“Okitobwa 13–19: ‘Ana Karea E Na Rangi Tabu Riki Nakoiu Nakon Rikirakena’: Reirei ao Berita aika Tabu 115–120,” Nakomai, Iriirai—Ibukin te Mweenga ao te Taromauri: Reirei ao Berita aika Tabu 2025 (2025)
“Reirei ao Berita aika Tabu 115–120,” Nakomai, Iriirai—Ibukin te Mweenga ao te Taromauri: 2025
Far West, Missouri, iroun Al Rounds
Okitobwa 13–19: “Ana Karea E Na Rang Tabu Riki Nakoiu Nakon Rikirakena”
Reirei ao Berita aika Tabu 115–120
Iai bukin nanomatoaia Aika Itiaki ibukin aia tabo ni bootaki ae boou, Far West, Missouri. E rikirake n buburanako te kaawa, ao n bati te mari n te aba, ao ni kaan bon Atam-ontaai-Aman, te tabo ae korakora iai maiuakinan te tamnei n boong akekei ao nakon boong aika a na roko (taraa Reirei ao Berita aika Tabu 107:53–56; 116). Ma, tao e bon kangaanga irouia Aika Itiaki bwa a na mwaninga aia bwai ake a bua. Irarikin kanakoakiia mai Independence, nuukan raoi Tion, a riai naba ni kitana Kirtland Aika Itiaki, ni kitana aia tembora ae tangiraki ti uoua te ririki imwiin tiana. Ao n te tai aei tiaki tii aiaia i tinanikun te Ekaretia ae a karekea te kangaanga—a mwaiti kaain te aro aika a kakanato ake a kaitaraa Iotebwa Timiti, n ikotaki ma aman kaain te kooram n Abotoro n te Tengaun ma Uoman.
N aki kabanea aia tai ni bwaai ake a bua mairouia, a teimatoa n katea Tion aomata aika a kakaonimaki, n te tai anne n te Far West. A karaoi babaire ibukin te tembora ae boou. Aman Abotoro aika a boou ake a weteaki. A ataia bwa karaoan ana mwakuri te Atua e aki nanonaki bwa ko aki kona ni bwaka; e nanonaki bwa ko na “manga teirake.” Ao e ngae ngke ko na karaoi anganano, karea akanne a na bon tabu nakon te Atua, ao n “tabu riki … nakon rikirake[m]” (Reirei ao Berita aika Tabu 117:13).
Taraa Saints, 1:296–99.
Iango ibukin te Kamatebwai n te Mweenga ao n te Taromauri
Reirei ao Berita aika Tabu 115:3–6
E rang ni kakawaki aran te Ekaretia iroun te Uea.
E taku Beretitenti Russell M. Nelson bwa aran te Ekaretia bon “te bwai ae rang kakaawaki” (“Aran te Ekaretia ae Eti,” Riaona, Nobembwa. 2018, 87). Iangoia bwa bukin tera e koaua aei ngkai ko wareka Reirei ao Berita aika Tabu 115:4–6. Tera irekereken aran te Ekaretia ma mwakurina ao ana mition?
Tara naba 3 Nibwaai 27:1–11.
Reirei ao Berita aika Tabu 115:5–6
Tion ao ana titeiki a na anga “te kamanomano man te angibuaka.”
Ngkai ko kamatebwaia te korakora n tamnei i nanon Reirei ao Berita aika Tabu 115:5–6, iangoia te tibwanga ae tangiria mairoun te Uea, ngkai kaain Ana Ekaretia, n kakoroa nanona. Te katooto, tera ae ko kona ni karaoia n “teirake ao n karaneanea otami” ke “riiki bwa banna ibukiia aaba”? (kibu 5). Tera angibuaka n tamnei ae ko nooria n riki ni katobibiko? Ko na kanga ni kunea te “kamanomano” rinanon te ikotaki? (kibu 6).
Taraa naba “Brightly Beams Our Father’s Mercy,” Boki n Anene n Taromauri, nambwa. 335.
E kona n riki Ana Ekaretia te Tia Kamaiu bwa te auti ni kaota ao te tabo ni kamanomano n tain te angibuaka.
Reirei ao Berita aika Tabu 117
A tabu au anga karea akon te Uea.
Iangoia bwa aongkoa ngke Newel K. Whitney ke kaainabana, ae Elizabeth, ake a rinanon te maiuraoi i Kirtland ao i mwiina a tuangaki naba bwa a na kitanna. Tera ae ko kunea n Reirei ao Berita aika Tabu 117:1–11 are e na kona ni buokiko ni karaoa te anganano aio? Tera anga karea ke anganano ae ko karaoia ibukin te Atua? Tera ae a reiakiniko kiibu aikai bwa antai te Atua ao tera ae E karaoia?
Te anganano are e tuangaki Oliver Granger e kaokoro man are a karekea te Whitneys’ e tuangiia te Uea bwa a na tiku i Kirtland ao n katamaroa bairean ana mwane te Ekaretia. N ana tai n tei ibukin te Ekaretia ma te etieti, e bon aki rangi n nakoraoi. Iangoia bwa e kanga ana taeka te Uea n Reirei ao Berita aika Tabu 117:12–15 n kaineti nakon bwaai ake E a tia n tuangako.
Taraa naba “Far West ao Atam-ontaai-Aman,” i nanon Revelations in Context, 239–40.
Reirei ao Berita aika Tabu 119–20
E buoka rikiraken abanuean te Atua au kabwianibwai.
Kaetieti i nanon mwakoro 119 ao 120 a kamataata bwa tera te kabwianibwai: ti anga “te katebwiina ni mwakoro” man ara raka (ke ara karekemwane) ni katoa ririki (taraa Reirei ao Berita aika Tabu 119:4). Ma kaotioti aikai a karaoa riki ae bati nakon nanona ae karekeaki. E tuangiia Aomata aika Itiaki te Uea bwa te kabwianibwai e na katabua te aba ae Tion.” Ao n akean te tua aio, E taku, “e na aki riki bwa … aban Tion nakoimi” (kibu 6). Ko a tia n iangoa taekan te kabwianibwai n te kawai aei? E na kangaa kabwakaan te kabwianibwai ni buokiko n tabu riki, n tauraoi riki ibukin Tion?
Tera ae ko reiakinna man kaotioti aikai bwa a kanga ana toro te Uea n kabonganai mwanen kabwianibwai? Tera ae kakaawaki iroum n te taeka ae “man oin bwanaau nakoia” n Reirei ao Berita aika Tabu 120?
E anga te kabwarabwara ae ibuobuoki Unimwaane David A. Bednar n aron kabonganaan te kabwianibwai ao kakabwaia ake a roko man te ongotaeka nakon te tua aei i nanon “Wintoon Karawa” (Riaona, Nobembwa. 2013, 19–20). A kona ni buokiko titiraki aika i mwiina aikai ngkai ko kamatebwaia ana rongorongo:
The Windows of Heaven
-
Antai ae baireia bwa e na kangaa ni kabonganaaki te kabwianibwai i mwiin kabwakakina nakon te Ekaretia?
-
E kabonganaaki ibukin tera te kabwianibwai?
-
Tera kakabwaia aika a roko man mwiin kabwakaan te kabwianibwai? Te katooto, n angaa raa ae kabwakaan kabwianibwai e kakorakora reitakim ma Tamam are i Karawa ao Iesu Kristo?
-
Tera ae ko kona n reiakinna man ana kakao Unimwaane Bednar?
-
Ti na kanga ni buokiia tabeman ni karikirakea aia onimaki n Ana tua te Uea i aon te kabwianibwai?
Taraa naba Maraki 3:8–12; “The Tithing of My People,” i nanon Revelations in Context, 250–55.
Buokia tabeman n maiuakina are a tia n reiakinna. E ngae ngkana e tangiria te aomata ni kabwakaa ana kabwianibwai, n tabetai ao a aki ataia bwa a na kanga. Ngakana ko reireia am utu ke te kiraati, iangoia n anaa tabeua te tai n kabwarabwara bwa a na kanga n kabwakaa kabwianibwai, i aonraain ke n te beebwa ni Kabwianibwai ao Angabwai riki Tabeua. (Taraa Reirei n Ana Kawai te Tia Kamaiu,, 27.)
Ibukin iango riki tabeua, taraa te beeba ni kaongora n te namwakain aio n te Riaona ao Ibukin Kakorakoraia Kairake maekatiin.
Iango ibukin Reiakinaia Ataei
Reirei ao Berita aika Tabu 115:4–5
Ngai Bon Kaain Ana Ekaretia Iesu Kristo Ibukiia Aika Itiaki ni Boong aika Kaitira.
-
N buokiia am ataei n reiakina aran te Ekaretia ao n mataata bwa bukin tera e rangi ni kakaawaki, iangoia n titirakina temanna mai buakoia are a konaa n taekina aran te Ekaretia ni kabwaninna. Ko kona ngkanne n kaota nakoia te ara man Reirei ao Berita aika Tabu 115:4 ao n tuangiia bwa a na kaoka atongana ma ngkoe. N karaoan anne, iangoia ni kaota kakawakin taeka ao bukin tera a kakaawaki. Ko kona naba n rinanoa “Chapter 43: Jesus Christ Names His Church” (i nanon Karakin Reirei ao Berita aika Tabu, 164, or the corresponding video in Gospel Library) ke n anenea “The Church of Jesus Christ” (Aia Boki n Anene Ataei, 77).
Chapter 43: Jesus Christ Names His Church: April 1838
Reirei ao Berita aika Tabu 115:4–6
Au banna ni katooto e kona ni buokiia tabeman n nakon Kristo ao ni karekea te kamanoaki.
-
Tao a na ataia aomata am ataei ake a korakai ao n kainnanoa “te kamanomano” man “angibuakan te maiu” (kibu 6). A na kanga ni buokiia aomata aikai? Iangoia ni kaoia am ataei bwa a na teirake ngkana ko wareka te taeka ae teirake n Reirei ao Berita aika Tabu 115:5. A kona n katerenakoi tabon baia n ai aron ootan taai ngkana a wareka karaneanea ootaia. Kauringiia ataei bwa otara e roko mairoun Iesu Kristo, ao buokiia n iangoi kawai ake a kona iai n “karaneanea ootaia” n ai Arona.
-
A kona am ataei n korea te tamnei ae tei ibukin Reirei ao Berita aika Tabu 115:6. Te katooto, a kona ni korea tamnein te angibuaka ma aomata aika a kataniia n ana kateitei te Ekaretia. Tera ae e tei ibukina te angibuaka? E kanga ni katauraoa te ibuobuoki ana Ekaretia te Tia Kamaiu? Buokiia am ataei ni iangoa raoraona, kaain ana utu, ke kaain rarikina ae kainnanoa te ibuobuoki. Ti na kanga ni kaoiia bwa a na kunea te buoka n Ana Ekaretia Iesu Kristo?
Reirei ao Berita aika Tabu 117
Au anganano a tabu nakon te Uea.
-
Kaoiia am ataei bwa a na iangoa bwa aongkoa ngaiaa Newel K. Whitney. A na kanga n namakinna ngkana e tuangiia te Uea bwa a na kitana aia mwakuri ae nakoraoi ao n mwaing nakon te tabo teuana ae boou? (E na kona n ibuobuoki rinanoan “Mwakoro 41: Trouble in Kirtland,” i nanon Karakin Reirei ao Berita aika Tabu, 158–60, ke witeo n Gospel Library.) Ngkai kam bootaki ni wareka Reirei ao Berita aika Tabu 117:1–11, tuangiia am ataei bwa a na toki ngkana a ongo te bwai are e na buokiia n karekea aia onimaki n onimakina te Uea. Tera anganano ae ti karaoia n ongeaaba nakon te Uea? E kangaa Ngaia ni kakabwaiara?
Chapter 41: Trouble in Kirtland: 1837–1838
Reirei ao Berita aika Tabu 119–20
E kabonganai kabwianibwai Tamara are i Karawa n kakabwaiaia natina.
-
Angiina ataei ake ko reireiniia tao a bon bae n rangi ni uarereke ibukin te kareke mwane ao kabwakaan kabwianibwai, ma e tamaroa ibukiia bwa a na ataia bwa e kanga kabwianibwai ni buoka ana mwakuri te Uea ni kabutaa te aonaaba. Iangoia ni kabonganai tamnei ao te iteraniba n kakukurei n kabanean ae kaotaki ikai ni buokiia bwa a na mataata bwa tera te kabwianibwai. (Taraa naba “Chapter 44: Tithing,” i nanon Karakin Reirei ao Berita aika Tabu, 165–66, ke n witeo i nanon te Gospel Library.) E kanga Tamara are i Karawa ni kabonganai kabwianibwai ni kakabwaiaia Natina? Tibwa am namakin ibukin tuan te kabwianibwai ao e kanga n tia ni kakabwaiako.
Chapter 44: Tithing: July 1838
Ngakana ti kabwakai kabwianibwai, ti kaota ara onimaki iroun Iesu Kristo.
Ibukin iango riki tabeua, taraa te beeba ni kaongora n te namwakaina aio n te Te Rao maekatiin.