පරණ ගිවිසුම කියවීම

ඔබ සහ ඔබේ පවුලේ අය මුහුණ දෙන අභියෝග කුමක් වුවත්, පිළිතුර සැමවිටම යේසුස් ක්‍රිස්තුස්වහන්සේයි. එබැවින් පරණ ගිවිසුමෙන් පිළිතුරු සොයා ගැනීමට නම්, උන්වහන්සේව සොයන්න. එය සැමවිටම පහසු වෙන්නේ නෑ. ඔබට ඉවසිලිවන්තව මෙනෙහි කර, අධ්‍යාත්මික මගපෙන්වීම් ලබා ගැනීමට අවශ්‍ය වෙන්න පුළුවන්. යෙසායාගේ ප්‍රකාශයේ මෙන් සමහර විට උන්වහන්සේ ගැන ඇති සඳහන් කිරීම් ඉතා සෘජු ලෙස පෙනෙනවා, “අපට ළදරුවෙක් උපන්නේය, අපට පුත්‍රයෙක් දෙන ලද්දේය; උන්වහන්සේ … සමාදානයේ කුමාරයායයි කියනු ලබන්නේය” (යෙසායා 9:6). වෙනත් ස්ථානවල, සංකේත සහ සමාන දේවල් හරහා ගැලවුම්කරුවාණන්ව වඩාත් සියුම් ලෙස නිරූපණය කර තිබෙනවා—සත්ව පූජා පිළිබඳ විස්තර හෝ යෝසෙප් තම සහෝදරයන්ට සමාව දී ඔවුන්ව සාගතයෙන් ගලවා ගැනීමේ වාර්තාව ඒ සඳහා උදාහරණ වෙනවා.

ඔබ පරණ ගිවිසුම අධ්‍යයනය කරන විට, ගැලවුම්කරුවාණන් කෙරෙහි වැඩි ඇදහිල්ලක් සොයන්නේ නම්, ඔබට එය සම්භ වෙනවා. සමහරවිට මේ වසරේ ඔබේ අධ්‍යයනයේ ඉලක්කය මෙය වෙන්න පුළුවන්. යේසුස් ක්‍රිස්තුස්වහන්සේ වෙත ඔබව සමීප කරවන ඡේද, කථාන්දර සහ අනාවැකි සොයා ගැනීමට සහ ඒවාට අවධානය යොමු කිරීමට ඔබට ආත්මයාණන්වහන්සේගේ මගපෙන්වීම ලැබෙන පිණිස යාච්ඤා කරන්න.

පරණ ගිවිසුම මගින් මානව වර්ගයාගේ පරිපූර්ණ හා නිවැරදි ඉතිහාසයක් ඉදිරිපත් කරනු ඇතැයි අපේක්ෂා කරන්න එපා. මුල් කතුවරුන් සහ සම්පාදකයන් නිර්මාණය කිරීමට උත්සාහ කළේ එය නොවේ. ඔවුන්ගේ විශාල සැලකිල්ල වුණේ, දෙවියන්වහන්සේ ගැන—උන්වහන්සේගේ දරුවන් සඳහා උන්වහන්සේගේ සැලැස්ම ගැන, උන්වහන්සේගේ ගිවිසුම් සෙනඟ වීම යන්නෙන් අදහස් කරන්නේ කුමක්ද යන්න ගැන සහ අප වැටුණු විට මිදීම සොයා ගන්නේ කෙසේද යන්න ගැන යමක් ඉගැන්වීමයි. සමහර විට ඔවුන් එය කළේ ශ්‍රේෂ්ඨ අනාගතවක්තෘවරුන්ගේ ජීවිතවල කථා ඇතුළුව, ඔවුන් තේරුම් ගත් පරිදි ඓතිහාසික සිදුවීම් සම්බන්ධ කිරීමෙනි. උත්පත්ති මේ සඳහා උදාහරණයක් වන අතර, යෝෂුවා, විනිශ්චයකාරයන්ගේ පොත, සහ 1 සහ 2 රාජාවලිය වැනි පොත්ද එසේමයි. නමුත් පරණ ගිවිසුමේ අනෙකුත් ලේඛකයින් කිසිසේත්ම ඓතිහාසික වීමට ඉලක්ක කළේ නෑ. ඒ වෙනුවට ඔවුන් ඉගැන්වූයේ කවි, සාහිත්‍ය වැනි කලා කෘති හරහායි. ගීතාවලිය සහ හිතෝපදේශ මෙම කාණ්ඩයට අයත් වෙනවා. ඉපැරණි ඉශ්‍රායෙලයට දෙවියන්වහන්සේගේ වචනය ප්‍රකාශ කළ යෙසායා සහ මලාකි වැනි අනාගතවක්තෘවරුන්ගේ වටිනා වචනත් තිබෙනවා—ඒවගේම, බයිබලයේ ආශ්චර්යය තුළින් ඒවා අදටත් අපට කථා කරනවා.

මේ සියලුම අනාගතවක්තෘවරුන්, කවියන් සහ සම්පාදකයන් ඔවුන්ගේ වචන වසර දහස් ගණනකට පසුව ලොව පුරා සිටින මිනිසුන් විසින් කියවන බව දැන සිටියාද? අපි දන්නේ නැහැ. නමුත් හරියටම සිදුවී ඇත්තේ එය නිසා, ඒ ගැන අපි පුදුම වෙනවා. ජාතීන් නැඟිට වැටුණා, නගර යටත් කර ගත්තා, රජවරු ජීවත් වුණා සහ මිය ගියා, නමුත් පරම්පරාවෙන් පරම්පරාවට, ලේඛකයාගේ සිට ලේඛකයා දක්වා, පරිවර්තනයේ සිට පරිවර්තනය දක්වා පරණ ගිවිසුම ඔවුන් සියල්ලන්ම අභිබවා ගියා. ඇත්ත වශයෙන්ම සමහර දේවල් නැති වී ගොස් හෝ වෙනස් කර තිබෙනවා, නමුත් කෙසේ හෝ බොහෝ දේ ආශ්චර්යමත් ලෙස සංරක්ෂණය කර තිබෙනවා.

මේවා ඔබ මේ වසරේ පරණ ගිවිසුම කියවන විට මතක තබා ගත යුතු කරුණු කිහිපයක් පමණයි. දෙවියන්වහන්සේ මෙම ඉපැරණි ලියවිලි ආරක්ෂා කළේ, උන්වහන්සේ ඔබව සහ ඔබ අත්විඳින දේ දන්නා නිසයි. මෙම වචන තුළින් උන්වහන්සේ ඔබ වෙනුවෙන් අධ්‍යාත්මික පණිවිඩයක් සූදානම් කර තිබෙනවා, එය ඔබව උන්වහන්සේ වෙතට ළං කර උන්වහන්සේගේ සැලැස්ම සහ උන්වහන්සේගේ ආදරණීය පුත්‍රයා කෙරෙහි ඔබේ ඇදහිල්ල ගොඩනගනවා. සමහර විට උන්වහන්සේ ඔබ හඳුනන කෙනෙකුට ආශිර්වාද කරන ඡේදයකට හෝ අනුභාවයකට—ඔබට මිතුරෙකු, පවුලේ සාමාජිකයෙකු හෝ සෙසු ශුද්ධවන්තයෙකු සමඟ බෙදා ගත හැකි පණිවිඩයක් වෙත ඔබව ගෙන යයි. විය හැකි බොහෝ දේ තිබෙනවා. එය සිතීම උද්යෝගිමත් නේද?

නෙපී මෙහෙම පැවසුවා, “මාගේ ප්‍රාණය ශුද්ධලියවිලි තුළ ප්‍රීති වන්නේය” (2 නෙපී 4:15). අපි දැන් පරණ ගිවිසුම ලෙස හඳුන්වන—නෙපී කියවූ බොහෝ වචන කියවන විට ඔබටත් සමහර විට ඒ ආකාරයෙන්ම දැනෙයි.