Tokāteline mo e Ngaahi Fuakava 125–128

Hili ʻa e foki mai ʻa Pilikihami ʻIongi mei heʻene ngāue fakafaifekau ki ʻIngilaní—ko e taha ʻo e ngaahi misiona lahi naʻá ne ngāue aí—naʻá ne maʻu ha uiuiʻi mahuʻinga ʻe taha mei he ʻEikí. Naʻe kole ange ke ne “tokangaʻi makehe ʻa [hono] fāmilí” (veesi 3), ʻa ia naʻa nau faingataʻaʻia ʻi heʻene mavahé. ʻI hoʻo ako e konga ko ʻení, fakakaukau ki he ʻuhinga ʻoku faʻa finangalo ai e ʻEikí ke fai ha feilaulau ʻi heʻetau ngāué. Ko e hā ha meʻa te ke lava ʻo fai ke tokangaʻi ai ho fāmilí?

Vakai foki, “Take Special Care of Your Family,” ʻi he Revelations in Context, 242–49.

Naʻe hanga ʻe he ngaahi tukuakiʻi loí mo e fakamanamana ke puke pōpulá ʻo toe fakamālohiʻi ʻa Siosefa Sāmita ke toitoi ʻi ʻAokosi 1842. Ka ko e ngaahi lea naʻá ne tohi ki he Kāingalotú lolotonga e taimi ko ʻení (Tokāteline mo e Ngaahi Fuakava 127 he taimi ní) ʻoku fonu ia ʻi he fiefia mo e fakatuʻamelie. Ko e hā ʻoku akoʻi atu ʻe he veesi 2–4 fekauʻaki mo e ʻOtuá? fekauʻaki mo e fehangahangai mo e manukí pe fakafepakí? Ko e hā ha ngaahi kupuʻi lea mei he ngaahi veesi ko ʻení ʻe ala tokoni atu ʻi he taimi ʻokú ke ongoʻi ai ʻoku fakatangaʻi koé? Fakakaukau ke hiki e founga ʻoku poupouʻi ai koe ʻe he ʻEikí ʻi he “vai loloto” ʻi hoʻo moʻuí.

ʻI hoʻo lau e Tokāteline mo e Ngaahi Fuakava 127:5–8; 128:1–8, kumi e ngaahi ʻuhinga naʻe foaki ai ʻe he ʻEikí kia Siosefa Sāmita ha ngaahi fakahinohino pau pehē ki hono lekooti e ngaahi papitaiso maʻá e kau pekiá. Ko e hā nai ʻoku akoʻi atu ʻe he meʻá ni fekauʻaki mo e ʻEikí mo ʻEne ngāué? Ko e hā e founga ʻokú ke ongoʻi ai ʻe lava ke fakaʻaongaʻi e fakahinohino ko ʻení ki hoʻo ngaahi lekooti fakafāmilí, hangē ko e tohinoa fakatāutahá?

ʻOku mahino mei he meʻa naʻe fakahā ʻe he ʻOtuá ʻo fakafou ʻia Siosefa Sāmitá ʻa e ʻuhinga ʻoku fiemaʻu ai kitautolu ʻe heʻetau ngaahi kui naʻe ʻikai papitaiso ʻi he moʻui ní: ʻoku tau papitaiso maʻanautolu koeʻuhí ke nau lava ʻo fili ke tali pe fakasītuʻaʻi ʻa e ouau ko ʻení. Ka naʻe toe akoʻi foki ʻe he Palōfitá ko e fakamoʻui ʻetau ngaahi kuí ʻoku “ʻaonga pea ʻoku kau lahi [ia] ki hotau fakamoʻuí.” ʻI hoʻo lau e Tokāteline mo e Ngaahi Fuakava 128:15–18, fakakaukau ki hono ʻuhingá.

ʻOku akoʻi ʻe he veesi 5 ko e ouau ʻo e papitaiso maʻá e pekiá naʻe “teuteuʻi [ia] ʻi he teʻeki ai ke ʻai ʻa e tuʻunga ʻo e māmaní.” Ko e hā ʻoku akoʻi mai ʻe he moʻoni ko ʻení ʻo fekauʻaki mo e ʻOtuá mo ʻEne palaní? Ko e hā e meʻa ʻoku tānaki atu ʻe he pōpoaki ʻa ʻEletā Teili G. Lenilani ko e “Hisitōlia Fakafāmilí mo e Ngāue Fakatemipalé: Silá mo e Fakamoʻuí” ki he mahino ʻokú ke maʻú? (Liahona, Mē 2018, 46–49).

Naʻe fakaʻaongaʻi ʻe Siosefa Sāmita ha ngaahi kupuʻi lea hangē ko e “mālohi … ke … nonoʻó,” “fehokotakiʻanga mālohi,” mo e “fakatahaʻi … haohaoa” ʻi heʻene akoʻi fekauʻaki mo e ngaahi ouau ʻo e lakanga fakataulaʻeikí mo e papitaiso maʻá e kau pekiá. Kumi e ngaahi kupuʻi leá ni mo ha ngaahi kupuʻi lea tatau ʻi hoʻo lau e Tokāteline mo e Ngaahi Fuakava 128:5–25. Te ke lava nai ʻo fakakaukau ki ha ngaahi meʻa te ke lava ʻo fakaʻaongaʻi ke fakatātaaʻi ʻaki e ngaahi kupuʻi lea ko ʻení, hangē ko ha sēini pe maea? Ko e hā e ʻuhinga ʻoku hoko ai ʻeni ko ha ngaahi kupuʻi lea lelei ke fakamatalaʻi ʻa e tokāteline ko ʻení?

ʻE ala tokoni foki hoʻo fakakaukau ki he ngaahi fehuʻi ko ʻení ke ke ako ai e ngaahi veesi ko ʻení:

• ʻI hoʻo fakakaukaú, ko e hā ʻe lava ke lau ai e papitaiso maʻá e kau pekiá ko e “tefito fakaʻofoʻofa [taha] ʻo e ngaahi tefito kotoa pē ʻa ia ʻoku kau ki he ongoongolelei taʻengatá”? (veesi 17). Ko e hā ha ngaahi aʻusia kuó ne tokoniʻi koe ke ke ongoʻi peheé?

• Ko e hā ha founga ʻe malaʻia ai ʻa e māmaní ʻo kapau he ʻikai ha “fehokotakiʻanga mālohi … ʻi he vahaʻa ʻo e ngaahi tamaí mo e fānaú”? (veesi 18).

• Ko e hā ʻokú ke mahuʻingaʻia ai ʻi he ngaahi lea ʻa Siosefa Sāmita ʻi he veesi 19–25? ʻOku tokoniʻi fēfē ʻe he ngaahi veesi ko ʻení ʻa e ongo ʻokú ke maʻu fekauʻaki mo Sīsū Kalaisí? fekauʻaki mo e ngāue fakatemipale ki hoʻo ngaahi kuí? (vakai foki, “Come, Rejoice,” Hymns, no. 9).

5:27

Hili hoʻo ako e ngaahi veesi ko ʻení, mahalo te ke ongoʻi ʻoku ueʻi koe ke ke fai ha meʻa maʻa hoʻo ngaahi kuí. ʻE lava ke tokoni ʻa e ngaahi fakakaukau ʻi he FamilySearch.org.

ʻE lava ke ʻoatu ʻe he “Inspirational Videos” ʻi he tānakiʻanga ʻo e “Temple and Family History” ʻi he Gospel Library ha tokoni, ngaahi talanoa fakalaumālie, mo ha ngaahi pōpoaki mei he kau takí fekauʻaki mo e hisitōlia fakafāmilí.

Vakai foki, Kevin R. Duncan, “Ko Ha Leʻo ʻo e Fiefiá!,” Liahona, Mē 2023, 95–97.

Naʻe pehē ʻe Palesiteni Kōtoni B. Hingikelī:

“ʻOku fakafofongaʻi ʻe he Fakalelei ʻa Sīsū maʻá e tokotaha kotoá ha feilaulau fakafofonga lahi ʻaupito. Naʻá Ne fokotuʻu ʻa e sīpingá ʻa ia naʻá Ne hoko ai ko ha fakafofonga maʻá e faʻahinga kotoa ʻo e tangatá. Ko e sīpinga ko ʻení, ʻa ia ʻoku lava ai ʻe ha tangata ʻe taha ʻo fakafofongaʻi ha tangata kehé ʻoku hoko atu hono fakahoko iá ʻi he ngaahi ouau ʻo e fale ʻo e ʻEikí. ʻI māmaní ʻoku tau ngāue ai ʻo fakafofongaʻi ʻa kinautolu kuo pekia ʻikai ha ʻilo ki he ongoongoleleí. Ko kinautolu kuo pekiá ʻoku nau fili ke tali pe taʻetali ʻa e ouau ko ia ne fakahokó. ʻOku ʻoange maʻanautolu ha faingamālie tatau mo kinautolu ʻoku nau ʻaʻeva he māmaní. ʻOku foaki ki he kau pekiá ʻa e faingamālie tatau mo e kakai moʻuí. ʻIo, hono ʻikai nāunauʻia mo fakaofo e foaki kuo fakahoko ʻe he Fungani Māfimafí ʻi Heʻene fakahā ki Heʻene Palōfitá” (“The Great Things Which God Has Revealed,” Liahona, Mē 2005, 82–83).

• Ke tokoni ki hoʻo fānaú ke nau ako ke tokoni ki he kau mēmipa honau fāmilí, fakakaukau ke vahevahe ʻa e fakamatala fekauʻaki mo Pilikihami ʻIongi ʻi he “Vahe 49: Ko e Kāingalotu ʻi Nāvuú” (ʻi he Ngaahi Talanoa ʻo e Tokāteline mo e Ngaahi Fuakavá, 184, pe ko e vitiō fekauʻakí ʻi he Gospel Library) pe fakamatalaʻi fakanounou ʻa e Tokāteline mo e Ngaahi Fuakava 126 ʻi hoʻo lea pē ʻaʻaú. Te ke lava ʻo fakamamafaʻi ʻa e kupuʻi lea “tokangaʻi makehe ʻa ho fāmilí” (veesi 3) pea talanoa mo hoʻo fānaú fekauʻaki mo e ʻuhinga ke tokangaʻi makehe hotau ngaahi fāmilí.

  

  1:33

• Mahalo ʻe fakafiefia kiate koe mo hoʻo fānaú ke mou sio ʻi ha ʻū tā fakafāmili (pe tā ha ʻū fakatātā) lolotonga hoʻomou talanoa fakataha fekauʻaki mo ha ngaahi founga te tau lava ai ʻo tokoni ke “tokangaʻi” ʻa e kau mēmipa ʻo e fāmilí. Te mou lava foki ʻo hivaʻi ha foʻi hiva hangē ko e “Hoko ʻa ʻApi ko e Hēvani” (Ngaahi Himí, fika 188).

• Fakaafeʻi hoʻo fānaú ke nau fekumi ʻi he Tokāteline mo e Ngaahi Fuakava 128:1 ke ʻiloʻi pe ko e hā ʻa e tefito naʻe fakakaukau ki ai ʻa Siosefa Sāmitá. Te nau lava foki ʻo fekumi ʻi he veesi 17 ke ʻiloʻi pe ko e hā ʻa e tefito naʻá ne pehē “[ko e] fakaʻofoʻofa tahá.” Tuku ke nau vahevahe ʻa e meʻa ʻoku nau maʻú, pea talanoa fekauʻaki mo e ʻuhinga ʻoku fakafiefia ai ʻa e tefito ko ʻení.

• Makehe mei hono tokoniʻi hoʻo fānaú ke nau teuteu (mo moʻui) ʻaki ʻenau ngaahi fuakava ʻi he papitaisó, te ke lava ʻo tokoni ke nau ʻiloʻi e founga ke tokoni ai ki he kakai naʻe ʻikai ke nau fai e ngaahi fuakava ko ʻení lolotonga ʻenau kei moʻuí. Fakakaukau ke talanoa ki hoʻo fānaú fekauʻaki mo ha taha ʻokú ke ʻilo naʻe pekia ʻoku teʻeki ke papitaiso. Hili iá pea te mou lava ʻo lau fakataha ʻa e Tokāteline mo e Ngaahi Fuakava 128:5 pea sio ki ha tā ʻo ha faiʻanga papitaiso ʻi he temipalé (hangē ko ia ʻi he fakaʻosinga ʻo e lēsoni ko ʻení). Talanoa ki hoʻo fānaú ʻa e ongo ʻokú ke maʻu fekauʻaki mo e papitaiso ʻi he ngaahi temipalé maʻá e kakai kuo pekiá koeʻuhí ke maʻu ʻe he taha kotoa ʻa e faingamālie ke fai ha ngaahi fuakava mo e Tamai Hēvaní.

• Mahalo ʻe fakafiefia kiate koe mo hoʻo fānaú ke mou faʻu ha sēini pepa ʻoku ʻi ai e hingoa ʻo e mātuʻá, ngaahi kuí, kui uá, pea hokohoko pehē ai pē (vakai ki he peesi ʻekitivitī ʻo e uike ní). Hili iá te mou lava ʻo fevahevaheʻaki ʻa e meʻa ʻokú ke ʻilo fekauʻaki mo e ngaahi kui ko ʻení. Lau fakataha e Tokāteline mo e Ngaahi Fuakava 128:18 ke iloʻi pe ko e hā ʻa e “fehokotakiʻanga mālohi” ʻokú ne ʻai hotau hisitōlia fakafāmilí ke “kakato mo fakakātoá.” Te mou lava foki ʻo mamata ʻi he foʻi vitiō “Courage: I Think I Get It from Him” (Gospel Library).

  

  1:44

• ʻE lava ke maʻu ha ngaahi ʻekitivitī kehe ke tokoniʻi hoʻo fānaú ke nau kau ʻi he hisitōlia fakafāmilí ʻi he “Ko e Temipalé mo e Palani ʻo e Fiefiá” ʻi he fakamatala fakalahi E pe ʻi he FamilySearch.org.