Mose 1 ; Aberahama 3

« Ahiri te Fatu e paraparau ti’a mai nei ia ’outou, » ’ua ha’api’i te peresideni Russel M. Nelson, « te ’ohipa mātāmua tāna e ha’apāpū mai ’oia ho’i ’ia māramarama ’outou i tō ’outou ihota’ata mau » (« Te mau mā’itira’a nō te tau mure ’ore » [purera’a nā te feiā ’āpī pa’ari ’ati a’e te ao nei, Mē 2022], Vaira’a buka ’Evanelia). E ’āpe’e mai te reira ē, e tāmata Sātane i te ha’atāfifi ia ’outou i ni’a i teie ā tumu parau. ’A mā’imi i teie hōho’a i roto i te poro’i a te Atua ia Mose i roto i te Mose 1:4, 6 ’e i roto i te mau parau a Sātane i roto i te Mose 1:12. E aha tā ’outou i ’apo mai nā roto mai i teie mau ’īrava i ni’a i te mau ta’a-’ē-ra’a i rotopū i te Atua ’e ia Sātane ?

’Ua ha’api’i ato’a te peresideni Nelson, « te huru ’a feruri ai ’outou ’o vai mau ’outou e fa’ata’a fātata te mau fa’aotira’a ato’a tā ’outou e rave »(« Te mau mā’itira’a nō te tau mure ’ore »). ’A feruri i te hāmani i te tahi tāpura nō te mau mā’itira’a tā ’outou e rave, nō te mea tō ’outou ihota’ata ’ei tamari’i nā te Atua e tae mai hou te tahi atu mau pi’ira’a.

E aha te tahi atu ā mau ’īrava ’e ’aore rā mau fa’a’itera’a i roto i te Mose 1 e tauturu ia ’outou ’ia māramarama i tō ’outou faufa’a hanahana ? E nehenehe ato’a ’outou e tai’o hau atu i te a’ora’a a te peresideni Nelson i roto i te tuha’a « Te mau mā’itira’a nō te tau mure ’ore » tei pi’ihia « ’A tahi : ’Ia ’ite ’outou i te parau mau e ’o vai ’outou. » E aha tei fa’auruhia ia ’outou ’ia rave nō te fa’ariro i tō ’outou ihota’ata ’ei tamari’i nā te Atua ’ei tō ’outou ihota’ata faufa’a roa atu ?

Hi’o ato’a « E tamari’i au nā te Atua ra, » Te mau Hīmene (1985), N 185 ; « Our True Identity [Tō tātou ihota’ata mau] » (video), Gospel Library ; Topics and Questions, « Children of God », Gospel Library.

3:45

Mai tā Mose 1 e fa’a’ite pāpū nei, te mau ’itera’a pae vārua pūai e ’ere te aura’a ē e’ita roa atu tātou e fa’ahema-fa’ahou-hia. ’Oia ïa, te tahi o te mau rāvera’a a Sātane ’o te ha’atūrorira’a ïa ia tātou i teie mau ’itera’a. ’A tai’o ai ’outou i te pāhonora’a a Mose ia Sātane i roto te mau ’īrava 12–26, e aha tā ’outou i ’apo mai tei nehenehe e tauturu ia ’outou ’ia ha’apa’o noa i te ’itera’a pāpū tā ’outou i fāri’i ? E aha te mea tei tauturu ia Mose ’ia ’aroti’a ia Sātane ?

Te tahi atu ha’api’ira’a nō roto mai i te ’ohipa i tupu ia Mose ’oia ho’i, e fa’ahema Sātane ia tātou ma te mau fa’ahuru-’ē-ra’a i te parau mau ’e te mana o te Atua. ’A feruri na i te tahi mau fa’ahuru-’ē-ra’a o te mau mea, mai te tahi rā’au tanu ha’avare ’e ’aore rā te tahi pēpe ha’avare. Nāhea ’outou e ’ite ai e ’ohipa ha’avare te reira ? I muri iho, ’a feruri i te mau ha’avarera’a tā Sātane e fa’a’ohipa nei i teie mahana nō te fa’ahema ia ’outou. E aha tā ’outou i ’apo mai nā roto i te Mose 1:13–18 e nāhea ’ia ’ite ’e ’ia pāto’i i tāna mau ha’avarera’a ? Nāhea te Fatu e nehenehe e tauturu ia ’outou ? (hi’o Mose 1:24–26).

Hi’o ato’a Mataio 4:1–11 ; Gary E. Stevenson, « Eiaha e ha’avare mai iā’u, » Liahona, Novema 2019, 93–96 ; « I Am a Son of God » (video), Gospel Library

6:31

I muri a’e i te fāri’ira’a i te tahi ’ōrama nō te mau poietera’a a te Atua, ’ua parau ’o Mose i te Fatu : « ’A fa’a’ite mai nā iā’u… nō te aha ho’i teie mau mea ato’a » (Mose 1:30. E aha te mea tā ’outou e fa’ahiahia nei i roto i te pāhonora’a a te Fatu i roto i te Mose 1:31–39 ? E aha te ta’a-’ē-ra’a i rotopū i te tāhuti ’ore ’e te ora mure ’ore ? (hi’o Topics and Questions, « Eternal Life, » Gospel Library). Mea nāhea ’o Iesu Mesia e tauturu mai nō te fa’atupu i teie nā mea e piti ? ’Ua fāri’i ato’a ’o Aberahama i te tahi ’ōrama, tei pāpa’ihia i roto i te Aberahama 3. E aha tā ’outou i ’ite i roto i te mau ’īrava 24–26 ’o tei nehenehe e tauturu i te pāhonora’a i te anira’a a Mose ?

Mea iti roa tō tātou ’ite i ni’a i tō tātou orara’a hou te tāhuti nei. Te rahira’a rā o te mau mea tā tātou i ’ite nō roto mai ïa i te ’ōrama a Aberahama i roto te Aberahama 3:22–28. ’A tai’o ai ’outou i teie mau ’īrava, ’a hāmani i te tahi tāpura nō te mau parau mau tei roa’a mai ia ’outou—’oia ato’a te mau parau mau i ni’a ia ’outou iho ’e i ni’a ia Iesu Mesia. Nō te aha e mea faufa’a teie mau parau mau nō ’outou ? E aha te ta’a-’ē-ra’a tā te reira e fa’atupu i roto i tō ’outou orara’a ?

Hi’o ato’a Topics and Questions, « Premortal Life, » Gospel Library.

• I muri mai i tō ’outou tai’ora’a ’āmui i te poro’i a te Atua ia Mose i roto i te Mose 1:4, ’a feruri i te vaiiho i tā ’outou mau tamari’i ’ia hi’o ia rātou iho i roto i te tahi hi’ohipa ’e e hōro’a ia rātou i te tahi poro’i mai teie te huru : « E tamari’i au nā te Atua ». I muri iho, e nehenehe rātou e hōro’a i te tahi ā poro’i te tahi i te tahi : « E tamari’i ’oe nā te Atua. » E nehenehe ato’a e roa’a ia ’outou i te mau hōho’a nō te mau ta’ata rau, ’e e ani i tā ’outou mau tamari’i ’ia fa’atoro i te manimani rima i ni’a i te hōho’a tāta’itahi ’e ’ia parau, « e tamari’i teie nā te Atua ». ’A fa’a’ite atu ia rātou nō te aha ’outou e ’oa’oa ai i te ’itera’a ē, e tamari’i ’outou nā te Atua. Nāhea teie ’itera’a e taui ai i tō ’outou huru ’a hi’o ai ia ’outou iho ’e ia vetahi ’ē ?

• E nehenehe ’outou ’e tā ’outou mau tamari’i e fa’aau i te poro’i a te Atua ia Mose i roto te Mose 1:4 ’e te parau a Sātane i roto i te ’īrava 12. Nāhea ’outou e nehenehe ai e tauturu i tā ’outou mau tamari’i, ’ia fa’ata’a maita’i i te mau poro’i a te Atua ia rātou ’e terā tā Sātane ?

• ’A tai’o ai ’outou i te Mose 1:6 ’e tā ’outou mau tamari’i, e nehenehe ’outou e paraparau ia rātou i ni’a i te « ’ohipa » tā te Atua nā Mose. ’A feruri i te fa’a’ohipa i te Buka hōho’a ’evanelia,, te mau nūmera 13–16, ’e ’aore rā Te mau ’ā’amu o te Faufa’a Tahito, te mau ’api 64–84, nō te tauturu i tā ’outou mau tamari’i ’ia hi’o e aha tā Mose i fa’atupu nā roto i te tauturu a te Metua i te ao ra. E aha te ’ohipa tā te Atua e hina’aro ia tātou i te rave ? (hi’o, ’ei hi’ora’a, Te Ha’api’ira’a Tumu ’e te mau Fafaura’a 11:20).

• ’A mā’imi māite ai ’outou te Mose 1:12–26 ’e tā ’outou mau tamari’i, ’a tauturu ia rātou ’ia māhu’i e aha tā Mose i rave nō te pāto’i ia Sātane (hi’o te mau ’īrava 13, 15, 18, 20–22, 26). E mea ’ārearea paha nō rātou ’ia ha’uti ta’ata ora rātou i te mau mea tā rātou e nehenehe e rave nō te pāto’i i te fa’ahemara’a (mai te purera’a, te fa’aāteara’a, ’e ’aore rā te anira’a i te tauturu).

• te ’itera’a tātou i ni’a i tō tātou orara’a hou te tāhuti nei e fa’auru i tā ’outou mau tamari’i, ’ia rave i te mau mā’itira’a tei niuhia i ni’a i te mau parau mau mure ’ore. Nō te tauturu ia rātou ’ia ha’api’i i te reira, e nehenehe ’outou e hōro’a ia rātou i te tahi mau ta’o ’e te mau pereota faufa’a roa nō te nīoa mai i roto i te Aberahama 3:22–28, mai te « hou te ao nei ’a vai ai », « te mau vārua », « hāmani i te fenua » ’e « tāmata ». E aha tā teie mau ’īrava e ha’api’i nei ia tātou i ni’a i te tumu te Metua i te ao ra i tono mai ai ia tātou i te fenua nei ?

• Teie te tahi hīmene « E pe’e au i te fā » (Buka hīmene nā te mau tamari’i, 86–87) e ha’apūai i te mea tā Aberahama 3 e ha’api’i nei. E nehenehe paha ’outou e ani i tā ’outou mau tamariʼi e pāpaʼi i te mau hōhoʼa tei tū i te mau parau.

• Tauturu i tā ’outou mau tamari’i ’ia feruri i te mau huru tupura’a ’o te tītau ia rātou, ’ia mā’iti e rave ’e ’aore rā ’aita i te mea tā te Atua i ani ia rātou ’ia rave (hi’o Aberahama 3:25 ; hi’o ato’a Nō te pūai o te feiā ’āpī : Hō’ē arata’i nō te rave i te mau mā’itira’a). E vaiiho ia rātou ’ia ha’api’ipi’i i te mau pāhonora’a i teie mau huru tupura’a. Nāhea te Fa’aora e tauturu ia tātou ’ia rave ana’e tātou i te mā’itira’a hape ?