Mose 1; Aperaamo 3

“Ana faapea o loo fetalai tuusao atu le Alii ia te oe,” na aoao mai ai Peresitene Russell M. Nelson, “o le mea muamua lava Na te faamautinoa ua e malamalama i ai o lou faasinomaga moni” (“O Filifiliga mo le Faavavau” [faigalotu i le lalolagi atoa mo talavou matutua, Me 2022], Potutusi o le Talalelei). E mulimuli ane ai o le a taumafai Satani e faafenumiai oe i lena lava manatu. Vaavaai mo lenei mamanu i le savali a le Atua ia Mose i le Mose 1:4, 6 ma i savali a Satani i le Mose 1:12. O le a se mea e mafai ona e aoao mai i nei fuaiupu e uiga i eseesega i le va o le Atua ma Satani?

Sa aoao mai foi Peresitene Nelson, “Ae, o le auala e te mafaufau ai po o ai moni oe e aafia ai toetoe o faaiuga uma e te faia” (“O Filifiliga mo le Faavavau”). Mafaufau e fai se lisi o filifiliga e te faia aua o lou faasinomaga o se atalii o le Atua e muamua atu i isi faailoga.

O a ni fuaiupu po o ni fasifuaitau faaopoopo i le Mose 1 e fesoasoani ia te oe e malamalama ai i lou taua paia? E mafai foi ona e faitau atili i le savali a Peresitene Nelson i le vaega “O Filifiliga mo le Faavavau” ua faaulutalaina “Muamua: Ia iloa le upumoni po o ai oe.” O le a se mea ua e lagonaina ua musuia e fai e avea ai lou faasinomaga o se atalii o le Atua ma ou faailoga e sili ona taua?

Tagai foi i le “O le Atua lo’u Tama,” Viiga (1985), nu. 184; “Our True Identity” (vitio), Potutusi o le Talalelei; Autu ma Fesili, “Fanau a le Atua,” Potutusi o le Talalelei.

3:39

E pei ona faaalia manino mai i le Mose 1 , o aafiaga faaleagaga mamana e le faapea ai o le a le toe faaosoosoina lava i tatou. O le mea moni, o se tasi o togafiti a Satani o le faaosoosoina lea o i tatou ia masalosalo i nei aafiaga. Ao e faitau i le tali a Mose ia Satani i fuaiupu 12–26, o le a se mea ua e aoaoina e mafai ona fesoasoani e te tumau faamaoni ai i le molimau ua e mauaina? O le a le mea lea na iu ina fesoasoani ia Mose e faatoilalo ai Satani?

O le tasi lesona mai le aafiaga o Mose e faapea, o Satani e faaosoosoina i tatou i mea taufaasese e uiga i le upumoni ma le mana o le Atua. Mafaufau i nisi o faamatalaga pepelo o mea, e pei o se laau palasitika po o se pepe meataalo. E faapefea ona e iloa e le mo’i? Ona mafaufau lea i mea taufaasese o loo faaaogā e Satani i aso nei e faaosooso ai oe. O le a le mea ua e aoaoina mai le Mose 1:13–18 e uiga i le auala e iloa ai ma teena ana mea taufaasese? E mafai faapefea ona fesoasoani le Alii ia te oe? (tagai i le Mose 1:24–26).

Tagai foi i le Mataio 4:1–11; Gary E. Stevenson, “Aua E Te Taufaasese Mai Ia Te A’u,” Liahona, Nov. 2019, 93–96; “I Am a Son of God” (vitio), Potutusi o le Talalelei.

6:31

Ina ua mae’a le vaaia o se faaaliga o foafoaga a le Atua, sa talosaga atu Mose i le Alii: “Ta’u mai ia te a’u … aisea ua faapea ona i ai o ia mea” (Mose 1:30). O le a se mea e faagaeetia ai oe e uiga i le tali a le Alii o loo i le Mose 1:31–39? O le a le eseesega i le va o le tino ola pea ma le ola e faavavau? (tagai i Autu ma Fesili, “Ola e Faavavau,” Potutusi o le Talalelei). E faapefea ona fesoasoani Iesu Keriso e faataunuu uma ia mea e lua? Na maua foi e Aperaamo se faaaliga vaaia, o loo tusifaamaumauina i le Aperaamo 3. O le a se mea e te maua i fuaiupu 22–26 lea e mafai ona fesoasoani e tali ai le talosaga a Mose?

E le tele ni mea tatou te iloa e uiga i lo tatou muai olaga. Ae o le tele o mea ua tatou iloa e sau mai le faaaliga vaaia a Aperaamo o loo i le Aperaamo 3:22–28. A o e faitauina nei fuaiupu, fai se lisi o upumoni ua e maua—e aofia ai upumoni e uiga ia te oe lava ma le e uiga ia Iesu Keriso. Aisea e taua ai nei upumoni ia te oe? O le a le eseesega e mafai e lenei mea ona faia i lou olaga?

Tagai foi i Autu ma Fesili, “Muaiolaga,” Potutusi o le Talalelei.

• A uma ona outou faitau faatasi i le savali a le Atua ia Mose i le Mose 1:4, mafaufau e tuu atu i lau fanau e vaai i o latou ātaāta i se faaata ma tuuina atu ia i latou lava se savali faapena: “O a’u o se atalii o le Atua.” Ona mafai lea ona latou tuuina atu le savali lava lea e tasi i le tasi ma le isi: “O oe o se atalii o le Atua.” Atonu foi e te mauaina ni ata o ni tagata eseese ma valaaulia lau fanau e faasino atu i tagata taitoatasi ma faapea atu, “O se atalii lenei o le Atua.” Faasoa atu i le tasi ma le isi le mafuaaga ua outou fiafia ai i le iloaina o outou o fanau a le Atua. E faapefea e lenei malamalamaaga ona suia le auala e te taulimaina ai oe lava ma isi?

• E mafai ona faatusatusa e oe ma lau fanau le savali a le Atua ia Mose i le Mose 1:4 ma le savali a Satani i le fuaiupu e 12. E mafai faapefea ona e fesoasoani i lau fanau ia iloa le eseesega i le va o savali a le Atua ia i latou ma savali a Satani?

• A o e faitauina le Mose 1:6 ma lau fanau, atonu e mafai ona e talanoa ia i latou e uiga i le “galuega” sa i ai i le Atua mo Mose. Mafaufau e faaaoga le Tusi Ata o le Talalelei, nu. 13–16, po o Tala o le Feagaiga Tuai, itulau 64–84, e fesoasoani ai i lau fanau ia iloa mea na ausia e Mose i le fesoasoani a le Tama Faalelagi. O le a le galuega ua i ai i le Atua mo i tatou e fai? (tagai i le, mo se faataitaiga, Mataupu Faavae ma Feagaiga 11:20).

• A o e suesueina le Mose 1:12–26 ma lau fanau, fesoasoani ia i latou ia iloa le mea na faia e Mose e tetee atu ai ia Satani (tagai i fuaiupu 13, 15, 18, 20–22, 26). Atonu e mālie mo i latou le faatinoina o mea e mafai ona latou faia e tetee atu ai i faaosoosoga (e pei o le tatalo, savali ese, po o le ole atu mo se fesoasoani).

• O le iloaina e uiga i lo tatou muai olaga e mafai ona musuia ai lau fanau e faia filifiliga e faavae i luga o upumoni e faavavau. Ina ia fesoasoani ia i latou e aoao e uiga i ai, e mafai ona e tuuina atu ia i latou ni upu autu ma fasifuaitau e maua i le Aperaamo 3:22–28, e pei o le “a o lei i ai le lalolagi,” “agaga, “faia se lalolagi,” ma le “faamaonia.” O le a se mea ua aoao mai e nei fuaiupu ia i tatou e uiga i le mafuaaga na auina mai ai i tatou e le Tama Faalelagi i le lalolagi?

• O se pese e pei o le “O Le a Ou Mulimuli I Le Fuafuaga a le Atua” (Tusipese a Tamaiti, 86) e mafai ona faamalosia ai mea o loo aoao mai e le Aperaamo 3 . Atonu e mafai ona e valaaulia lau fanau e tusi ni ata e o faatasi ma upu.

• Fesoasoani i lau fanau e mafaufau i tulaga e tatau ona latou filifili ai pe faia pe leai foi o mea ua poloaiina ai i latou e le Atua (tagai i le Aperaamo 3:25; tagai foi i le Mo Le Malosi o le Autalavou: O Se Taiala mo le Faia o Filifiliga). Tuu atu ia i latou e faataitai ni tali e ono talafeagai i na tulaga. E mafai faapefea e le Faaola ona fesoasoani ia i tatou pe a tatou faia se filifiliga sese?