Chiv Keeb 3–4; Mauxes 4–5

Muaj tseeb tias qhov uas Adas thiab Evas xaiv ua tau coj ntau qhov kev cov nyom uas peb ntsib hauv lub neej no los rau peb txhua tus. Txawm yog li ntawd los peb tsis khuv xim qhov uas nkawd xaiv ua. Thaum koj nyeem Chiv Keeb 3 thiab Mauxes 4, tej zaum koj yuav nug koj tus kheej, yog vim li cas txoj Kev Poob thiaj tseem ceeb rau Vajtswv txoj hau kev?

Raws li Mauxes 5:9–12, Adas thiab Evas xav li cas txog txoj Kev Poob? Koj yuav piv tau nkawd tej lus rau tej yam uas tau muaj los rau koj hauv lub ntiaj teb poob no? Koj kawm dab tsi ntxiv los ntawm 2 Nifais 2:19–25?

Kuj saib Mauxiyas 3:19; Amas 12:21–37; thiab Lus Qhuab Qhia thiab Kev Khi Lus 29:39–43.

Adas thiab Evas zaj dab neeg yog ib zaj uas qhia txog kev cia siab thiab kev txhiv dim dhau ntawm Yexus Khetos. Kom saib yog vim li cas, tej zaum koj mam li pib nrhiav txog tej yam uas muaj los vim yog txoj Kev Poob hauv Chiv Keeb 3:1–7; Mauxes 4:22–31 thiab khij los sis txheeb xyuas tej yam uas koj nrhiav tau. Tej yam uas muaj los no raug rau koj li cas? Ces koj nrhiav tau hauv Mauxes 5:4–15, es nrhiav saib Vajtswv txoj hau kev ua li cas pab txhiv peb dim ntawm tej yam uas muaj los no. Yog vim li cas Adas thiab Evas “zoo siab” tom qab tus tim tswv tuaj xyuas nkawd? Koj kawm dab tsi los ntawm nkawd txog Leej Txiv Saum Ntuj Ceeb Tsheej txoj hau kev?

Kuj saib “Because of Him” (vidi-aus), Txoj Moo Zoo cov Ntawv.

2:44

Qee zaum nqe vaj lug kub yog to taub yuam kev hais tias ib tug txiv tsev muaj cai ua nyaum nrog rau nws tus poj niam. Niaj hnub nim no, tus Tswv cov yaj saub tau qhia hais tias ib khub niam txiv, tus txiv thiab tus poj niam, nyias yuav tsum saib nyias ua kom sib npaug zog ua nkawd tej hauj lwm los saum ntuj los hauv tsev neeg (saib “Tsev Neeg: Ib Zaj Lus Tshaj Tawm rau lub Ntiaj Teb” [Txoj Moo Zoo cov Ntawv]). Txwj Laug Dale G. Renlund thiab Muam Ruth Lybbert Renlund piav hais tias ib tug txiv ncaj ncees “yuav rau siab ua hauj lwm pab, nws yuav lees txim txhaum thiab thov kom tau kev zam txim; nws yuav hais cov lus qhuas nws tsev neeg; nws yuav txawj xav txog tej yam uas nws tsev neeg nyiam; nws yuav ris lub nra ntawm qhov uas yuav tsum npaj ‘tej yam uas xav tau hauv lub neej no thiab kev pov hwm’ rau nws tsev neeg; nws yuav saib nws tus poj niam rau nqi thiab hwm nws. … Nws yuav foom koob hmoov rau nws tsev neeg” (The Melchizedek Priesthood: Understanding the Doctrine, Living the Principles [2018], 23).

Txwj Laug Dale G. Renlund qhia hais tias, “Peb Leej Txiv Saum Ntuj Ceeb Tsheej lub hom phiaj tsis yog kom Nws cov me nyuam ua qhov yog; Nws lub hom phiaj yog kom Nws cov me nyuam xaiv tej yam uas yog thiab thaum kawg hloov los ua neeg zoo li Nws” (“Nej Cia Li Xaiv Hnub No,” Liyahaunas, Kaum Ib Hlis Ntuj 2018, 104). Yog vim li cas thiaj tseem ceeb rau Leej Txiv Saum Ntuj Ceeb Tsheej txoj hau kev uas peb xaiv ua qhov yog?

Thaum koj nyeem Mauxes 4:1–4, nrhiav saib Leej Txiv Saum Ntuj Ceeb Tsheej thiab Yexus Khetos ua li cas kom thiaj pov hwm koj txoj cai xaiv—koj txoj kev ywj siab. Koj yuav ua li cas kom txais tau nkawd lub hwj chim? Yog xav tau tswv yim, xav saib puas kawm tshooj hu ua “Xaiv raws li kev tshoov siab” hauv Ntxiv Dag Zog rau cov Tub Hluas Ntxhais Hluas: Phau Ntawv Coj Kev Pab Neeg Xaiv (4–5).

Xav saib puas nyeem qhov uas Lihais qhia txog kev ywj siab xaiv hauv 2 Nifais 2:11–20, 25–30. Yog vim li cas yuav tsum muaj kev cov nyom kom thiaj muaj kev ywj siab xaiv? Koj yuav ua li cas ris Yexus Khetos txiaj vim nws ua rau koj muaj “kev ywj siab xaiv”? (2 Nifais 2:27).

Kuj saib Dallin H. Oaks, “Txhua Txhia Yam Muaj Qhov Fab Ntxeev,” Liyahaunas, Tsib Hlis Ntuj 2016, 114–17; Tej lub Ntsiab Lus thiab tej Lus Nug, “Kev Ywj Siab Xaiv,” Txoj Moo Zoo cov Ntawv; “Xaiv Qhov Yog,” Cov Nkauj Qhuas Vajtswv, zaj 110.

Thaum koj nyeem Mauxes 4:4–12; 5:13–33, xav saib puas txheeb xyuas tej yam Dab Ntxwg Nyoog ua kom thiaj haub ntxias Adas thiab Evas thiab nkawd cov me nyuam. Nws ua li cas ua tej yam zoo li ntawd niaj hnub nim no thiab? Leej Txiv Saum Ntuj Ceeb Tsheej ua li cas pab koj tiv tau Dab Ntxwg Nyoog tej kev haub ntxias?

Tom qab nkawd noj lub txiv uas txwv tsis pub noj, Adas thiab Evas sim npog qhov uas nkawd liab qab. Tom qab no, tus Tswv hais tias nws yuav muab tsoos tsho rau nkawd hnav. Thaum koj nyeem Mauxes 4:13–16, 27, xav txog qhov nram qab no:

• Xav saib qhov liab qab thiab qhov uas hnav tsoos tsho yuav txhais li cas hauv cov vaj lug kub (saib, ua piv txwv, Tshwm Sim 7:9, 13–15; 2 Nifais 9:14; Lus Qhuab Qhia thiab Kev Khi Lus 109:22–26, 76). Koj kawm dab tsi los ntawm qhov uas muaj los rau Adas thiab Evas hais txog kev ua liab qab thiab kev hnav tsoos tsho?

• Yog tias koj tau txais lub vaj txiaj ntsim hauv lub tuam tsev lawm, xav saib Adas thiab Evas yuav hais li cas rau koj hais txog qhov uas koj cev tsoos tsho tuam tsev tseem ceeb npaum li cas thiab cev ntawd txhais li cas.

Kuj saib “Sacred Temple Clothing” (vidi-aus), Txoj Moo Zoo cov Ntawv.

4:12

Thaum koj kawm Mauxes 5:4–9, 16–26, xav txog Adas thiab Evas thiab nkawd ob tug tub Cain thiab Abel tus xeeb ceem rau txoj kev txi zoo li cas. Yog vim li cas tus Tswv thiaj txais Abel txoj kev txi tiam sis tsis txais Cain li?

Tus Tswv hais kom koj ua tej kev txi zoo li cas? Puas muaj dab tsi hauv tej nqe vaj lug kub no uas hloov koj txoj kev xav txog tej kev txi ntawd?

• Kom pab koj cov me nyuam to taub txog Adas thiab Evas txoj Kev Poob zoo dua, koj luam tau cov duab los ntawm “Adas thiab Evas” (hauv Cov Dab Neeg hauv Phau Qub, 13–16) thiab txiav tawm. Ces nej yuav xav ua hauj lwm ua ke kom muab cov duab sib dhos raws li qhov yog thaum nej sib tham txog tej yam uas muaj los rau Adas thiab Evas. Thaum nej sib tham, hais txog qhov uas tseem ceeb, rau Leej Txiv Saum Ntuj Ceeb Tsheej txoj hau kev, uas Adas thiab Evas ncaim tawm ntawm lub Vaj Edees mus.

• Koj cov me nyuam ris Vajtswv txiaj tau vim yog Yexus Khetos txoj Kev Theej Txhoj thaum lawv to taub saib Nws kov yeej tej yam muaj los vim yog txoj Kev Poob li cas. Thaum nej nyeem Mauxes 4:25; 6:48; Loos 5:12; 2 Nifais 2:22–23 ua ke, pab koj cov me nyuam nrhiav kev hais qhov kawg ntawm txoj kab lus no: “Vim yog txoj Kev Poob, kuv …” Ces, thaum nej nyeem ua ke Mauxes 5:8–11, 14–15; 6:59; Amas 11:42, lawv hais qhov kawg ntawm txoj kab lus no los tau thiab: “Vim yog Yexus Khetos, kuv …” Ib leeg qhia ib leeg nws txoj kev ris Yexus Khetos txiaj.

• Xav saib puas muab dab tsi rau cov me nyuam ua kom thiaj qhia txog txoj kev ywj siab xaiv: caw koj cov me nyuam los kos xim rau phab ntawv ntxim ua rau lub lim tiam no, tiam sis tsuas muab ib qho xim rau lawv siv xwb. Yog vim li cas thiaj zoo dua uas peb muaj ob peb yam uas peb xaiv tau? Ces nej yuav nyeem tau ua ke Mauxes 4:1–4 thiab sib tham txog yog vim li cas Vajtswv xav kom peb muaj lub cib fim xaiv qhov yog los sis qhov tsis yog. Leej Txiv Saum Ntuj Ceeb Tsheej thiab Yexus Khetos ua li cas pab peb xaiv qhov yog?

• Pab koj cov me nyuam xav txog thiab kos duab txog tej kev xaiv zoo uas qhia tias lawv ua raws li Yexus Khetos hais. Los sis nej hu tau ib zaj nkauj ua ke hais txog txoj kev xaiv qhov yog, xws li “Choose the Right Way” (Children’s Songbook, 160–61). Tej zaum nej ib leeg qhia ib leeg txog ib lub sij hawm thaum nej xaiv ib qho zoo thiab saib nej xav li cas tom qab ntawd.

• Thaum Adas thiab Evas yuav tsum ncaim tawm ntawm lub Vaj Edees mus, nkawd nrog Leej Txiv Saum Ntuj Ceeb Tsheej nyob ua ke tsis tau ntxiv. Nyeem Mauxes 5:4, 8 nrog koj cov me nyuam, thiab pab lawv nrhiav saib Adas thiab Evas tau ua li cas kom thiaj nyob ze Vajtswv thiab hnov tau Vajtswv cov lus. Muaj dab tsi uas peb hais tau rau Leej Txiv Saum Ntuj Ceeb Tsheej thaum peb thov Vajtswv?