Kíka Májẹ̀mú Láéláé

Èyikeyi àwọn ìpènijà tí ẹ̀yin àti ẹbí yín lè máa kojú, ìdáhùn náà nígbàgbogbo ni Jésù Krístì. Nítorínáà láti rí àwọn ìdáhùn nínú Májẹ̀mú Láéláé, ẹ wá A. Kò ní fi ìgbàgbogbo rọrùn. Ẹ lè nílò láti jíròrò pẹ̀lú sùúrù kí ẹ sì wá atọ́nà ti ẹ̀mí. Nígbà míràn àwọn atọ́ka sí I ndàbí tààrà gan-an, bíi ti inú ìkéde Ísáíàh, “A bí ọmọ kan fún wa, a fi ọmọkùnrin kan fún wa: … orúkọ rẹ̀ ni a ó sì pè ní … Ọmọ-Aládé Àlàáfíà” (Isaiah 9:6). Ní àwọn Ibì kan, Olùgbàlà ni a rọ́pò jù lábẹ́lẹ̀, nípa àwọn àmì àti ìbáramu—fún àpẹrẹ, nípasẹ̀ àpèjúwe àwọn irúbọ ẹran ọ̀sìn tàbí àkọsílẹ̀ Jósẹ́fù tí ó ndáríji àwọn arákùnrin rẹ̀ tí ó sì gbà wọ́n là kúrò nínú ìyàn.

Bí ẹ bá nwá ìgbàgbọ́ títóbijù nínú Olùgbàlà bí ẹ ti nṣe àṣàrò Májẹ̀mú Láéláé, ẹ yíò rí i. Bóyá èyí lè jẹ́ ìlépa àṣàrò yín ní ọdún yí. Ẹ gbàdúrà pé Ẹ̀mí yíò ṣe atọ́nà yín láti rí àti láti fojúsí àwọn ẹsẹ, àwọn ìtàn, àti àwọn àsọtẹ́lẹ̀ tí yíò mú yín súnmọ́ Jésù Krístì síi.

Ẹ máṣe retí kí Májẹ̀mú Láéláé fúnni ní ìwé-ìtàn ẹ̀dá ènìyàn ní pípé àti ní pàtó. Èyí kìí ṣe ohun tí àwọn ònkọ̀wé àti àwọn alákòójọ ngbìyànju láti dá sílẹ̀. Àníyàn wọn títóbijù ni láti kọ́ni ní ohun kan nípa Ọlọ́run—nípa ètò Rẹ̀ fún àwọn ọmọ Rẹ̀, nípa ohun tí ó túmọ̀sí láti jẹ́ àwọn ènìyàn májẹ̀mú Rẹ, àti nípa bí wọ́n ṣe lè rí ìràpadà nígbàtí wọ́n bá kùnà. Nígbàmíràn wọ́n ṣe é nípa ṣíṣe ìbámu àwọn ìṣẹ̀lẹ̀ onítàn bí wọ́n ti ní òye wọn, pẹ̀lú àwọn ìtàn láti inú ìgbé ayé àwọn wòlíì nlá. Gẹ́nẹ́sísì ni àpẹrẹ kan nípa èyí, bẹ́ẹ̀ sì ni àwọn ìwé bíi Jóṣúà, àwọn Onídàájọ́, àti àwọn Ọba 1 àti 2. Ṣùgbọ́n ònkọ̀wé míràn ti Májẹ̀mú Láéláé kò fojúsùn láti jẹ́ onítàn rárá. Dípò bẹ́ẹ̀, wọ́n kọ́ni nínú àwọn iṣẹ́ ọnà bíi ewì àti àtẹ̀kọ. Àwọn Orin Dáfídì àti Òwe bá ẹ̀ka yí mu. Àti nígbànáà àwọn ọ̀rọ̀ iyebíye ti àwọn wòlíì wà, bí irú Ísáíàh àti Málákì, tí wọ́n sọ ọ̀rọ̀ Ọlọ́run sí àwọn ọmọ Isráẹ́lì àtijọ́—àti, nípasẹ̀ iṣẹ́ ìyanu ti Bíbélì, wọ́n ṣì nbá wa sọ̀rọ̀ ní òní.

Njẹ́ gbogbo àwọn wòlíì, akéwì, àti alákòójọ wọ̀nyí mọ̀ pé àwọn ọ̀rọ̀ wọn yíò jẹ́ kíkà nípasẹ̀ àwọn ènìyàn ní gbogbo ayé ní ẹgbẹgbẹ̀rún ọdún lẹ́hìnwá. A kò mọ̀. Ṣùgbọ́n a ní ìyàlẹ́nu pé èyí ni déédé ohun tí ó ti ṣẹlẹ̀. Àwọn orílẹ̀-èdè dìde wọ́n sì ṣubú, àwọn ìlú ni a ṣẹ́gun, àwọn ọba gbé láyé wọ́n sì kú, ṣùgbọ́n Májẹ̀mú Láéláé wà kọjá gbogbo wọn, láti ìran dé ìran, láti akọ̀wé dé akọ̀wé, láti ìyírọ̀padà dé ìyírọ̀padà. Bẹ́ẹ̀ni àwọn ohun kan ti sọnù tàbí di títúnṣe, àti pé síbẹ̀ bákan a ti pa púpọ̀ mọ́ pẹ̀lú ìyanu.

Ìwọ̀nyí ni àwọn ohun díẹ̀ péré láti pamọ́ sí inú rẹ̀ bí ó ti nka Májẹ̀mú Láéláé ní ọdún yìí. Ọlọ́run pa àwọn ohun kíkọ àtijọ́ wọ̀nyí mọ́ nítorí Ó mọ̀ yín àti ohun tí ẹ̀ nlà kọjá. Ó ti múra ọ̀rọ̀ ti ẹ̀mí kan sílẹ̀ fún yín nínú àwọn ọ̀rọ̀ wọ̀nyí, èyí tí yíò fà yín súnmọ́ Ọ síi tí yíò si mú ìgbàgbọ́ yín nínú ètò Rẹ̀ àti Àyànfẹ́ Ọmọ Rẹ̀ dàgbà. Bóyá Òun yíò darí yín sí ẹsẹ ọ̀rọ̀ kan tàbí ìwòye tí yíò bùkún ẹnìkan tí ẹ mọ̀—ọ̀rọ̀ kan tí ẹ lè pín pẹ̀lú ọ̀rẹ́ kan, ọmọlẹ́bí kan, tàbí akẹgbẹ́ Ènìyàn Mímọ́ kan. Ọ̀pọ̀lọpọ̀ àwọn ìleṣe ni ó wà. Njẹ́ èyí kò ha dùn mọ́ni láti ronú nípa rẹ̀ bí?

Néfì wípé, “Ọkàn mi yọ̀ nínú ìwé mímọ́” (2 Néfì 4:15). Bóyá ẹ lè ní ìmọ̀lára ní ọ̀nà kannáà bí ẹ ṣe nka ọ̀pọ̀lọpọ̀ àwọn ọ̀rọ̀ kannáà tí Néfì kà—ohun tí a pè ní Májẹ̀mú Láéláé nísisìyí.