“Adwendwen a ɔwɔ dɛ Edwen ho na Ekaa: Erekenkan Ahyɛmu Dadaw no,” Bra, Bɛka Mo Do—Dze Ma Fie na Asɔr: Ahyɛmu Dadaw 2026 (2026)
“Erekenkan Ahyɛmu Dadaw no,” Bra, Bɛka Mo Do”: 2026
Adwendwen a ɔwɔ dɛ Edwen ho na Ekaa
Erekenkan Ahyɛmu Dadaw no
Mber a nna Nephi pɛ dɛ okenyan no nuambanyin ma wɔtwer Ewuradze no, ɔkãa Moses ho nsɛm na nkyerɛkyerɛ fi Isaiah nwoma mu. Mber a nna Ɔsomafo Paul pɛ dɛ ɔhyɛ Christianfo edzikamfo no nkuran dɛ wonya gyedzi wɔ Nyankopɔn n’anohoba horow mu no, ɔbɔɔ hɔn nkaa faa Noah, Abraham, Sarah, Rahab, na nkaafo no hɔn gyedzi ho. Na mber a Jesus Christ kãa kyerɛɛ Jewfo hɔn baanodzifo no dɛ “wɔnhwehwɛ kyerɛwsɛm mu no,” Ɔkyerɛkyerɛɛ mu dɛ “wɔgye mo ho dase” (John 5:39), kyerɛwsɛm a nna Ɔrekã ho asɛm no nye nkyerɛwee a yɛfrɛ no Ahyɛmu Dadaw no.
Anaaso dɛ, sɛ ekenkan Ahyɛmu Dadaw no a, nna erekenkan nsɛm a woekenyan, wɔakyekye werɛ, na wɔahyɛ Nyankopɔn no nkorɔfo nkuran mfe mpem mpem.
Naaso ana dza wɔakyerɛw no mber tsentsenntsen a etwa mu kɔ botum aboa wo ma enya ndɛ nsɛnhia ho mbuae ankasa a? Nyew, obotum! Nkanka sɛ ekaa nyia nokwar ara Ahyɛmu Dadaw no fa no ho a.
Jesus Christ N’Ahyɛmu
Nsɔhwɛ biara a ɔwo nye w’ebusua rihyia no, aber nyina ne nyiano nye Jesus Christ. Ntsi ama enya nyiano wɔ Ahyɛmu Dadaw mu no, hwehwɛ No. Ɔrennyɛ mberɛw aber nyina. Bia a obehia dɛ abotar mu ara edwendwen ho na ehwehwɛ sunsum mu kwankyerɛ. Ɔtɔfabi a nhwehwɛmu fa No ho no bɛyɛ pɔkyee, dɛ mbrɛ ɔwɔ Isaiah ne dawurbɔ mu no dɛ, “Na ɔawo ɔba ama hɛn, ɔama hɛn ɔbabanyin: … na wɔbɛfrɛ ne dzin: … Asomdwee Hen’’ (Isaiah 9:6). Beebi binom no, Agyenkwa no wodua nsɛnkyerɛdze na asɛfo mu da no edzi a ɔnnyɛ pefee—mfatoho, wodua mbowa afɔrbɔ ho nsɛnkã do anaa Joseph a ɔdze no nuambanyin hɔn bɔn kyɛɛ hɔn na ɔgyee hɔn fii ɔkɔm mu ho asɛm do.
Light of the World [Wiadze no ne Kan], Scott Summer yɛɛ nsaano mfonyin no
Sɛ ehwehwɛ gyedzi kɛsenara wɔ Agyenkwa no mu ber a isũa Ahyɛmu Dadaw no a, ibohu. Bia iyi botum ayɛ afe yi w’adzesũa no botae. Bɔ mpaa dɛ Sunsum no bɛyɛ wo kwankyerɛfo ma ehu na etsim nsɛnsin, nsɛm, na nkɔnhyɛsɛm a ɔdze wo bɛbɛn Jesus Christ ho yie do.
Ɔsor Tum Akora do
Mma w’enyi nnda kwan dɛ Ahyɛmu Dadaw no bɛma adasamba hɔn abakɔsɛm ne nyinara na pɛpɛɛpɛ. Nnyɛ dɛm na asɔpɔkan akyerɛwfo na mboanofo no nna wɔrobɔ mbɔdzen dɛ wɔbɛyɛ. Nna dza ohia hɔn kɛsenara nye dɛ wɔbɛkyerɛkyerɛ biribi fa Nyankopɔn ho—ɔfa Ne nhyehyɛɛ ma Ne mba ho, ɔfa yɛbɛyɛ N’ahyɛmudzi nkorɔfo n’asekyerɛ ho, na ɔfa sɛ yɛtɔ sin a mbrɛ yebesi bɔhwehwɛ ɔpon ho. Ɔtɔfabi a nna wɔyɛ iyi ber a wɔkyerɛw abakɔsɛm mu dza osisii dɛ mbrɛ wɔtsee ase no, a nkɔnhyɛfo ekunyin hɔn abrabɔ mu nsɛm kã ho. Genesis nwoma yɛ iyi ho mfatoho, na mbuukuu dɛmara so tse dɛ Joshua, Ɔtsɛmbuafo, na 1 na 2 Ahemfo. Naaso nna nnyɛ abakɔsɛm koraa nye Ahyɛmu Dadaw akyerɛwfo binom no hɔn botae. Mbom, woduaa awensɛm na nwoma edwin do dze kyerɛkyerɛe. Ndwom na Mbɛbusɛm hyɛ nhyehyɛɛ yi mu. Na nkyii nkɔnhyɛfo tse dɛ Isaiah na Malachi, a wɔkãa Nyankopɔn n’asɛm kyerɛɛ tsetse Israel hɔn nsɛm a ɔsom bo wɔ hɔ—na, ɔnam Bible n’awanwadze do, wɔda ho kasa kyerɛ hɛn ndɛ.
Ana nna nkɔnhyɛfo, awensɛm kyerɛwfo, na mboanofo yinom nyim dɛ mfe mpempem ekyir no nkorɔfo a wɔwɔ wiadze nyina bɛkenkan hɔn nsɛm no? Yennyim. Naaso ɔyɛ hɛn ahobow dɛ dɛm pɛpɛɛpɛr na oesi. Amanaman soɛree na wɔhwee ase, nkuropɔn dzii nkogu, ahemfo tsenaa ase na wowuwui, naaso Ahyɛmu Dadaw no akyɛr asen hɔn nyinara, fi mbasantsen dze kesi mbasantsen, fi ɔkyerɛwfo dze kesi ɔkyerɛwfo do, fi nkyerɛasee dze kesi nkyerɛasee. Ɔyɛ nokwar ndzɛmba bi yewee anaa wɔsesaa no, na mbom ahobow mu ara dodow ara na wɔkoraa do.
Old Testament Prophet [Ahyɛmu Dadaw Nkɔnhyɛnyi], Judith A. Mehr yɛɛ nsaano mfonyin no (ne fã bi)
Iyinom yɛ ndzɛmba kakra ara a ɔwɔ dɛ ehyɛ no nsew ber a afe yi ekenkan Ahyɛmu Dadaw no. Nyankopɔn koraa tsetse nkyerɛwee yinom do osiandɛ Onyim wo na dza erefa mu. Oesiesie sunsum mu nsɛm ama wo wɔ nsɛm yinom mu, a wɔbɔtwe wo abɛn No yie na wɔatow wo gyedzi wɔ Ne nhyehyɛɛ na No Dɔba do. Bia Obegya wo akɔ asɛnsin anaa nhumu bi ho a obehyira obi a inyim no—asɛm a ibotum nye nyɛnko, busuanyi, anaa Ɔhotseweenyi fɛfo bi akyɛ. Akwan pii wɔ hɔ. Ana ɔnyɛ enyigye dɛ ebɔdwen ho a?
Nephi kãa dɛ, “Me kra enyi gye kyerɛwsɛm ho” (2 Nephi 4:15). Bia ibenya dɛm atsenka noara ber a ekenkan nsɛm pii a Nephi kenkanee no—dza sesei yɛfrɛ no Ahyɛmu Dadaw no.
Nwoma a ɔwɔ Ahyɛmu Dadaw no mu
Christianfo dodow hɔn Ahyɛmu Dadaw mu no, ɔson mbrɛ woesi wɔahyehyɛ nwoma no fi mbrɛ wosii hyehyɛɛ no mber a wodzii kan boaa ano yɛɛ no adze kor no. Ntsi ber a Hebrew Bible hyehyɛ nwoma no nhyehyɛɛ ebiasa—mbra no, nkɔnhyɛfo, na nkyerɛwee no—Christianfo Bible dodow hyehyɛ nwoma no wɔ nhyehyɛɛ anan mu: mbra (Genesis-Deuteronomy), abakɔsɛm (Joshua-Esther), awensɛm nwoma (Job-Ndwom mu Ndwom), na nkɔnhyɛfo (Isaiah-Malachi).
Ebɛnadze ntsi na nhyehyɛɛ horow yinom hia? Osiandɛ iruhu nwoma kor a erekenkan no botum aboa wo ma atse mbrɛ ibesi bosũa no ase.
Iyi yɛ biribi a ɔwɔ dɛ ekaa ber a ehyɛ ase kenkan “mbra no,” anaa Ahyɛmu Dadaw mu nwoma enum a odzi kan no. Nwoma yinom, a wɔagye ato mu dɛ Moses dze no, bia mber resen no ɔfaa akyerɛwfo na mboanofo beberee hɔn nsamu. Na yenyim dɛ, mfe ɔha mfe ɔha ase no, ‘’ndzɛmba a ɔda edzi pefee na ɔsombo kɛse no’’ woyii fii Bible no mu (hwɛ 1 Nephi 13:23–26). Ɔda ho ara dɛ, Moses Nwoma no yɛ Nyankopɔn ne nkenyan nsɛm, mpo dɛ—tse dɛ edwuma biara a Nyankopɔn dze edua nyimpa do—wɔwɔ adasa esintɔ (hwɛ Moses 1:41; Gyedzi ho Nsɛmpɔw 1:8). Moroni ne nsɛm, ɔrekasa fa Mormon Nwoma krɔnkrɔn nkyerɛwee no a ɔboae ma wɔboaa ano no, yɛ mfaso wɔ ha: “Na afei sɛ mfom bi wɔ mu a nna ofi nyimpa; dɛm ntsi mma hom nnkasa nntsia ndzɛmba a Nyame ayɛ” (Mormon Nwoma dzin krataafa). Anaaso dɛ, kyerɛwsɛm nwoma nnhia dɛ nyimpa mfom nnkɛba mu ana ɔayɛ Nyankopɔn n’asɛm.