پُرانے عہد نامے کا مُطالعہ کرتے ہُوئے

آپ اور آپ کے خاندان کو جو بھی چنوتیاں درپیش ہوں، جواب ہمیشہ یِسُوع مسِیح ہے۔ لہٰذا پُرانے عہد نامے میں جوابات تلاش کرنے کے لیے، اُس کی تلاش کریں۔ یہ ہمیشہ آسان نہیں ہو گا۔ آپ کو صبر سے غور کرنے اور رُوحانی ہدایت کے خواہاں ہونے کی ضرورت پڑ سکتی ہے۔ بعض اوقات اُس کے حوالہ جات بالکل براہِ راست لگتے ہیں، جیسا کہ یسعیاہ کے فرمان میں ہے، ”ہمارے لِئے ایک لڑکا تولُّد ہُوا، ہم کو ایک بیٹا بخشا گیا: … اور اُس کا نام … سلامتی کا شاہزادہ پُکارا جائے گا“ (یسعیاہ 9:‏6)۔ دُوسری جگہوں پر، نجات دہندہ کو علامتوں اور مماثلتوں کے ذریعے زیادہ باریک بینی سے دِکھایا گیا ہے—مثال کے طور پر، جانوروں کی قُربانیوں کے ذریعے سے یا جوزف کے اپنے بھائیوں کو مُعاف کرنے اور اُنھیں قحط سے بچّانے کے بیان کے ذریعے سے۔

اگر آپ پُرانے عہد نامہ کا مُطالعہ کرتے ہُوئے نجات دہندہ پر زیادہ ایمان کے خواہاں ہوتے ہیں، تو آپ اِسے پائیں گے۔ شاید یہ اِس سال آپ کے مُطالعہ کا مقصد ہو سکتا ہے۔ دُعا کریں کہ رُوح آپ کو اُن حوالہ جات، کہانیوں، اور نبوتوں کو پانے اور اُن پر توجہ مرکوز کرنے میں راہ نُمائی کرے جو آپ کو یِسُوع مسِیح کے قریب لائیں گے۔

توقع نہ کریں کہ پُرانا عہد نامہ قدیم انسانیت کی مُکمل اور درست تاریخ پیش کرے گا۔ یہ وہ نہیں ہے جو اصل مُصنّفین اور مرتب کرنے والے تخلیق کرنے کی کوشش کر رہے تھے۔ اُن کی سب سے بڑی فِکر تھی کہ خُدا کے بارے میں کُچھ سِکھائیں—اُس کے بچّوں کے لئے اُس کے منصُوبے کے بارے میں، اُس کے موعودہ لوگ ہونے کا کیا مطلب ہے، اور اُس بارے میں کہ جب ہم زوال پذیر ہوتے ہیں تو نجات کیسے حاصل کی جائے۔ بعض اوقات وہ تاریخی واقعات کو بیان کرتے تھے جِس طرح وہ سمجھتے تھے، جِس میں عظیم نبیوں کی زندگیوں کی کہانیاں بھی شامل تھیں۔ پیدایش اِس کی ایک مثال ہے، اور اِسی طرح یشوع، قضات، اور 1 اور 2 سلاطین کی کِتابیں بھی ہیں۔ لیکن پُرانے عہد نامے کے دُوسرے مصنفین کا مقصد یہ نہیں تھا کہ وہ تاریخی ہوں۔ بجائے اِس کے، اُنھوں نے شاعری اور ادّب جیسے فن کے کاموں کے ذریعے تعلیم دی۔ زبور اور امثال اِس زمرے میں آتے ہیں۔ اور پھر انبیا کے انمول الفاظ ہیں، جیسا کہ یسعیاہ اور ملاکی، جنھوں نے خُدا کا کلام قدیم اسرائیل کو پُہنچایا—اور، بائبل کے معجزے کے ذریعے، آج بھی ہم سے کلام کرتے ہیں۔

کیا اِن تمام نبیوں، شاعروں، اور مصنفوں کو معلُوم تھا کہ اِن کے الفاظ ہزاروں سال بعد دُنیا بھر کے لوگ پڑھیں گے؟ ہم نہیں جانتے۔ لیکن ہم حیران ہیں کہ بالکل ایسا ہی ہُوا ہے۔ قومیں بڑھتی اور گرتی رہیں، شہر فتح ہُوئے، بادشاہ جِیے اور مرے، لیکن پُرانا عہد نامہ نسل در نسل، کاتب سے کاتب تک، ترجمہ سے ترجمہ تک چلتا رہا۔ یقیناً کُچھ چیزیں کھو گئی تھیں یا اِن میں تبدیلی کی گئی تھی، اور پھر بھی کسی نہ کسی طرح بُہت کُچھ معجزانہ طور پر محفُوظ کِیا گیا تھا۔

اِس سال جب آپ پُرانے عہد نامہ کو پڑھیں تو یہ چند باتیں ذہن نشین کر لیں۔ خُدا نے اِن قدیم نوشتوں کو محفُوظ رکھا کیوں کہ وہ آپ کو اور جن حالات سے آپ گُزر رہے ہیں جانتا ہے۔ اُس نے اِن الفاظ میں آپ کے لیے رُوحانی پیغام تیار کِیا ہے، جو آپ کو اُس کے قریب تر کرے گا اور اُس کے منصُوبے اور اُس کے پیارے بیٹے پر آپ کے ایمان كو مضبُوط کرے گا۔ شاید وہ آپ کو کسی ایسے اقتباس یا بصیرت کی طرف لے جائے گا جو آپ کے جاننے والے کو برکت دے گی—ایک پیغام جس کا اشتراک آپ کسی دوست، خاندان کے کسی رُکن، یا ساتھی مُقدّس/رُكن کے ساتھ کر سکتے ہیں۔ بُہت سارے امکانات ہیں۔ کیا اِس کے بارے میں سوچنا دلچسپ نہیں ہے؟

نیفی نے کہا، ”میری جان صحائف سے خُوش ہوتی ہے“ (2 نیفی 4:‏15)۔ ہو سکتا ہے کہ آپ بھی ویسا ہی محسُوس کریں جب آپ نیفی کے اُن الفاظ کو پڑھتے ہیں—جِسے اب ہم پُرانا عہد نامہ کہتے ہیں۔