Tokāteline mo e Ngaahi Fuakava 133–134

Ko e fehangahangai fakalaumālie ʻo Saioné ko Pāpilone—ko ha kolo ʻi he kuonga muʻá ʻokú ne fakataipe ʻa e faiangahalá mo e pōpula fakalaumālié ʻi he kotoa ʻo e folofolá. ʻI hoʻo lau ʻa e Tokāteline mo e Ngaahi Fuakava 133:4–14, fakalaulauloto ki he founga ʻoku ui ai koe ʻe he Fakamoʻuí ke ke “ʻalu … mei Pāpilone” (veesi 5) pea “ʻalu atu ki … Saioné” (veesi 9). ʻOkú ke tali fēfē ʻa ʻEne uí? Ko e hā mo ha toe meʻa ʻokú ke ako fekauʻaki mo Saione mei he pōpoaki ʻa ʻEletā D. Toti Kulisitofasoni “Haʻu ki Saioné”? (Liahona, Nōvema 2008, 37–40).

Ko e vahe 1, ko e talamuʻaki ia ʻa e ʻEikí ki he Tokāteline mo e Ngaahi Fuakavá, pea ko e vahe 133, ko e fakamatala fakalahi totonu ia ki he Tohi ʻo e Ngaahi Fekaú, pea ʻokú na fakatou kamata ʻaki ʻa e kole tatau mei he ʻEikí: “Tokanga mai, ʻa kimoutolu ʻa e kakai ʻo hoku siasí” (Tokāteline mo e Ngaahi Fuakava 1:1; 133:1). Mahalo te ke lava ʻo ako ʻa e Tokāteline mo e Ngaahi Fuakava 133:1–19, 37–39 pea lisi ʻa e ngaahi pōpoaki ʻoku fakaafeʻi koe ʻe he ʻEikí ke ke “tokanga” ki aí (fakafanongo pea talangofua) ʻi hoʻo teuteu ki Heʻene Hāʻele ʻAnga Ua Maí. Kae tautautefito ki haʻo lisi ʻa e ngaahi meʻa ʻokú Ne finangalo ke ke fai ke (1) teuteuʻi ai koé mo (2) tokoni ke teuteuʻi ʻa e māmaní ki Heʻene toe hāʻele maí. Ko e hā e meʻa ʻokú ke ako mei he ongo lisi ko ʻení?

Naʻe vahevahe ʻe Palesiteni Lāsolo M. Nalesoni ha ngaahi moʻoni mahuʻinga fekauʻaki mo e tuʻunga ʻe ʻi ai ʻa e māmaní ʻi he taimi ʻe toe hāʻele mai ai ʻa e Fakamoʻuí—pea mo e founga ke teuteu aí. Kumi ʻa e ngaahi moʻoni ko ʻení ʻi heʻene pōpoaki, “Ko e Kahaʻu ʻo e Siasí: Ko Hono Teuteu ʻo e Māmaní ki he Hāʻele ʻAnga Ua Mai ʻa e Fakamoʻuí” (Liahona, ʻEpeleli 2020, 6–11). Ko e hā e meʻa ʻokú ke ongoʻi ʻoku ueʻi koe ke ke fai—pe hokohoko atu hono faí—ke “teuteuʻi ai ʻa e māmaní ki he liuaki mai ʻa e Fakamoʻuí”? (“Kaveinga ʻo e Kōlomu ʻo e Lakanga Taulaʻeiki Faka-ʻĒloné,” Gospel Library).

Vakai foki, Mātiu 25:1–13; Russell M. Nelson, “Tali Lelei ʻa e Kahaʻú ʻi he Tui,” Liahona, Nōvema 2020, 73–76; “Haʻu e Fānau ʻa e ʻEikí,” Ngaahi Himí, fika 24; Ngaahi Tefitó mo e Ngaahi Fehuʻí, “Hāʻele ʻAngaua Mai ʻa Sīsū Kalaisí,” Gospel Library.

ʻI hoʻo lau e fakamatala ki he toe hāʻele mai ʻa e Fakamoʻuí ʻi he veesi 19–56, ko e hā ha meʻa ʻokú ke maʻu ai ʻokú ke hanganaki atu ki ai? Ko e hā ha ngaahi foʻi lea pe kupuʻi lea ʻokú ne fakamatalaʻi e ʻofa ʻa e ʻEikí ki Hono kakaí? Fakakaukau ke hiki hoʻo ngaahi aʻusia fakataautaha ʻi he “loto-manavaʻofa ʻa [hoʻo] ʻEikí, pea mo e meʻa kotoa pē kuó ne foaki kiate [koé], ʻo fakatatau ki heʻene angaleleí” (veesi 52).

Naʻe faingataʻa e vā fetuʻutaki ʻa e fuofua Kāingalotú mo e puleʻangá. ʻI he taimi naʻe tuli ai e Kāingalotú mei he Vahefonua Siakisoni, Mīsulí, ʻi he 1833, naʻa nau kole tokoni ki he puleʻanga fakalotofonuá mo fakafonuá pea naʻe ʻikai ke nau maʻu ha tokoni. ‘I he taimi tatau, naʻe fakaʻuhingaʻi ʻe he kakai ʻe niʻihi ne ʻikai kau ki he Siasí ʻoku ʻuhinga e ngaahi akonaki fekauʻaki mo Saioné naʻe fakasītuʻaʻi ʻe he Kāingalotú ʻa e mafai ʻo e ngaahi puleʻanga he māmaní. Naʻe hiki ʻa e Tokāteline mo e Ngaahi Fuakava 134 ko e konga ke fakamahinoʻi ʻa e tuʻunga ʻo e Siasí ʻi he puleʻangá. Ko e hā ha meʻa ʻoku fokotuʻu mai ʻe he vahe ko ʻení fekauʻaki mo e ongo ʻoku totonu ke maʻu ʻe he Kāingalotu ʻa e ʻEikí ki he puleʻangá?

ʻI hoʻo ako ʻa e vahe 134, fakakaukau ke kumi e ngaahi tefitoʻi moʻoni ʻo e puleʻangá pea mo e ngaahi fatongia ʻo e kau tangataʻi fonuá. Naʻe mei tokoni fēfē nai e ngaahi fakakaukaú ni ki he fuofua Kāingalotú? ʻOku nau kaunga fēfē ki he feituʻu ʻokú ke nofo aí?

Vakai foki, Ngaahi Tefito ʻo e Tuí 1:11–12; Ngaahi Tefitó mo e Ngaahi Fehuʻí, “Tauʻatāina Fakalotú,” Gospel Library.

• Te ke lava mo hoʻo fānaú ʻo lisi ha ngaahi feituʻu mo ha ngaahi tūkunga ʻe niʻihi ʻoku finangalo ʻa e ʻEikí ke tau fakamamaʻo mei ai. Hili iá te ke lava leva ʻo fakafehoanaki ʻa e ngaahi feituʻu mo e ngaahi tūkunga ko iá ki he ʻuhinga ʻo e “Pāpilone, Pēpeli,” ʻi he Fakahinohino ki he Ngaahi Folofolá (Gospel Library). Te nau lava leva ʻo lau ʻa e Tokāteline mo e Ngaahi Fuakava 133:4–5, 14. Ko e ʻuhinga ki he hā ʻa e “ʻalu atu mei Pāpiloné”? (veesi 5). Te ke lava foki ʻo faʻu ha lisi tatau ʻo e ngaahi feituʻu mo e ngaahi tūkunga ʻoku fakaafeʻi kitautolu ʻe he ʻEikí ki aí pea fakafehoanaki ʻa e lisi ko iá ki he ʻuhinga ʻo “Saione” ʻi he Fakahinohino ki he Ngaahi Folofolá.

• Mahalo naʻa fiefia hoʻo fānaú ke fakatātaaʻi ʻa e founga ʻo e teuteu ki ha meʻa, hangē ko ha feʻauhi sipoti, ko ha tokotaha mahuʻinga ʻe ʻaʻahi mai, pe ko ha ʻaho mālōlō manakoa. Ko e hā ʻoku mahuʻinga ai ʻa e mateuteú? Te mou lava leva ʻo lau fakataha ʻa e Tokāteline mo e Ngaahi Fuakava 133:17–19, 21 pea fakaafeʻi hoʻo fānaú ke nau kumi ʻa e meʻa ʻoku fakaafeʻi kitautolu ʻe he ʻEikí ke tau teuteu ki aí. Te ke lava ʻo fakaʻaliʻali ange ʻa e fakatātā mei he lēsoni ki he uike ní pea fehuʻi ki hoʻo fānaú pe ko e hā e meʻa ʻoku nau ʻilo fekauʻaki mo e Hāʻele ʻAnga Ua Mai ʻa Sīsū Kalaisí. Ko e hā ha toe meʻa ʻoku tau ako mei he veesi 19–25, 46–52? Ko e hā ha meʻa te tau lava ʻo fai ke teuteu ai ki he meʻa fakafiefia ko ʻení?

• Te ke lava ʻo fufuuʻi ha ʻū fakatātā pe meʻa kehekehe ʻokú ne fakahaaʻi ʻa e ngaahi meʻa te tau lava ʻo fai ke teuteu ai ki he Hāʻele ʻAnga Ua Mai ʻa Sīsū Kalaisí (hangē ko e lau e folofolá, vahevahe e ongoongoleleí, pe tokoniʻi hotau ngaahi fāmilí). Tuku ke kumi ʻe he fānaú e ʻū fakatātaá pe ʻū meʻá, pea mou talanoa ki he founga ʻe tokoni ai hono fakahoko ʻo e ngaahi meʻa ko ʻení ke tau mateuteu ke feʻiloaki mo e Fakamoʻuí ʻi Heʻene toe hāʻele maí.

• Te mou lava foki ʻo hivaʻi fakataha ha foʻi hiva fekauʻaki mo e Hāʻele ʻAnga Uá, hangē ko e “ʻO Ka Ne Ka Toe Haʻú” (Tohi Hiva ʻa e Fānaú, 46–47). Fevahevaheʻaki hoʻomou ʻofa ki he Fakamoʻuí pea mo hoʻomou ngaahi ongo fekauʻaki mo ʻEne toe hāʻele maí.

• Te ke lava mo hoʻo fānaú ʻo sio ki ha ʻū fakatātā ʻoku fakaʻaliʻali ai ʻoku ʻofa mo angaʻofa ʻa Sīsū. (Hangē ko ʻení, vakai, Tohi Fakatātā ʻo e Ongoongoleleí, fika 42, 47.) Ko e hā mo ha toe meʻa kuo fai ʻe Sīsū ke fakahaaʻi ʻaki ʻEne ʻofá mo e angaʻofá? Lau fakataha ʻa e Tokāteline mo e Ngaahi Fuakava 133:52, pea tokoniʻi hoʻo fānaú ke nau fakakaukau ki ha ngaahi founga te nau lava ai ʻo “lau ki he loto-manavaʻofa ʻa honau ʻEikí” ki he niʻihi kehé.

  

• ʻE lava ke lisi ʻe he fānaú ha ngaahi lao pe fono ʻoku nau talangofua ki ai. ʻE mei fēfē nai e moʻuí kapau ne ʻikai talangofua ha taha ia ki he ngaahi fono ko ʻení? Hili iá te ke lava leva ʻo lau ʻa e Tokāteline mo e Ngaahi Fuakava 134:1–2 mo kinautolu, ʻo tokoni ke mahino kiate kinautolu ha ngaahi lea pe kupuʻi lea ʻe ngali taʻemahino. Ko e hā e ʻuhinga ʻoku finangalo ai e ʻEikí ke tau talangofua ki he fonó? (vakai foki, Ngaahi Tefito ʻo e Tuí 1:12).