Ahyɛmu Dadaw no Mbueienyi

Kwan kor a yebotum enya sunsum mu edziban mapã wɔ Ahyɛmu Dadaw mu nye yɛbɔhwehwɛ Nkwa Paanoo no, Jesus Christ (hwɛ John 6:48). Mfatoho, isi dɛn hu Agyenkwa no wɔ dza odzi do yi no mu?

• Edziban (Exodus 16:4, 11–15; John 6:35)

• Eguambaa a wɔdze robɔ afɔr (Exodus 12:3–5; John 1:29)

• Boran abowatsena no (Nkanee 21:4–10; John 3:14)

• Jonah (Jonah 1:4–17; Matthew 12:38–41)

Ebɛnadze na mfatoho yinom kyerɛkyerɛ fa No ho? Ebɛn ntotoho bi so a ɔfa Jesus Christ ho wɔ Ahyɛmu Dadaw no mu a inyim no dadaw?

N’asɛm “Jesus Christ Nye Akoradze no mu no,” Elder Dale G. Renlund hyɛɛ hɛn nkuran dɛ “aber nyina [yɛn]kaa Jesus Christ na [yen]tsim wɔ no do” (Liahona, Ɔberɛfɛw 2023, 98). Susu dɛ ebɛkenkan n’asɛm a, erohwehwɛ ndzɛmba a ibotum ayɛ dze ehu Jesus Christ nnyɛ wɔ Ahyɛmu Dadaw mu nko mbom wɔ w’abrabɔ so mu.

Hwɛ “Christ ho Nsɛnkyerɛdze anaa Ngyinahɔmadze Horow” wɔ Kyerɛwsɛm no Kwankyerɛ mu, “Jesus Christ,” Asɛmpa Nwoma Korabea; “Seek the Lord Early,” Children’s Songbook, 108 so.

President Dallin H. Oaks kyerɛkyerɛɛ dɛ: “Egya no daa Ne Ba a Wɔwoo no Kortoo no, Jesus Christ, edzi, dɛ hɛn Agyenkwa na Pomfo na Ɔhyɛɛ hɛn mbra dɛ ‘yentsie No.’ Fi akwankyerɛ yi mu no yesi no pi dɛ kyerɛwsɛm no mu nsɛm a ‘Nyame’ anaa ‘Ewuradze’ akã no nyina taa yɛ Jehovah, hɛn Ewuradze a Ɔasoɛr, Jesus Christ Ne nsɛm” (“The Teachings of Jesus Christ,” Liahona, Esusow Aketseaba 2023, 102).

14:7

Ber a Jewfo hɔn baanodzifo no gyee kyim wɔ Jesus Ne nyimpa ban ho no, Ɔpaa mu kãa dɛ, “Ansaana Abraham rebɛba no, nna mowɔ hɔ.” Nsɛm yinom yɛɛ nkorɔfo a wotsiee Jesus no ahobow, nna wɔayɛ krado do dɛ wobesiw No abo (hwɛ John 8:58-59). Hwɛ dɛ ebɛkenkan Exodus 3:13–15; 6:3–5 dze ehu siantsir a nna Jewfo binom hɔn bo fuuw dodow wɔ dza Jesus kãe no ho.

Ebɛnadze ntsi na ɔyɛ adze tsitsir ma wo dɛ ibohu dɛ Jesus Christ nye Jehovah?

Enyido-adzehu mu no, Ewuradze dze Bible a obopue no kyerɛɛ Nephi, a ɔkyerɛkyerɛɛ mu dɛ wobeyi “ndzɛmba pii a ɔda edzi pefee na dza ɔsom bo” no efi mu. Susu dɛ ebɛkenkan 1 Nephi 13:21–29, 38–42, a erohwehwɛ mbrɛ Ewuradze sii hyehyɛɛ ma “wohun ndzɛmba a ɔda edzi pefee na dza ɔsom bo no.” Dɛ mbrɛ 2 Nephi 3:12 kã no, Bible na Mormon Nwoma no si dɛn bɔ mu yɛ edwuma?

Ber a isũa Ahyɛmu Dadaw afe yi no, ebɛsan so esũa “nowma binom so a” Nephi dzii kan hunii no. Iyinom kã ho:

• Moses nwoma no, Joseph Smith ne Bible nkyerɛasee no mu bi. Ɔdze nokwar na nsɛm a wonnhu no wɔ ndɛ Genesis 1–6 no san ananmu ba.

• Abraham nwoma no, a woyii kyerɛɛ Joseph Smith mber a nna ɔrohwehwɛ tsetse Egyptfo nwoma mu no (hwɛ Topics and Questions, “Book of Abraham,” Asɛmpa Nwoma Korabea).

• Nsɛnsin horow fi Joseph Smith Nkyerɛasee mu, no mu bi a opue wɔ Kyerɛwsɛm no Kwankyerɛ mu.

Mfatoho bi fi Ahyɛmu Dadaw nsɛm a wɔdze duaa Joseph Smith do dze san ananmu bae nye yi: Enoch no kuropɔn Zion (Moses 7:18–19), Abraham n’enyido-adzehu fa sor baguabɔ no ho (Abraham 3:22–28), na Melchizedek no somdwuma (Joseph Smith Nkyerɛasee, Genesis 14:25–40). Ebɛnadze ntsi na nsɛm yinom “da edzi pefee na ɔsom bo” ma wo?

Ahyɛmu Dadaw no yɛ Nyankopɔn a Ɔrohwehwɛ edua ahyɛmudzi do ayɛ hɛn No “soronko egyapadze” (Exodus 19:5). Ne siantsir ntsi, kwan pa a yɛdze bɛyɛ ahoboa dze akenkan Ahyɛmu Dadaw no nye dɛ yebosũa ahyɛmudzi horow ho asɛm—nkanka daapem ahyɛmudzi no a Nyankopɔn dze maa tsetse nkɔnhyɛfo tse dɛ Abraham, Isaac, Jacob, na hɔn asefo no. Na kwan kɛse a yɛdze bosũa ahyɛmudzi horow ho asɛm nye yebosũa President Russell M. Nelson ne nsɛm “The Everlasting Covenant” (Liahona, Ɔbɛsɛ 2022, 4–11).

Ber a ekenkan no bisa woho dɛ: Ebɛnadze ntsi na ahyɛmudzi horow hia ma me? Ebɛn “ɔdɔ na ehumbɔbɔr soronko” na minya fi Nyankopɔn hɔ ber a misie m’ahyɛmu horow no a menye No edzi no? Ber a ekenkan Ahyɛmu Dadaw no afe yi no, hwɛ ndzɛmba a Nyankopɔn pɛ dɛ ɔkyerɛkyerɛ wo fa enye No ntamu ahyɛmudzi nkitahodzi ho asɛm no.

Hwɛ Jeremiah 31:31–34 so.

• Bia Ahyɛmu Dadaw ne nsɛm na kusum no bɛyɛ dzen ama mbofra dɛ wɔbɛtse ase, naaso ibotum aboa hɔn ma woehu Jesus Christ wɔ nsɛnkyerɛdze na nsɛm mu. Bia ɔwo na wo mbofra botum ahwɛ mfonyin a ɔwɔ ase no, The Prophet Isaiah Foretells Christ’s Birth [Nkɔnhyɛnyi Isaiah Kã Christ N’Awoe ho Asɛm]. Ma wo mbofra no nda ndzɛmba a wohu no mfonyin no mu no edzi. Tsitsir ara, twe hɔn adwen gyina abɔdomaba Jesus do. Nkyii ibotum nye hɔn akenkan dza Isaiah kyerɛwee faa Agyenkwa n’awoe ho wɔ Isaiah 7:14; 9:6. Enye wo mbofra no nkyɛ atsenkã a inya fa erohwehwɛ Agyenkwa no wɔ Ahyɛmu Dadaw no mu wɔ afe yi mu no ho.

  

• Ɔwo na wo mbofra no so botum akenkan Ndwom 23 anaa Isaiah 53:3–9 na wɔahwehwɛ nsɛmfua a ɔbɔ hɔn Jesus Christ ho nkaa. Ebɛnadze na nsɛmfua yinom kyerɛkyerɛ hɛn fa N’abrabɔ na No Werdambɔ ho?

• Ahyɛmudzi horow yɛ asɛngyinado tsitsir wɔ Ahyɛmu Dadaw no mu. Ama ebue asɛngyinado yi enyi akyerɛ wo mbofra no, ibotum akã anohoba horow a wɔnye hɔn ebusua anaa anyɛnkofo yɛ na siantsir a worisie anohoba horow yinom hia ho asɛm akyerɛ hɔn. Nkyii hom botum ahwɛ enuma ho mfonyin na hom akã anohoba, anaa ahyɛmu, a yɛnye Nyankopɔn dzi ber a wonuma hɛn ho asɛm (hwɛ Mosiah 18:10, 13). Ibotum so edze temple no mfonyin akyerɛ na akyɛ w’atsenka afa ahyɛmu horow a yɛyɛ no wɔ hɔ ho.

• Dapɛn yi dwumadzi krataafa no botum aboa ma wo mbofra no hɔn enyi agye ma wɔnye Ɔsor egya edzi ahyɛmu na woesie. Hom botum asan atow ndwom afa woridzi ahyɛmu ho, tse dɛ “When I Am Baptized” (Children’s Songbook, 103).

• Ana wo mbofra no nyim obi a okitsa dzin fofor wɔ gyinabew fofor mu a? Bia ɔwofo anaa kyerɛkyerɛnyi bi wɔ mbrɛ wosi frɛ no wɔ edwuma mu, wɔ fie, na wɔ asɔr. Kã edzin no ho asɛm; nkyii hom mbɔ mu nkenkan Exodus 6:3 na to nsa frɛ wo mbofra ma wɔnhwehwɛ edzin a nna wɔdze nyim Jesus Christ ansaana wɔrowo No (hwɛ Joseph Smith Nkyerɛasee wɔ ase nsensin c).