Bwanaa n Kaokan Bwaai

“Te nebonebo ibukin te katabu anne e kona ni manga warekaki, ma akea taeka mai i aon te aba ae a kona ni kabwarabwarai kaotioti mai i karawa n te bong ae ururingaki anne. A kaoti anera nakoia tabeman, ngkai namakinan te roko mai karawa e nooraki irouia ni kabane ake a roko bwa e kaonaki nanoia n te kimwareirei ae aki kona ni kabwarabwaraaki ao n onrake n te mimitong.’”

“Teuana mai ibuakon au ururing bon katabuan te Tembora. E tauiira au karo i aon toan waena ao n tuangiira bukina ngkai ti nako ao tera ae nanonaki ni katabuan ana auti te Atua. Ao e ngae ngke I rangi n uarereke n te tai anne, I uringa raoi te bwai ae riki. I kona n tanrikaaki n tarai bwaai aika a riki n taai aika a nako ao n noria ngke I noora Iotebwa te Burabeti, n tei ma baina aika a tei nako karawa, moana e rangi ni mainarake, ranin matana a bwaro rikaaki nako aon tabana ngke e taetae n te bong ae ururingaki anne. A taraa n ae a bane n tang aomata . E rangi n ibetutu te aomata n te tembora ngaia ae ataei a tekateka iaon waeia aomata ake a kara, mwaneu e tekateka iaon waen tamau. Ngai iaon waen tinau. I kona naba n uring kunikai aika ti bwain. E rangin n uarereke au iango n te tai anne n taui mwiin bwaai aika a kakawaki, ma ngke e waaki nako te tai I a ataa kakawakina ma rikiraken mataatana, ao I rangi ni kakaitau bwa e reke au tai ni mena ikekei.”

“N te tairiki are I kaitibo ma aobitia n te ekaretia i nanon ana tembora te Uea. E karuoaki te Tamnei—I nora mimitongin te Atua, kanga te nang ae bubura, n ruo rikaaki ao n tiku iaon te tembora, ao ni kaona te tembora ae ai aron karen te ang ae korakora. I nori naba neewe aika kirimangamanga, n ai aron te ai ni bwaro nakoia aika mwaiti, … ngke a taetae n neewe riki tabeua ao taeka ni burabeti.”

“A mwaiti mii ni burabeti [aika] a noraki. Temanna e noora te nang n tei n ineti ni waerake ni bangaki i aon te tembora, n takiakia otana ae kanga e a oti taai i aon te nang n aron te koora. Uoman aomata a noriia teniman aomata n ririaki i nanon te ruu ma aia kiing aika a raneanea i nanon baia, ao te tiein ae raneanea i nanon baia.”

“E mena te Atua ikekei, ana anera a mena naba ikekei, te Tamnei ae Raoiroi e mena ibuakoia aomata … ao a kanoaki mai ietan atuia nakon waeia ni mwaakan ao ana kairi te Tamnei ae Raoiroi.”

“[Ngke] e a tia te tembora ao ni katabuaki … aikai bon uoua boong aika te kabanea ni kakukurei man bongin maiu. Te anene ae kaineti e oteaki ibukin te waaki anne ‘Tamnein te Atua ai Aron te Ai Inanora.’ E bon rangin ni koaua bwa korakoran Karawa e mena i nanon te tembora. … I namakinna bwa te tembora bon karawa i aon te aba.”