Հին Կտակարանի ընթերցանություն

Ինչպիսի դժվարությունների էլ որ բախվեք դուք և ձեր ընտանիքը, պատասխանը միշտ Հիսուս Քրիստոսն է: Այսպիսով, Հին Կտակարանում պատասխաններ գտնելու համար փնտրեք Նրան: Միշտ չէ, որ դա հեշտ կլինի։ Ձեզ կարող է անհրաժեշտ լինել համբերատար խորհել և հոգևոր առաջնորդություն խնդրել: Երբեմն Նրան վերաբերող հղումները թվում են շատ ուղիղ, ինչպես Եսայու հայտարարությունում. «Մեզ համար մի մանուկ ծնուեցավ, մեզ մի որդի տրուեցավ. եւ … նորա անունը կկոչուի … Խաղաղութեան Իշխան» (Եսայի 9.6): Այլ տեղերում Փրկիչը ներկայացված է ավելի նրբորեն՝ խորհրդանիշների և նմանությունների միջոցով, օրինակ՝ կենդանիների զոհաբերությունների նկարագրությունների միջոցով կամ Հովսեփի պատմությունում, որը ներում է իր եղբայրներին և փրկում նրանց սովից։

Եթե Հին Կտակարանն ուսումնասիրելիս դուք ձգտում եք ավելի մեծ հավատքի Փրկչի հանդեպ, դուք կգտնեք այն: Հավանաբար սա կլինի այս տարվա ձեր ուսումնասիրության նպատակը: Աղոթեք, որ Հոգին առաջնորդի ձեզ գտնելու և կենտրոնանալու այն հատվածների, պատմությունների և մարգարեությունների վրա, որոնք ձեզ ավելի կմոտեցնեն Հիսուս Քրիստոսին:

Մի սպասեք, որ Հին Կտակարանը ներկայացնելու է մարդկության մանրակրկիտ և ճշգրիտ պատմությունը: Դա այն չէ, ինչ փորձում էին ստեղծել բնօրինակի հեղինակները և կազմողները: Նրանց ավելի մեծ մտահոգությունը Աստծո մասին ինչ-որ բան սովորեցնելն էր՝ Իր զավակների համար Նրա ծրագրի մասին, այն մասին, թե ինչ է նշանակում լինել Նրա ուխտի ժողովուրդը և ինչպես փրկագնում գտնել, երբ մենք ձախողվում ենք։ Երբեմն նրանք դա անում էին պատմական իրադարձությունները պատմելով այնպես, ինչպես որ հասկանում էին դրանք, այդ թվում՝ պատմություններ մեծ մարգարեների կյանքից: «Ծնունդ» գիրքը դրա օրինակն է, ինչպես նաև Հեսու, Դատավորներ, Ա և Բ Թագավորների գրքերը: Բայց Հին Կտակարանի մյուս գրողները պատմական գիրք գրելու նպատակ բոլորովին չէին դնում: Փոխարենը՝ նրանք դասավանդում էին արվեստի այնպիսի գործերի միջոցով, ինչպիսիք են բանաստեղծությունը և գրականությունը: Սաղմոսներն ու ասացվածքները պատկանում են այս խմբին: Եվ հետո կան մարգարեների թանկագին խոսքերը՝ Եսայիայից մինչև Մաղաքիա, որոնք Աստծո խոսքն էին՝ ուղղված հնադարյան Իսրայելին, և Աստվածաշնչի հրաշքի միջոցով այսօր էլ մեզ հետ են խոսում:

Արդյո՞ք այդ բոլոր մարգարեները, բանաստեղծները և կազմողները գիտեին, որ իրենց խոսքերը կարդացվելու էին ողջ աշխարհի մարդկանց կողմից՝ հազարավոր տարիներ անց: Մենք չգիտենք: Բայց մենք զարմանում ենք, որ դա հենց այն է, ինչ պատահեց: Ժողովուրդներ բարձրացան և ընկան, քաղաքներ նվաճվեցին, թագավորներ ապրեցին և մահացան, բայց Հին Կտակարանը հարատևեց և վերապրեց դրանց բոլորին, սերնդից սերունդ, դպիրից դպիր, թարգանությունից թարգմանություն: Իհարկե որոշ բաներ կորսվել կամ փոփոխվել են, և այնուամենայնիվ, ինչ-որ կերպ հրաշքով պահպանվել է այդքան շատ բան:

Սրանք ուղղակի մի քանի բաներ են մտքում պահելու համար, երբ կարդում եք Հին Կտակարանը։ Աստված պահպանել է այդ հնագույն գրվածքները, որովհետև Նա գիտի ձեզ և զգում է, թե ինչի միջով եք անցնում: Միգուցե Նա ձեզ համար հոգևոր ուղերձ է պատրաստել այս խոսքերում, մի բան, որը ձեզ ավելի կմոտեցնի Նրան և կամրացնի ձեր հավատքը Նրա ծրագրի և Նրա սիրելի Որդու հանդեպ։ Միգուցե Նա ձեզ կուղղորդի դեպի մի հատված կամ մի գաղափար, որը կօրհնի ձեր ծանոթներից մեկին, մի ուղերձ, որով դուք կարող եք կիսվել ընկերոջ, ընտանիքի անդամի կամ ընկերակից Սրբի հետ: Այնքան շատ հնարավորություններ կան: Միթե՞ հուզիչ չէ այդ մասին մտածելը:

Նեփին ասել է՝ «հոգիս հրճվում է սուրբ գրություններով» (2 Նեփի 4․15)։ Գուցե դուք նույն բանը զգաք, երբ կարդաք Նեփիի կարդացած խոսքերից շատերը, որոնք մենք այժմ անվանում ենք Հին Կտակարան: