Bwanaa n Kaokan Bwai

“Nakon Buu ae Moan te Tangiraki

“N reken au tai ni kona ni kanakoa au reta nakoim mairoun raoraou, I kataia ni korea au reta, ma N na aki kataia ni kabwarabwarai au namakin ni kabane, ibukin te bwai ae ko mena i nanona ngkai, oon te auti ni kaikain, kaibiti, taian roka, karaanga aika a raanganako, neei aika buti, tabuki aika ririeta, kamwanono, aaba aika uteute are e kamaenakoira, ao te motibuaka ae iowaawa are e uotiko nako nanon te matawariki man katikuko i nanona, n raonaki ma waaki riki tabeua, e aki kona ni kabwarabwara aron au namakin.

Bwa tiaki ibukin akean te bure, ao aron te nanoanga mai karawa, I koaua raoi bwa I bon konaa n rinanon waaki ni karawawata ake I a tia n rinanona …; ma I teimatoa ni maiu ao n teimatoa n tauraoi ni korakai riki ngkana anne ana kantaninga te Atua ae tangiria bwa N na riai ibukim.

“Ti bane ni marurung n te tai aei, ma tii Fredrick ae bon aoraki teutana.

Alexander ae uarereke are mena ngkai i nanon baiu bon temanna te ataei ae kakateke ae ko a tia n nooria i nanon maium. E rangi ni korakora n te aro are ngkana e taua te kaintekateka ao e na biribiri ni katobibia te ru. …

Akea temanna bwa ti te Atua ae ataa kanoan au iango ao ana namakin nanou ngke I kitana ara auti ao mwengara, ao ni bane ara bwai ma tii natira aika uarereke, ao ni karaoa kawaiu ni kitana te mwakoro i Missouri, ni kitaniko n rokanaki i nanon te auti ni kaikain ae kamaroa anne. Ma manga ururingan e riaon ae kona n uotia ana kona te rabwata. …

… Au kantaninga bwa iai boong aika raraoi aika a na roko nakoira. … [Ngai] raom ae tangiriko.

Emma Timiti

“Nakon—Buu—ae moan te tangiraki.

N tairikin te Kaabong I tekateka ngke e nang bon bung taai, ngke ti kaninganinga rimarenan kaibitin te auti ni kaikain ae kamaroa aei, ni koroboki nakoim, bwa I aonga ni kaota arou ae I mena iai nakoim. I kakoaua bwa ngkai e a kaan nimaua te namwakaina ao onoua te bong man te tai are I moan teiakinaki iai iroun te tia tararua ae unun n te bong ao te ngaina, ao i nanon te oo, kaibiti, ao tangitangin mataroan te auti ni kaikain ae te biti ae kamaroa, e roo, ao e barekareka. I korea te reta aio ma taian namakin aika a tii ataaki iroun te Atua. A ti kona ni kaotaki rawawatan te iango i nanon kangaanga aikai man te koroboki n te been, ke te newe, ke Anera, ni kabwarabwara, ke ni katamaneia, nakon te aomata are e tuai rinanon te bwai ae ti rinanona. … Ti onimakina korakoran Iehova, ao akea riki, ibukin kainaomatakira, ao ngkana e aki karaoia, ao e na bon aki karaoaki, ko kona n ataa anne, ibukina bwa e rawata te aomata n te tabo aei ae a tangiria n tiringiira; tiaki ibukina bwa ti kairaua n te bwai teuana. … Emma ae tangiraki irou I teimatoa n iangoiko ao ataei. … I tangiria n noora Frederick te ataei, Joseph, Julia, Alexander, Joana, ao kain ara utu ae a kara [kamean te utu]. … I tangiria n nakonako mai ikai nakoim n akea nangoan waeu, ao akea nangoan atu, ao ni karabanai teutana, n noriko ao n iangoia ma te kukurei ae korakora, ao n aki taraia bwa te karawawata. … I keiakinna ma korakorau ni kabane ni kaitaraa, ao ai aroia naba aika raou ikai; akea mai iroura ae bwara nanona. I tangiriko bwa [ko] na aki kariaia [au ataei] bwa a na aki mwaninga taekau. Tuangiia bwa e tangiriia Tamaia ma te tangira ae kororaoi, ao e karaoa ana kabanea ni kona ni kararoaia taan iowaawa bwa a naaki roko irouia. … Tuangiia bwa e taku Tamaia bwa a riai n riki bwa ataei aika raoiroi, ao n ongotaeka nakon tinaia. …

“Ngai,

Iotebwa Timiti Jr.