Genese 1–2; Mose 2–3; Abalayama 4–5

Atako toyebi te makambo nyonso etali lolenge nini mokili ekelamaki, ezali malamu koyeba maye Nzambe aponaki komonisa etali Bokeli. Nini Nzambe ateyi bino etali yango kati na Genese 1:1–25; Mose 2:1–25; mpe Abalayama 4:1–25? Mpo na nini Alingi bino boyeba makambo oyo? Ntango bozali komanyola masolo oyo, bokoki lisusu kokanisa kotala maye yango ezali koteya bino etali Tata na Lola, Yesu Klisto, mokili, mpe bino moko.

Mpo na kobongisa boyekoli na bino, bokanisa kotanga milongo oyo ntango bozali kotala bikelamu ya Nzambe to ntango bozali koyoka loyembo lokola “All Creatures of Our God and King” (Hymns, no. 31). Bokoki kozwa bafoto ya bikelamu na Ye oyo ezali kosalisa bino boyoka limemya mpo na Mokeli. Bokanisa kokabola bafoto oyo, elongo na litatoli na bino, na basusu.

Botala lisusu Malongi mpe Mayokani 101:32–34.

Ntango bozali kotanga Genese 1:26–27; Mose 2:26–27; mpe Abalayama 4:26–27, bomanyola nini elingi koloba kokelama na “elilingi” to “lolenge” ya Nzambe, mobali mpe mwasi. Mpo na nini yango ezali motuya epayi na bino boyeba bosolo kati na milongo oyo? Ndakisa, lolenge nini bosolo oyo esimbi lolenge bomimonaka, bomonaka basusu mpe Nzambe? Lolenge nini ekoki kosalisa bino ntango bozali na mayoki ya mabe etali binomei?

Mpo na kosalisa bino bokanisa oyo etali mituna oyo, bomeka kotondisa molongo ya maloba lokola oyo elandi: “Mpo nayebi ete nakelami na elilingi ya Nzambe, naponi mpo na …” Kozongelaka lisusu “Nzoto na yo ezali bule” na Mpo na Bokasi ya Bilenge: Bokambi mpo na Kosala Maponi (nkasa 22–29) ekoki kosalisa. Bokanisa kopona likambo moko bokosala mpo na kolakisa Nzambe ete boyebi nzoto na bino ezali bule.

Na video “God’s Greatest Creation” (Biblioteke ya Nsango Malamu), Mokambi Russell M. Nelson atatoli na ntina ya nzoto ya kokamwa ya moto. Ntango bozali kotala video, bomituna, “Lolenge nini Tata na Lola alingi ngai nayoka etali nzoto na ngai?” Lolenge nini yango ekeseni na nsango bokoki koyoka uta na basusu?

2:51

Bato mususu bakoki koloba ete kokelama na elilingi ya Nzambe elingi koloba ete makanisi, mayoki, mpe bamposa na biso nyonso endimami epayi na Ye mpe ete tosengeli te (to tokoki te) kobongisa. Bokoloba nini na likambo yango? Bososoli nini bozwi uta na Mosiya 3:19 mpe Etele 12:27?

Botala lisusu Russell M. Nelson, “Your Body: A Magnificent Gift to Cherish,” Liahona, Sanza ya mwambe 2019, 50–55.

“Adama mpe Eva basanganaki elongo na libala mpo na ntango mpe mpo na seko na nguya ya bonganganzambe ya libela [yango]” (Russell M. Nelson, “Lessons from Eve,” Ensign, Sanza ya zomi na moko 1987, 87). Bomanyola yango ntango bozali kotanga Genese 1:27–28; 2:18–25; Mose 3:18, 21–25; mpe Abalayama 5:14–19. Lolenge nini bokoki kotalela libala na bosantu oyo Nzambe apesi yango?

Botala lisusu 1 Bakolinti 11:11; “Libota: Esakola na Mokili,” Biblioteke ya Nsango Malamu.

Nini Genese 1:28; Mose 2:28; mpe Abalayama 4:28 etalisi na oyo etali mokumba na biso epayi ya bikelamu ya Nzambe? Nini Malongi mpe Mayokani 59:16–21 mpe 104:13–18 ebakisi na bososoli na bino?

Botala lisusu J Gérald Caussé, “Mokumba na Biso na Mokili; Liahona, Sanza ya zomi na moko 2022, 57–59; Topics and Questions, “Environmental Stewardship and Conservation,” Biblioteke ya Nsango Malamu.

Nzambe asalaki Saba mokolo esantu, mpe Asengaki biso tobatela yango esantu. Ntango bozali kotanga Genese 2:2–3; Mose 3:2–3; Abalayama 5:2–3, bokanisa oyo etali nini esalaka Saba “epambolama” epayi na bino.

Botala lisusu Malongi mpe Mayokani 59:9-13; “Saba Ezali Esengo”(video), Biblioteke ya Nsango Malamu.

0:50

• Lolenge nini bokosala boyekoli ya Bokeli ezala nsai mpo na bana na bino? Bokoki komema bango libanda mpo na koluka ndenge ya biloko oyo ekelamaka na eleko moko na moko ya Bokeli. Bana na bino bakoki lisusu kotala bafoto ya biloko Yesu akelaki (botala “Bokeli ya Mabele” na Masolo ya Kondimana na Kala, 8–12). Nsima bino mpe bana na bino bokoki kosolola etali lolenge nini boyoki etali Yesu Klisto nsima ya kotanga oyo etali Bokeli.

• Bokanisa koyemba loyembo elongo etali mokili na biso kitoko, lokola “My Heavenly Father Loves Me” (Children’s Songbook, 228–29). Ntango mosusu bana na bino bakoki kobakisa na loyembo biloko misusu Nzambe akelaki oyo esalisaka bango bayoka bolingo na Ye.

• Bana na bino bakoki kokolisa lolenge ya limemya mpe botosi mpo na banzoto na bango moko mpe ya basusu ntango bazali koyekola ete biso banso tokelami na elilingi ya Nzambe. Mpo na kosalisa bango basosola maye yango elingi koloba, bokoki kotika bana na bino batala elilingi na bango na talatala to foto ntango bozali kotanga Mose 2:26–27 na bango. Bokoki lisusu kolakisa bango lolenge nini bana ya banyama bazali mbala mingi kati na “bokokani” ya baboti na bango (botala foto na mateya oyo, mpo na ndakisa). Yango ekoki komema na lisolo etali mpo na nini ezali na motuya mpo na bino boyeba ete bokelami na elilingi ya Tata na bino ya Lola.

  

• Bana na bino bakoki kosepela koyema nzoto ya moto mpe kokatakata mayemi na biteni ya kosangisa. Ntango bana na bino bazali kosangisa biteni na bango, bakoki kosolola na oyo etali banzela bakoki kolakisela Tata na Lola ete bazali na botondi mpo na banzoto na bango.

• Ntango bozali kotanga Moses 3:2–3, botuna bana na bino bayoka maye Nzambe asalaki mokolo ya nsambo. Bosalisa bana na bino bazwa to bayema bafoto ya biloko bakoki kosala na eyenga mpo na kosala yango mokolo esantu mpe ekesena na mikolo misusu. Bokabola na moko mpe mosusu mpo na nini ezali motuya epayi na bino bobatela mokolo ya Saba esantu.

• Bosalisa bana na bino basakana bango na bango kolimbolelaka moninga mpo na nini baponi kosala na eyenga makambo oyo epesaka lokumu na Tata na Lola mpe Yesu. Bopesa likanisi ete basalela Genese 2:2–3 na bandimbola na bango. Lolenge nini kobatela mokolo ya Saba esantu elakisaka bolingo na biso mpo na Tata na Lola mpe Yesu Klisto?