“Tej Yam Ntxim Xav Txog: Kev Nyeem Phau Qub,” Los, Nrog Kuv Mus—Siv hauv Tsev thiab lub Koom Txoos: Phau Qub 2026 (2026)
“Kev Nyeem Phau Qub,” Los, Nrog Kuv Mus: 2026
Tej Yam Ntxim Xav Txog
Kev Nyeem Phau Qub
Thaum Nifais xav tshoov nws cov tij laug lub siab kom tso siab rau tus Tswv, nws qhia tej dab neeg txog Mauxes thiab tej lus qhia los ntawm Yaxayas. Thaum tus Thwj Tim Pov Lauj xav yaum cov Ntseeg Khetos thaum ntxov kom muaj siab ntseeg rau ntawm Vajtswv cov lus cog tseg, nws pab lawv nco qab txog txoj kev ntseeg Vajtswv ntawm Nau-as, Anplaham, Xalas, Lahaj, thiab lwm tus neeg. Thiab thaum Yexus Khetos qhia cov neeg Yudais cov thawj coj kom “kawm Vajtswv txoj lus,” piav hais tias cov vaj lug kub “hais txog kuv ntag” (Yauhas 5:39), cov vaj lug kub uas Yexus hais txog yog cov ntawv uas peb hu ua Phau Qub.
Ua lwm yam lus hais, thaum koj nyeem Phau Qub, koj nyeem cov lus uas tau tshoov, nplij, thiab yaum Vajtswv haiv neeg tej siab rau txhiab txhiab xyoos.
Tiam sis ib phau ntawv uas sau tseg puag thaum ub puas yuav pab koj kho tau koj tej teeb meem niaj hnub nim no tiag? Yog los mas, pab tau kawg! Twb yog tias koj nco qab ntsoov hais tias Phau Qub hais txog leej twg.
Ib Zaj Lus Tim Khawv txog Yexus Khetos
Txawm tias koj thiab koj tsev neeg muaj tej kev cov nyom dab tsi, Yexus Khetos yog lus teb tiag. Yog li ntawd kom thiaj nrhiav tau lus teb hauv Phau Qub, nrhiav kom tau Yexus. Yeej tsis yooj yim li. Tej zaum koj yuav tsum ua siab ntev xav tob tob thiab nrhiav kom tau kev coj qhia ntawm sab ntsuj plig. Qee zaum tej nqe vaj lug kub hais txog Nws hais meej meej, xws li hauv Yaxayas txoj lus tshaj tawm hais tias, “Vim ib tug me nyuam yuav yug los rau peb, yuav muab ib tug me tub rau peb; … thiab nws lub npe yuav raug hu ua, … tus Tub Vaj Ntxwv ntawm txoj kev Thaj Yeeb Nyab Xeeb.” (Yaxayas 9:6). Hos nyob hauv lwm nqe vaj lug kub, muaj lwm yam ua piv txwv rau tus Cawm Seej, xws li tej lub cim thiab tej yam zoo sib xws tus Cawm Seej—piv txwv hais tias, dhau ntawm tej lus hais txog txoj kev txi tsiaj txhu los sis zaj lus uas hais txog Yauxej zam txim pub rau nws cov tij laug thiab cawm lawv dim ntawm kev tshaib nqhis.
Txoj Kev Kaj ntawm lub Ntiaj Teb, los ntawm Scott Sumner
Yog tias koj nrhiav kom tau kev ntseeg tus Cawm Seej ntau dua thaum koj kawm Phau Qub, koj yeej yuav nrhiav tau. Tej zaum lub tswv yim no ua tau lub hom phiaj rau koj txoj kev kawm xyoo no. Thov kom tus Ntsuj Plig coj koj kev kom koj thiaj nrhiav tau thiab tsom tej nqe, tej dab neeg, thiab tej lus qhia qhov yav tom ntej uas yuav ua rau koj nyob ze dua Yexus Khetos.
Vajtswv Tshwj Tseg
Tsis txhob xav hais tias Phau Qub qhia ntxaws ntxaws thiab meej meej txog tib neeg ntiaj teb keeb kwm. Cov neeg uas sau tej ntaub ntawv no ua ke tsis txhob txwm tsim ib yam zoo li ntawd. Lawv lub hom phiaj loj yog kom qhia ib yam txog Vajtswv—txog Nws lub tswv yim rau Nws cov me nyuam, txog saib yuav tsum coj ua zoo li cas kom thiaj ua tau Nws cov neeg uas Nws nrog khi lus, thiab saib yuav ua li cas nrhiav tau kev txhiv dim thaum peb poob qab. Qee zaum lawv qhia txog Vajtswv dhau ntawm tej yam uas muaj los hauv lawv zaj liv xwm raws li lawv to taub, suav qhia dab neeg txog cov yaj saub. Phau Chiv Keeb yog ib qho piv txwv txog qhov uas hais no, thiab tej phau xws li Yausuas, Cov Thawj Tswj, thiab 1 thiab 2 Vaj Ntxwv zoo ib yam. Tiam sis lwm cov kws sau ntawv hauv Phau Qub tsis xav sau tej liv xwm tseg cia. Tsis li, lawv qhia Vajtswv txoj lus dhau ntawm cov paj lug thiab cov dab neeg. Phau Ntawv Nkauj thiab Phau Paj Lug phim hom ntawv vaj lug kub zoo li no. Ces muaj cov yaj saub cov lus tshwj xeeb, xws li Yaxayas thiab Malakis, uas hais Vajtswv txoj lus rau haiv neeg Ixayees yav thaum ub—thiab, dhau ntawm phau Vaj Lug Kub Npaivnpaum, tseem hais lus rau peb niaj hnub nim no thiab.
Tag nrho cov yaj saub, kws sau paj lug, thiab kws sau ntawv ua ke puas paub hais tias tib neeg thoob plaws lub ntiaj teb yuav nyeem tau lawv cov lus txhiab txhiab xyoos tom qab sau tseg? Peb tsis paub tiag. Tiam sis peb xav tsis thoob uas tau muaj li ntawd lawm tiag. Tej teb chaws nce tuaj thiab poob mus, cov nroog tawg, cov vaj ntxwv ua neej nyob thiab tuag, tiam sis Phau Qub tseem kav ntev dua lawv txhua tus, ib tiam dhau ib tiam, ib tug kws sau ntawv dhau ib tug kws sau ntawv, ib txoj kev txhais lus dhau ib txoj kev txhais lus. Ham tsis qee yam poob mus los sis hloov me ntsis, thiab txawm yog li ntawd los ntau yam tseem muaj tshwj tseg yam xav tsis thoob li.
Phau Qub Ib tug Yaj Saub, los ntawm Judith A. Mehr (qhov ntxaws ntxaws)
Nov yog ob peb lub tswv yim ntxim xav txog thaum koj nyeem Phau Qub xyoo no. Vajtswv tshwj tej ntaub ntawv qub tseg vim Nws paub koj thiab saib koj muaj kev cov nyom li cas. Nws tau npaj ib zaj lus txhawb nqa sab ntsuj plig rau koj hauv cov lus no, uas yuav cia koj nyob ze dua Nws thiab txhawb nqa koj txoj kev ntseeg rau ntawm Nws txoj hau kev thiab Nws Tib Leeg Tub. Tej zaum Nws yuav coj koj rau ib nqe vaj lug kub los sis ib qho kev tshoov siab uas yuav foom koob hmoov rau ib tug neeg uas koj paub—ib nqe vaj lug kub uas koj qhia tau rau ib tug phooj ywg, ib tug neeg txheeb tseg, los sis ib tug neeg Ntseeg. Yeej muaj ntau yam uas ua tau. Nov puas yog ib yam zoo kawg nkaus xav txog?
Nifais hais tias, “Kuv nyiam cov vaj lug kub heev” (2 Nifais 4:15). Tej zaum koj yuav xav ib yam li ntawd thaum koj nyeem ib co lus uas Nifais nyeem—qhov uas niaj hnub nim no peb hu ua Phau Qub.
Tej Ntawv Nyob hauv Phau Qub
Nyob hauv Phau Qub rau cov Ntseeg Khetos, cov ntawv yog kho kom txawv qhov uas muaj thaum xub sau ua ke ub ib phau loj. Txawm tias Phau Vaj Lug Kub Npaivnpaum Henplais muab cov ntawv faib ua peb pawg—txoj kev cai, cov yaj saub, thiab cov ntawv—cov Npaivnpaum uas cov Neeg Ntseeg Khetos siv feem coob siv muab cov ntawv faib ua plaub pawg: kev cai (Chiv Keeb–Kev Cai), keeb kwm (Yausuas–Exethaws), cov ntawv paj lug (Yauj–Xalumoos tej Nkauj), thiab cov yaj saub (Yaxayas–Malakis).
Yog vim li cas muab sib faib li no thiaj tseem ceeb? Vim thaum koj paub saib koj kawm hom phau ntawv twg koj yuav to taub zoo dua saib koj yuav tsum kawm li cas.
Ua zoo xav txog qhov no thaum koj pib nyeem “txoj kev cai,” los sis thawj tsib phau ntawv ntawm Phau Qub. Cov ntawv no, uas yeej ib txwm xav tias yog Mauxes sau, tej zaum yog coob tug kws sau ntawv thiab kws muab ntawv sau ua ke kov ib tiam dhau ib tiam. Thiab peb paub hais tias, tau ntau pua xyoo, “ntau yam uas meej thiab muaj nuj nqis heev” yog tshem tawm ntawm Phau Vaj Lug Kub Npaivnpaum (saib 1 Nifais 13:23–26). Txawm yog li ntawd, Mauxes cov ntawv tseem yog Vajtswv txoj lus, txawm tias cov ntawv no yog—ib yam li Vajtswv ib txoj hauj lwm twg uas tshwm sim dhau ntawm tib neeg—yog ib yam uas tsis zoo tag nrho vim yog tib neeg yuam kev (saib Mauxes 1:41; Tej Nqe Kev Ntseeg 1:8). Maulaunais txoj lus, hais txog Phau Ntawv Maumoos dawb ceev uas nws pab sau ua ke, yeej pab tau peb, hais tias: “Yog muaj tej qho tsis yog tej ntawd tsuas yog neeg tej kev yuam kev xwb; yog li ntawd, tsis txhob thuam tej yam uas los ntawm Vajtswv” (phab ntawv qhia npe ntawm Phau Ntawv Maumoos). Hais ua lwm yam lus, ib phau vaj lug kub tsis tas yog ib phau uas tsis muaj tib neeg sau yuam kev es txawm li cas tseem yog Vajtswv txoj lus.