“10–16 Novemba: ‘Mi Bin Luk Ol Sakrifaes blong Yu blong Mekem Se Bae Yu Obei’: Doktrin mo Ol Kavenan 129–132,” Kam Folem Mi—Blong Hom mo Jos: Doktrin mo Ol Kavenan 2025 (2025)
“Doktrin mo Ol Kavenan 129–132,” Kam Folem Mi—Blong Hom mo Jos: 2025
Wan smol pat blong peinting ia Josef Smit long Nauvu, 1840, i kam long Theodore Gorka
10–16 Novemba: “Mi Bin Luk Ol Sakrifaes blong Yu blong Mekem Se Bae Yu Obei”
Doktrin mo Ol Kavenan 129–132
Tru long Josef Smit, Lod i karemaot sam long ol samting we i sikret blong taem we i no save finis. Bigfala paoa blong God, glori blong heven, mo hamas we taem we i no save finis, i impoten tumas, i save luk kolosap olsem laet blong gospel we i bin kambak, iven long ol smol maen olsem blong yumi. Ol revelesen long Doktrin mo Ol Kavenan 129–32 oli wan gudfala eksampol. ?God i olsem wanem? Hem i “gat wan bodi … we oli save tajem.” ?Heven i olsem wanem? “Semfala laef wetem ol narafala man we yumi stap gat long wol ia, bae i stap wetem yumi longwe” (Doktrin mo Ol Kavenan 130:22, 2). I tru, wan long ol naesfala trutok abaot heven i we, hemia i save tekem tu famli blong yumi we i lukaotem ol rilesensip, sapos oli silim tru long stret atoriti. Ol trutok olsem, oli save mekem heven i nomo stap longwe—i gat glori be yumi filim se yumi save kasem.
Be afta, samtaem God i save askem yumi blong mekem ol samting we i luk olsem se, yumi no filim gud blong mekem mo no save kasem. Long plante fasfala Sent, fasin blong maredem plante woman, i bin wan komanmen ia we i had. I bin wan strong mo had tes blong fet long Josef Smit, waef blong hem, Ema, mo kolosap evriwan we i kasem komanmen ia. Blong mekem se tes ia i gotru, oli bin nidim moa bitim ol gudfala filing abaot gospel ia we i kambak; oli bin nidim fet long God we i go moa dip bitim hemia. Komanmen ia, i nomo stap tedei, be fetful eksampol blong ol pipol we oli bin laef tru long hemia, i stap yet. Mo eksampol ia, i givim insperesen long yumi taem Lod i askem yumi blong mekem “sakrifaes blong [yumi] blong mekem se bae [yumi] obei” (Doktrin mo Ol Kavenan 132:50).
Ol aedia blong Stap Lanem Samting long Hom mo long Jos
God i wantem blong leftemap ol pikinini blong Hem.
I gat plante samting we yumi no save abaot fasin blong kam olsem wan god o laef insaed long digri we i hae blong selestial kingdom—laef ia we God i gat. Plante long hemia bae i moa long hamas yumi save andastanem naoia. Be God i bin talemaot sam impoten samting, mo plante long olgeta oli stap long Doktrin mo Ol Kavenan 130–32 Maet taem yu stap rid, gat ol kwestin ia: ?Wanem nao mi lanem abaot God? ?Wanem nao mi lanem abaot laef afta laef long wol ia? ?Long wanem wei nao infomesen ia abaot laef we i no save finis i blesem laef blong mi naoia?
Luk tu long “Our Hearts Rejoiced to Hear Him Speak,” long Revelations in Context, 277–80.
Doktrin mo Ol Kavenan 130:20–21; 132: 5
God i stap blesem ol pipol we oli obei long ol loa blong Hem.
?Olsem wanem nao bae yu tokbaot hemia long toktok blong yuwan, abaot wanem we Lod i tijim insaed long Doktrin mo Ol Kavenan 130:20–21 mo 132:5? Tingting hevi long wanem wei nao yu bin soemaot prinsipol ia long laef blong yu.
Samtaem, taem yumi stap obei long God, ol blesing we yumi hop from, oli no kam hariap. ?Long wanem wei nao yu stap holemtaet fet mo hop blong yu taem hemia i hapen? Lukaotem ol niu tingting insaed long mesej blong Elda D. Todd Christofferson “Rilesensip blong Yumi Wetem God” (Liahona, Mei 2022, 78–80).
Luk tu long 1 Nifae 17:35; Doktrin mo Ol Kavenan 82:10.
Doktrin mo Ol Kavenan 132:13–21
Papa long Heven i mekem i posibol blong ol famli oli save stap blong taem we i no save finis.
Tru long profet Josef Smit, Lod i putumbak trutok ia se, ol rilesensip insaed long mared mo famli, oli save stap blong taem we i no save finis. Taem yu stap ridim Doktrin mo Ol Kavenan 132:13–21, lukaotem ol toktok we oli helpem yu blong andastanem wanem we i defren bitwin, wanem we bae “i stap” blong taem we i no save finis mo hemia we bae i no save stap. ?Wanem nao yu ting se wan rilesensip insaed long mared i stap minim blong stap “kam tru [long Lod]”? (ves 14).
Long mesej blong hem,“In Praise of Those Who Save,” Presiden Dieter F. Uchtdorf i tokbaot wanem we i defren insaed long ol rilesensip blong mared wetem ol samting we yumi save “karemaot” (Liahona, Mei 2016, 77–78). ?Wanem nao samting ia we i defren i tijim yu abaot, olsem wanem blong lukaot gud—o rere from—wan rilesensip insaed long mared? Tingbaot ol famli rilesensip blong yu—naoia mo long fiuja—taem yu stap ridim mesej blong Elda Uchtdorf. ?Wanem nao yu faenem long ples ia we i stap givim hop long yu long Kraes abaot ol famli rilesensip blong yu?
Presiden Henry B. Eyring i serem kaonsel ia we hem i kasem taem hem i gat wari abaot situesen blong famli blong hem: “Yu jes laef klin inaf nomo blong stap long selestial kingdom, mo ol famli bae oli kam moa gud bitim we yu save tingbaot” (long “Wan Hom we Spirit I Stastap long Hem,” Liahona, Mei 2019, 25). ?Long wanem wei nao kaonsel ia i save helpem yu o wan we yu save?
Luk tu long “Families Can Be Together Forever,” Hym, namba 300; Topics and Questions, “Marriage,” Gospel Laebri.
Wan mared i save sil blong taem we i no save finis insaed long haos blong Lod.
Doktrin mo Ol Kavenan 132:1–2, 29–40
Fasin blong maredem fulap woman, God i save akseptem nomo taem Hem nao i givim oda from.
Plante pipol we oli rid abaot OlTesteman, oli stap askem olgetawan abaot Ebraham, Aesak, Jekob, Moses mo ol narawan we oli bin stap maredem fulap waef. ?Ol wokman blong Lod ia oli stap brekem loa blong adaltri? ?God i bin apruvum ol mared blong olgeta? Josef Smit i bin gat ol semmak kwestin. Lukaotem ol ansa we God i bin givim long yu insaed long Doktrin mo Ol Kavenan 132:1–2, 29–40.
Mared bitwin wan man mo wan woman, hem i standet blong God long saed blong mared (luk long seksen heding blong Ofisol Toktok 1; Jekob 2:27, 30). Be, i bin gat ol taem we God i bin givim komanmen long ol pikinini blong Hem blong praktisim fasin blong maredem fulap woman.
Ol fasfala yia blong Jos ia we i kambak, oli bin wan taem we i no semmak long ol nara taem. Sapos yu wantem lanem moa abaot fasin blong maredem fulap woman long medel blong Ol fas Sent, luk long “Mercy Thompson and the Revelation on Marriage” (long Revelations in Context, 281–93); Saints, 1:290–92, 432–35, 482–92, 502–4; Topics and Questions, “Plural Marriage in The Church of Jesus Christ of Latter-day Saints,” Gospel Laebri; “Why Was It Necessary for Joseph Smith and Others to Practice Polygamy?” (vidio), ChurchofJesusChrist.org.
Why was it necessary for Joseph Smith and others to practice polygamy?
Sam Aedia blong Tijim Ol Pikinini
Doktrin mo Ol Kavenan 130:2, 18–19; 132:13, 19
Papa long Heven i wantem mi blong lukluk nomo long ol samting we oli no save finis.
-
?Wanem nao Doktrin mo Ol Kavenan 132:13 i stap tijim yumi abaot ol samting blong wol ia? Maet yu mo ol pikinini blong yu i save fulumap wan sutkes o hanbag wetem ol samting we oli ripresentem ol samting we i folem wanem we i stap long Doktrin mo Ol Kavenan 130:2, 18–19; 132:19, bae yumi save tekem wetem yumi i go long nekis laef.
Doktrin mo Ol Kavenan 130:20–21; 132:5, 21–23
God i blesem mi taem mi obei ol loa blong Hem.
-
Maet blong komperem ol samting long wan simpol wei bae i save tijim ol pikinini blong yu abaot stap obei ol komanmen blong God. Eksampol, yu save askem olgeta blong givim ol daereksen long yu blong wokbaot i go long wanples, olsem blong wokbaot i go long wan skul o Jos bilding. ?Wanem bae i hapen taem yumi no folem ol daereksen? Afta, yu save ridim Doktrin mo Ol Kavenan 130:21 mo komperem ol daereksen ia i go wetem ol komanmen blong God we i bin givim long yumi.
-
Tugeta, yufala i save singsing wan singsing abaot fasin blong stap obei, olsem “Keep the Commandments” (Children’s Songbook, 146–47), mo lukaotem ol toktok insaed long Doktrin mo Ol Kavenan 130:20–21 mo 132:5 we oli semmak long olgeta ia insaed long singsing. ?Long wanem wei nao God i stap blesem yumi taem yumi traehad blong obei ol komanmen blong Hem?
Papa long Heven mo Jisas Kraes oli gat ol bodi blong mit mo bun.
-
Afta we yufala i rid tugeta long Doktrin mo Ol Kavenan 130:22 , yu mo ol pikinini blong yu i save lukluk wan pikja blong Jisas Kraes mo poen i go long ae blong Hem, maot blong Hem mo ol narafala pat blong bodi blong Hem. Ol pikinini blong yu oli save poen i go long ol semmak pat blong ol bodi blong olgetawan. Talem long olgeta, from wanem i impoten long yu blong save se ol bodi blong yumi oli luk semmak olsem ol bodi blong Papa long Heven mo Jisas Kraes.
Tru long ol odinens blong haos blong Lod, ol famli oli save stap blong taem we i no save finis.
Papa long Heven i mekem i posibol blong ol famli oli stap tugeta blong oltaem.
-
Helpem ol pikinini blong yu blong faenem ol samting we oli no save stap blong oltaem—ol kaekae we bae oli roten, ol flaoa we bae oli kam slak mo sam moa. Afta, tugeta, lukluk long Doktrin mo Ol Kavenan 132:19 mo faenem ol ki toktok olsem,“kavenan we i no gat en”” “silim,” “long ful taem we i no save finis,” mo “oltaem mo oltaem.” (Luk tu long “Japta 55: Wan Revelesen abaot Mared,” long Ol Doktrin mo Ol Kavenan Stori, 198, o vidio we i go wetem long Gospel Laebri.) Yu save lukluk tu long ol pikja blong famli blong yu mo testifae se Lod i bin mekem i posibol, tru ol odinens mo ol kavenan blong tempol, blong famli oli stap blong oltaem.
Chapter 55: A Revelation about Marriage: July 1843
Lukaot gud mo gat hat long ol famli situesen we i stap. “Tedei, ol pikinini oli stap long ol defren kaen mo had famli situesen. … Yumi nidim blong go aot mo toktok long olgeta we oli filim se oli stap olgetawan, we oli filim se oli lego olgeta oli stap biaen i stap, o oli stap aotsaed long fanis” (Neil L. Andersen, “Whoso Receiveth Them, Receiveth Me,” Liahona, May 2016, 49, 52).
Blong kasem moa aedia, luk long magasin blong Fren blong manis ia.