Te tai’ora’a i te Faufa’a Tahito

Noa atu te huru o te mau tāmatara’a tā ’outou ’e tō ’outou ’utuāfare e fa’aruru nei, te pāhonora’a o Iesu Mesia ïa. Nō reira, nō te fa’ari’i i te mau pāhonora’a i roto i te Faufa’a Tahito, ’a ’imi iāna. E ’ere i te mea ’ōhie noa. E ti’a paha ia ’outou ’ia feruri ma te fa’a’oroma’i ’e ’ia ’imi i te arata’ira’a pae vārua. I te tahi taime, e au te mau fa’ahorora’a nō ni’a iāna e mea ’āfaro ti’a, mai te fa’ahitira’a a Isaia « ’ua fānau mai ho’i te hō’ē tama nā tātou, ’ua hōro’ahia mai te hō’ē tamaiti nā tātou… e ma’irihia tōna i’oa… te Ari’i nō te hau » (Isaia 9:6). I roto i te tahi atu mau vāhi, ’ua vauvauhia te Fa’aora ma te huru ta’a ’ē ri’i, nā te mau tāpa’o ’e te mau fa’ahōho’ara’a—’ei hi’ora’a, nā roto i te mau fa’ata’ara’a o te mau tusia ’ānimara ’e ’aore rā, te ’ā’amu o Iosepha i te fa’a’orera’a i te hapa a tōna mau taea’e ’e te fa’aorara’a ia rātou i te o’e.

Mai te mea e ’imi ’outou ’ia roa’a te fa’aro’o rahi i roto i te Fa’aora, ma te mā’imi-māite-ra’a i te Faufa’a Tahito, ’e ’itehia mai ia ’outou te reira. E nehenehe paha te reira e riro ’ei ’ōpuara’a nō tā ’outou mā’imira’a māite i teie matahiti. ’A pure ’ia arata’i te Vārua ia ’outou nō te ’ite ’e ’a rōtahi i ni’a i te mau pāpa’ira’a, te mau ’ā’amu, ’e te mau parau tohu ’o te ha’afātata atu ia ’outou ia Iesu Mesia.

’Eiaha e mana’o ē, e vauvau mai te Faufa’a Tahito i te hō’ē ’ā’amu tā’āto’a ’e te pāpū maita’i o te ta’ata nei. E ’ere te reira tā te mau ta’ata pāpa’i mātāmua ’e tā te mau ta’ata ha’aputu e tāmata nei i te fa’atupu. Tā rātou māna’ona’ora’a rahi ’o te ha’api’ira’a ïa i te tahi ’ohipa nō te Atua—i ni’a i tāna fa’anahora’a nō tāna mau tamari’i, e aha mau te aura’a ’ia riro ’ei nūna’a fafau nōna ’e e nāhea ’ia ’ite i te fa’aorara’a ’ia manuia ’ore ana’e tātou. I te tahi taime e nā reira rātou, ma te fa’ati’ara’a i te mau ’ohipa i tupu mai tā rātou i māramarama, te mau ’ā’amu iho ā ra nō roto mai i te orara’a o te mau peropheta rahi. ’O te Genese te hō’ē hi’ora’a nō te reira, mai te mau buka ato’a a Iosua, te mau Tāvana ’e te mau Ari’i 1 ’e te 2. Terā rā, vetahi mau ta’ata pāpa’i o te Faufa’a Tahito ’aita roa atu ïa teie ’ōpuara’a ’ia riro ’ei ta’ata pāpa’i ’ā’amu. ’Āhani te reira, e ha’api’i īa rātou nā roto i te mau ’ohipa anoihi mai te pehepehe ’e te buka pāpa’i. Tei roto te mau Salamo ’e te Maseli i te reira pāpara’a. ’E i muri iho tē vai ra te mau parau faufa’a rahi a te mau peropheta, mai ia Isaia ’e o’ Malaki, ’o tei fa’atae mai i te parau a te Atua i tō ’Īsera’ela i tahito ra—’e, maoti te temeio o te Bibilia, tē paraparau fa’ahou nei ā ia tātou i teie mahana.

Teie mau peropheta, mau rohipehe ’e mau ta’ata ha’aputu parau ato’a, ’ua ’ite ānei rātou ē e tai’ohia tā rātou mau parau e te mau ta’ata ato’a nā te ao nei, e rave rahi tauatini matahiti i muri mai ? ’Aita tātou i ’ite. Tē māere nei rā tātou ē, tē tupu mau nei te reira. ’Ua ti’a mai te mau nūna’a ’e ’ua topa, ’ua haruhia te mau ’oire, ’ua ora mai te mau ari’i ’e ’ua pohe ; ’ua ora mai rā te Faufa’a Tahito ia rātou pā’āto’a, mai terā u’i ’e terā u’i, mai terā ta’ata pāpa’i ’e terā ta’ata pāpa’i, mai terā hurira’a parau ’e terā hurira’a parau. ’Oia mau, ’ua mo’e te tahi mau mea ’e ’aore rā ’ua tāuiuihia, ’e e rave rahi ra mea tei fa’ahereherehia ma te temeio.

Teie te tahi mau mea ri’i e tāpe’a mai i roto i te ferurira’a, ’ia tai’o ana’e ’outou i te Faufa’a Tahito i teie matahiti. ’Ua fa’aherehere te Atua i teie mau pāpa’ira’a tahito nō te mea ’ua mātau ’oia ia ’outou, ’e ’ua ’ite ’oia ē e aha tā ’outou e fa’aruru nei. ’Ua fa’aineine ’oia i te parau poro’i pae vārua nā ’outou i roto i teie mau parau, ’o tē ha’afātata atu ia ’outou iāna ’e ’o tē ha’apūai i tō ’outou fa’aro’o nō tāna fa’anahora’a ’e nō Tāna Tamaiti Here. E arata’i paha ’oia ia ’outou i te tahi tuha’a pāpa’ira’a ’e ’aore rā i te hō’ē mana’o ’o tē ha’amaita’i i te vetahi tā ’outou i mātau—e parau poro’i tā ’outou e nehenehe e fa’a’ite atu i te tahi hoa, i te hō’ē melo o te ’utuāfare, ’e ’aore rā i te hō’tahi mero mo’a. E rave rahi atu ā rāve’a. E ’ere ānei e mea fa’ahiahia mau ’ia feruri i te reira ?

’Ua parau ’o Nephi, « tē ’oa’oa nei tā’u vārua i te mau pāpa’ira’a mo’a » (2 Nephi 4:15). Penei a’e e putapū ’outou i teie huru, ’a tai’o ai ’outou e rave rahi o teienei ā mau parau tā Nephi i tai’o—te mea tā tātou e pi’i nei i teienei te Faufa’a Tahito.