheg Got ngom ko tabinaew nib manemus nge tin nib manemus ban’en. Napon nibaymu be’eg marnge’gen fare michmich ko fargi binaew, dabmu lemnag nikemus mange’gen fargi binaew nmikan micheg ku Abraham. Kum lemnag marnge’gen e tagil’ e fayleng nib celestial—nikan micheg ko pi’en niyad ba “sobtan’” niyad ma “soennag Samoel” (Matthew 5:5; Psalm 37:9, 11). Ma napon nibaymu be’eg marnge’gen fare michmich nipi girdii’en Got ebayra taw’ath niged “gubin e tabinaew u fayleng” (Abraham 2:11), gathi kemus ni yigo machib ku Abraham fa fapi profet ni yibu tomuren. Mu Lemnag marnge’gen en’en nirayog ningam rin’—nigur rebe tamu’un ngak Yesus Kristus—ningam rebe taw’ath kopi tabinaew u chirem.