“ວັນທີ 12–18 ເດືອນມັງກອນ. ‘ໃນຕອນຕົ້ນພຣະເຈົ້າໄດ້ນິລະມິດສ້າງຟ້າສະຫວັນ ແລະ ແຜ່ນດິນໂລກ’: ປະຖົມມະການ 1–2; ໂມເຊ 2–3; ອັບຣາຮາມ 4–5,” ຈົ່ງຕາມເຮົາມາ—ສຳລັບບ້ານ ແລະ ໂບດ: ພຣະຄໍາພີເດີມ 2026 (2026)

“ວັນທີ 12–18 ເດືອນມັງກອນ. ‘ໃນຕອນຕົ້ນພຣະເຈົ້າໄດ້ນິລະມິດສ້າງຟ້າສະຫວັນ ແລະ ແຜ່ນດິນໂລກ’,” ຈົ່ງຕາມເຮົາມາ: 2026

ວັນທີ 12–18 ເດືອນມັງກອນ: “ໃນຕອນຕົ້ນພຣະເຈົ້າໄດ້ນິລະມິດສ້າງຟ້າສະຫວັນ ແລະ ແຜ່ນດິນໂລກ”

ປະຖົມມະການ 1–2; ໂມເຊ 2–3; ອັບຣາຮາມ 4–5

ເປັນເພາະໂລກທີ່ຢູ່ອ້ອມຮອບເຮົາສວຍງາມ ແລະ ສະຫງ່າງາມຫລາຍ, ມັນຈຶ່ງຍາກທີ່ຈະນຶກພາບແຜ່ນດິນໂລກເມື່ອຕອນທີ່ມັນຍັງ “ບໍ່ທັນມີຮູບຮ່າງ ແລະ ຍັງວ່າງເປົ່າຢູ່” ແລະ “ວ່າງເປົ່າ ແລະ ຮ້າງ” (ປະຖົມມະການ 1:2; ອັບຣາຮາມ 4:2). ສິ່ງໜຶ່ງທີ່ເລື່ອງເລົ່າກ່ຽວກັບການນິລະມິດສ້າງສິດສອນເຮົາກໍຄື ພຣະເຈົ້າສາມາດກະທຳສິ່ງທີ່ຍິ່ງໃຫຍ່ຈາກສິ່ງທີ່ບໍ່ເປັນລະບຽບໄດ້ ເມື່ອເວລາຜ່ານໄປ. ມັນຊ່ວຍໄດ້ທີ່ຈະຈື່ຈຳສິ່ງນັ້ນ ເມື່ອຊີວິດເບິ່ງຄືວ່າວຸ້ນວາຍ. ພຣະບິດາເທິງສະຫວັນ ແລະ ພຣະເຢຊູຄຣິດເປັນພຣະຜູ້ສ້າງ, ແລະ ວຽກງານການນິລະມິດສ້າງຂອງພວກພຣະອົງກັບພວກເຮົາຍັງບໍ່ສຳເລັດເທື່ອ. ພວກພຣະອົງສາມາດເຮັດໃຫ້ແສງສະຫວ່າງສ່ອງແສງໃນຊ່ວງເວລາທີ່ມືດມົນໃນຊີວິດຂອງເຮົາໄດ້. ພວກພຣະອົງສາມາດເຕີມເຕັມຄວາມວ່າງເປົ່າຂອງເຮົາດ້ວຍຊີວິດ. ພວກພຣະອົງສາມາດປ່ຽນແປງເຮົາໃຫ້ກາຍເປັນສິ່ງມີຊີວິດແຫ່ງສະຫວັນທີ່ເຮົາສົມຄວນຈະເປັນ. ນັ້ນຄືຄວາມໝາຍຂອງການຖືກສ້າງຂຶ້ນຕາມຮູບລັກສະນະຂອງພຣະເຈົ້າ, ຕາມແບບຢ່າງຂອງພຣະອົງ (ເບິ່ງ ປະຖົມມະການ 1:26). ເຮົາມີສັກກະຍະພາບທີ່ຈະກາຍເປັນເໝືອນດັ່ງພຣະອົງ: ຮັບຄວາມສູງສົ່ງ, ລັດສະໝີພາບ, ເປັນຂອງສະຫວັນ.

ສຳລັບພາບລວມຂອງພຣະທຳປະຖົມມະການ, ເບິ່ງ “ປະຖົມມະການ” ໃນ ຄູ່ມືພຣະຄຳພີ.

ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ

ປະຖົມມະການ 1:1–25; ໂມເຊ 2:1–25; ອັບຣາຮາມ 4:1–25

“ໂດຍພຣະອົງດຽວທີ່ຖືກຳເນີດຂອງເຮົາ, ເຮົາໄດ້ສ້າງສິ່ງເຫລົ່ານີ້.”

ເຖິງແມ່ນວ່າເຮົາຈະບໍ່ຮູ້ທຸກຢ່າງກ່ຽວກັບວິທີທີ່ໂລກໄດ້ຖືກສ້າງຂຶ້ນ, ແຕ່ມັນໜ້າສົນໃຈທີ່ຈະສັງເກດສິ່ງທີ່ພຣະເຈົ້າໄດ້ເລືອກທີ່ຈະເປີດເຜີຍກ່ຽວກັບການນິລະມິດສ້າງ. ພຣະເຈົ້າສິດສອນຫຍັງໃຫ້ກັບທ່ານກ່ຽວກັບການນິລະມິດສ້າງໃນ ປະຖົມມະການ 1:1–25; ໂມເຊ 2:1–25; ແລະ ອັບຣາຮາມ 4:1–25? ເປັນຫຍັງພຣະອົງຈຶ່ງຕ້ອງການໃຫ້ທ່ານຮູ້ກ່ຽວກັບສິ່ງເຫລົ່ານີ້? ຂະນະທີ່ທ່ານໄຕ່ຕອງເລື່ອງລາວເຫລົ່ານີ້, ທ່ານອາດພິຈາລະນາສິ່ງທີ່ເລື່ອງລາວນັ້ນສິດສອນທ່ານຫຍັງແດ່ກ່ຽວກັບພຣະບິດາເທິງສະຫວັນ, ພຣະເຢຊູຄຣິດ, ໂລກ, ຕົວທ່ານເອງນຳອີກ.

ເພື່ອເພີ່ມພູນການສຶກສາຂອງທ່ານ, ໃຫ້ພິຈາລະນາທີ່ຈະອ່ານຂໍ້ເຫລົ່ານີ້ ຂະນະທີ່ຢູ່ທາງນອກກັບສິ່ງນິລະມິດສ້າງຂອງພຣະເຈົ້າ ຫລື ຂະນະທີ່ຟັງເພງເຊັ່ນ “All Creatures of Our God and King” (Hymns, no. 62). ທ່ານສາມາດຊອກຫາຮູບພາບສິ່ງນິລະມິດສ້າງຂອງພຣະອົງທີ່ຊ່ວຍໃຫ້ທ່ານຮູ້ສຶກເຖິງຄວາມຄາລະວະຕໍ່ພຣະຜູ້ສ້າງ. ໃຫ້ຄິດທີ່ຈະແບ່ງປັນຮູບພາບເຫລົ່ານີ້, ພ້ອມດ້ວຍປະຈັກພະຍານຂອງທ່ານ, ກັບຄົນອື່ນ.

ເບິ່ງ ຄຳສອນ ແລະ ພັນທະສັນຍາ 101:32–34 ນຳອີກ.

ຮູບແຕ້ມຂອງສວນເອເດນ. — The Garden of Eden [ສວນເອເດນ], ໂດຍ ແກຣ້ນ ຣອມນີ ຄລໍສັນ

ປະຖົມມະການ 1:26–27; ໂມເຊ 2:26–27; ອັບຣາຮາມ 4:26–27

ເຮົາໄດ້ຖືກສ້າງຂຶ້ນຕາມຮູບລັກສະນະຂອງພຣະເຈົ້າ.

ຂະນະທີ່ທ່ານອ່ານ ປະຖົມມະການ 1:26–27; ໂມເຊ 2:26–27; ແລະ ອັບຣາຮາມ 4:26–27, ໃຫ້ໄຕ່ຕອງວ່າ ຊາຍ ແລະ ຍິງຖືກສ້າງຕາມ “ຮູບລັກສະນະ” ຫລື “ຕາມແບບຢ່າງ,” ຂອງພຣະເຈົ້ານັ້ນ ໝາຍຄວາມວ່າແນວໃດ. ເປັນຫຍັງມັນຈຶ່ງສຳຄັນຕໍ່ທ່ານທີ່ຈະຮູ້ຈັກຄວາມຈິງໃນຂໍ້ເຫລົ່ານີ້? ຍົກຕົວຢ່າງ, ຄວາມຈິງເຫລົ່ານີ້ມີຜົນກະທົບຕໍ່ວິທີທີ່ທ່ານເບິ່ງຕົວເອງ, ຄົນອື່ນ, ແລະ ພຣະເຈົ້າແນວໃດ? ຄວາມຈິງເຫລົ່ານີ້ສາມາດຊ່ວຍທ່ານໃນເວລາທີ່ທ່ານມີຄວາມຮູ້ສຶກໃນທາງລົບກ່ຽວກັບຕົວທ່ານເອງແນວໃດ?

ເພື່ອຊ່ວຍໃຫ້ທ່ານຄິດກ່ຽວກັບຄຳຖາມເຫລົ່ານີ້, ລອງປະກອບປະໂຫຍກໃຫ້ສົມບູນເຊັ່ນໂຕນີ້: “ເພາະຂ້ອຍຮູ້ວ່າ ຂ້ອຍໄດ້ຖືກສ້າງຕາມຮູບລັກສະນະຂອງພຣະເຈົ້າ, ຂ້ອຍຈຶ່ງເລືອກທີ່ຈະ …” ການທົບທວນ “ຮ່າງກາຍຂອງເຈົ້າສັກສິດ” ໃນ ສຳລັບຄວາມເຂັ້ມແຂງຂອງຊາວໜຸ່ມ: ຄູ່ມືສຳລັບການເລືອກ (ໜ້າທີ 22–29) ສາມາດຊ່ວຍໄດ້. ໃຫ້ພິຈາລະນາທີ່ຈະເລືອກບາງສິ່ງທີ່ທ່ານຈະເຮັດເພື່ອສະແດງໃຫ້ພຣະເຈົ້າເຫັນວ່າ ທ່ານຮູ້ວ່າຮ່າງກາຍຂອງທ່ານສັກສິດ.

ໃນວິດີໂອ “God’s Greatest Creation” (ຫ້ອງສະໝຸດພຣະກິດຕິຄຸນ), ປະທານຣະໂຊ ເອັມ ແນວສັນ ເປັນພະຍານເຖິງຮ່າງກາຍມະນຸດທີ່ໜ້າອັດສະຈັນ. ຂະນະທີ່ທ່ານເບິ່ງວິດີໂອນີ້, ໃຫ້ຖາມຕົນເອງວ່າ, “ພຣະບິດາເທິງສະຫວັນຕ້ອງການໃຫ້ເຮົາຮູ້ສຶກແນວໃດກ່ຽວກັບຮ່າງກາຍຂອງເຮົາ?” ສິ່ງນີ້ແຕກຕ່າງຈາກຂ່າວສານທີ່ທ່ານອາດໄດ້ຍິນຈາກຄົນອື່ນແນວໃດ?

ບາງຄົນອາດເວົ້າວ່າ ການຖືກສ້າງຕາມຮູບລັກສະນະຂອງພຣະເຈົ້າໝາຍຄວາມວ່າ ທຸກໆຄວາມຄິດ, ຄວາມຮູ້ສຶກ, ແລະ ຄວາມປາດຖະໜາຂອງເຮົາ ແມ່ນໄດ້ຮັບອະນຸມັດຈາກພຣະອົງ ແລະ ວ່າເຮົາບໍ່ຈຳເປັນຕ້ອງ (ຫລື ບໍ່ສາມາດ) ພັດທະນາຕົນເອງ. ທ່ານຈະວ່າຢ່າງໃດກັບເລື່ອງນັ້ນ? ຄວາມຮູ້ແຈ້ງໃດແດ່ທີ່ທ່ານໄດ້ຮັບຈາກ ໂມໄຊຢາ 3:19 ແລະ ອີເທີ 12:27?

ເບິ່ງ Russell M. Nelson, “Your Body: A Magnificent Gift to Cherish,” Liahona, Aug. 2019, 50–55 ນຳອີກ.

ປະຖົມມະການ 1:27–28; 2:18–25; ໂມເຊ 3:18, 21–24; ອັບຣາຮາມ 5:14–18

ການແຕ່ງງານລະຫວ່າງຊາຍ ແລະ ຍິງ ໄດ້ຖືກແຕ່ງຕັ້ງໄວ້ໂດຍພຣະເຈົ້າ.

“ອາດາມ ແລະ ເອວາໄດ້ເຂົ້າຮ່ວມກັນໃນການແຕ່ງງານສຳລັບການເວລາ ແລະ ຊົ່ວນິລັນດອນ ໂດຍອຳນາດຂອງຖານະປະໂລຫິດອັນເປັນນິດ” (Russell M. Nelson, “Lessons from Eve,” Ensign, Nov. 1987, 87). ໃຫ້ໄຕ່ຕອງສິ່ງນີ້ຂະນະທີ່ທ່ານອ່ານ ປະຖົມມະການ 1:27–28; 2:18–25; ໂມເຊ 3:18, 21–25; ແລະ ອັບຣາຮາມ 5:14–19. ທ່ານຈະສາມາດປະຕິບັດຕໍ່ການແຕ່ງງານດ້ວຍຄວາມສັກສິດທີ່ພຣະເຈົ້າໄດ້ປະທານໃຫ້ແກ່ມັນໄດ້ແນວໃດ?

ເບິ່ງ 1 ໂກຣິນໂທ 11:11; “ຄອບຄົວ: ການປະກາດຕໍ່ໂລກ,” ຫ້ອງສະໝຸດພຣະກິດຕິຄຸນ ນຳອີກ.

ປະຖົມມະການ 1:28; ໂມເຊ 2:28; ອັບຣາຮາມ 4:28

ເຮົາມີໜ້າທີ່ຮັບຜິດຊອບດູແລສິ່ງນິລະມິດສ້າງຂອງພຣະເຈົ້າ.

ປະຖົມມະການ 1:28; ໂມເຊ 2:28; ແລະ ອັບຣາຮາມ 4:28 ແນະນຳຫຍັງແດ່ກ່ຽວກັບໜ້າທີ່ຮັບຜິດຊອບຂອງເຮົາຕໍ່ສິ່ງນິລະມິດສ້າງຂອງພຣະເຈົ້າ? ຄຳສອນ ແລະ ພັນທະສັນຍາ 59:16–21 ແລະ 104:13–18 ເພີ່ມຫຍັງແດ່ໃຫ້ກັບຄວາມເຂົ້າໃຈຂອງທ່ານ?

ເບິ່ງ Gérald Caussé, “Our Earthly Stewardship,” Liahona, Nov. 2022, 57–59; Topics and Questions, “Environmental Stewardship and Conservation,” ຫ້ອງສະໝຸດພຣະກິດຕິຄຸນ ນຳອີກ.

ປະຖົມມະການ 2:2–3; ໂມເຊ 3:2–3; ອັບຣາຮາມ 5:2–3

ພຣະເຈົ້າອວຍພອນ ແລະ ເຮັດໃຫ້ວັນຊະບາໂຕສັກສິດ.

ພຣະເຈົ້າ ເຮັດໃຫ້ ວັນຊະບາໂຕສັກສິດ, ແລະ ພຣະອົງຂໍໃຫ້ເຮົາ ຮັກສາ ມັນໃຫ້ສັກສິດ. ຂະນະທີ່ທ່ານອ່ານ ປະຖົມມະການ 2:2–3; ໂມເຊ 3:2–3; ແລະ ອັບຣາຮາມ 5:2–3, ໃຫ້ຄິດກ່ຽວກັບສິ່ງທີ່ເຮັດໃຫ້ວັນຊະບາໂຕ “ເປັນພອນ” ໃຫ້ແກ່ທ່ານ.

ເບິ່ງ ຄຳສອນ ແລະ ພັນທະສັນຍາ 59:9–13; “The Sabbath Is a Delight” (ວິດີໂອ), ຫ້ອງສະໝຸດພຣະກິດຕິຄຸນ ນຳອີກ.

ສຳລັບຂໍ້ມູນເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.

ແນວຄິດສຳລັບການສິດສອນເດັກນ້ອຍ

ປະຖົມມະການ 1:1–25; ໂມເຊ 2:1–25; ອັບຣາຮາມ 4:1–25

ພຣະເຢຊູໄດ້ສ້າງແຜ່ນດິນໂລກ.

ທ່ານຈະສາມາດເຮັດໃຫ້ການຮຽນຮູ້ກ່ຽວກັບການນິລະມິດສ້າງເປັນສິ່ງທີ່ມ່ວນຊື່ນສຳລັບລູກໆຂອງທ່ານໄດ້ແນວໃດ? ທ່ານສາມາດພາພວກເຂົາອອກໄປຊອກຫາສິ່ງທີ່ຢູ່ນອກເຮືອນ ທີ່ໄດ້ຖືກສ້າງຂຶ້ນໃນແຕ່ລະໄລຍະຂອງການນິລະມິດສ້າງ. ລູກໆຂອງທ່ານອາດສາມາດເບິ່ງຮູບພາບຂອງສິ່ງຕ່າງໆທີ່ພຣະເຢຊູໄດ້ສ້າງ (ເບິ່ງ “ການສ້າງໂລກ” ໃນ ເລື່ອງພຣະຄຳພີເດີມ, 8–12). ແລ້ວທ່ານ ແລະ ລູກໆຂອງທ່ານສາມາດເວົ້າລົມກັນກ່ຽວກັບວ່າພວກທ່ານຮູ້ສຶກແນວໃດກ່ຽວກັບພຣະເຢຊູຄຣິດຫລັງຈາກທີ່ໄດ້ອ່ານກ່ຽວກັບການນິລະມິດສ້າງ.
ໃຫ້ພິຈາລະນາທີ່ຈະຮ້ອງເພງນຳກັນກ່ຽວກັບໂລກອັນແສນງົດງາມ, ເຊັ່ນ “ພຣະວິນຍານພຣະເຈົ້າ” (ເພງສວດ ແລະ ເພງຂອງເດັກນ້ອຍ, 30). ບາງເທື່ອລູກໆຂອງທ່ານກໍສາມາດຕື່ມສິ່ງອື່ນໆທີ່ພຣະເຈົ້າໄດ້ສ້າງທີ່ຊ່ວຍໃຫ້ພວກເຂົາຮູ້ສຶກເຖິງຄວາມຮັກຂອງພຣະອົງໃສ່ໃນເພງ .

ຊ່ວຍໃຫ້ເດັກນ້ອຍສະແດງຄວາມຄິດສ້າງສັນຂອງພວກເຂົາ. “ເມື່ອທ່ານເຊື້ອເຊີນໃຫ້ເດັກນ້ອຍແຕ້ມ, ສ້າງ, ລະບາຍສີ, ຫລື ຂຽນບາງຢ່າງທີ່ກ່ຽວພັນກັບຫລັກທຳພຣະກິດຕິຄຸນ, ທ່ານໄດ້ຊ່ວຍໃຫ້ພວກເຂົາເຂົ້າໃຈຫລັກທຳຫລາຍກວ່າເກົ່າ ແລະ ທ່ານໄດ້ເຕືອນພວກເຂົາດ້ວຍສິ່ງຂອງທີ່ສາມາດຈັບບາຍໄດ້ ເຖິງສິ່ງທີ່ພວກເຂົາໄດ້ຮຽນຮູ້” (ການສິດສອນໃນວິທີຂອງພຣະຜູ້ຊ່ວຍໃຫ້ລອດ, 32).

ປະຖົມມະການ 1:26–27; ໂມເຊ 2:26–27; ອັບຣາຮາມ 4:26–27

ເຮົາຖືກສ້າງຕາມຮູບລັກສະນະຂອງພຣະເຈົ້າ.

ລູກໆຂອງທ່ານສາມາດພັດທະນາຄວາມຮູ້ສຶກແຫ່ງຄວາມຄາລະວະ ແລະ ຄວາມເຄົາລົບຕໍ່ຮ່າງກາຍຂອງຕົນເອງ ແລະ ຂອງຄົນອື່ນ ຂະນະທີ່ພວກເຂົາຮຽນຮູ້ວ່າ ເຮົາທຸກຄົນຖືກສ້າງຕາມຮູບລັກສະນະຂອງພຣະເຈົ້າ. ເພື່ອຊ່ວຍໃຫ້ພວກເຂົາເຂົ້າໃຈວ່າສິ່ງນີ້ໝາຍຄວາມວ່າແນວໃດ, ທ່ານສາມາດໃຫ້ລູກໆຂອງທ່ານເບິ່ງຮູບຂອງຕົນເອງໃນແວ່ນ ຫລື ຮູບພາບ ຂະນະທີ່ທ່ານອ່ານ ໂມເຊ 2:26–27 ໃຫ້ພວກເຂົາຟັງ. ທ່ານຍັງສາມາດສະແດງໃຫ້ພວກເຂົາເຫັນວ່າ ລູກສັດມັກຈະມີ “ຄວາມຄ້າຍຄື” ກັບພໍ່ແມ່ຂອງພວກມັນແນວໃດ (ເບິ່ງຮູບໃນໂຄງຮ່າງນີ້, ຍົກຕົວຢ່າງ). ສິ່ງນີ້ສາມາດນຳໄປສູ່ການສົນທະນາກ່ຽວກັບວ່າ ເປັນຫຍັງມັນຈຶ່ງສຳຄັນສຳລັບທ່ານທີ່ຈະຮູ້ວ່າ ທ່ານໄດ້ຖືກສ້າງຕາມຮູບລັກສະນະຂອງພຣະບິດາເທິງສະຫວັນ.
ທ່ານ ແລະ ລູກໆຂອງທ່ານອາດມັກແຕ້ມຮູບຮ່າງກາຍມະນຸດ ແລະ ຕັດຮູບແຕ້ມໃຫ້ເປັນຈິກຊໍ. ຂະນະທີ່ລູກໆຂອງທ່ານຕໍ່ຈິກຊໍເຂົ້າກັນ, ພວກເຂົາສາມາດເວົ້າກ່ຽວກັບວິທີທີ່ພວກເຂົາສາມາດສະແດງໃຫ້ພຣະບິດາເທິງສະຫວັນເຫັນວ່າ ພວກເຂົາຮູ້ສຶກຂອບຄຸນສຳລັບຮ່າງກາຍຂອງພວກເຂົາ.

ປະຖົມມະການ 2:2–3; ໂມເຊ 3:2–3; ອັບຣາຮາມ 5:2–3

ວັນຊະບາໂຕເປັນວັນສັກສິດ.

ຂະນະທີ່ທ່ານອ່ານ ໂມເຊ 3:2–3, ຂໍໃຫ້ລູກໆຂອງທ່ານຟັງສິ່ງທີ່ພຣະເຈົ້າໄດ້ກະທຳໃນມື້ທີເຈັດ. ຊ່ວຍລູກໆຂອງທ່ານຊອກຫາ ຫລື ແຕ້ມຮູບສິ່ງທີ່ພວກເຂົາສາມາດເຮັດໃນວັນອາທິດ ເພື່ອເຮັດໃຫ້ມື້ນັ້ນເປັນມື້ສັກສິດ ແລະ ແຕກຕ່າງຈາກມື້ອື່ນໆ. ໃຫ້ແບ່ງປັນນຳກັນວ່າ ເປັນຫຍັງການຮັກສາວັນຊະບາໂຕໃຫ້ເປັນວັນສັກສິດຈຶ່ງສຳຄັນສຳລັບທ່ານ.
ຊ່ວຍລູກໆຂອງທ່ານຫລິ້ນລະຄອນກ້ອມໃນການອະທິບາຍໃຫ້ໝູ່ຟັງວ່າ ເປັນຫຍັງພວກເຂົາຈຶ່ງເລືອກທີ່ຈະເຮັດສິ່ງຕ່າງໆໃນວັນອາທິດທີ່ຖວາຍກຽດແດ່ພຣະບິດາເທິງສະຫວັນ ແລະ ພຣະເຢຊູ. ແນະນຳໃຫ້ພວກເຂົາໃຊ້ ປະຖົມມະການ 2:2–3 ໃນຄຳອະທິບາຍຂອງພວກເຂົາ. ການຮັກສາວັນຊະບາໂຕໃຫ້ສັກສິດ ສະແດງເຖິງຄວາມຮັກຂອງເຮົາທີ່ມີຕໍ່ພຣະບິດາເທິງສະຫວັນ ແລະ ພຣະເຢຊູຄຣິດແນວໃດ?

ສຳລັບຂໍ້ມູນເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.

ພຣະເຢໂຮວາຢືນຢູ່ໃນກ້ອນເມກໂດຍທີ່ພຣະຫັດຂອງພຣະອົງຍື່ນອອກໄປເໜືອໂລກທີ່ພຣະອົງກຳລັງຈັດລະບຽບຢູ່ — The Creation [ການນິລະມິດສ້າງ], ໂດຍ ແອນນີ ເຮັນຣີ ເນເດີ

ໜ້າກິດຈະກຳປະຖົມໄວ: ພຣະເຢຊູໄດ້ສ້າງແຜ່ນດິນໂລກ — The Creation [ການນິລະມິດສ້າງ], ໂດຍ ແອນນີ ເຮັນຣີ ເນເດີ