Iriburiro ku Isezerano rya Kera

Uburyo bumwe bwo kubona ibyo kurya bya roho mu Isezerano rya Kera ni ugushaka Umutsima w’Ubugingo, Yesu Kristo (reba Yohana 6:48). Nk’urugero, mbese ni gute mubona Umukiza mu mirongo ikurikira?

• Manu (Kuva 16:4, 11–15; Yohana 6:35)

• umwana w’intama wo gutangwamo igitambo (Kuva 12:3–5; Yohana 1:29)

• Inzoka y’umuringa (Kubara 21:4–10; Yohana 3:14)

• Yona (Yona 1:4–17; Matayo 12:38–41)

Mbese ni iki izi ngero zigisha kuri We? Mbese ni izihe mfashanyigisho kuri Yesu Kristo ziri mu Isezerano rya Kera usanzwe uzi?

Mu butumwa bwe “Yesu Kristo ni Ubutunzi,” Umukuru Dale G. Renlund yadushishikarije “kwibuka no guhora [twibanda] kuri yesu Kristo.” (Liyahona, Ugushyingo. 2023, 98). Mutekereze gusoma ubutumwa bwe, mushaka ibintu mushobora gukora kugira ngo mubone Yesu Kristo atari mu Isezerano rya Kera gusa ahubwo no mu buzima bwanyu.

Reba na none “Types or Symbols of Christ” muri Guide to the Scriptures, “Jesus Christ,” Isomero ry’Inkuru Nziza; “Seek the Lord Early,” Children’s Songbook, 108.

Umuyobozi Dallin H. Oaks yarigishije ati: “Data yazanye Umwana we w’Ikinege, Yesu Kristo, nk’Umukiza n’Umucunguzi kandi aduha itegeko ryo ‘kumwumvira.’ Duhereye kuri iki cyerekezo twanzura ko amagambo y’ibyanditswe yavuzwe n’‘Imana’ cyangwa ‘Nyagasani’ ahora ari nk’amagambo ya Yehova, Nyagasani wacu wazutse, Yesu Kristo” (“Inyigisho za Yesu Kristo,” Liyahona, Gicurasi 2023, 102).

14:7

Igihe abayobozi b’Abayahudi bageragezaga Yesu bamubaza uwo ari we, Yaratangaje ati, “Mbere y’uko Aburahamu abaho, Nari ndiho.” Ayo magambo yatunguye abantu bumvise Yesu, kandi bari biteguye kumutera amabuye (reba Yohana 8:58–59). Mutekereze gusoma Kuva 3:13–15; 6:3–5 kugira ngo murebe impamvu Abayahudi bamwe barakariye ibyo Yesu yavuze.

Mbese ni kuki ari ngombwa ko mumenyako Yesu Kristo ari Yehova?

Mu iyerekwa, Nyagasani yeretse Nefi ukuza kwa Bibiliya, asobanura ko “ibintu byinshi byeruye kandi by’agaciro gakomeye” bizakurwa muri yo. Mutekereze gusoma 1 Nefi 13:21–29, 38–42, mureba uko Nyagasani yateguye “kumenyekanisha ibintu byeruye kandi by’agaciro gakomeye.” Bijyanye na 2 Nefi 3:12, mbese ni gute Bibiliya n’Igitabo cya Morumoni bikorana?

Uko mwiga Isezerano rya Kera uyu mwaka, muziga n’“ibindi bitabo” Nefi yabonye. Ibyo birimo:

• Igitabo cya Mose, igice cy’ubusemuzi bwa Joseph Smith bwa Bibiliya. Kigarura ukuri n’inkuru zitaboneka mu nyandiko y’ubu ya Itangiriro 1–6.

• Igitabo cya Aburahamu, cyahishuriwe Joseph Smith ubwo yasuzumaga inyandiko za kera z’Abanyegiputa (reba Topics and Questions, “Book of Abraham,” Isomero ry’Inkuru Nziza).

• Imirongo itandukanye yo mu busemuzi bwa Joseph Smith, imwe muri yo igaragara mu dusobanuro mpezarupapuro, ku mugereka wa Bibiliya, na Guide to the Scriptures.

Aha hari zimwe mu nkuru zo mu Isezerano rya Kera zagaruwe binyuze kuri Joseph Smith: umujyi wa Siyoni wa Henoki (Mose 7:18–19), iyerekwa rya Aburahamu ry’inama yabereye mu ijuru (Aburahamu 3:22–28), n’iyogezabutumwa rya Melekizedeki (Ubusemuzi bwa Joseph Smith, Itangiriro 14:25–40). Mbese ni kuki izi nkuru ari iz’ibintu “byeruye kandi by’agaciro gakomeye” kuri mwebwe?

Isezerano rya Kera ni inkuru y’Imana ishakisha uko yatugira “ubutunzi bwihariye” bwayo kubw’igihango (Kuva 19:5). Kubw’iyo mpamvu, uburyo bwiza bwo kwitegura gusoma Isezerano rya Kera ni ukwiga iby’ibihango—by’umwihariko igihango cy’iteka ryose Imana yagiranye n’abahanuzi ba kera nka Aburahamu, Isaka, Yakobo n’ababakomokaho. Kandi uburyo bwiza bwo kwiga ibihango ni ukwiga ubutumwa bw’Umuyobozi Russell M. Nelson “Igihango cy’Iteka ryose” (Liyahona, Ukwakira 2022, 4–11).

Uko musoma, wibaze ubwawe uti: Ni iyihe mpamvu ibihango ari ingirakamaro kuri njye? Ni ubuhe “bwoko bw’urukundo n’impuhwe byihariye” nakira biturutse ku Imana uko nubahiriza ibihango byanjye na Yo? Uko musoma Isezerano rya Kera uyu mwaka, nimurebe ibintu Imana ishaka kubigisha ku isano riri hagati y’igihango cyawe na Yo.

Reba na none Yeremiya 31:31–34.

• Amagambo n’umuco byo mu Isezerano rya Kera bishobora kugorana gusobanukirwa ku bana, ariko ushobora kubafasha kubona Yesu Kristo mu bimenyetso no mu nkuru. Ahari mwebwe n’abana banyu mushobora kureba ishusho ikurikira, The Prophet Isaiah Foretells Christ’s Birth [Umuhanuzi Yesaya Avuga ku Ivuka rya Kristo]. Nimureke abana banyu bagaragaze ibisobanuro babona. Nimubashishikarize, by’umwihariko, kwita ku mwana Yesu. Noneho mushobora gusomeraa hamwe nabo ibyo Yesaya yanditse ku ivuka ry’Umukiza Yesaya 7:14; 9:6. musangize abana banyu uko mwumva mwashakira Umukiza mu Isezerano rya Kera uyu mwaka.

  

• Mwebwe n’’abana banyu mushobora na none gusoma Zaburi 23 cyangwa Yesaya 53:3–9 maze mugashaka amagambo abibutsa Yesu Kristo. Ni iki aya magambo atwigisha ku buzima Bwe n’Impongano?

• Ibihango ni insanganyamatsiko ikomeye mu Isezerano rya Kera. Kugira ngo mubwire abana banyu iyi nsanganyamatsiko, mushobora kubaganiriza ku masezerano bakora kandi bakubahiriza hamwe n’umuryango cyangwa inshuti n’impamvu kubahiriza ayo masezerano ari ingenzi. Mushobora noneho kureba ishusho y’umubatizo noneho mukaganira ku isezerano, cyangwa igihango, tugirana n’Imana iyo tubatijwe (reba Mosaya 18:10, 13). Mushobora na none kubereka ishusho y’ingoro maze mukabasangiza ibyiyumviro byanyu ku bihango mugirirayo.

• Paji y’igikorwa cy’iki cyumweru rushobora gufasha abana banyu kunezezwa no kugirana no kubahiriza ibihango na Data wo mu Ijuru. Mushobora na none kuririmba indirimbo ivuga ku kugirana ibihango, nka “When I Am Baptized” (Children’s Songbook, 103).

• Mbese abana banyu bazi umuntu ufite amazina atandukanye mu buryo butandukanye? Ahari umubyeyi cyangwa umwarimu yitwa bitandukanye ku kazi, mu rugo, no ku rusengero. Muganire kuri ayo mazina; noneho musomere Kuva 6:3 hamwe maze musabe abana banyu gushaka amazina Yesu Kristo yari azwiho mbere y’uko avuka (reba na none ubusemuzi bwa Joseph Smith ku Kuva 6:3 c).