He Kupu Tīmatanga mō te Kawenata Tawhito

Ko tētahi huarahi e rapua ai ngā kai o te wairua i roto i te Kawenata Tawhito, koia ko te rapu i te Taro o te Ora, a Ihu Karaiti (tirohia Hoani 6:48). Hei tauira, he aha te āhua o te Kaiwhakaora ki tāu nā titiro i roto i ngā mea e whai ake nei?

• Mena (Ekoruhe 16:4, 11–15; Hoani 6:35)

• Te reme whakahere (Ekoruhe 12:3–5; Hoani 1:29)

• Te nākahi parāhe (Ngā Tau 21:4–10; Hoani 3:14)

• Hona (Hona 1:4–17; Matiu 12:38–41)

He aha ngā mea e ako ai koe i ēnei whiti Mōna? He aha atu ētahi whiti i te Kawenata Tawhito e mōhio nei koe e hāngai ana ki a Ihu Karaiti?

I tana karere “Jesus Christ Is the Treasure,” i akiaki a Erata Dale G. Renlund i a tātou “kia maumahara, ā, kia aro pūmau i ngā wā katoa ki a Ihu Karaiti” (Liahona, Noema 2023, 98). Me pānui e koe tana karere, e kimihia ana ngā mea e taea ana te mahi hei rapu i a Ihu Karaiti, ehara i te mea i roto i te Kawenata Tawhito, engari i roto hoki i tō oranga.

Tirohia anōtia “Types or Symbols of Christ” i te Kupu Aratohu ki ngā Karaipiture, “Jesus Christ,” Wharepukapuka Rongopai; “Seek the Lord Early,” Children’s Songbook, 108.

Nā Tumuaki Dallin H, Oaks i whakaako: “I whakahua ake te Matua i Tana Tama Kotahi Anake, a Ihu Karaiti, arā, ko Ia te Kaiwhakaora me te Kaihoko, ā, i whakahaua mai kia ‘whakarongo ki a Ia.’ Nō tēnei whakahau mōhio nei tātou ko ngā tuhinga karaipiture o ngā kupu i kōrerotia ai e te ‘Atua’ e te ‘Ariki’ rānei i te nuinga o te wā koinā ngā kupu a Ihowa, tō tātou Ariki kua whakaarahia, arā, ko Ihu Karaiti” (“The Teachings of Jesus Christ,” Liahona, Mei 2023, 102).

14:7

I te werotanga atu a ngā rangatira o ngā Hūrai ki a Ihu e pā ana ki Tōna tuakiri, ka whakapuakina e Ia, “I mua i te whānautanga mai o Aperahama, ko Au.” Nā ēnei kupu ohorere ai ngā tāngata i reira e whakarongo ana ki a Ihu, ā, i rite rawa rātou kia ākina Ia ki te kōhatu (tirohia Hoani 8:58–59). Me pānui Ekoruhe 3:13–15; 6:3–5 kia kitea he aha i tino riri ai ētahi o ngā Hūrai ki tā Ihu kōrero.

He aha e whakahirahira ai mōu kia mōhio ko Ihu Karaiti a Ihowa?

I roto i tētahi kitenga, i whakakitea mai e te Ariki ki a Nīwhai te putanga mai o te Paipera, e whakamāramahia ana ka tangohia atu ngā “mea mārama me ngā mea utu nui maha” i reira. Me pānui 1 Nīwhai 13:21-29, 38–42, e kimihia ana te rautaki a te Ariki kia “whakamōhiotia atu ngā mea mārama me ngā mea utu nui.” E ai ki 2 Nīwhai 3:12, me pēhea te Paipera rāua ko te Pukapuka a Moromona e mahi tahi ai?

I a koe e rangahau ana i te Kawenata Tawhito i tēnei tau, ka rangahau hoki koe “i ētahi atu pukapuka” i matakitea ai e Nīwhai. Anei ētahi o ēnei:

• Ko te Pukapuka a Mohi, tētahi wāhanga o tā Hōhepa Mete whakapākehātanga o te Paipera. Ko tāna he whakahoki i ētahi o ngā mea pono me ngā kōrero kāore e kitea ana i roto i ngā kupu kei roto o Kenehi 1–6.

• Ko te Pukapuka a Aperahama, i whakakitea mai nei ki a Hōhepa Mete i a ia e tirohia ana ngā tuhinga onamata Īhipiana (tirohia ngā Kaupapa me ngā Pātai, “Ko te Pukapuka a Aperahama,” Wharepukapuka Rongopai).

• Ētahi o ngā rerenga whiti mai i te Whakapākehātanga o Hōhepa Mete, ka kitea ētahi i roto i ngā kupu kīwae, te āpitihanga o te Paipera, me te Kupu Aratohu ki ngā Karaipiture.

Anei ētahi tauira mō ngā kōrero nō te Kawenata Tawhito i whakahokia mai nei mā roto i a Hōhepa Mete: Tō Enoka pā o Hīona (Mohi 7:18–19), Tā Aperahama kitenga o te huinga i te rangi (Aperahama 3:22–28), me te minitatanga o Merekihereke (Whakapākehātanga o Hōhepa Mete, Kenehi 14:25–40). He aha ēnei kōrero i te “mea mārama me te mea utu nui” ai ki a koe?

Ko te Kawenata Tawhito te kōrero mō te Atua e whai ana kia meinga tātou e Ia he “taonga motuhake” Māna mā runga i te kawenata (Ekoruhe 19:5). Nā taua take, ko tētahi huarahi e whakarite ai mō te pānui i te Kawenata Tawhito, koia, ko te ako e pā ana ki ngā kawenata—arā, ko te kawenata mau tonu i hoatu e te Atua ki ngā poropiti onamata pērā i a Aperahama, Ihaka, Hākopa, me ō rātou uri. Ko tētahi huarahi pai rawa ki te ako e pā ana ki ngā kawenata, koia, ko te rangahau i tā Tumuaki Russell M. Nelson karere “The Everlasting Covenant” (Liahona, Oketopa 2022, 4–11).

I a koe e pānui ana, uia ki a koe anō: He aha e whakahirahira ai ngā kawenata ki ahau? He aha “te momo aroha motuhake” e whiwhi nei au i te Atua i ahau e pupuri ana i aku kawenata ki a Ia? Ia koe e pānui ana i te Kawenata Tawhito i tēnei tau, kia mataara ki ngā mea e hiahia ana te Atua hei akoranga māu e pā ana ki tō hononga kawenata ki a Ia.

Tirohia anōtia Heremaia 31:31–34.

• Tērā pea ka uaua mā te hunga rangatahi kia mārama ki ngā kupu me te ahurea o te Kawenata Tawhito, engari māu rātou e āwhina kia kite atu i a Ihu Karaiti i roto i ngā tohu me ngā kōrero. Tērā pea me titiro koutou ko ō tamariki ki te whakaahua kei raro iho nei, Ka whakakite te Poropiti Ihāia mō te Whānautanga mai a Ihu . Tukuna āu tamariki kia tohua mai ngā mea e kitea ai e rātou. Kumea mai kia aro atu rātou ki te pēpi Ihu. Kātahi ka taea e koe te pānui tahi i tā Ihaia e pā ana ki te whānautanga mai o te Kaiwhakaora i Ihaia 7:14; 9:6. Tohaina atu ki āu tamariki he aha ō whakaaro e pā ana ki te titiro atu ki te Kaiwhakaora i te Kawenata Tawhito i tēnei tau.

  

• Kātahi koutou ko ō tamariki ka pānui i a Ngā Waiata 23 Ihāia 53:3–9 rānei e kimi ana i ngā kupu e whakamahara ana ki a Ihu Karaiti. He aha ngā akoranga i ēnei kupu e pā ana ki Tana oranga me Tōna Whakamārietanga?

• He kaupapa nui ngā kawenata i roto i te Kawenata Tawhito. Hei tūwheratanga kōrero māu ki ō tamariki e pā ana ki tēnei kaupapa, me kōrero tahi e pā ana ki ngā oati e meatia ana e rātou ki ngā whanaunga me ngā hoa, ā, he aha e whakahirahira ai hoki ki te pupuri i ēnei kawenata. Me titiro tahi ki tētahi pikitia mō te rumakitanga kātahi ka kōrero e pā ana ki te oati, te kawenata rānei, e meatia ana e tātou ki te Atua i te wā e rumakina ai tātou (tirohia Mōhia 18:10, 13). Māu hoki tētahi pikitia o te temepara e hura atu me te kōrero mō ō whakaaro e pā ana ki ngā kawenata e meatia ana e tātou i reira.

• Mā te whārangi mahi mō tēnei wiki e āwhina ai i ō tamariki kia hīkaka ki te mahi, ki te pupuri i ngā kawenata ki te Matua i te Rangi. Waiatahia ngātahitia tētahi waiata e pā ana ki te mahi i ngā kawenata, pērā i “When I Am Baptized” (Children’s Songbook, 103).

• E mōhio ana rānei ō tamariki ki tētahi tangata he maha ōna ingoa? Tērā pea he rerekē te ingoa o tētahi matua, kaiako rānei i te mahi, i te kāinga, i te hāhi rānei. Me āta kōrero mō aua ingoa; kātahi ka pānuitia Ekoruhe 6:3 me te tono i āu tamariki ki te rapu ingoa o Ihu Karaiti i mua i Tana whānautanga mai (tirohia anō hoki te Whakapākehātanga o Hōhepa Mete i te kupu kīwae c).