Fampahafantarana ny Testamenta Taloha

Fomba iray ahitana sakafo ara-panahy feno ao amin’ny Testamenta Taloha ny mitady ilay Mofon’aina, dia i Jesoa Kristy (jereo ny Jaona 6:48). Ohatra, hitanao ho inona ny Mpamonjy ao amin’ireto manaraka ireto?

• Mana (Eksodosy 16:4, 11–15; Jaona 6:35)

• ilay zanak’ondry atao sorona (Eksodosy 12:3–5; Jaona 1:29)

• Ilay menarana varahina (Nomery 21:4–9; Jaona 3:14)

• Jona (Jona 1:4–17; Matio 12:38–41)

Inona no ampianarin’ireo ohatra ireo antsika momba Azy? Inona koa ireo andinin-tsoratra masina hafa momba an’i Jesoa Kristy ao amin’ny Testamenta Taloha izay efa fantatrao?

Ao amin’ny hafany hoe “I Jesoa Kristy no harena,” dia namporisika antsika ny Loholona Dale G. Renlund mba “hahatsiaro sy hifantoka mandrakariva amin’i Jesoa Kristy” (Liahona, nôv. 2023, 98). Hevero ny hamaky ny hafany, ka tadiavo ireo zavatra azonao atao mba hahitana an’i Jesoa Kristy tsy ao amin’ny Testamenta Taloha ihany fa eo amin’ny fiainanao ihany koa.

Jereo koa ny “Tandindona na sarinteny momba an’i Kristy” ao amin’ny Torolalana ho an’ny Soratra Masina, “Jesoa Kristy,” Médiathèque de l’Évangile; “Hitady ny Tompo aho dieny izao,” Bokin-kiran’ny ankizy, 67.

Nampianatra ny Filoha Dallin H. Oaks hoe: “Ny Ray dia nampahafantatra fa i Jesoa Kristy Zanany Lahitokana no Mpamonjy sy Mpanavotra antsika ary nandidy antsika Izy hoe –henoy Izy.– Ny hevitra tsoahantsika avy amin’io torolalana io dia ny hoe ireo raki-tsoratra masina ahitana ny teny nambaran’ –Andriamanitra– na ny –Tompo– dia saika teny nambaran’i Jehovah, i Jesoa Kristy ilay Tompontsika nitsangana tamin’ny maty lalandava” (“Ireo fampianaran’i Jesoa Kristy,” Liahona, May 2023, 102).

14:6

Rehefa nifanditra tamin’i Jesoa mikasika ny maha-Izy Azy ireo mpitarika ny Jiosy dia nanambara Izy hoe: “Talohan’ny nisian’i Abrahama dia Izy Aho.” Ireo teny ireo dia nanaitra ny olona izay nandre an’i Jesoa, ary nivonona ny hitora-bato Azy izy ireo (jereo ny Jaona 8:58–59). Hevero ny hamaky ny Eksodosy 3:13–15; 6:3–5 mba hahitana ny antony nahatezitra ny Jiosy sasany tamin’ny zavatra nolazain’i Jesoa.

Nahoana no zava-dehibe aminao ny mahafantatra fa i Jesoa Kristy no Jehovah?

Tao anatin’ny fahitana iray, ny Tompo dia nampiseho an’i Nefia ny fivoahan’ny Baiboly, ka nanazava Izy fa “zavatra tsotra sady sarobidy” maro no hoesorina ao anatin’izany. Hevero ny hamaky ny 1 Nefia 13:21–29, 38–42, ka tadiavo ny drafitra nataon’ny Tompo mba “hampahafanta[rana] ireo zavatra tsotra sady sarobidy.” Araka ny 2 Nefia 3:12, dia ahoana no fomba hiarahan’ny Baiboly sy ny Bokin’i Môrmôna miasa?

Rehefa mandalina ny Testamenta Taloha ianao amin’ity taona ity dia handalina koa ny sasany amin’ireo “boky hafa” hitan’i Nefia mialoha. Tafiditra ao anatin’izany:

• Ny bokin’i Mosesy, ampahany mandrafitra ny fandikana ny Baiboly nataon’i Joseph Smith. Mamerina amin’ny laoniny ireo fahamarinana sy tantara tsy hita ao amin’ny lahatsoratry ny Genesisy 1–6 amin’izao fotoana izao izany.

• Ny bokin’i Abrahama, izay nambara tamin’i Joseph Smith rehefa namakafaka ireo papirosy Egyptiana fahiny izy (jereo ny Sujets et questions, “Origines du livre d’Abraham,” Médiathèque de l’Evangile).

• Ireo Andinin-tsoratra masina isan-karazany avy ao amin’ny Dikantenin’Joseph Smith, ka ny sasany amin’izany dia miseho eo amin’ny fanovozan-kevitra eny farany ambanin’ny pejy, ary ny Torolalana ho an’ny Soratra Masina.

Ireto misy ohatra vitsivitsy amin’ireo tantara ao amin’ny Testamenta Taloha izay naverina tamin’ny laoniny tamin’ny alalan’i Joseph Smith: ny tanànan’i Ziona an’i Enoka (Mosesy 7:18–19), ny fahitana hitan’i Abrahama momba ny filankevitra tany an-danitra (Abrahama 3:22–28), ary ny asa fanompoan’i Melkizedeka (Dikantenin’i Joseph Smith, Genesisy 14:25–40). Nahoana no “tsotra sady sarobidy” aminao ireo tantara ireo?

Ny Testamenta Taloha dia tantaran’ Andriamanitra mikatsaka ny hahatonga antsika ho “rakitra soa” ho Azy amin’ny alalan’ny fanekempihavanana (Eksodosy 19:5). Noho izany antony izany, ny fomba tsara hiomanana hamaky ny Testamenta Taloha dia ny mianatra momba ireo fanekempihavanana, indrindra fa ny fanekempihavanana maharitra mandrakizay izay natolotr’ Andriamanitra an’ireo mpaminany fahiny toa an’i Abrahama, i Isaka, i Jakoba ary ny taranany. Ary fomba iray tena tsara hianarana momba ireo fanekempihavanana ny mandalina ny hafatry ny Filoha Russell M. Nelson “Ny fanekempihavanana maharitra mandrakizay” (Liahona, ôktôbra 2022, 4–11).

Rehefa mamaky ianao dia manontania tena hoe: Nahoana no zava-dehibe amiko ireo fanekempihavanana? Inona no “karazam-pitiavana sy famindram-po miavaka” azoko avy amin’ Andriamanitra rehefa mitandrina ny fanekempihavanana nataoko Taminy aho? Eo am-pamakianao ny Testamenta Taloha amin’ity taona ity dia jereo ireo zavatra tian’ Andriamanitra hampianarina anao momba ny fifandraisanao mifono fanekempihavanana Aminy.

Jereo koa ny Jeremia 31:31–34.

• Mety ho sarotra ho an’ny ankizy ny mahatakatra ireo teny sy kolontsaina ao amin’ny Testamenta Taloha, kanefa afaka manampy azy ireo hahita an’i Jesoa Kristy ao anatin’ny tandindona sy tantara ianao. Azonao sy ny zanakao atao angamba ny mijery ilay sary etsy ambany, The Prophet Isaiah Foretells Christ’s Birth [Manambara mialoha ny fahaterahan’i Kristy ny Mpaminany Isaia]. Avelao ny zanakao hanondro ireo antsipirian-javatra hitan’izy ireo. Sariho manokana amin’i Jesoa zazakely ny sain’izy ireo. Avy eo dia azonao vakina miaraka amin’izy ireo ny zavatra nosoratan’i Isaia momba ny fahaterahan’ny Mpamonjy ao amin’ny Isaia 7:14; 9:6. Zarao amin’ny zanakao ny zavatra tsapanao momba ny fikarohana ny Mpamonjy ao amin’ny Testamenta Taloha amin’ity taona ity.

  

• Afaka mamaky ny Salamo 23 na ny Isaia 53:3–9 koa ianao sy ny zanakao ary mitady teny izay mampahatsiahy anareo an’i Jesoa Kristy. Inona no ampianarin’ireo teny ireo antsika momba ny fiainany sy ny Sorompanavotany?

• Lohahevitra lehibe ao amin’ny Testamenta Taloha ny fanekempihavanana. Mba hampahafantarana io lohahevitra io amin’ny zanakao dia azonao atao ny miresaka amin’izy ireo momba ireo fampanantenana ataon’izy ireo amin’ny fianakaviana na namana ary hazonin’izy ireo sy ny antony maha-zava-dehibe ny fitandremana ireo fampanantenana ireo. Azonareo atao avy eo ny mijery ny sarin’ny batisa iray ary miresaka momba ilay fampanantenana, na fanekempihavanana, ataontsika amin’ Andriamanitra rehefa atao batisa isika (jereo ny Môzià 18:10, 13). Azonao atao koa ny mampiseho sarin’ny tempoly ary mizara ny zavatra tsapanao momba ireo fanekempihavanana ataontsika any.

• Ny pejin’ny sahanasa ho an’ity herinandro ity dia afaka manampy ny zanakao ho faly hanao sy hitandrina fanekempihavanana amin’ny Ray any An-danitra. Azonareo atao koa ny mihira hira iray momba ny fanaovana fanekempihavanana, toy ny “Rehefa atao batisa aho” (Bokin-kiran’ny ankizy, 53).

• Moa ve ny zanakao mahafantatra olona izay antsoina amin’ny anarana samihafa any amin’ny sehatra samihafa? Angamba ny ray aman-dreny na mpampianatra iray dia antsoina amin’ny fomba samihafa any am-piasana sy any an-tokantrano ary any am-piangonana. Resaho ny momba ireo anarana ireo. Avy eo dia miaraha mamaky ny Eksodosy 6:3 ary asao ny zanakao hitady ireo anarana izay nahafantarana an’i Jesoa Kristy talohan’ny nahaterahany.