“ວັນທີ 5–11 ເດືອນມັງກອນ. ‘ນີ້ຄືວຽກງານຂອງເຮົາ ແລະ ລັດສະໝີພາບຂອງເຮົາ’: ໂມເຊ 1; ອັບຣາຮາມ 3,” ຈົ່ງຕາມເຮົາມາ—ສຳລັບບ້ານ ແລະ ໂບດ: ພຣະຄຳພີເດີມ 2026 (2026)
“ວັນທີ 5–11 ເດືອນມັງກອນ. ‘ນີ້ຄືວຽກງານຂອງເຮົາ ແລະ ລັດສະໝີພາບຂອງເຮົາ’,” ຈົ່ງຕາມເຮົາມາ: 2026
ວັນທີ 5–11 ເດືອນມັງກອນ: “ນີ້ຄືວຽກງານຂອງເຮົາ ແລະ ລັດສະໝີພາບຂອງເຮົາ”
ໂມເຊ 1; ອັບຣາຮາມ 3
ພຣະຄຣິສຕະທຳຄຳພີເລີ່ມຕົ້ນດ້ວຍຄຳວ່າ “ໃນຕອນຕົ້ນພຣະເຈົ້າໄດ້ສ້າງຟ້າສະຫວັນ ແລະ ແຜ່ນດິນໂລກ” (ປະຖົມມະການ 1:1). ແຕ່ມີຫຍັງ ກ່ອນ “ຕອນຕົ້ນ” ນີ້? ແລະ ເປັນຫຍັງ ພຣະເຈົ້າຈຶ່ງສ້າງທຸກສິ່ງເຫລົ່ານີ້? ຜ່ານທາງສາດສະດາໂຈເຊັບ ສະມິດ, ພຣະຜູ້ເປັນເຈົ້າໄດ້ໃຫ້ຄຳຕອບຕໍ່ຄຳຖາມເຫລົ່ານີ້.
ຍົກຕົວຢ່າງ, ພຣະອົງໄດ້ມອບບັນທຶກໃຫ້ເຮົາກ່ຽວກັບພາບນິມິດ ຊຶ່ງໃນນັ້ນອັບຣາຮາມໄດ້ເຫັນການເປັນຢູ່ຂອງເຮົາໃນຖານະວິນຍານ “ກ່ອນໂລກເປັນມາ” (ເບິ່ງ ອັບຣາຮາມ 3:22–28). ພຣະຜູ້ເປັນເຈົ້າກໍຍັງໄດ້ມອບການແປທີ່ດົນໃຈ ຫລື ການເປີດເຜີຍຫົກບົດທຳອິດຂອງປະຖົມມະການໃຫ້ເຮົານຳອີກ, ເອີ້ນວ່າໜັງສືໂມເຊ—ຊຶ່ງບໍ່ໄດ້ເລີ່ມຕົ້ນດ້ວຍ “ໃນຕອນຕົ້ນ.” ກົງກັນຂ້າມ, ມັນເລີ່ມຕົ້ນດ້ວຍປະສົບການທີ່ໂມເຊໄດ້ມີ ຊຶ່ງໃຫ້ຄວາມໝາຍກ່ຽວກັບເລື່ອງລາວຂອງການນິລະມິດສ້າງ. ພ້ອມກັນນີ້, ພຣະຄຳພີຂອງຍຸກສຸດທ້າຍນີ້ ຍັງເປັນບ່ອນທີ່ສຳຄັນທີ່ຈະເລີ່ມຕົ້ນການສຶກສາພຣະຄຳພີເດີມຂອງເຮົາ ເພາະວ່າມັນຕອບຄຳຖາມຂັ້ນພື້ນຖານ ທີ່ສາມາດໃຫ້ຄວາມໝາຍແກ່ການອ່ານຂອງເຮົາວ່າ: ພຣະເຈົ້າຄືໃຜ? ພວກເຮົາຄືໃຜ? ວຽກງານຂອງພຣະເຈົ້າຄືຫຍັງ, ແລະ ໜ້າທີ່ຂອງພວກເຮົາຄືຫຍັງໃນນັ້ນ? ບົດທຳອິດຢູ່ໃນປະຖົມມະການສາມາດເຫັນໄດ້ວ່າ ພຣະຜູ້ເປັນເຈົ້າຕອບສະໜອງຄຳອ້ອນວອນຂອງໂມເຊ ທີ່ວ່າ: “ຂໍຈົ່ງເມດຕາຜູ້ຮັບໃຊ້ຂອງພຣະອົງດ້ວຍເທີ້ນ, ໂອ້ ພຣະອົງເຈົ້າ, ແລະ ຂໍຈົ່ງບອກຂ້າພຣະອົງກ່ຽວກັບແຜ່ນດິນໂລກນີ້, ແລະ ຜູ້ອາໄສຢູ່ໃນນັ້ນ, ແລະ ຟ້າສະຫວັນນຳອີກ” (ໂມເຊ 1:36).
ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ
ໃນຖານະລູກຂອງພຣະເຈົ້າ, ເຮົາມີຈຸດໝາຍປາຍທາງອັນສູງສົ່ງ.
“ຖ້າພຣະຜູ້ເປັນເຈົ້າກ່າວກັບທ່ານໂດຍກົງ,” ປະທານແນວສັນໄດ້ສິດສອນວ່າ, “ສິ່ງທຳອິດທີ່ພຣະອົງຈະເຮັດໃຫ້ທ່ານເຂົ້າໃຈ ຄືເອກະລັກທີ່ແທ້ຈິງຂອງທ່ານ” (“Choices for Eternity” [ກອງປະຊຸມໃຫ້ຄຳດົນໃຈສຳລົບຜູ້ໃຫຍ່ໜຸ່ມທົ່ວໂລກ, ເດືອນພຶດສະພາ 2022], ຫ້ອງສະໝຸດພຣະກິດຕິຄູນ). ດັ່ງນັ້ນຊາຕານກໍຈະພະຍາຍາມເຮັດໃຫ້ທ່ານສັບສົນໃນປະເດັນດຽວກັນນັ້ນ. ໃຫ້ຊອກຫາແບບແຜນນີ້ໃນຂ່າວສານຂອງພຣະເຈົ້າເຖິງໂມເຊໃນ ໂມເຊ1:4, 6 ແລະ ຂ່າວສານຂອງຊາຕານໃນ ໂມເຊ 1:12. ທ່ານຮຽນຮູ້ຫຍັງແດ່ຈາກຂໍ້ເຫລົ່ານີ້ ກ່ຽວກັບຄວາມແຕກຕ່າງລະຫວ່າງພຣະເຈົ້າ ແລະ ຊາຕານ?
ປະທານແນວສັນຍັງສິດສອນອີກວ່າ, “ວິທີທີ່ທ່ານຄິດກ່ຽວກັບວ່າທ່ານເປັນໃຜແທ້ໆ ຈະສົ່ງຜົນຕໍ່ການຕັດສິນໃຈເກືອບທຸກເລື່ອງທີ່ທ່ານຈະເຮັດ” (“Choices for Eternity”). ໃຫ້ຄິດທີ່ຈະຂຽນການເລືອກຕ່າງໆທີ່ທ່ານເຮັດ ຍ້ອນເອກະລັກຂອງທ່ານໃນຖານະລູກຂອງພຣະເຈົ້າມາກ່ອນ.
ຂໍ້ພຣະຄຳພີ ຫລື ວະລີເພີ່ມເຕີມໃດໃນ ໂມເຊ 1 ທີ່ຊ່ວຍທ່ານໃຫ້ເຂົ້າໃຈເຖິງຄ່າຄວນແຫ່ງສະຫວັນຂອງທ່ານ? ທ່ານອາດອ່ານຂ່າວສານຂອງປະທານແນວສັນເພີ່ມເຕີມນຳອີກໃນພາກ “ການເລືອກເພື່ອນິລັນດອນ” ໃນຫົວຂໍ້ “First: Know the truth about who you are.” ທ່ານຮູ້ສຶກໄດ້ຮັບການດົນໃຈໃຫ້ເຮັດສິ່ງໃດເພື່ອເຮັດໃຫ້ເອກະລັກຂອງທ່ານໃນຖານະລູກຂອງພຣະເຈົ້າເປັນຕົວລະບຸທີ່ສຳຄັນທີ່ສຸດ?
ເບິ່ງ “ເຮົາເປັນລູກຂອງພຣະເຈົ້າ,” ເພງສວດ ແລະ ເພງຂອງເດັກນ້ອຍ (1985), 64; “Our True Identity” (ວິດີໂອ), ຫ້ອງສະໝຸດພຣະກິດຕິຄຸນ; Topics and Questions, “Children of God,” ຫ້ອງສະໝຸດພຣະກິດຕິຄຸນ ນຳອີກ.
Our True Identity
ດ້ວຍຄວາມຊ່ວຍເຫລືອຈາກພຣະຜູ້ເປັນເຈົ້າ, ເຮົາສາມາດຕ້ານທານຊາຕານໄດ້.
ດັ່ງທີ່ ໂມເຊ 1 ສະແດງໃຫ້ເຫັນຢ່າງແຈ່ມແຈ້ງວ່າ, ປະສົບການທາງວິນຍານບໍ່ໄດ້ໝາຍຄວາມວ່າເຮົາຈະບໍ່ຖືກລໍ້ລວງອີກຕໍ່ໄປ. ຕາມຈິງແລ້ວ, ໜຶ່ງໃນຍຸດທະວິທີຂອງຊາຕານແມ່ນທີ່ຈະລໍ້ລວງເຮົາໃຫ້ສົງໄສປະສົບການເຫລົ່ານີ້. ຂະນະທີ່ທ່ານອ່ານການຕອບຮັບຂອງໂມເຊຕໍ່ຊາຕານ ຢູ່ໃນ ຂໍ້ທີ 12–26, ທ່ານຮຽນຮູ້ຫຍັງແດ່ທີ່ສາມາດຊ່ວຍທ່ານໃຫ້ຍຶດໝັ້ນຢູ່ໃນຄວາມຈິງໃຈຕໍ່ປະຈັກພະຍານທີ່ທ່ານໄດ້ຮັບ? ສຸດທ້າຍແລ້ວແມ່ນຫຍັງທີ່ຊ່ວຍໃຫ້ໂມເຊເອົາຊະນະຊາຕານໄດ້?
ບົດຮຽນອີກຢ່າງໜຶ່ງຈາກປະສົບການຂອງໂມເຊນັ້ນກໍຄືຊາຕານລໍ້ລວງເຮົາດ້ວຍອຳນາດ ແລະ ຄວາມຈິງຂອງພຣະເຈົ້າທີ່ຈອມປອມ. ໃຫ້ຄິດເຫັນສິ່ງຂອງປອມໆ, ເຊັ່ນຕົ້ນໄມ້ປອມ ຫລື ຕຸກກະຕາເດັກນ້ອຍ. ທ່ານຈະສາມາດຮູ້ໄດ້ແນວໃດວ່າ ພວກມັນປອມ? ຈາກນັ້ນລອງພິຈາລະນາເບິ່ງສິ່ງຈອມປອມທີ່ຊາຕານໃຊ້ເພື່ອລໍ້ລວງເຮົາໃນປະຈຸບັນນີ້. ທ່ານຮຽນຮູ້ຫຍັງແດ່ຈາກ ໂມເຊ 1:13–18 ກ່ຽວກັບວິທີການຮັບຮູ້ ແລະ ປະຕິເສດຄວາມຈອມປອມຂອງມັນ? ພຣະຜູ້ເປັນເຈົ້າສາມາດຊ່ວຍເຫລືອທ່ານແນວໃດ? (ເບິ່ງ ໂມເຊ 1:24–26).
ເບິ່ງ ມັດທາຍ 4:1–11; Gary E. Stevenson, “Deceive Me Not,” Liahona, Nov. 2019, 93–96; (ວິດີໂອ) “I Am a Son of God”, ຫ້ອງສະໝຸດພຣະກິດຕິຄຸນ ນຳອີກ.
I Am a Son of God
ການຮຽນຮູ້ທີ່ບ້ານສາມາດຖືກວາງແຜນລ່ວງໜ້າ ຫລື ເກີດຂຶ້ນເອງໄດ້. “ໂອກາດສິດສອນໃນຄອບຄົວມັກຈະເກີດຂຶ້ນແບບເປັນກັນເອງ, ໃນທຸກເວລາແຕ່ລະວັນ—ຂະນະທີ່ຮັບປະທານອາຫານ, ເຮັດວຽກບ້ານ, ຫລິ້ນເກມ, [ຫລື] ເດີນທາງ” (ການສິດສອນໃນວິທີຂອງພຣະຜູ້ຊ່ວຍໃຫ້ລອດ, 31). ຍົກຕົວຢ່າງ, ນອກເໜືອຈາກການອ່ານກ່ຽວກັບວິທີທີ່ໂມເຊຕໍ່ຕ້ານຊາຕານໃນ ໂມເຊ 1, ທ່ານອາດຈະໃຊ້ເວລາເລັກນ້ອຍຕອນກິນເຂົ້າແລງເປັນຄອບຄົວເວົ້າລົມກ່ຽວກັບວິທີທີ່ຈະຕໍ່ຕ້ານອິດທິພົນຂອງຜູ້ປໍລະປັກ.
ວຽກງານ ແລະ ລັດສະໝີພາບຂອງພຣະເຈົ້າ ຄືການຊ່ວຍເຮົາໃຫ້ໄດ້ຮັບຊີວິດນິລັນດອນ.
ຫລັງຈາກໄດ້ເຫັນພາບນິມິດເຖິງການນິລະມິດສ້າງຂອງພຣະເຈົ້າແລ້ວ, ໂມເຊໄດ້ທູນຖາມພຣະຜູ້ເປັນເຈົ້າວ່າ: “ຂໍຊົງບອກຂ້າພຣະອົງແດ່ທ້ອນ … ດ້ວຍເຫດໃດສິ່ງເຫລົ່ານີ້ຈຶ່ງເປັນເຊັ່ນນີ້” (ໂມເຊ 1:30). ແມ່ນຫຍັງທີ່ປະທັບໃຈທ່ານກ່ຽວກັບການຕອບສະໜອງຂອງພຣະເຈົ້າໃນ ໂມເຊ 1:31–39? ແມ່ນຫຍັງຄືຄວາມແຕກຕ່າງລະຫວ່າງຄວາມເປັນອະມະຕະ ແລະ ຊີວິດນິລັນດອນ? (ເບິ່ງ Topics and Questions, “Eternal Life,” ຫ້ອງສະໝຸດພຣະກິດຕິຄຸນ). ພຣະເຢຊູຄຣິດໄດ້ຊ່ວຍນຳເອົາທັງສອງຢ່າງກັບມາແນວໃດ? ອັບຣາຮາມກໍໄດ້ເຫັນພາບນິມິດນຳອີກ, ຊຶ່ງບັນທຶກຢູ່ໃນ ອັບຣາຮາມ 3. ທ່ານພົບເຫັນຫຍັງແດ່ຢູ່ໃນ ຂໍ້ທີ 24–26 ທີ່ສາມາດຊ່ວຍຕອບຄຳຖາມຂອງໂມເຊ?
ເຮົາໄດ້ຢູ່ເປັນວິນຍານກ່ອນທີ່ເຮົາຈະມາເກີດໃນໂລກນີ້.
ເຮົາຮູ້ຈັກພຽງເລັກນ້ອຍກ່ຽວກັບຊີວິດກ່ອນເກີດຂອງເຮົາ. ແຕ່ສິ່ງທີ່ເຮົາຮູ້ຫລາຍຢ່າງແມ່ນມາຈາກພາບນິມິດຂອງອັບຣາຮາມໃນ ອັບຣາຮາມ 3:22–28. ຂະນະທີ່ທ່ານອ່ານຂໍ້ເຫລົ່ານີ້, ໃຫ້ຂຽນລາຍຊື່ຂອງຄວາມຈິງທີ່ທ່ານພົບເຫັນ—ລວມທັງຄວາມຈິງກ່ຽວກັບຕົວທ່ານ ແລະ ພຣະເຢຊູຄຣິດ. ເປັນຫຍັງຄວາມຈິງເຫລົ່ານີ້ຈຶ່ງມີຄ່າຕໍ່ທ່ານ? ສິ່ງນີ້ສ້າງຄວາມແຕກຕ່າງແນວໃດແດ່ໃນຊີວິດຂອງທ່ານ?
ເບິ່ງ Topics and Questions, “Premortal Life,” ຫ້ອງສະໝຸດພຣະກິດຕິຄຸນ ນຳອີກ.
ສຳລັບຂໍ້ມູນເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.
ແນວຄິດສຳລັບການສິດສອນເດັກນ້ອຍ
ເຮົາເປັນລູກຂອງພຣະເຈົ້າ.
-
ຫລັງຈາກທີ່ພວກທ່ານອ່ານຂ່າວສານຂອງພຣະເຈົ້າເຖິງໂມເຊໃນ ໂມເຊ 1:4 ນຳກັນແລ້ວ, ໃຫ້ພິຈາລະນາທີ່ຈະໃຫ້ລູກໆຂອງທ່ານເບິ່ງພາບສະທ້ອນຂອງພວກເຂົາໃນແວ່ນ ແລະ ບອກຂ່າວສານໃນທຳນອງດຽວກັນທີ່ວ່າ: “ເຮົາເປັນລູກຂອງພຣະເຈົ້າ.” ແລ້ວພວກເຂົາສາມາດບອກຂ່າວສານອັນດຽວກັນນີ້ຕໍ່ກັນວ່າ: “ເຈົ້າເປັນລູກຂອງພຣະເຈົ້າ.” ທ່ານອາດຊອກຫາຮູບພາບຂອງຜູ້ຄົນຫລາກຫລາຍ ແລະ ເຊື້ອເຊີນໃຫ້ລູກໆຂອງທ່ານຊີ້ໃສ່ແຕ່ລະຮູບ ແລະ ເວົ້າວ່າ, “ຄົນນີ້ເປັນລູກຂອງພຣະເຈົ້າ.” ແບ່ງປັນນຳກັນວ່າເປັນຫຍັງພວກທ່ານຈຶ່ງດີໃຈທີ່ໄດ້ຮູ້ວ່າພວກທ່ານເປັນລູກຂອງພຣະເຈົ້າ. ຄວາມຮູ້ດັ່ງກ່າວນີ້ໄດ້ປ່ຽນແປງວິທີທີ່ພວກທ່ານປະຕິບັດຕໍ່ຕົວເອງ ແລະ ຄົນອື່ນແນວໃດ?
-
ທ່ານ ແລະ ລູກໆຂອງທ່ານສາມາດປຽບທຽບຂ່າວສານຂອງພຣະເຈົ້າເຖິງໂມເຊໃນ ໂມເຊ 1:4 ກັບຂໍ້ຄວາມຂອງຊາຕານໃນ ຂໍ້ທີ 12. ທ່ານຈະສາມາດຊ່ວຍລູກໆຂອງທ່ານໃຫ້ແຍກແຍະລະຫວ່າງ ຂ່າວສານຂອງພຣະເຈົ້າ ແລະ ຂ່າວສານຂອງຊາຕານທີ່ກ່າວກັບພວກເຂົາໄດ້ແນວໃດ?
Moses Sees Jehovah [ໂມເຊເຫັນພຣະເຢໂຮວາ], ໂດຍ ໂຈເຊັບ ບຣິກກີ (ລາຍລະອຽດ)
ພຣະບິດາເທິງສະຫວັນມີວຽກງານໃຫ້ເຮົາເຮັດ.
-
ຂະນະທີ່ທ່ານອ່ານ ໂມເຊ 1:6 ກັບລູກໆຂອງທ່ານ, ທ່ານອາດຈະເວົ້າກັບພວກເຂົາກ່ຽວກັບ “ວຽກງານ” ທີ່ພຣະເຈົ້າມີສຳລັບໂມເຊ. ໃຫ້ພິຈາລະນາທີ່ຈະໃຊ້ ປື້ມຮູບພຣະກິດຕິຄຸນ, ເລກທີ 13–16, ຫລື ເລື່ອງພຣະຄຳພີເດີມ, ໜ້າທີ 64–84, ເພື່ອຊ່ວຍໃຫ້ລູກໆຂອງທ່ານເຫັນສິ່ງທີ່ໂມເຊເຮັດສຳເລັດໄດ້ຈາກການຊ່ວຍເຫລືອຂອງພຣະບິດາເທິງສະຫວັນ. ວຽກງານທີ່ພຣະເຈົ້າມອບໝາຍໃຫ້ເຮົາເຮັດແມ່ນຫຍັງ? (ເບິ່ງ, ຍົກຕົວຢ່າງ, ຄຳສອນ ແລະ ພັນທະສັນຍາ 11:20).
ເຮົາສາມາດຕ້ານທານກັບການລໍ້ລວງຂອງຊາຕານ.
-
ຂະນະທີ່ທ່ານສຶກສາ ໂມເຊ 1:12–26 ກັບລູກໆຂອງທ່ານ, ຈົ່ງຊ່ວຍພວກເຂົາໃຫ້ຄົ້ນພົບສິ່ງທີ່ໂມເຊໄດ້ເຮັດເພື່ອຕໍ່ຕ້ານຊາຕານ (ເບິ່ງ ຂໍ້ທີ 13, 15, 18, 20–22, 26). ມັນອາດຈະເປັນເລື່ອງສະໜຸກສະໜານສຳລັບພວກເຂົາທີ່ຈະສະແດງຕາມສິ່ງທີ່ພວກເຂົາສາມາດເຮັດໄດ້ເພື່ອຕໍ່ຕ້ານການລໍ້ລວງ (ເຊັ່ນ ການອະທິຖານ, ການຍ່າງໜີ, ຫລື ການຮ້ອງຂໍຄວາມຊ່ວຍເຫລືອ).
ເຮົາໄດ້ຢູ່ເປັນວິນຍານກ່ອນທີ່ເຮົາຈະມາເກີດຢູ່ໃນໂລກ.
-
ການຮູ້ຈັກກ່ຽວກັບຊີວິດກ່ອນເກີດຂອງເຮົາສາມາດເປັນແຮງບັນດານໃຈໃຫ້ກັບລູກໆຂອງທ່ານໃນການຕັດສິນໃຈໂດຍຖືເອົາຄວາມຈິງນິລັນດອນເປັນຫລັກ. ເພື່ອຊ່ວຍໃຫ້ພວກເຂົາຮຽນຮູ້ກ່ຽວກັບເລື່ອງນັ້ນ, ທ່ານສາມາດມອບຄຳສຳຄັນ ຫລື ວະລີທີ່ສຳຄັນເພື່ອຊອກຫາໃນ ອັບຣາຮາມ 3:22–28 ໃຫ້ກັບພວກເຂົາ, ເຊັ່ນ “ກ່ອນໂລກເປັນມາ,” “ວິນຍານ,” “ສ້າງແຜ່ນດິນໂລກ,” ແລະ “ພິສູດ.” ຂໍ້ເຫລົ່ານີ້ສິດສອນເຮົາຫຍັງແດ່ກ່ຽວກັບເຫດຜົນທີ່ພຣະບິດາເທິງສະຫວັນ ແລະ ພຣະເຢຊູຄຣິດສົ່ງເຮົາມາຍັງໂລກນີ້?
-
ເພງເຊັ່ນ “ໂອ້ພຣະບິດາຜູ້ນິລັນ” (ເພງສວດ ແລະ ເພງຂອງເດັກນ້ອຍ, 18) ສາມາດເສີມສ້າງສິ່ງທີ່ ອັບຣາຮາມ 3 ສິດສອນໄວ້. ບາງທີທ່ານສາມາດເຊື້ອເຊີນລູກໆຂອງທ່ານໃຫ້ແຕ້ມຮູບທີ່ເຂົ້າກັບຄຳເວົ້າກໍໄດ້.
-
ຊ່ວຍລູກໆຂອງທ່ານໃຫ້ຄິດເຖິງສະຖານະການທີ່ພວກເຂົາຈະຕ້ອງເລືອກລະຫວ່າງຈະເຮັດໃນສິ່ງທີ່ພຣະເຈົ້າຂໍໃຫ້ພວກເຂົາເຮັດຫລືບໍ່ (ເບິ່ງ ອັບຣາຮາມ 3:25; ເບິ່ງ ສຳລັບຄວາມເຂັ້ມແຂງຂອງຊາວໜຸ່ມ: ຄຳແນະນຳສຳລັບການເລືອກ). ປ່ອຍໃຫ້ພວກເຂົາຝຶກຊ້ອມການຕອບຮັບທີ່ເປັນໄປໄດ້ຕໍ່ສະຖານະການເຫລົ່ານີ້. ພຣະຜູ້ຊ່ວຍໃຫ້ລອດສາມາດຊ່ວຍເຮົາແນວໃດເມື່ອເຮົາເລືອກຜິດທາງ?
ສຳລັບຂໍ້ມູນເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.