“Novemba 17–23: ‘Yufala I Mas Rere From Taem Ia we Man we Bae I Mared I Kam’: Doktrin mo Ol Kavenan 133–134,” Kam Folem Mi—Blong Hom mo Jos: Doktrin mo Ol Kavenan 2025 (2025)
“Doktrin mo Ol Kavenan 133–134,” Kam Folem Mi—Blong Hom mo Jos: 2025
Ol Ten Yangfala Gel, i kam long Jorge Cocco
Novemba 17–23: “Yufala I Mas Rere From Taem Ia we Man we Bae I Mared I Kam”
Doktrin mo Ol Kavenan 133–134
Long 1833, ol grup blong ol rabis man ol atakem mo prapa spolem gud ofis blong Jos blong printim buk. Long medel blong ol wok blong printim we i stap gohed long tetaem ia, i bin Buk blong Olgeta Komanmen—we hem i fastaem blong Jos we i stap traem blong putum tugeta ol revelesen blong God blong ol las dei ia i kam long wan buk. Ol grup blong ol rabis man ia oli sakem ol pej we oli no putum tugeta yet olsem wan buk, mo nomata plante Sent we oli gat strong tingting oli bin holemtaet samfala pej ia, i bin gat sam kopi nomo we oli no komplit blong Buk blong Olgeta Komanmen we i bin save we i sef i stap.
Wanem we yumi save naoia olsem seksen 133 blong Doktrin mo Ol Kavenan, oli bin wantem blong i mas stap long apendiks blong Buk blong Olgeta Komanmen, olsem wan bigfala haelaet we i stap long en blong ol revelesen blong Lod we oli pablisim. Hem i stap givim ol woning abaot wan dei blong jajmen we i stap kam mo i stap ripitim singaot ia we i stap truaot long revelesen blong taem naoia: Ronwe long ol samting blong wol, olsem Babilon i wan saen blong hemia. Bildimap Saeon. Rere from Seken Kaming. Mo serem mesej ia i go “ long evri kantri, mo famli, mo lanwis, mo pipol” (ves 37). Ol fasfala plan blong Buk blong Olgeta Komanmen i no bin kamtru, be revelesen ia i stap blong mekem yumi tingbaot, mo i stap olsem wan witnes se wok blong Lod bae i go fored, “from we bae Lod i soemaot tabu han blong hem … , mo evri en blong wol bae oli luk fasin blong sevem man we i kam long God blong olgeta” (ves 3).
Ol aedia blong Stap Lanem Samting long Hom mo long Jos
Doktrin mo Ol Kavenan 133:4–14
Jisas Kraes i singaotem mi blong lego Babilon mo kam long Saeon.
Oposit blong Saeon long saed blong spirit, hem i Babilon—wan siti blong bifo we truaot long skripja, i wan saen blong fasin nogud mo fasin blong stap slef long saed blong spirit. Taem yu ridim Doktrin mo Ol Kavenan 133:4–14, tingting hevi long olsem wanem Sevya i stap singaotem yu blong “go … aot long Babilon” (ves 5) mo “go … long … Saeon” (ves 9). ?Long wanem wei nao yu stap ansa long singaot ia? ?Wanem bakegen yu lanem abaot Saeon long mesej blong Elda D. Todd Christofferson “Come to Zion”? (Liahona, Nov. 2008, 37–40).
Doktrin mo Ol Kavenan 133:1–19, 37–39
Mi save rere naoia from Seken Kaming blong Sevya.
Tugeta, seksen 1, fas toktok blong Lod long Doktrin mo Ol Kavenan, mo seksen 133, orijinol apendiks blong Buk blong Olgeta Komanmen, oli stat wetem semfala strong toktok ia we i kam long Lod: “Lisin gud, O yufala ol pipol blong jos blong mi” (Doktrin mo Ol Kavenan 1:1; 133:1). Maet bae yu save stadi long Doktrin mo Ol Kavenan 133:1–19, 37–39 mo mekem lis blong ol mesej we Lod i invaetem yu blong “lisin gud” blong (lisin mo obei) taem yu stap rere from Seken Kaming blong Hem. Maet yu save mekem lis, speseli ol samting we Hem i wantem yu blong mekem (1) mekem yuwan yu rere mo (2) help blong mekem wol i rere from taem we bae Hem i kambak bakegen. ?Wanem nao yu lanem aot long ol lis ia?
Presiden Russell M. Nelson i serem ol impoten trutok abaot wanem we wol bae i kam olsem, taem we Sevya bae i kambak bakegen—mo olsem wanem blong rere. Lukaotem ol trutok ia insaed long mesej blong hem, “Fiuja blong Jos: Stap Mekem Wol I Rere from Seken Kaming blong Sevya” (Liahona, Epril 2020, 6–11). ?Wanem nao yu filim insperesen blong mekem—o blong gohed blong stap mekem—blong “mekem wol ia i rere from kambak bakegen blong Sevya”? (“Stamba Toktok blong Kworom blong Aronik Prishud,” Gospel Laebri).
Luk tu long Matiu 25:1–13; Russell M. Nelson, “Akseptem mo Fesem Fiuja Wetem Fet,” Liahona, Novemba 2020, 73–76; “Kam Pikinini blon gGod,” Hym, namba 4; Topics and Questions, “Second Coming of Jesus Christ,” Gospel Laebri.
Doktrin mo Ol Kavenan 133:19–56
Seken Kaming blong Jisas Kraes bae i wan bigfala glad blong olgeta we oli stap stret mo gud.
Taem yu ridim wanem we oli tokbaot abaot taem we Sevya bae i kambak bakegen long ol ves 19–56, ?wanem nao yu faenem we yu stap lukluk i go fored from? ?Wanem toktok o sentens ia i tokbaot lav we Lod i gat long ol pipol blong Hem? Tingting blong raetemdaon ol eksperiens blong yuwan wetem “kaen fasin blong Lod blong [yu], mo evri samting we hem i bin givim long [yu], folem gud fasin blong hem” (ves 52).
Wan smol pat blong peinting ia Man blong Hilim Man, i kam long Kelsy mo Jesse Lightweave
“God i stanemap ol gavman blong gud blong ol man.”
Rilesensip blong ol fasfala Sent wetem gavman i wan hadwan lelebet. Taem we oli fosem Ol Sent blong oli mas aot long Jakson Kaonti, Misuri, long yia 1833, oli bin askem help long lokol mo nasonal gavman mo oli no kasem wan. Long semtaem, sam pipol aotsaed long Jos oli ting se ol tijing abaot Saeon i minim se Ol Sent oli sakemaot atoriti blong ol gavman blong wol ia. Doktrin mo Ol Kavenan 134 oli bin raetem, long wan wei, blong kliarem posisen we Jos i stanap long hem long saed blong gavman. ?Wanem nao seksen ia i talem abaot olsem wanem Ol Sent blong Lod oli save filim abaot gavman?
Taem yu stadi long seksen 134, tingting blong stap lukaotem ol prinsipol blong gavman mo ol responsabiliti blong ol sitisen. ?Olsem wanem ol aedia ia oli bin helpem ol fasfala Sent? ?Olsem wanem nao yu save yusum olgeta long ples we yu stap laef long hem?
Luk tu long Ol Toktok blong Bilif 1:11–12; Topics and Questions, “Religious Freedom,” Gospel Laebri.
Sam Aedia blong Tijim Ol Pikinini
Doktrin mo Ol Kavenan 133:4–5, 14
Lod i wantem mi blong stap longwe long ol nogud fasin blong wol.
-
Yu mo ol pikinini blong yu i save mekem lis blong sam ples mo ol situesen we Lod i wantem yumi blong stap longwe long olgeta. Afta, yu save komperem ol ples ia mo ol situesen ia folem mining blong “Babel, Babilon” insaed long Gaed long Ol Skripja (Gospel Laebri). Afta, oli save ridim Doktrin mo Ol Kavenan 133:4–5, 14. ?I minim wanem blong “Yufala i aot long Babilon”? (ves 5). Mo tu, yu save mekem wan semmak lis blong ol ples mo ol situesen we Lod i invaetem yumi blong go long hem mo komperem lis ia wetem mining blong “Saeon” long Gaed long Ol Skripja.
Doktrin mo Ol Kavenan 133:19–21, 25
Jisas Kraes bae i kambak bakegen.
-
Maet ol pikinini blong yu bae oli glad blong aktem olsem wanem blong rere from wan samting, olsem wan spot tunamen, wan impoten visita o wan fevret holidei. ?From wanem fasin blong stap rere hem i impoten? Afta, tugeta, yufala i save ridim Doktrin mo Ol Kavenan 133:17–19, 21 mo invaetem ol pikinini blong yu blong lukaotem wanem we Lod i invaetem yumi blong rere from. Yu save soem long olgeta, ol pikja blong aotlaen blong wik ia mo askem ol pikinini blong yu wanem oli save abaot Seken Kaming blong Jisas Kraes. ?Wanem bakegen nao yumi lanem aot long ol ves 19–25, 46–52? ?Wanem nao yumi save mekem blong rere from naesfala samting we bae i hapen?
-
Yu save haedem ol defdefren pikja o ol samting we i soem ol samting we yumi save mekem blong rere from Seken Kaming blong Jisas Kraes (olsem, ridim ol skripja, serem gospel, o givim seves long ol famli blong yumi). Letem ol pikinini blong yu oli faenem ol pikja o ol samting ia mo oli tokbaot olsem wanem, taem yumi stap mekem olgeta samting ia, i stap helpem yumi blong rere blong mitim Sevya taem we bae Hem i kambak.
-
Mo tu, tugeta, yufala i save singsing wan singsing abaot Seken Kaming olsem “When He Comes Again” (Children’s Songbook, 82–83). Serem wetem yufala wanwan, lav we yu gat long Sevya mo ol filing blong yu abaot taem we bae Hem i kambak.
Doktrin mo Ol Kavenan 133:52–53
Jisas Kraes i gat lav mo i kaen.
-
Yu mo ol pikinini blong yu i save lukluk long ol pikja we oli soem se Jisas i gat lav mo fasin blong stap kaen. (Eksampol, luk long Gospel Art Buk, ol namba 42, 47.) ?Wanem bakegen we Jisas i bin mekem blong soem lav mo fasin blong Hem blong stap kaen? Tugeta, ridim Doktrin mo Ol Kavenan 133:52, mo helpem ol pikinini blong yu blong tingting long ol wei we oli save “tokbaot bigfala lav mo kaen fasin blong Lod blong olgeta,” i go long ol narawan.
Wan smol pat blong peinting ia Long Laet blong Hem, i kam long Greg Olsen
Tijim klia mo simpol doktrin. Lod i tijim gospel blong Hem “i klia” mo “i simpol” (Doktrin mo Ol Kavenan 133:57). ?Ol toktok ia oli talem wanem long yu abaot wei blong stap tijim gospel long famli blong yu o klas?
Luk long Doktrin mo Ol Kavenan 134:1–2.
Lod i wantem mi blong mi obei ol loa.
-
Ol pikinini blong yu oli save mekem lis blong ol rul o ol loa we oli obei long olgeta. ?Bae laef i olsem wanem sapos i no gat wan i obei long ol loa ia? Afta, yu save ridim Doktrin mo Ol Kavenan 134:1–2 wetem olgeta, mo semtaem, helpem olgeta blong andastanem eni toktok o sentens we oli no save andastanem. ?From wanem nao Lod i wantem yumi blong obei long loa? (luk tu long Ol Toktok blong Bilif 1:12).
Blong moa tingting, luk long namba blong manis ia long Fren magasin.