Reirei ao Berita aika Tabu 121–123

Ngkana ti korakai ke a korakai aomata ake ti tangiriia, e bon ririki te titiraki bwa e bon ataa anne te Atua. Ngkai ko wareka Reirei ao Berita aika Tabu 121:1–6, iangoi taai ngke iai am titiraki ke am namakin n aron are iroun Iotebwa Timiti. Tera ae ko kunea n ana kaeka te Uea ae e na kona ni buokiko ngkana iai iroum titiraki ke namakin akanne? Te katooto, n kiibu 7–10, 26–33, noori kakabwaia ake E beritanna. Tera n am iango ae nanonaki n “teimatoa … n ae raoiroi”? E kanga te Tia Kamaiu ni buokiko ni karaoa aei?

Ngkana ko wareka te mwakoro 122, iangoia bwa e kanga te Uea n tangiriko n taraia am kairiribai. Ko na kona n iangoi raoi taneiei ake a roko man karawawatakim ao a kangaa n riki “bon ibukin kabwaia[m]” (verse 7).

Taraa naba Quentin L. Cook, “Te Rau ae Onoti Nakon Temanna i nanon Taai ni Kangaanga,” Riaona, Nobembwa. 2021, 89–92; “Where Can I Turn for Peace?,” Boki n Anene n Taromauri, nambwa. 129.

Te mwaaka man te aonaaba a kamwaingiia nako Aomata aika Itiaki ma te kairooro mai Missouri ao n Iotebwa Timiti nakon te karabuuti. Ma i nanon ana tai Iotebwa ni mena ikekei, e reireinaki iroun te Uea te aeka ni korakora teuana ae kaokoro, “te mwaaka mai karawa.” Warekan taekan te mwaaka n Reirei ao Berita aika Tabu 121:34–46 e kona ni buokiko n reiakinna bwa e kanga aron karekean te mwaaka anne—ao ko na kanga ni kabonganaa ni kakabwaiaia tabeman. Tao ko konaa n taua mwiin are ko reiakinna n te taibora ma rainna ma taekana ae Te Mwaaka mai Karawa ao Mwaaka man te Aonaaba. A kanga ni kaokoro mwaaka aika uaekaki aikai? Tera kabwarabwaraan mwaakan te Uea ae reiakiniko ibukina?

Ko kona naba ni iangoa raoi te taeka ae kakairi n te kibu 41. Tera tabeua waaki ae ko tangiria n riki bwa te kakairi ngke ibukin te raoiroi—tao i nanon te reitaki n te utu, n te reirei, n te mwakuri, ke n te katabeaki n te Ekaretia? Tera ae ko reiakinna man kiibu 41–46 taekan aron ana kakairi te Atua nakoia natina? Tao ko kona n kakimototoa are ko reiakinna man kabwaninan te kibuntaeka n aron ae teuana aei: “Ni kakairi ibukin te raoiroi, N na .”

Taraa naba Jeffrey R. Holland, “Not as the World Giveth,” Riaona, Meei 2021, 35–38; David A. Bednar, “The Powers of Heaven,” Riaona, Meei 2012, 48–51; “The Powers of Heaven” (video), Gospel Library.

9:14

Tera n am iango ae nanonaki n taekinna bwa Iesu Kristo e “rinanon ae buakaka… [bwaai] ni kabane”? Aikai tabeua riki kiibu ake a kona n buokiko ni kamataata te mwakoro n taeka aei: Itaia 53:3–4; Ebera 2:17–18; 1 Nibwaai 11:16–33; Aramwa 7:11–13. N boboto i aon ae ko reiakinna, bairea taekinan Reirei ao Berita aika Tabu 122:8 n oin am taeka. Ko na kanga n kaota am kakaitau nakon Iesu Kristo ibukin arona n rinanon ae buakaka ni bwaai ni kabane?

E kanga te nonoori mairoun Beretitenti Dallin H. Oaks n roota mataatam? Ti kona naba n taekinna bwa i mwin rinanoan bwaai ni kabane, E tauraoi raoi n tabekira rake [Iesu Kristo] ao n anganira te korakora ae ti kainnanoia ni keiakin korakaira” (“Strengthened by the Atonement of Jesus Christ,” Riaona, Nobembwa. 2015, 64).

N Reirei ao Berita aika Tabu 123:7–8, E taekini kakoaua aika a kaairua Iotebwa Timiti are e karekea te korakai, ni ikotaki ma bwainikirinakiia Aomata aika Itiaki. Ni Maati 1839, e taraa n ae akea te bwai ae a kona ni karaoia Aoma aika Itiaki ibukin anne. Ma n ana reta ae koreaki man te Karabuti i Liberty, e tuangiia Iotebwa te bwai ae a konani karaoia: “[ikotan] atatai ni kabane baike a riki” ao “n tei naba, ma te koaua ae korakora, n noora ana kamaiu te Atua” (Reirei ao Berita aika Tabu 123:1, 17). Ngkai ko iangoi kangaanga n te aonaaba n boong aikai, iangoi kawai n taobarai ake a “wene n mwaaka[m]” (kiibu 12, 17). Ao tai tarariaoi “bwaai aika a uarereke” (kibu 15). Bukin tera e kakawaki karaoakin bwaai aikai ma te “kukurei” (kibu 17).

A mwaiti rongorongo aike e bubuti Iotebwa ibukina n ana reta aei ae a kanakoaki nakon te tautaeka ao ni boretiaki bwa te ka‑11 ni mwakoro n te beebwa ni kaongora mai Nauvoo, ae te Times and Seasons (taraa “A History, of the Persecution, of the Church of Jesus Christ, of Latter Day Saints in Missouri, December 1839–October 1840,” [josephsmithpapers.org]).

• Ni buokia am ataei ni katamneia n aia iango bwa tera aron Iotebwa Timiti ao raorona n te Karabuti ae Liberty, kam kona ni bootaki ni wareka “Mwakoro 46: Joseph Smith in Liberty Jail” (n Karakin Reirei ao Berita aika Tabu, 172–74) or “Voices of the Restoration: Liberty Jail” ke ni matakuakina mwakoron te witeo “Joseph Smith: Prophet of the Restoration” (Gospel Library, beginning at 41:30). I mwiina, ngkai kam bootaki ni wareka Reirei ao Berita aika Tabu 121:1–9, kam kona ni marooroia bwa e kanga te Tia Kamaiu ni buoka Iotebwa n namakina te rau. Ti na kangaa n kunea te rau iroun te Tia Kamaiu, i nanon naba taai aika a rawaawata?

  

  1:51

  

  62:4

• Ni buokakiia am ataei n kinaa bwa ara kangaanga “bon ibukin kabwaia [ra] (Reirei ao Berita aika Tabu 122:7), ko kona n taetae ma ngaiia i aon aron ara mwatireti n rikirake ngkana ti uota te bwai ae tinebu. Ko kona naba n kaoiia bwa a na tabeka te bwai ae tinebu. Ngkanne ko kona n marooro ma ngaia bwa e kanga aron touakin taai aika a kangaanga a konaa ni karikirakea tamneira—ngke ti rairaki nakon te Uea ibukin ana ibuobuoki. Tibwai tabeua katooto man maium.

• Tao e na ibuobuoki nakoia am ataei te kabotau ni kamataataia “te mwaaka mai karawa.” Te katooto, ko kona ni kabotaua korakoran te Atua ma korakoran te iti. Tera ae konaa n totokoa te bwai ae maiu man te iti man karekean te korakora? Tera ae kauarerekea korakoran tamneira? Tera ae karikirakea? (Tarai taeka ao mwakoro n taeka n Reirei ao Berita aika Tabu 121:34–46; taraa naba Aeniboki ni Kabuta, 3.5, 3.6, Gospel Library.)

• I mwiin warekan Reirei ao Berita aika Tabu 122: 7– 9 ma am ataei, tao ko kona n tibwaa am taneiei ngke ko namakinna bwa e raoniko te Tia Kamaiu i nanon tain te kataaki ae kangaanga. Kam kona naba n bootaki n anenea te anene n aron “Jesus Once Was a Little Child” (Aia Boki n Anene Ataei, 55) ao n kaota am kakoaua bwa e kona ni buokiira Iesu Kristo ibukin bwa E atai aron ara namakin.

• Ni buokiia am ataei bwa a na mataata n Reirei ao Berita aika Tabu 123:15–17, ko kona n tibwaia ma ngaiia tamnein te kaibuke ae bubura ao te wiira ae uarereke, ke n tibwaia ma ngaiia ana kabwabwara Unimwaane David A. Bedna n “Tuan Au Euangkerio” (Riaona, Meei 2021, 125–26). I mwiina ko kona n maroorakina aekan kawai aika a karako are ti kona ni beku iai ma te kukurei nakoia ara utu ao raorora.

15:0