Zaj Lus Piav txog Phau Qub

Ib txoj kev nrhiav kom tau kev pab ntawm sab ntsuj plig hauv Phau Qub yog nrhiav kom tau cov Mov uas Cawm Neeg Txoj Sia, Yexus Khetos (saib Yauhas 6:48). Piv txwv hais tias, koj pom tus Cawm Seej li cas hauv tej nqe nram qab no?

• Manas (Khiav Dim 16:4, 11–15; Yauhas 6:35)

• Tus me nyuam yaj uas yuav muab txi (Khiav Dim 12:3–5; Yauhas 1:29)

• Tus nab tooj (Teev Npe 21:4–10; Yauhas 3:14)

• Yaunas (Yaunas 1:4–17; Mathais 12:38–41)

Tej piv txwv no qhia dab tsi txog Yexus Khetos? Puas muaj lwm nqe vaj lug kub hauv Phau Qub hais txog Yexus Khetos uas koj twb paub txog lawm?

Hauv nws zaj lus hais “Yexus Khetos Yog cov Khoom Muaj Nqis,” Txwj Laug Dale G. Renlund yaum kom peb “nco ntsoov tsom ntsoov rau Yexus Khetos tas mus li” (Liyahaunas, Kaum Ib Hlis Ntuj 2023, 98). Xav seb koj puas nyeem nws zaj lus qhia, es nrhiav saib koj puas nrhiav tau Yexus Khetos tsis yog hauv Phau Qub xwb tiam sis kuj hauv koj lub neej thiab.

Kuj saib “Tej Cim Hom los sis tej Cim hais txog Khetos” hauv Phau Qhia txog Vaj Lug Kub, “Yexus Khetos,” Txoj Moo Zoo cov Ntawv; “Nrhiav tus Tswv Thaum Ntxov,” Me Nyuam Phau Hu Nkauj, 108.

Thawj Tswj Hwm Dallin H. Oaks qhia hais tias: “Leej Txiv tau hais tias Nws Tib Leeg Tub, Yexus Khetos, yog peb tus Cawm Seej thiab tus Txhiv Dim thiab txib peb ‘mloog Nws hais.’ Los ntawm cov lus qhia no peb kawm tias cov vaj lug kub uas ‘Vajtswv’ los sis ‘tus Tswv’ hais yuav luag tag nrho yog Yehauvas, peb tus Tswv, Yexus Khetos, cov lus.” (“Yexus Khetos tej Lus Qhia,” Liyahaunas, Tsib Hlis Ntuj 2023, 102).

14:7

Thaum cov neeg Yudais cov thawj coj twv Yexus hais txog Nws yog leej twg, Yexus hais tias, “Kuv xub nyob ua ntej Anplaham yug lawm.” Yexus cov lus no ua rau cov neeg no xav tsis thoob, thiab lawv npaj siab muab pob zeb ntaus Nws (saib Yauhas 8:58–59). Xav seb puas nyeem Khiav Dim 3:13–15; 6:3–5 kom pom saib yog vim li cas ib co neeg Yudais thiaj npau taws vim yog Yexus cov lus ntawd.

Yog vim li cas thiaj tseem ceeb rau koj paub hais tias Yexus Khetos yog Yehauvas?

Hauv ib qho ua yog toog pom, tus Tswv ua rau Nifais pom tau qhov uas phau Vaj Lug Kub Npaivnpaum tawm tuaj, thiab piav hais tias “ntau yam uas meej thiab muaj nuj nqis heev” yuav raug tshem tawm ntawm phau ntawd. Cia li xav saib puas nyeem 1 Nifais 13:21–29, 38–42, nrhiav saib tus Tswv npaj siab ua li cas kom thiaj “qhia txog tej yam meej thiab muaj nuj nqis.” Raws li 2 Nifais 3:12 hais, Phau Vaj Lug Kub Npaivnpaum thiab Phau Ntawv Maumoos ua hauj lwm ua ke li cas?

Thaum koj kawm Phau Qub xyoo no, koj kuj yuav kawm ob peb phau ntawm “lwm cov ntawv” uas Nifais ua yog toog pom. Cov ntawv no muaj:

• Phau Mauxes, ib feem ntawm Joseph Smith kev txhais Phau Vaj Lug Kub Npaivnpaum. Nws muab tej qhov tseeb thiab tej dab neeg uas tsis muaj hauv cov ntawv Chiv Keeb 1–6 txum tim rov qab los.

• Phau Ntawv Anplaham, uas yog tshwm sim los rau Joseph Smith thaum nws kuaj xyuas cov ntawv Iyiv los ntawm yav thaum ub (saib Tej Ntsiab Lus thiab tej Lus Nug, “Phau Ntawv Anplaham,” Txoj Moo Zoo cov Ntawv).

• Ob peb nqe los ntawm Joseph Smith Kev Txhais Lus, ib co kuj muaj nyob hauv cov lus cim nram qab, cov ntawv tom kawg hauv Phau Vaj Lug Kub Npaivnpaum, thiab Phau Qhia txog Vaj Lug Kub.

Nram qab no yog ob peb zaj los ntawm Phau Qub uas ua piv txwv txog tej yam uas txum tim rov qab los dhau ntawm Joseph Smith: Enauj lub nroog Xi-oos (Mauxes 7:18–19), Anplaham txoj ua yog toog pom txoj kev sib sab laj saum ntuj ceeb tsheej (Anplaham 3:22–28), thiab Mekhixedes txoj kev ua hauj lwm qhuab qhia (Joseph Smith Kev Txhais Lus, Chiv Keeb 14:25–40). Yog vim li cas tej zaj no “meej thiab muaj nqis” rau koj?

Phau Qub yog zaj dab neeg txog qhov uas Vajtswv xav kom peb ua Nws “haiv neeg uas muaj nqi” dhau ntawm txoj kev khi lus (Khiav Dim 19:5). Yog vim li ntawd, ib yam zoo ua kom thiaj npaj nyeem Phau Qub yog kawm txog tej kev khi lus—twb yog txoj kev khi lus kav mus ib txhis li uas Vajtswv muab rau cov yaj saub thaum ub xws li Anplaham, Ixaj, thiab Yakhauj, thiab lawv cov xeeb leej xeeb ntxwv. Thiab ib yam zoo ua ntxiv kom kawm txog tej kev khi lus yog kawm Thawj Tswj Hwm Russell M. Nelson’s zaj lus qhia “Kev Khi Lus uas Kav Ib Txhis” (Liyahaunas, Kaum Hli Ntuj 2022, 4–11).

Thaum koj nyeem, nug koj tus kheej hais tias: Yog vim li cas tej kev khi lus thiaj tseem ceeb rau kuv? Kuv yuav txais tau “kev hlub thiab kev hlub tshua tshwj xeeb” los ntawm Vajtswv thaum kuv ua raws li kuv tej kev khi lus nrog Nws? Thaum koj nyeem Phau Qub xyoo no, nrhiav saib tej yam Vajtswv xav qhia koj txog koj txoj kev khi lus nrog Nws.

Kuj saib Yelemis 31:31–34.

• Tej zaum cov lus thiab tej kab lis kev cai ntawm Phau Qub yuav nyuaj rau cov me nyuam tom taub, tiam sis koj yuav pab tau lawv pom tau Yexus Khetos hauv tej lub cim thiab tej dab neeg. Tej zaum koj thiab koj cov me nyuam yuav saib tau daim duab nram qab no, Tus Yaj Saub Yaxayas Qhia txog Khetos txoj Kev Yug Los. Cia koj cov me nyuam hais txog tej yam uas lawv pom hauv daim duab. Ua tib zoo taw tes rau tus me nyuam mos liab Yexus. Ces koj nrog lawv nyeem tau saib Yaxayas sau dab tsi txog tus Cawm Seej txoj kev yug los hauv Yaxayas 7:14; 9:6. Qhia koj cov me nyuam saib koj xav li cas txog qhov uas nrhiav kom tau tus Cawm Seej hauv Phau Qub xyoo no.

  

• Koj thiab koj cov me nyuam kuj nyeem tau Phau Ntawv Nkauj 23 los sis Yaxayas 53:3–9 thiab nrhiav kom tau cov lus uas ua rau yus xav txog Yexus Khetos. Cov lus no qhia peb dab tsi txog Nws lub neej thiab Nws txoj Kev Theej Txhoj?

• Tej kev khi lus yog ib lub ntsiab lus tseem ceeb heev hauv Phau Qub. Kom qhia koj cov me nyuam txog lub ntsiab lus no, tej zaum koj qhia tau lawv txog cov lus cog tseg uas lawv cog nrog rau lawv tsev neeg thiab phooj ywg thiab yog vim li cas txoj kev ua raws li tej lus cog tseg no tseem ceeb heev. Ces koj mam li tso ib daim duab txog kev cai raus dej rau sawv daws pom thiab hais txog txoj lus cog tseg, los sis txoj kev khi lus, uas peb nrog Vajtswv khi tseg thaum peb ua kev cai raus dej (saib Mauxiyas 18:10, 13). Koj kuj muab ib daim duab txog lub tuam tsev tso rau sawv daws saib tau thiab qhia saib koj xav li cas txog tej kev khi lus uas peb khi nyob haud.

• Phab ntawv ntxim ua rau lub lim tiam no yuav pab tau koj cov me nyuam zoo siab khi lus thiab ua raws li tej kev khi lus nrog Leej Txiv Saum Ntuj Ceeb Tsheej. Koj kuj hu tau ib zaj nkauj txog txoj kev khi lus thiab, xws li “When I Am Baptized” (Children’s Songbook, 103).

• Koj cov me nyuam puas paub leej twg uas muaj npe sib txawv nyob ntawm saib lawv nyob qhov twg? Tej zaum ib leej txiv leej niam los sis ib tug qhia ntawv yog hu ua lwm lub npe txawv nyob tom hauj lwm, hauv tsev, los yog nyob tom lub tsev koom txoos. Hais txog tej npe ntawd; ces nyeem Khiav Dim 6:3 ua ke thiab caw koj cov me nyuam nrhiav kom tau cov npe uas Yexus Khetos yog hu ua ntej Nws yug los (kuj saib Joseph Smith Kev Txhais hauv lub cim nram qab c).