“Ib Hlis Ntuj 12–18. ‘Thaum Chiv Keeb Vajtswv Tsim lub Ntuj thiab lub Ntiaj Teb’: Chiv Keeb 1–2; Mauxes 2–3; Anplaham 4–5,” Los, Nrog Kuv Mus—Siv hauv Tsev thiab lub Koom Txoos: Phau Qub 2026 (2026)
“Ib Hlis Ntuj 12–18. ‘Thaum Chiv Keeb Vajtswv Tsim lub Ntuj thiab lub Ntiaj Teb’,” Los, Nrog Kuv Mus: 2026
Ib Hlis Ntuj 12–18: “Thaum Chiv Keeb Vajtswv Tsim lub Ntuj thiab lub Ntiaj Teb”
Chiv Keeb 1–2; Mauxes 2–3; Anplaham 4–5
Vim tias lub ntiaj teb ib puag ncig peb zoo nkauj heev, nyuaj rau peb xav txog ib lub sij hawm thaum lub ntiaj teb “tsis tau muaj dab tsi, thiab nyob do dus” thiab “tsis tau muaj dab tsi thiab tsis muaj neeg nyob haud” (Chiv Keeb 1:2; Anplaham 4:2). Ib yam uas peb kawm tau los ntawm zaj dab neeg txog txoj Kev Tsim Ntuj Tsim Teb twb yog qhov uas Vajtswv muaj peev xwm tsim tau ib yam dab tsi zoo kawg nkaus los ntawm tej yam uas ntxhov heev. Yog peb nco qab txog qhov no ces yuav pab peb lub neej thaum ntxhov hnyo. Leej Txiv Saum Ntuj Ceeb Tsheej thiab Yexus Khetos yog ob tug uas Tsim Ntuj Tsim Teb, thiab Nkawd txoj hauj lwm nrog peb tseem tsis tau tiav. Thaum tej lub sij hawm tsaus ntuj hauv peb lub neej Nkawd ua rau txoj kev kaj ci ntsa iab. Nkawd muaj peev xwm pab peb lub neej muaj lub ntsiab. Nkawd muaj peev xwm hloov peb los ua cov neeg saum ntuj raws li Vajtswv lub hom phiaj. Muaj li no vim Vajtswv tau tsim peb kom muaj yam ntxwv zoo li Nws (saib Chiv Keeb 1:26). Peb muaj peev xwm hloov los ua neeg zoo li Nws: neeg uas tau txais kev tsa nto, muaj yeeb koob, neeg saum ntuj ceeb tsheej.
Yog xav nyeem ib zaj lus piav txog phau Chiv Keeb, saib “Chiv Keeb” nyob hauv Phau Qhia txog Vaj Lug Kub.
Tej Tswv Yim Pab Qhia hauv Tsev thiab lub Koom Txoos
Chiv Keeb 1:1–25; Mauxes 2:1–25; Anplaham 4:1–25
“Kuv tau tsim tej yam no los ntawm kuv Tib Leeg Tub.”
Txawm peb tsis paub txhua yam txog txoj kev uas tau siv kom tsim lub ntiaj teb, yog ib yam zoo kawm txog tej yam uas Vajtswv tau muab tshwm sim txog txoj Kev Tsim Ntuj Tsim Teb. Vajtswv qhia dab tsi rau koj txog qhov no nyob hauv Chiv Keeb 1:1–25; Mauxes 2:1–25; thiab Anplaham 4:1–25? Vim li cas Nws xav kom koj paub tej yam no? Thaum koj xav txog tej xwm txheej no, tej zaum koj yuav xav seb tej ntawd qhia koj dab tsi txog Leej Txiv Saum Ntuj Ceeb Tsheej, Yexus Khetos, thiab koj tus kheej.
Kom pab koj txoj kev kawm, cia li xav seb puas nyeem tej nqe no thaum koj nyob nraum zoo nrog tej yam uas Vajtswv tau tsim los sis thaum mloog ib zaj nkauj xws li “Txhua Yam Peb tus Vajtswv Tsim Muaj” (Cov Nkauj Qhuas Vajtswv, zaj 20). Tej zaum koj yuav xav nrhiav cov duab txog tej yam uas Nws tau tsim kom pab koj hwm tus uas Tsim Ntuj Tsim Teb. Xav seb koj puas muab cov duab, nrog koj tej lus tim khawv, hais rau lwm tus.
Kuj saib Lus Qhuab Qhia thiab Kev Khi Lus 101:32–34.
Lub Vaj Edees, los ntawm Grant Romney Clawson
Chiv Keeb 1:26–27; Mauxes 2:26–27; Anplaham 4:26–27
Vajtswv tau tsim kuv kom muaj Nws tus yam ntxwv.
Thaum koj nyeem Chiv Keeb 1:26–27; Mauxes 2:26–27; thiab Anplaham 4:26–27, xav seb qhov uas Vajtswv tsim txiv neej thiab poj niam kom muaj “yam ntxwv” zoo li Nws txhais li cas. Vim li cas koj yuav tsum paub tej yam tseeb hauv tej nqe no? Piv txwv hais tias, tej lus tseeb no ua li cas kom hloov koj txoj kev saib koj tus kheej, lwm tus, thiab Vajtswv? Tej ntawd pab tau koj li cas thaum koj xav tsis zoo txog koj tus kheej?
Kom pab koj xav txog tej lus nug no, teb tej kab lus li kab lus no: “Vim kuv paub tias Vajtswv tau tsim kuv kom muaj yam ntxwv zoo li Nws, kuv yuav xaiv ua …” Thaum nyeem “Koj lub cev yeej dawb ceev” nyob hauv Ntxiv Dag Zog rau cov Tub Hluas Ntxhais Hluas: Phau Ntawv Coj Kev Pab Neeg Xaiv (phab ntawv 22–29) pab tau koj. Xav seb koj yuav xaiv ua dab tsi kom qhia Vajtswv tias koj paub koj lub cev dawb ceev.
Nyob hauv qhov vidi-aus “God’s Greatest Creation” (Txoj Moo Zoo cov Ntawv), Thawj Tswj Hwm Russell M. Nelson ua tim khawv txog tib neeg lub cev uas yog ib qhov txuj ci tseem ceeb. Thaum koj saib qhov vidi-aus no, nug koj tus kheej, “Leej Txiv Saum Ntuj Ceeb Tsheej xav kom kuv xav li cas txog kuv lub cev?” Qhov no txawv li cas ntawm tej zaj lus uas tej zaum koj tau hnov los ntawm lwm tus?
God's Greatest Creation
Tej zaum ib txhia yuav hais tias qhov uas Vajtswv tsim peb kom muaj yam ntxwv zoo li Nws txhais tias Nws pom zoo rau tag nrho peb tej kev xav thiab tsis tas hloov (los sis hloov tsis taus) los ua neeg zoo dua. Koj yuav hais li cas txog qhov no? Koj kawm dab tsi los ntawm Mauxiyas 3:19 thiab Ethaws 12:27?
Kuj saib Russell M. Nelson, “Your Body: A Magnificent Gift to Cherish,” Liyahaunas, Yim Hli Ntuj 2019, 50–55.
Chiv Keeb 1:27–28; 2:18–25; Mauxes 3:18, 21–24; Anplaham 5:14–18}
Vajtswv pom zoo rau kev sib yuav ntawm ib tug txiv neej thiab ib tug poj niam.
“Adas thiab Evas tau sib yuav rau lub neej no thiab mus ib txhis li los ntawm lub hwj chim ntawm lub pov thawj hwj kav mus ib txhis” (Russell M. Nelson, “Lessons from Eve,” Ensign, Kaum Ib Hlis Ntuj. 1987, 87). Xav txog qhov no thaum koj nyeem Chiv Keeb 1:27–28; 2:18–25; Mauxes 3:18, 21–25; thiab Anplaham 5:14–19. Koj yuav ua li cas kom saib kev sib yuav dawb ceev zoo li Vajtswv saib?
Kuj saib 1 Kauleethaus 11:11; “Tsev Neeg: Ib zaj Lus Tshaj Tawm rau lub Ntiaj Teb,” Txoj Moo Zoo cov Ntawv.
Chiv Keeb 1–28; Mauxes 2–28; Anplaham 4–28
Kuv lav ris saib xyuas tej yam uas Vajtswv tsim.
Chiv Keeb 1:28; Mauxes 2:28; thiab Anplaham 4:28 qhia dab tsi txog peb txoj kev lav ris rau tej yam uas Vajtswv tau tsim? Lus Qhuab Qhia thiab Kev Khi Lus 59:16–21 thiab 104:13–18 ua rau koj to taub dab tsi ntxiv?
Kuj saib Gérald Caussé, “Peb Ntiag Tug Hauj Lwm Saib Xyuas lub Ntiaj Teb,” Liyahaunas, Kaum Ib Hlis Ntuj. 2022, 57–59; Tej Ntsiab Lus thiab tej Lus Nug, “Environmental Stewardship and Conservation,” Txoj Moo Zoo cov Ntawv.
Chiv Keeb 2:2–3; Mauxes 3:2–3; Anplaham 5:2–3
Vajtswv foom koob hmoov rau Hnub Caiv thiab ua kom hnub ntawd dawb huv.
Vajtswv tau tsim Hnub Caiv kom dawb huv, thiab Nws hais kom peb hwm Hnub Caiv ua ib hnub dawb huv thiab. Thaum koj nyeem Chiv Keeb 2:2–3; Mauxes 3:2–3; thiab Anplaham 5:2–3, xav txog seb yog vim li cas Hnub Caiv yog ib hnub uas tau “koob hmoov.”
Kuj saib Lus Qhuab Qhia thiab Kev Khi Lus 59:9–13; “The Sabbath Is a Delight” (vidi-aus), Txoj Moo Zoo cov Ntawv.
Highlight: The Sabbath Is a Delight
Yog xav tau ntxiv, saib tej phau xov xwm Liyahaunas thiab Ntxiv Dag Zog rau cov Tub Hluas Ntxhais Hluas rau lub hli no.
Tej Tswv Yim Pab Qhia cov Me Nyuam
Chiv Keeb 1:1–25; Mauxes 2:1–25; Anplaham 4:1–25
Yexus tsim lub ntiaj teb.
-
Koj yuav ua dab tsi kom pab koj cov me nyuam muaj kev lom zem thaum lawv kawm txog Kev Tsim Ntuj Tsim Teb? Tej zaum koj yuav xav coj lawv mus nrhiav tej yam uas tau tsim hauv txhua lub caij nyoog nyob nraum zoov. Tej zaum koj cov me nyuam saib tau cov duab txog tej yam uas Yexus tau tsim (saib “Kev Tsim lub Ntiaj Teb” nyob hauv Cov Dab Neeg hauv Phau Qub, 8–12). Ces tej zaum koj thiab koj cov me nyuam yuav xav sib tham txog tej yam uas nej xav txog Yexus Khetos tom qab koj nyeem txog txoj Kev Tsim Ntuj Tsim Teb
-
Xav seb puas xav hu ib zaj nkauj ua ke txog peb lub ntiaj teb uas zoo nkauj heev, xws li “My Heavenly Father Loves Me” (Children’s Songbook, 228–29). Tej zaum koj cov me nyuam yuav xav hu nkauj txog tej yam ntxiv uas Vajtswv tau tsim uas pab lawv paub txog Nws txoj kev hlub.
Pab cov me nyuam siv lawv txoj kev txawj tsim tej yam. “Thaum koj caw koj cov me nyuam tsim ib yam uas qhia txog ib lub ntsiab cai ntawm txoj moo zoo, koj yuav pab lawv to taub lub ntsiab cai zoo dua ntxiv, thiab koj kuj yuav pab lawv muaj ib yam dab tsi uas ua rau lawv nco ntsoov txog qhov uas lawv tau kawm” (Teaching in the Savior’s Way, 32).
Chiv Keeb 1:26–27; Mauxes 2:26–27; Anplaham 4:26–27
Vajtswv tau tsim kuv kom muaj raws li Nws tus yam ntxwv.
-
Thaum koj cov me nyuam kawm tias Vajtswv tau tsim peb sawv daws kom muaj raws li yam ntxwv zoo li Nws ces lawv yuav saib taus lawv thiab lwm tus lub cev. Kom pab lawv to taub tias qhov no txhais li cas, koj cia koj cov me nyuam saib lawv tus kheej hauv ib daim iav los sis saib duab thaum koj nyeem Mauxes 2:26–27 rau lawv. Tej zaum koj kuj pab lawv saib tias cov me nyuam tsiaj yeej “zoo li” lawv niam lawv txiv (piv txwv, saib daim duab nyob hauv tus txheej txheem qhia no). Tej zaum qhov no yuav ua rau nej xav sib tham seb yog vim li cas yog ib qho tseem ceeb rau koj paub tias Leej Txiv Saum Ntuj Ceeb Tsheej tau tsim nej raws li Nws tus yam ntxwv.
-
Tej zaum koj thiab koj cov me nyuam yuav muaj kev lom zem kos duab txog tib neeg lub cev thiab txiav daim duab ntawd ua ib daim duab uas muab dhos ua ke. Thaum koj cov me nyuam rov qab muab daim duab ntawd sib dhos ua ke, tej zaum lawv yuav xav sib tham txog tej yam uas lawv qhia Leej Txiv Saum Ntuj Ceeb Tsheej tias lawv zoo siab rau lawv lub cev.
Chiv Keeb 2:2–3; Mauxes 3:2–3; Anplaham 5:2–3
Hnub Caiv yog ib hnub dawb huv.
-
Thaum koj nyeem Mauxes 3:2–3, hais kom koj cov me nyuam mloog seb Vajtswv tau ua dab tsi txog hnub xya. Pab koj cov me nyuam nrhiav los sis kos duab txog tej yam uas lawv ua tau kom Hnub Caiv ua ib hnub dawb huv thiab txawv lwm hnub. Nej cia li sib tham txog qhov uas vim li cas nej xav hwm Hnub Caiv kom ua ib hnub dawb huv.
-
Pab koj cov me nyuam ua yeeb yam qhia ib tug phooj ywg vim li cas lawv xaiv ua tej yam Hnub Caiv kom hwm Leej Txiv Saum Ntuj Ceeb Tsheej thiab Yexus. Qhia kom lawv siv Chiv Keeb 2:2–3 thaum lawv qhia. Vim li cas thaum peb hwm Hnub Caiv kom dawb huv peb qhia tias peb hlub Leej Txiv Saum Ntuj Ceeb Tsheej thiab Yexus Khetos?
Yog xav tau ntxiv, saib phau xov xwm Phooj Ywg rau lub hli no.