“ຄວາມຄິດທີ່ໃຫ້ເກັບໄວ້ໃນໃຈ: ການອ່ານພຣະຄຳພີເດີມ,” ຈົ່ງຕາມເຮົາມາ—ສຳລັບບ້ານ ແລະ ໂບດ: ພຣະຄຳພີເດີມ 2026 (2026)
“ການອ່ານພຣະຄຳພີເດີມ,” ຈົ່ງຕາມເຮົາມາ: 2026
ຄວາມຄິດທີ່ໃຫ້ເກັບໄວ້ໃນໃຈ
ການອ່ານພຣະຄຳພີເດີມ
ເມື່ອນີໄຟຕ້ອງການດົນໃຈພວກອ້າຍຂອງເພິ່ນໃຫ້ໄວ້ວາງໃຈພຣະຜູ້ເປັນເຈົ້າ, ເພິ່ນໄດ້ແບ່ງປັນເລື່ອງລາວກ່ຽວກັບໂມເຊ ແລະ ຄຳສອນຕ່າງໆຈາກເອເຊຢາ. ເມື່ອອັກຄະສາວົກໂປໂລຕ້ອງການໃຫ້ກຳລັງໃຈຊາວຄຣິດລຸ້ນດັ້ງເດີມໃຫ້ມີສັດທາໃນຄຳສັນຍາຂອງພຣະເຈົ້າ, ເພິ່ນໄດ້ເຕືອນພວກເຂົາກ່ຽວກັບສັດທາຂອງໂນອາ, ອັບຣາຮາມ, ຊາຣາ, ຣາຮາບ, ແລະ ຄົນອື່ນໆ. ແລະ ເມື່ອພຣະເຢຊູຄຣິດໄດ້ບອກພວກຜູ້ນຳຂອງຊາວຢິວໃຫ້, “ຄົ້ນຫາໃນພຣະຄຳພີ,” ໂດຍອະທິບາຍວ່າມັນ “ເປັນພະຍານໃຫ້ເຮົາ” (ໂຢຮັນ 5:39), ພຣະຄຳພີທີ່ພຣະອົງກ່າວເຖິງນັ້ນແມ່ນການຂຽນທີ່ເຮົາເອີ້ນວ່າ ພຣະຄຳພີເດີມ.
ໃນອີກຄຳໜຶ່ງ, ເມື່ອທ່ານອ່ານພຣະຄຳພີເດີມ, ທ່ານກຳລັງອ່ານພຣະຄຳທີ່ດົນໃຈ, ປອບໂຍນ, ແລະ ໃຫ້ກຳລັງໃຈຜູ້ຄົນຂອງພຣະເຈົ້າມາເປັນເວລາຫລາຍພັນປີ.
ແຕ່ວ່າບາງສິ່ງທີ່ຖືກຂຽນໄວ້ແຕ່ດົນນານມາແລ້ວນັ້ນຈະສາມາດຊ່ວຍທ່ານໃນການຊອກຫາວິທີແກ້ໄຂບັນຫາໃນປະຈຸບັນນີ້ໄດ້ແທ້ບໍ? ແມ່ນແລ້ວ, ມັນສາມາດຊ່ວຍໄດ້! ໂດຍສະເພາະຖ້າທ່ານຈື່ໄດ້ວ່າພຣະຄຳພີເດີມແມ່ນເລື່ອງລາວກ່ຽວກັບໃຜແທ້ໆ.
ປະຈັກພະຍານໜຶ່ງເຖິງພຣະເຢຊູຄຣິດ
ບໍ່ວ່າທ່ານ ແລະ ຄອບຄົວຂອງທ່ານກຳລັງປະເຊີນກັບຄວາມທ້າທາຍໃດໆກໍຕາມ, ຄຳຕອບກໍຄືພຣະເຢຊູຄຣິດຢູ່ສະເໝີ. ສະນັ້ນເພື່ອຊອກຫາຄຳຕອບໃນພຣະຄຳພີເດີມ, ໃຫ້ຊອກຫາພຣະອົງ. ມັນຈະບໍ່ແມ່ນເລື່ອງງ່າຍສະເໝີໄປ. ທ່ານອາດຕ້ອງໄດ້ໄຕ່ຕອງດ້ວຍຄວາມອົດທົນ ແລະ ສະແຫວງຫາການນຳພາທາງວິນຍານ. ບາງເທື່ອຄຳອ້າງອີງເຖິງພຣະອົງ ເບິ່ງເປັນແບບໂດຍກົງ, ດັ່ງທີ່ຢູ່ໃນການປະກາດຂອງເອຊາຢາ ທີ່ວ່າ, “ມີເດັກນ້ອຍຜູ້ໜຶ່ງໄດ້ເກີດມາໃຫ້ພວກເຮົາ: … ແລະ ພຣະອົງຈະມີນາມວ່າ … ອົງສັນຕິລາດ” (ເອຊາຢາ 9:6). ຢູ່ໃນບ່ອນອື່ນອີກ, ພຣະຜູ້ຊ່ວຍໃຫ້ລອດຖືກນຳສະເໜີໃນທາງທີ່ອ້ອມຄ້ອມກວ່າ, ຜ່ານທາງສັນຍາລັກ ແລະ ຄວາມຄ້າຍຄຽງ—ຍົກຕົວຢ່າງ, ຜ່ານທາງການຖວາຍສັດ ຫລື ໂດຍເລື່ອງລາວກ່ຽວກັບໂຢເຊັບໄດ້ໃຫ້ອະໄພແກ່ພວກອ້າຍຂອງລາວ ແລະ ຊ່ວຍຊີວິດເຂົາເຈົ້າຈາກຄວາມອຶດຢາກ.
Light of the World [ຄວາມສະຫວ່າງຂອງໂລກ], ໂດຍ ສະກາດ ຊຳເນີ
ຖ້າຫາກທ່ານສະແຫວງຫາສັດທາທີ່ຍິ່ງໃຫຍ່ກວ່າໃນພຣະຜູ້ຊ່ວຍໃຫ້ລອດ ຂະນະທີ່ທ່ານສຶກສາພຣະຄຳພີເດີມ, ທ່ານຈະພົບເຫັນມັນ. ບາງທີສິ່ງນີ້ສາມາດເປັນເປົ້າໝາຍຂອງການສຶກສາຂອງທ່ານໃນປີນີ້. ໃຫ້ອະທິຖານຂໍໃຫ້ພຣະວິນຍານນຳພາທ່ານໃຫ້ໄດ້ພົບເຫັນ ແລະ ເອົາໃຈໃສ່ຕໍ່ຂໍ້ພຣະຄຳພີ, ເລື່ອງລາວ, ແລະ ຄຳທຳນາຍ ທີ່ຈະນຳພາທ່ານໃຫ້ເຂົ້າໃກ້ພຣະເຢຊູຄຣິດຫລາຍກວ່າເກົ່າ.
ຖືກຮັກສາໄວ້ໂດຍສະຫວັນ
ຢ່າຄາດໝາຍໃຫ້ພຣະຄຳພີເດີມມີປະຫວັດສາດຂອງມະນຸດຊາດທີ່ລະອຽດ ແລະ ຊັດເຈນ. ນັ້ນບໍ່ໄດ້ເປັນເຈດຕະນາຂອງຜູ້ຂຽນ ແລະ ຜູ້ຮວບຮວມພຣະຄຳພີ. ຄວາມເປັນຫ່ວງຫລາຍກວ່າຂອງພວກເພິ່ນ ແມ່ນເພື່ອສິດສອນບາງສິ່ງກ່ຽວກັບພຣະເຈົ້າ—ກ່ຽວກັບແຜນຂອງພຣະອົງສຳລັບລູກໆຂອງພຣະອົງ, ກ່ຽວກັບຄວາມໝາຍຂອງການເປັນຜູ້ຄົນແຫ່ງພັນທະສັນຍາຂອງພຣະອົງ, ແລະ ກ່ຽວກັບວິທີທີ່ຈະພົບເຫັນການໄຖ່ ເມື່ອເຮົາຂາດຕົກບົກພ່ອງ. ບາງເທື່ອເຂົາເຈົ້າໄດ້ເຮັດໂດຍການເລົ່າເຖິງເຫດການໃນປະຫວັດສາດຕາມທີ່ເຂົາເຈົ້າເຂົ້າໃຈມັນ, ລວມທັງເລື່ອງລາວຈາກຊີວິດຂອງບັນດາສາດສະດາທີ່ຍິ່ງໃຫຍ່. ປະຖົມມະການເປັນຕົວຢ່າງເຖິງສິ່ງນີ້, ແລະ ເຊັ່ນດຽວກັນກັບໜັງສືໂຢຊວຍ, ພວກຜູ້ປົກຄອງ, ແລະ 1 ແລະ 2 ກະສັດ. ແຕ່ຜູ້ຂຽນພຣະຄຳພີເດີມຄົນອື່ນໆ ບໍ່ໄດ້ມີເປົ້າໝາຍຈະໃຫ້ເປັນປະຫວັດສາດຈັກໜ່ອຍເລີຍ. ແຕ່ພວກເພິ່ນໄດ້ສິດສອນຜ່ານທາງວຽກງານທາງສິລະປະ ດັ່ງເຊັ່ນບົດກະວີ ແລະ ວັນນະຄະດີ. ເພງສັນລະເສີນ ແລະ ສຸພາສິດ ກໍຢູ່ໃນຈຳພວກນີ້. ແລະ ແລ້ວກໍມີຖ້ອຍຄຳອັນມີຄ່າຂອງບັນດາສາດສະດາ, ເຊັ່ນເອຊາຢາ ແລະ ມາລາກີ, ຜູ້ໄດ້ກ່າວເຖິງພຣະເຈົ້າຕໍ່ຊາວອິດສະຣາເອນໃນສະໄໝບູຮານ—ແລະ, ຜ່ານທາງການມະຫັດສະຈັນຂອງພຣະຄຣິສຕະທຳຄຳພີ, ຊຶ່ງຍັງກ່າວກັບເຮົາຢູ່ໃນທຸກວັນນີ້.
ບັນດາສາດສະດາ, ນັກກະວີ, ແລະ ຜູ້ຮວບຮວມເຫລົ່ານີ້ໄດ້ຮູ້ບໍວ່າ ຖ້ອຍຄຳຂອງພວກເພິ່ນຈະຖືກອ່ານໂດຍຜູ້ຄົນຕະຫລອດທົ່ວໂລກ ເມື່ອຫລາຍພັນປີຈາກນັ້ນ? ເຮົາບໍ່ຮູ້. ແຕ່ເຮົາອັດສະຈັນໃຈທີ່ ສິ່ງນີ້ແຫລະທີ່ໄດ້ເກີດຂຶ້ນ. ປະຊາຊາດໄດ້ຖືກສະຖາປະນາຂຶ້ນ ແລະ ຕົກໄປ, ຕົວເມືອງໄດ້ຖືກຍຶດຄອງ, ກະສັດໄດ້ມີຊີວິດ ແລະ ຕາຍໄປ, ແຕ່ພຣະຄຳພີເດີມຢູ່ໄດ້ດົນນານກວ່າທັງໝົດນັ້ນ, ຈາກລຸ້ນສູ່ລຸ້ນ, ຈາກຜູ້ຂຽນຄົນແລ້ວຄົນເລົ່າ, ຈາກການແປເທື່ອແລ້ວເທື່ອເລົ່າ. ແນ່ນອນບາງສິ່ງໄດ້ສູນຫາຍໄປ ຫລື ຖືກປ່ຽນແປງ, ແຕ່ກໍຍັງມີຢ່າງຫລວງຫລາຍທີ່ຖືກຮັກສາໄວ້ຢ່າງມະຫັດສະຈັນ.
Old Testament Prophet [ສາດສະດາໃນພຣະຄຳພີເດີມ], ໂດຍ ຈູດິດ ເອ ເມີ (ລາຍລະອຽດ)
ທີ່ກ່າວມານີ້ ເປັນພຽງສອງສາມຢ່າງທີ່ໃຫ້ເກັບໄວ້ໃນໃຈ ຂະນະທີ່ທ່ານອ່ານພຣະຄຳພີເດີມໃນປີນີ້. ພຣະເຈົ້າໄດ້ຮັກສາການຂຽນບູຮານເຫລົ່ານີ້ໄວ້ ເພາະພຣະອົງຮູ້ຈັກທ່ານ ແລະ ຮູ້ຈັກສິ່ງທີ່ທ່ານກຳລັງປະເຊີນຢູ່. ພຣະອົງໄດ້ຕຽມຂ່າວສານທາງວິນຍານໄວ້ໃຫ້ທ່ານຢູ່ໃນຂໍ້ຄວາມເຫລົ່ານີ້, ຊຶ່ງຈະເຮັດໃຫ້ທ່ານເຂົ້າໃກ້ພຣະອົງຫລາຍກວ່າເກົ່າ ແລະ ສ້າງສັດທາຂອງທ່ານໃນແຜນຂອງພຣະອົງ ແລະ ໃນພຣະບຸດທີ່ຮັກຂອງພຣະອົງ. ບາງທີພຣະອົງຈະນຳພາທ່ານໄປຫາຂໍ້ພຣະຄຳພີໃດໜຶ່ງ ຫລື ໄປຫາຄວາມຮູ້ທີ່ຈະເປັນພອນໃຫ້ບາງຄົນທີ່ທ່ານຮູ້ຈັກ—ຂ່າວສານທີ່ທ່ານສາມາດແບ່ງປັນໃຫ້ກັບໝູ່ເພື່ອນ, ສະມາຊິກໃນຄອບຄົວ, ຫລື ເພື່ອນສິດທິຊົນດ້ວຍກັນ. ມັນມີຄວາມເປັນໄປໄດ້ຫລາຍໆຢ່າງ. ເມື່ອຄິດແລ້ວ ມັນເປັນເລື່ອງທີ່ໜ້າຕື່ນເຕັ້ນບໍ່?
ນີໄຟໄດ້ກ່າວວ່າ, “ຈິດວິນຍານຂອງຂ້າພະເຈົ້າເບີກບານໃນພຣະຄຳພີ” (2 ນີໄຟ 4:15). ບາງທີທ່ານຈະຮູ້ສຶກແບບດຽວກັນໃນຂະນະທີ່ທ່ານອ່ານຂໍ້ຄວາມອັນດຽວກັນກັບທີ່ນີໄຟໄດ້ອ່ານ—ຊຶ່ງປະຈຸບັນເຮົາເອີ້ນວ່າພຣະຄຳພີເດີມ.
ໜັງສືຕ່າງໆຢູ່ໃນພຣະຄຳພີເດີມ
ໃນພຣະຄຳພີເດີມຂອງຊາວຄຣິດສ່ວນຫລາຍ, ໜັງສືຕ່າງໆຢູ່ໃນນັ້ນອາດຖືກຈັດລຽງໃນວິທີທີ່ແຕກຕ່າງກັນ ເມື່ອໜັງສືເຫລົ່ານັ້ນຖືກຮວບຮວມເຂົ້າກັນເທື່ອທຳອິດເຮັດເປັນເຫລັ້ມດຽວ. ຂະນະທີ່ພຣະຄຣິສຕະທຳຄຳພີເປັນພາສາເຮັບເຣີ ຈັດລຽງໜັງສືເປັນສາມຈຳພວກ—ກົດ, ບັນດາສາດສະດາ, ແລະ ການຂຽນ—ພຣະຄຣິສຕະທຳຄຳພີຂອງຊາວຄຣິດສ່ວນຫລາຍໄດ້ຖືກຈັດລຽງໄວ້ເປັນສີ່ຈຳພວກ: ກົດ (ປະຖົມມະການ–ພຣະບັນຍັດສອງ), ປະຫວັດສາດ (ໂຢຊວຍ–ເອສະເທີ), ປຶ້ມບົດກະວີ (ໂຢບ–ເພງຄ່ຳຄວນ), ແລະ ບັນດາສາດສະດາ (ເອຊາຢາ–ມາລາກີ).
ເປັນຫຍັງຈຳພວກເຫລົ່ານີ້ຈຶ່ງສຳຄັນ? ເພາະວ່າ ການຮູ້ຈັກ ຊະນິດ ຂອງໜັງສືທີ່ທ່ານກຳລັງສຶກສາຢູ່ ສາມາດຊ່ວຍທ່ານໃຫ້ເຂົ້າໃຈ ວິທີ ທີ່ຈະສຶກສາມັນ.
ຕໍ່ໄປນີ້ແມ່ນບາງສິ່ງທີ່ຄວນເກັບໄວ້ຢູ່ໃນໃຈ ຂະນະທີ່ທ່ານເລີ່ມຕົ້ນອ່ານ “ກົດ,” ຫລື ໜັງສືຫ້າເຫລັ້ມທຳອິດຂອງພຣະຄຳພີເດີມ. ໜັງສືເຫລົ່ານີ້, ຊຶ່ງໂດຍທົ່ວໄປແລ້ວ ເຊື່ອວ່າເປັນຜົນງານຂອງໂມເຊ, ອາດຖືກສົ່ງຕໍ່ກັນມາຈາກຜູ້ຂຽນ ແລະ ຜູ້ຮວບຮວມຫລາຍຄົນໃນຊ່ວງເວລາຕ່າງໆ. ແລະ ເຮົາຮູ້ແລ້ວວ່າ, ຫລາຍສັດຕະວັດທີ່ຜ່ານມາ, “ຂໍ້ຄວາມຫລາຍຕອນຊຶ່ງແຈ່ມແຈ້ງ ແລະ ມີຄ່າທີ່ສຸດ” ຖືກນຳອອກໄປຈາກພຣະຄຣິສຕະທຳຄຳພີ (ເບິ່ງ 1 ນີໄຟ 13:23–26). ແຕ່ໜັງສືໂມເຊເປັນພຣະຄຳທີ່ດົນໃຈຈາກພຣະເຈົ້າ, ເຖິງແມ່ນວ່າມັນເປັນ—ເຊັ່ນດຽວກັນກັບວຽກງານອື່ນໆຂອງພຣະເຈົ້າ ຖືກສົ່ງຕໍ່ຜ່ານທາງມະນຸດ—ທີ່ຂຶ້ນກັບຄວາມບົກພ່ອງຂອງມະນຸດ (ເບິ່ງ ໂມເຊ 1:41; ຫລັກແຫ່ງຄວາມເຊື່ອ 1:8). ຄຳຂອງໂມໂຣໄນ, ຊຶ່ງອ້າງເຖິງພຣະຄຳພີມໍມອນທີ່ສັກສິດ ບັນທຶກວ່າເພິ່ນໄດ້ຊ່ວຍຮວບຮວມ, ກໍເປັນປະໂຫຍດຫລາຍຢູ່ໃນນີ້: “ຖ້າຫາກຈະມີສິ່ງທີ່ຂາດຕົກບົກພ່ອງກໍເປັນຄວາມຜິດຂອງມະນຸດ; ດັ່ງນັ້ນ ຈົ່ງຢ່າກ່າວໂທດເລື່ອງຂອງພຣະເຈົ້າ” (ໜ້າວິເຄາະສະບັບຂອງພຣະຄຳພີມໍມອນ). ໃນອີກຄຳໜຶ່ງ, ໜັງສືພຣະຄຳພີບໍ່ຈຳເປັນຕ້ອງປາດສະຈາກຄວາມຜິດພາດຂອງມະນຸດ ເພື່ອມາເປັນພຣະຄຳຂອງພຣະເຈົ້າ.