“Ol Voes blong Restoresen: Rilif Sosaeti,” Kam Folem Mi—Blong Hom mo Jos: Doktrin mo Ol Kavenan 2025 (2025)
“Rilif Sosaeti,” Kam Folem Mi—Blong Hom mo Jos: 2025
Ol Voes blong Restoresen
Rilif Sosaeti
Long 1842, afta we Rilif Sosaeti i bin oganaes long Nauvu, Ilinoa, Profet Josef Smit i bin talem: “Jos i neva bin oganaes stret evriwan kasem taem we ol woman oli bin oganaes.” Semmak, long wan stadi blong Restoresen blong Jos Ia blong Lod mo prishud blong Hem i no fulwan kasem taem we i gat tu wan stadi blong Rilif Sosaeti, we hemwan i “wan restoresen blong wan paten blong bifo” abaot ol woman disaepol blong Jisas Kraes.
Eliza R. Snow i bin plei wan impoten wok long restoresen ia. Hem i bin stap taem oli bin oganaesem Rilif Sosaeti blong fastaem, mo olsem sekretari blong sosaeti, hem i bin tekem ol not long taem blong ol miting ia. Hem i bin witnesem se Rilif Sosaeti i bin oganaes “folem paten blong prishud.” Andanit ia, oli ol toktok blong hem, we hem i bin raetem taem hem i bin stap givim seves olsem seken Jeneral Presiden blong Rilif Sosaeti, blong helpem ol sista blong hem blong oli andastanem tabu wok we i go long ol kavenan gel blong God.
Blong lanem moa abaot hao Rilif Sosaeti i bin oganaes, luk long Daughters in My Kingdom: The History and Work of Relief Society (2017), 1–25; The First Fifty Years of Relief Society (2016), 3–175.
Peinting blong oganaesesen blong Rilif Sosaeti we i kam long Paul Mann
Eliza R. Snow
“I nomata nem ia Rilif Sosaeti i wan nem blong tedei, oganaesesen ia hem i blong longtaem bifo finis. Josef Smit i bin talem long yumi se, semfala oganaesesen ia i bin stap long Jos bifo, mo oli tokbaot smol long ol leta we oli raetem long Niu Testeman, taem oli yusum toktok ia ‘woman we God i jusumaot yu’ [luk long 2 Jon 1:1; Doktrin mo Ol Kavenan 25:3].
“Hemia i wan oganaesesen we i no save stap sapos i no gat Prishud, hemia i from se evri atoriti mo paoa blong hem i kamaot long ples ia nao. Taem we oli tekemaot Prishud long wol ia, oganaesesen ia tu, mo evri nara samting we i bin hang long tru oda blong jos blong Jisas Kraes long wol ia, i go lus tu. …
“Mi bin stap long taem we oli oganaesem ‘Woman Rilif Sosaeti blong Nauvu,’ … mo tu, mi bin gat bigfala eksperiens long asosiesen ia, nao mi save talem samfala samting we bae oli helpem ol gel blong Saeon blong tekem step long impoten posisen ia, we i fulap wetem ol niu mo plante moa responsabiliti. Sapos i gat eni gel mo mama long Isrel we i stap filim se hem i no inaf long ples we hem i stap long hem, nao bae hem i faenem se hem i gat moa paoa mo skil blong mekem gud; mo ol paoa mo skil ia, oli gat i stap wetem olgeta we oli endao.
Rilif Sosaeti, oli bin oganaesem long wan rum we i stap antap insaed long Red Brikis Stoa.
“Sapos kwestin i kam long maen, blong eniwan, ?Wanem i stamba tingting blong Woman Rilif Sosaeti? Bae mi ansa—blong mekem gud—blong mekem se oli yusum evri paoa we yumi gat blong mekem gud, i no blong helpem ol puaman nomo, be tu, blong sevem ol sol. Fasin blong wok wan, bae i mekem bigbigfala samting i hapen we man i no save kaontem; bae i moa bitim ol gudfala paoa blong wanwan man o woman. …
“Taem bae oli helpem olgeta we oli pua, Woman Rilif Sosaeti i gat ol narafala diuti blong mekem bitim hemia blong helpem wanem we bodi i wantem. Fasin blong stap pua long tingting mo sik long hat, hemia tu i nidim man blong lukluk long hem; mo plante taem, wan kaen toktok—samfala toktok blong kaonsel, o iven wan wom mo gudfala sekhan bae i mekem moa gud, mo bae man i laekem moa bitim wan paos we i fulap long gol. …
“Taem we Ol Sent oli kam nara ples, oli strenja long evriwan, mo oli stap tu blong olgeta we oli wet blong stap giaman oli trikim olgeta, Rilif Sosaeti i mas kwik blong lukaotemgud olgeta, mo presentem olgeta long sosaeti, we bae i mekem olgeta oli kam gud moa, mo i leftemap olgeta, mo antap long evri samting, bae i mekem olgeta oli kam strong moa long fet blong olgeta long Gospel; mo taem oli mekem hemia, oli kam ol strong tul blong sevem plante.
“Bae i nidim fulap buk blong raetemdaon ol diuti, ol spesel janis, mo ol responsabiliti we oli kam insaed long ol responsabiliti ia blong Sosaeti. … Mekem wok (anda long daereksen blong bisop blong yu), wetem kwaet fasin, wetem ful tingting, wetem paoa, wetem yuniti, mo wetem prea, mo bae God i blesem ol hadwok blong yu wetem sakses.”