ძველი აღთქმის წაკითხვა

რა გამოწვევების წინაშეც არ უნდა იყოთ თქვენ და თქვენი ოჯახი, პასუხი ყოველთვის არის იესო ქრისტე. იმისათვის, რომ იპოვოთ პასუხები ძველ აღთქმაში, ეძებეთ იესო ქრისტე. ეს ყოველთვის იოლი არ იქნება. ალბათ დაგჭირდებათ მოთმინებით მსჯელობა და სულიერი ხელმძღვანელობის მოძიება. ზოგჯერ მასზე მითითებები ძალიან პირდაპირი ჩანს, როგორც ეს ესაიას განცხადებაშია: „ყრმა შეგვეძინა, ძე გვებოძა: … და უწოდებენ მას სახელად: … მშვიდობის მეუფეს“ (ესაია 9:6). სხვა ადგილებში მხსნელი წარმოდგენილია უფრო დახვეწილად, სიმბოლოებითა და მსგავსებით — მაგალითად, ცხოველთა მსხვერპლშეწირვის აღწერით ან ამბის საშუალებით, რომლის მიხედვითაც იოსებმა აპატია ძმებს და იხსნა ისინი შიმშილისგან.

თუ ძველი აღთქმის შესწავლით უფრო მეტ რწმენას ეძებთ მხსნელის მიმართ, თქვენ იპოვით მას. შესაძლოა, ეს იყოს თქვენი ამ წლის სწავლის მიზანი. ილოცეთ, რომ სულიწმინდამ გიწინამძღვროთ, რათა იპოვოთ და მთელი ყურადღება მიაპყროთ მათზე, მათ ისტორიებსა და წინასწარმეტყველებებზე, რომლებიც დაგაახლოებთ იესო ქრისტესთან.

ნუ ელით, რომ ძველი აღთქმა წარმოაჩენს კაცობრიობის სრულ და ზუსტ ისტორიას. ეს არ არის ის, რის შექმნასაც ცდილობდნენ თავდაპირველი ავტორები და შემდგენლები. მათი უფრო დიდი საზრუნავი იყო ღმერთის შესახებ რაღაცის სწავლება — მისი გეგმის შესახებ თავისი შვილებისთვის იმაზე, თუ რას ნიშნავს იყო მისი აღთქმის ხალხი და იმის შესახებ, თუ როგორ უნდა ვეძიოთ გამოსყიდვა, როდესაც მოლოდინს ვერ ვამართლებთ. ზოგჯერ ისინი ამას აკეთებდნენ ისტორიული მოვლენების გადმოცემით, ისე, როგორც მათ ესმოდათ, მათ შორის ისტორიების დიდი წინასწარმეტყველების ცხოვრებიდან. დაბადება ამის მაგალითია, ისევე როგორც წიგნები, როგორიცაა, იესო ნავეს ძე, მსაჯულთა და 3 და 4 მეფეთა. მაგრამ ძველი აღთქმის სხვა მწერლები საერთოდ მიზნად არ ისახავდნენ, ყოფილიყვნენ ისტორიის აღმწერნი. ამის ნაცვლად, ისინი ასწავლიდნენ ხელოვნების ნიმუშების მეშვეობით, როგორიცაა: პოეზია და ლიტერატურა. ამ კატეგორიას მიეკუთვნება ფსალმუნები და იგავები. და შემდეგ არის წინასწარმეტყველთა ძვირფასი სიტყვები, როგორიცაა ესაია და მალაქია, რომლებმაც ღვთის სიტყვა უთხრეს ძველ ისრაელს — და ბიბლიის სასწაულის მეშვეობით, დღესაც გველაპარაკებიან.

იცოდა თუ არა ყველა ამ წინასწარმეტყველმა, პოეტმა და შემდგენელმა, რომ მათ სიტყვებს ათასობით წლის შემდეგ მთელ მსოფლიოში წაიკითხავდნენ? ჩვენ ეს არ ვიცით. მაგრამ ჩვენ გვიკვირს, რომ ზუსტად ასე კი მოხდა. ერები მაღლდებოდნენ და ეცემოდნენ, ქალაქებს იპყრობდნენ, მეფეები ცხოვრობდნენ და კვდებოდნენ, მაგრამ ძველმა აღთქმამ ამ ყველაფერს გაუძლო, გადაეცემოდა რა თაობიდან თაობას, მწიგნობრიდან მწიგნობარს, თარგმანიდან თარგმანს. რა თქმა უნდა, ზოგიერთი რამ დაიკარგა ან შეიცვალა, მაგრამ უამრავი რამ რატომღაც სასწაულებრივად შენარჩუნდა.

ეს არის მხოლოდ მცირედი, რაც უნდა გახსოვდეთ, როდესაც წელს ძველ აღთქმას წაიკითხავთ. ღმერთმა გადაარჩინა ეს უძველესი ნაწერები, რადგან ის გიცნობთ თქვენ და იცის, რას განიცდით. მან მოამზადა თქვენთვის სულიერი გზავნილი ამ სიტყვებით, რომლებიც დაგაახლოებთ მასთან და გაგიმყარებთ რწმენას მისი გეგმისა და მისი საყვარელი ძის მიმართ. შესაძლოა, მან მიგიყვანოთ მონაკვეთამდე ან აზრამდე, რომელიც აკურთხებს ვინმეს თქვენი ნაცნობებიდან — გზავნილი, რომელიც შეგიძლიათ მეგობარს, ოჯახის წევრს ან მეგობარ წმინდანს გაუზიაროთ. უამრავი შესაძლებლობა არსებობს. განა ამაზე ფიქრი ამაღელვებელი არ არის?

ნეფიმ თქვა: „ჩემი სული ხარობს წმინდა წერილებით“ (2 ნეფი 4:15). შესაძლოა, თქვენც ისევე იგრძნოთ თავი, როდესაც წაიკითხავთ ბევრ იმავე სიტყვას, რომელსაც ნეფი კითხულობდა, იმას, რასაც ჩვენ ახლა ძველ აღთქმას ვუწოდებთ.