Mauxes 1; Anplaham 3

“Yog tus Tswv xav hais lus ncaj qha rau nej,” Thawj Tswj Hwm Russell M. Nelson qhia, “qhov xub thawj uas Nws yuav xav kom nej paub tias nej yog leej twg tiag tiag” (“Choices for Eternity” [kev hawm Vajtswv uas tshaj tawm rau cov neeg hluas thoob ntiaj teb, Tsib Hlis Ntuj 2022], Txoj Moo Zoo cov Ntawv). Yog vim li ntawd Dab Ntxwg Nyoog yuav sim ua rau koj ntxhov siab txog qhov ntawd. Nrhiav kom tau tus qauv no hauv Vajtswv txoj lus rau Mauxes hauv Mauxes 1:4, 6 thiab hauv Dab Ntxwg Nyoog cov lus hauv Mauxes 1:12. Koj kawm dab tsi los ntawm tej nqe no txog saib Vajtswv thiab Dab Ntxwg Nyoog sib txawv li cas?

Thawj Tswj Hwm Nelson kuj qhia hais tias, “Nej txoj kev xav txog saib nej yog leej twg tiag tiag raug rau txhua txhia yam nej txiav txim siab txog mus li” (“Choices for Eternity”). Xav saib puas txheeb xyuas rau hauv ntawv tej kev xaiv uas koj xaiv tau vim qhov uas koj yog Vajtswv ib tug me nyuam tseem ceeb dua lwm yam hauj lwm uas koj muaj.

Muaj lwm cov lus los sis nqe hauv Mauxes 1 pab koj to tau saib koj muaj nqi los saum ntuj los npaum li cas? Tej zaum koj yuav xav nyeem ntxiv hauv Thawj Tswj Hwm Nelson zaj lus “Choices for Eternity” hauv toom hu ua “First: Know the truth about who you are.” Puas muaj kev tshoov siab li cas kom saib qhov uas koj yog Vajtswv ib tug me nyuam ua koj txoj hauj lwm tseem ceeb tshaj plaws?

Kuj saib “Kuv Yog Vajtswv Me Nyuam,” Cov Nkauj Qhuas Vajtswv (1985), zaj 142; “Our True Identity” (vidi-aus), Txoj Moo Zoo cov Ntawv; Tej Ntsiab Lus thiab tej Lus Nug, “Vajtswv cov Me Nyuam,” Txoj Moo Zoo cov Ntawv.

3:39

Ib yam li qhia meej meej hauv Mauxes 1, tej yam muaj hwj chim ntawm sab ntsuj plig tsis txhais tau hais tias peb yeej yuav tsis raug haub ntxias ntxiv li. Muaj tseeb tiag, Dab Ntxwg Nyoog ib lub tswv yim yog ntxias peb kom xoom xaim tias tej yam muaj los rau peb ntawm sab ntsuj plig tsis muaj tseeb li. Thaum koj nyeem Mauxes lo lus teb Dab Ntxwg Nyoog hauv tej nqe 12–26, koj kawm dab tsi uas yuav pab koj coj ruaj nrees rau zaj lus tim khawv uas koj twb tau txais lawm? Muaj dab tsi uas thaum kawg pab Mauxes kov yeej Dab Ntxwg Nyoog?

Muaj dua ib txoj lus qhia los ntawm qhov uas muaj los rau Mauxes yog Dab Ntxwg Nyoog ntxias peb siv tej qhov tseeb cuav thiab lub hwj chim cuav ua Vajtswv li. Xav txog ob peb yam uas yog cuav tsis tseeb, xws li ib tsob ntoo cuav los sis ib tug me nyuam kas tas. Koj yuav ua li cas kom paub saib tej no cuav los sis tsis cuav? Ces xav txog tej yam cuav uas Dab Ntxwg Nyoog siv niaj hnub nim no ntxias koj. Koj kawm dab tsi los ntawm Mauxes 1:13–18 hais txog saib yuav ua li cas fim tau thiab xyeej Dab Ntxwg Nyoog tej yam cuav? Tus Tswv yuav pab tau koj li cas? (saib Mauxes 1:24–26).

Kuj saib Mathais 4:1–11; Gary E. Stevenson, “Tsis Txhob Dag Ntxias Kuv,” Liyahaunas, Kaum Ib Hlis Ntuj 2019, 93–96; “I Am a Son of God” (vidi-aus), Txoj Moo Zoo cov Ntawv.

6:31

Tom qab ua yog toog pom tag nrho tej yam uas Vajtswv tsim, Mauxes hais rau tus Tswv hais tias: “Kuv thov koj qhia kuv … saib vim li cas thiaj muaj tej no” (Mauxes 1:30). Koj txais kev tshoov siab dab tsi txog tus Tswv txoj lus teb hauv Mauxes 1:31–39? Txoj kev tsis txawj tuag thiab txoj sia nyob mus ib txhis sib txawv li cas? (saib Tej Ntsiab Lus thiab tej Lus Nug, “Txoj Sia Nyob Mus Ib Txhis,” Txoj Moo Zoo cov Ntawv). Yexus Khetos ua li cas npaj kev rau peb txais ob qho tib si? Anplaham kuj ua yog toog pom dab tsi thiab, sau tseg hauv Anplaham 3. Koj nrhiav tau dab tsi hauv tej nqe 24–26 uas yuav pab teb Mauxes lo lus thov nug ntawd?

Peb tsuas paub tsawg tsawg xwb txog peb lub neej ua ntej lub neej no. Tiam sis tej yam peb paub los ntawm Anplaham txoj kev ua yog toog pom hauv Anplaham 3:22–28. Thaum koj nyeem tej nqe vaj lug kub no, txheeb xyuas tej qhov tseeb uas koj nrhiav tau—suav tej qhov tseeb hais txog koj tus kheej thiab txog Yexus Khetos. Vim li cas tej lus tseeb no muaj nqis rau koj? Qhov no puas yuav hloov koj lub neej?

Kuj saib Tej Ntsiab Lus thiab tej Lus Nug, “Lub Neej Ua Ntej Yug Los hauv Ntiaj Teb,” Txoj Moo Zoo cov Ntawv.

• Tom qab uas nej nyeem Vajtswv txoj lus rau Mauxes ua ke hauv Mauxes 1:4, xav saib puas cia koj cov me nyuam saib lawv tus kheej hauv ib daim iav thiab qhia lawv tus kheej zoo ib yam li ntawd hais tias: “Kuv yog Vajtswv tus me nyuam.” Ces lawv hais tau ib yam nkaus li ib leeg rau ib leeg: “Koj yog Vajtswv tus me nyuam.” Tej zaum koj nrhiav tau duab txog ob peb tug neeg thiab caw koj cov me nyuam taw tes rau txhua tus thiab hais tias, “Tus no yog Vajtswv tus me nyuam.” Cia li qhia vim li cas nej zoo siab paub hais tias nej yog Vajtswv cov me nyuam. Qhov uas nej paub li no puas hloov nej txoj kev saib xyuas nej tus kheej thiab lwm tus neeg?

• Koj thiab koj cov me nyuam muab tau Vajtswv txoj lus rau Mauxes hauv Mauxes 1:4 piv rau Dab Ntxwg Nyoog txoj lus hauv nqe 12. Koj yuav ua li cas pab tau koj cov me nyuam paub txoj lus twg yog Vajtswv txoj lus thiab txoj twg yog Dab Ntxwg Nyoog li?

• Thaum koj nyeem Mauxes 1:6 nrog rau koj cov me nyuam, tej zaum koj nrog lawv tham tau txog “txoj hauj lwm” Vajtswv muaj rau Mauxes ua. Xav saib puas siv Txoj Moo Zoo Pawg Duab, tej daim 13–16, los sis Cov Dab Neeg hauv Phau Qub, phab 64–84, kom pab koj cov me nyuam pom saib Mauxes ua tiav tej hauj lwm dab tsi nrog Leej Txiv Saum Ntuj Ceeb Tsheej txoj kev pab. Vajtswv muaj hauj lwm dab tsi rau peb ua? (saib, ua piv txwv, Lus Qhuab Qhia thiab Kev Khi Lus 11:20).

• Thaum koj kawm Mauxes 1:12–26 nrog koj cov me nyuam, pab lawv nrhiav saib Mauxes tau ua li cas kom thiaj tiv tau Dab Ntxwg Nyoog (saib tej nqe 13, 15, 18, 20–22, 26). Tej zaum yuav lom zem rau lawv ua yeeb yam txog tej yam lawv ua tau kom tiv tau kev haub ntxias (xws li thov Vajtswv, khiav mus, los sis thov kev pab).

• Kev paub txog peb lub neej ua ntej yug los hauv ntiaj teb no tshoov tau koj cov me nyuam lub siab kom xaiv tej yam raws li tej qhov tseeb nyob mus ib txhis li. Kom pab lawv kawm txog lub tswv yim no, koj muab tau tej lus thiab tej kab lus rau lawv nrhiav kom tau hauv Anplaham 3:22–28, xws li “ua ntej ntuj tsim teb raug,” “tej ntsuj plig,” “tsim ib lub ntiaj teb,” thiab “sim.” Tej nqe vaj lug kub no qhia peb dab tsi txog saib yog vim li cas Leej Txiv Saum Ntuj Ceeb Tsheej xa peb los rau hauv lub ntiaj teb?

• Ib zaj nkauj xws li “I Will Follow God’s Plan” (Children’s Songbook, 164–65) pab txhawb nqa qhov uas Anplaham 3 qhia. Tej zaum koj yuav caw koj cov me nyuam kos duab uas phim cov lus hu.

• Pab koj cov me nyuam xav txog tej yam muaj los uas lawv yuav tsum xaiv saib lawv yuav ua raws li Vajtswv hais los tsis ua (saib Anplaham 3:25; kuj saib Ntxiv Dag Zog rau cov Tub Hluas Ntxhais Hluas: Phau Ntawv Coj Kev Pab Neeg Xaiv). Cia lawv xyaum xaiv qhov uas lawv yuav ua thaum muaj li hais no. Tus Cawm Seej yuav pab tau peb thaum peb xaiv yuam kev li cas?