Wadewadek Kadehde Mering

Sohte lipilipil kahpwal akan kowe oh ahmw peneinei wie sohsohpai, pasapengo iei ansou koaros Sises Krais. Eri pwehn diar pasapeng kan nan Kadehde Mering, rapahki Ih. E sohte pahn mengei ansou koaros. Ke pahn anahne en medemedewe ni kanengamah oh rapahki kaweid en palingehn. Ekei pak soahng kan me koasoaia Ih mwomwen nohnla inenen, me duwehte nan en Aiseia kehkehlik, “Kisin seri kis ipwidiongkitailehr, neitail pwutak emen kohiengkitailehr: … e pahn mwarenki … Nanmwarkien popohl” (Aiseia 9:6). Nan ekei wasa kan, weliepen Sounkomouro sohte nohn sansal, sang kilel oh soahng duwehte kan—ni karasepe, sang ni kasansaladahn meiroang en mahn akan de soaiepen Sosep ah mahkohng rie pwutak kan oh kapitirailla sang lehko.

Ma ke rapahki pwoson laud rehn Sounkomouro ni ahmw onopiki Kadehde Mering, ke pahn diar. Mwein met kak wia ahmw koasoandi en ahmw onopen pahret. Kapakapki me Ngehno pahn kaweid uhk en diar oh kilikilangete kaweid kan, soai kan, oh kokohp akan me pahn waiukodo karanihala Sises Krais

Dehr kasik Kadehde Mering en kasalehda poadoapoad en mour en aramas ehu me keneinei, unsek, oh pwung. Kaidehn ihme udahn soun nting oh soun kihpene koa songosong en wiahdahu. Arail kapwunod keiou laud iei en kasukuhlki mehkot duwen Koht—duwen Sapwellime pilahn ong Sapwellime seri kan, duwen ia wehwehn en wia Sapwellime aramas en inou, oh duwen mwomwen diar poadoandoar ansou kitail pwupwidi. Ekei pak irail kin wia met sang ni karasahieng kemwekid kan en mahso ni arail wehwehki, ni ahr iangahki soaien mour en suhkohp kehlail kan. Senesis wia karasaras en met, oh pil duwehte pwuhk teikan soangen Sosua, Soun Kopwung kan, oh 1 oh 2 Nanmwarki kan. Ahpw soun nting kan en Kadehde Mering sohte nantihong en wia doadoahk en poadoapoad ehu. Ahpw, irail wia kasukuhl sang doadoahk en art kan me duwehte poetry oh literature. Melkahka kan oh Lepin Padahk Audapahn kan pwungehng nan pali wet. Oh eri pil mie mahsen kesempwal akan en soukohp kan, me duwehte Aiseia oh Malakai, me lokaiahki mahsen en Koht ong mehn Israel en mahso—oh, sang ni mwekid kopwuriamwei en Pwuhk Sarawi, pil kawkaweid ong kitail rahnwet.

Koaros soukohp, soun nting kan, oh soun kihpene kan ese me arail lokaia kan pahn wadawad di sang aramas en pohn sampah pwon sounpar kid samwa mwuhr? Kitail sehse. Ahpw kitail medewe me ih mwomwen dahme wiawihero. Wehi kan kehlailda oh pwupwilahr, kahnihmw kan kolkoldier, Nanmwarki kan mourehr oh melahr, ahpw Kadehde Mering mour wereisang koaros, sang ehu dih lel ehu dih, sang emen soun nting kolahng emen soun nting, sang kawehwe ong kawehwe. Udahn ekei mehkot salongalahr de wekideklahr, oh eri ni mwohmw ehu me tohto ni mwekid kopwuriamwei nekineklahr.

Mepwukat wia soahng malaulau kan ken taman ni ahmw pahn wadek Kadehde Mering nan pahr wet. Koht ketin nekidala nting en mahso pwukat pwehki E ketin mwahngih iuk oh dahme ke pahn lelohng. E ketin kaunopadahr ehu padahk en palingehn ong uhk nan mahsen pwukat, me pahn waiukodohng karanihala Ih oh kakehlaka ahmw pwoson nan Sapwellime pilahn oh Sapwellime Pwukat Kehmpoakehu. Mwein E pahn ketin kahluwaiuk ong ehu iren pwuhk sarawi de ehu kamarain me pahn kapaiada emen aramas me ke ese—ehu padahk me ke kak ehukihong emen kempoakepahmw, emen tohn peneinei, de emen iengomw Souleng. Soahng tohto kei me kak wiawi. E sohte kaperen en medewe met?

Nihpai inda,“Pali ngeni kin perenkihda mahsen en Koht akan” (2 Nihpai 4:15). Mwein ke pahn ahniki soangen pepehmohte ni ahmw pahn wadek soangen lokaia kan me Nihpai wadekehr—dahme kitail met kahdaniki Kadehde Mering.