Genese 1–2 ; Mose 2–3 ; Aberahama 4–5

Noa atu ā, ’aita tātou i ’ite i te mau mea ato’a i ni’a i te huru ’a hāmanihia ai te ao nei, e mea fa’ahiahia ’ia tāpa’o i te mea tā te Atua i mā’iti e heheu mai i ni’a i te poietera’a. E aha tā te Atua e ha’api’i nei ia ’outou i ni’a i te reira i roto te Genese 1:1–25 ; Mose 2:1–25 ; ’e Aberahama 4:1–25 ? Nō te aha ’oia e hina’aro ai ’ia ’ite ’outou i teie mau mea ? ’A feruri ai ’outou i teie mau ’ā’amu, e nehenehe ato’a ’outou e feruri e aha tā te reira e ha’api’i nei ia ’outou i ni’a i te Metua i te ao ra, ia Iesu Mesia, te ao nei ’e ia ’outou iho.

Nō te ha’amaita’i i tā ’outou mā’imi-māite-ra’a, ’a feruri i te tai’o i teie mau ’īrava i te vaira’a i rotopū i te mau hāmanira’a a te Atua, ’e ’aore rā ma te fa’aro’ora’a i te tahi hīmene mai teie « E tā te Atua rahi » (Te mau Hīmene, N 28). E nehenehe ’outou e ’ite i te mau hōho’a ’o tāna mau hāmanira’a tei tauturu ia ’outou ’ia nīoa i te fa’atura nō tei Hāmani. ’A feruri i te fa’a’ite i teie mau hōho’a, ’oia ato’a i tō ’outou ’itera’a pāpū ia vetahi ’ē.

Hi’o ato’a Te Ha’api’ira’a Tumu ’e te mau Fafaura’a 101:32–34.

’A tai’o ai ’outou te Genese 1:26–27 ; Mose 2:26–27 ; ’e te Aberahama 4:26–27, ’a feruri e aha te aura’a ’ia hāmanihia i te « hōho’a » ’e ’aore rā i « te huru » o te Atua, te tāne ’e te vahine. Nō te aha e mea faufa’a nō ’outou ’ia ’ite atu i te parau mau i roto i teie mau ’īrava ? .’Ei hi’ora’a, nāhea teie mau parau mau e fa’atupu i ni’a i tō ’outou huru hi’ora’a ia ’outou iho, ia vetahi ’ē ’e i te Atua ? Nāhea te reira e tauturu ia ’outou, ’ia vai ana’e ia ’outou te mau nino’a mana’o tano ’ore nō ni’a ia ’outou iho ?

Nō te tauturu ia ’outou ’ia feruri i teie mau uira’a, ’a tāmata i te fa’aoti i te tahi pereota mai teie te huru : « Nō te mea ’ua ’ite au ē, ’ua hāmanihia vau i te hōho’a o te Atua, e mā’iti au… » E nehenehe te hi’o-fa’ahou-ra’a « E mea mo’a tō ’outou tino » i roto Nō te pūai o te feiā ’āpī : E arata’i nō te rave i te mau mā’itira’a (mau ’api 22–29) e tauturu. ’A feruri i te mā’iti i te tahi mea tā ’outou e rave nō te fa’a’ite i te Atua ē, ’ua ’ite ’outou e mea mo’a tō ’outou tino.

I roto i te video « God’s Greatest Creation » (Gospel Library), tē fa’a’ite pāpū nei te peresideni Russell M. Nelson nō te tino ta’ata ei temeio. ’A māta’ita’i ai ’outou i teie video, ’a ui ia ’outou iho : « Nāhea te Metua i te ao ra e hina’aro iā’u ’ia nīoa i ni’a i tō’u tino ? » Nāhea te reira e ta’a ’ē ai i te mau parau poro’i ’o tā ’outou e nehenehe e fa’aro’o mai roto mai ia vetahi ’ē ?

2:48

E parau paha te tahi mau ta’ata ē, te hāmanira’ahia tātou i te hōho’a o te Atua e au ra ē, tō tātou mau mana’o ato’a, tō tātou mau nino’a mana’o ’e tō tātou mau hia’ai ’ua fa’ati’ahia e āna, ’e ’aita tātou e tītauhia (’e ’aore rā e nehenehe) e ha’amaita’i atu ā ia tātou. E aha tā ’outou e parau nō te reira ? E aha te mau mana’o tā ’outou i ’apo mai roto mai te Mosia 3:19 ’e te Etera 12:27 ?

Hi’o ato’a ia Russell M. Nelson, « Votre corps : un don magnifique à chérir, » Liahona, ’Ātete 2019, 50–55.

« ’Ua hō’ē ’o Adamu ’e ’o Eva nā roto i te fa’aipoipora’a nō te tau ’e nō te tau mure ’ore nā roto i te mana o [te] autahu’ara’a mure ’ore » (Russell M. Nelson, « Lessons from Eve », Ensign, Novema 1987, 87). ’A feruri i te reira ’a tai’o ai ’outou i te Genese 1:27–28 ; 2:18–25 ; Mose 3:18, 21–25, ’e Aberahama 5:14–19. Nāhea ’outou i te fa’ariro i te fa’aipoipora’a ma te mo’ara’a ’o tā te Atua i hōro’a mai ?

Hi’o ato’a 1 Korinetia 11:11 ; « Te ’Utuāfare : E Poro’i i tō te Ao nei, » Vaira’a buka ’evanelia.

E aha tā te Genese 1:28 ; Mose 2:28 ; ’e Aberahama 4:28 e parau nei, nō ni’a i tā tātou hōpoi’a nō te mau hāmanira’a a te Atua ? E aha tā Te Ha’api’ira’a Tumu ’e te mau Fafau 59:16–21 ’e te 104:13–18 i tu’u mai nō tō ’outou māramaramara’a ?

Hi’o ato’a ia Gérald Caussé, « Tō tātou ti’a’au i te fenua nei, » Liahona, Novema 2022, 57–59 Vaira’a buka ’evanelia ; Topics and Questions, « Environmental Stewardship and Conservation, » Gospel Library.

’Ua fa’ariro te Atua i te sābati ’ei mahana mo’a, ’e tē ani mai nei ’oia ia tātou ’ia ha’amo’a i te reira. ’A tai’o ai ’outou i te Genese 2:2–3 ; Mose 3:2–3 ; ’e Aberahama 5:2–3, ’a feruri i te mea ’ua « ha’amaita’ihia » te sābati nō ’outou.

Hi’o ato’a Te Ha’api’ira’a Tumu ’e te mau Fafaura’a 59:9–13 ; « The Sabbath Is a Delight [E mahana hina’arohia te sābati] » (video), Gospel Library.

0:50

• Nāhea ’outou e fa’ariro ai i te ha’api’ira’a i ni’a i te poietera’a ’ei fa’anahora’a ’ārearea nō tā ’outou mau tamari’i ? E nehenehe ’outou e ’āfa’i ia rātou i rāpae nō te mā’imi mai i te mau huru mea, ’o tei hāmanihia i te pu’e tau tāta’itahi o te poietera’a. E nehenehe ato’a tā ’outou mau tamari’i e hi’o i te mau hōho’a nō te mau mea tā Iesu i hāmani (hi’o « Te poietera’a o te fenua » i roto Te mau ’ā’amu o te Faufa’a Tahito, 8–12). I muri iho e nehenehe ’outou ’e tā ’outou mau tamari’i e tāu’aparau, e aha te mea i fa’atupu i roto ia ’outou nō Iesu Mesia i muri a’e i te tai’ora’a i te ’ā’amu nō te poietera’a.

• ’A feruri i te hīmene ’āmui i te tahi hīmene i ni’a i tō tātou ao ’una’una, mai te « ’Ua aroha tō’u Atua iā’u » (Buka hīmene nā te mau tamari’i,16–17). E nehenehe paha tā ’outou mau tamari’i e tu’u mai i roto i te hīmene i te tahi atu mau mea, ’o tā te Atua i hāmani nō te tauturu ia rātou ’ia nīoa i tōna aroha.

• E nehenehe tā ’outou mau tamari’i e fa’ananea i te tahi nīno’a mana’o nō te tura ’e te fa’atura nō tō rātou iho tino ’e nō tō vetahi ’ē, ’a ha’api’i ai rātou ē ’ua hāmanihia tātou pā’āto’a i te hōho’a o te Atua. Nō te tauturu ia rātou ’ia māramarama e aha te aura’a o te reira, e nehenehe ’outou e vaiiho i tā ’outou mau tamari’i ’ia hi’o i tō rātou hōho’a i roto i te tahi hi’ohipa, ’e ’aore rā i te tahi hōho’a ’a tai’o ai ’outou te Mose 2:26–27 ia rātou. E nehenehe ato’a ’outou e fa’a’ite ia rātou ē pinepine te mau fanau’a ’ānimara i te « fa’ahōho’ahia » i tō rātou nā metua (hi’o te hōho’a i roto i teie arata’i ha’api’ira’a, ’ei hi’ora’a). E nehenehe te reira e arata’i atu i te tahi ’āparaura’a, nō te aha e mea faufa’a nō ’outou ’ia ’ite ē ’ua hāmanihia ’outou i te hōho’a o tō ’outou Metua i te ao ra.

  

• E au paha ’outou ’e tā ’outou mau tamari’i e pāpa’i hōho’a i te tahi tino ta’ata ’e e tāpūpū i te mau hōho’a pāpa’i ’ei piriapu [puzzle]. ’A tu’u ’āmui ai tā ’outou mau tamari’i i tā rātou piriapu, e nehenehe rātou e paraparau i ni’a i te mau rāve’a e nehenehe ai rātou e fa’a’ite i te Metua i te ao ra ē, ’ua māuruuru rātou nō tō rātou tino.

• ’A tai’o ai ’outou te Mose 3:2–3, ’a ani i tā ’outou mau tamari’i ’ia fa’aro’o i te mea tā te Atua i rave i te hitu o te mahana. E tauturu i tā ’outou mau tamari’i ’ia noa’a ’e ’aore rā ’ia pāpa’i hōho’a i te mau mea tā rātou e nehenehe e rave i te sābati, nō te fa’ariro i te reira ’ei mahana mo’a ’e te ta’a ’ē i te tahi atu mau mahana. ’A fa’a’ite te tahi i te tahi nō te aha e mea faufa’a nō ’outou ’ia ha’amo’a i te mahana sābati.

• E tauturu i tā ’outou mau tamari’i ’ia ha’uti te ti’ara’a ta’ata ma te fa’ata’a atu i te tahi hoa, nō te aha rātou i mā’iti ai e rave i te mau ’ohipa i te sābati nō tē fa’atura i te Metua i te ao ra ’e ia Iesu. ’A ani ia rātou ’ia fa’a’ohipa te Genese 2:2–3 i roto i tā rātou mau fa’ata’ara’a. Nāhea te ha’amo’ara’a i te mahana sābati, e fa’a’itera’a i te reira i tō tātou here i te Metua i te ao ra ’e nō Iesu Mesia ?