Nkyerɛkyerɛ na Ahyɛmudzi 115–120

President Russell M. Nelson kãa dɛ Asɔr no ne dzin “yɛ asɛm a ho hia kɛse” (“The Correct Name of the Church,” Liahona, Ebɔbira 2018, 87). Dwen siantsir a iyi yɛ nokwar ho ber a ekenkan Nkyerɛkyerɛ na Ahyɛmudzi 115:4–6. Ebɛnadze na Asɔr no ne dzin no fa n’edwuma na no botae ho?

Hwɛ 3 Nephi 27:1–11 so.

Ber a isũa enyido adzehwɛ a ɔyɛ ndam wɔ Nkyerɛkyerɛ na Ahyɛmudzi 115:5–6 mu no, susu asɛdze a Ewuradze pɛ dɛ ɔwo, dɛ eyɛ N’Asɔrba no, hyɛ no mã. Mfatoho, ebɛn adze na ibotum ayɛ dze “[a]soɛr na [a]hyerɛn” anaa “aayɛ fasusu ama aman”? (nyiyimu 5). Ebɛn sunsum mu ehum na ahyɛ no nsew wɔ woho aporɔw? Isi dɛn nya “guandɔbea” wɔ mboaboano mu? (nyiyimu 6).

Hwɛ “Brightly Beams Our Father’s Mercy,” Hymns, nkanee 335.

Susu dɛ eyɛ Newel K. Whitney anaa ne yer, Elizabeth, a hɔn abrabɔ ayɛ prɔmprɔm wɔ Kirtland na nkyii wɔase hɔn dɛ wontu mfi hɔ. Ebɛnadze na ihu no wɔ Nkyerɛkyerɛ na Ahyɛmudzi 117:1–11 mu a bia ɔbɔboa wo ma etum ayɛ afɔrbɔ yi? Ebɛn afɔrbɔ na ebɔ ma Nyankopɔn? Ebɛnadze na nyiyimu yinom kyerɛkyerɛ wo fa Nyame ho na dza Ɔyɛ?

Ɔson afɔrbɔ a wobisaa Oliver Granger na Whitneyfo dze no: Ewuradze maa no edwuma dɛ ɔntsena Kirtland na onsiesie Asɔr no ne sikasɛm. Ɔdze nokwardzi yɛɛ Asɔr no ananmusinyi, naaso ewiei no oenndzi konyim. Susu mbrɛ Ewuradze ne nsɛm a ɔwɔ Nkyerɛkyerɛ na Ahyɛmudzi 117:12–15 mu no fa ndzɛmba a Ɔase wo no ho.

Hwɛ “Far West and Adam-ondi-Ahman,” wɔ Revelations in Context, 239–40 so.

Nkyerɛkyerɛ no a ɔwɔ afã 119 na 120 mu no kyerɛkyerɛ mu pefee dza ebupɛn du yɛ: yetua hɛn mfaso (anaa dza yenya) mu ebupɛn du kor afe biara (hwɛ Nkyerɛkyerɛ na Ahyɛmudzi 119:4). Naaso nyikyerɛ yinom ma dza ɔbor nkyerɛasee ara do. Ewuradze kãa kyerɛɛ Ahotseweefo no dɛ ebupɛn du “[bɛ]tsew Zion asaase ho.” Ɔkãa dɛ, mbra yi nnyi hɔ a, “Ɔrennyɛ Zion asaase mma hom” (nyiyimu 6). Ana adwen ebupɛn du ho wɔ kwan yi do pɛn a? Osi dɛn na ebupɛn du no ntuae ma woho tsew yie, na eyɛ ahoboa yie ma Zion?

Ebɛnadze na isũa fi nyikyerɛ yinom mu a ɔfa mbrɛ Ewuradze n’asomfo dze ebupɛn du ntoboa no si dzi dwuma. Ebɛnadze na ɔyɛ wo adze tsitsir wɔ kasasin “mankasa me ndze a ɔkasa kyerɛ hɔn” wɔ Nkyerɛkyerɛ na Ahyɛmudzi 120 mu?

Elder David A. Bednar ama yenya nkyerɛmu a ɔboa wɔ mbrɛ wosi dze ebupɛn du dzi dwuma na nhyira horow a ofi iridzi mbra yi do no dze ba wɔ “The Windows of Heaven” (Liahona, Ɔberɛfɛw 2013, 19–20 mu). Nsɛmbisa a odzi do yinom botum aboa ber a isũa n’asɛm no:

16:55

• Woana na ɔkyerɛ dza wɔdze ebupɛn du yɛ ber a woetua ama Asɔr no ekyir no?

• Wɔdze ebupɛn du yɛ dɛn?

• Ebɛn nhyira horow na ɔba a ɔyɛ ebupɛn du no ntuae ho nsunsuando? Mfatoho, ebɛn akwan mu na ebupɛn du no ntuae hyɛ wo nkitahodzi a enye Ɔsor Egya na Jesus Christ wɔ no dzen.

• Ebɛnadze na isũa fi Elder Bednar ne nsato no ho?

• Ibesi dɛn botum aboa binom ma wɔato hɔn gyedzi mu wɔ Ewuradze n’ebupɛn du mbra no ho?

San hwɛ Malachi 3:8–12; “The Tithing of My People,” wɔ Revelations in Context, 250–55 mu.

• Ama aaboa wo mbofra ma woesũa Asɔr no ne dzin na wɔatse siantsir a ohia no ase no, susu dɛ ibebisa sɛ hɔn mu binom botum abɔ Asɔr no ne dzin nyinara a. Nkyii ibotum dze dzin no a ofi Nkyerɛkyerɛ na Ahyɛmudzi 115:4 akyerɛ hɔn na ama woeesi do nye wo akã. Ereyɛ no, susu dɛ ebɛkyerɛ hɔn nsɛm etsitsir no na siantsir a hɔnho wɔ hia. Hom botum so abɔbɔ “Chapter 43: Jesus Christ Names His Church” do (wɔ Doctrine and Covenants Stories, 164, anaa video a ɔnye no kɔ do wɔ Asɛmpa Nwoma Korabea anaa hom atow “The Church of Jesus Christ” (Children’s Songbook, 77).

0:37

• Bia wo mbofra no nyim binom a woridzi aper na wohia “guandɔbea” fi “abrabɔ mu ehum” ho (nyiyimu 6). Wobesi dɛn botum aboa nkorɔfo yinom? Susu dɛ ebɔto nsa afrɛ wo mbofra no dɛ wɔnsoɛr ngyina sɛ wɔtse dɛ akenkan nkasafua hom nsoɛr wɔ Nkyerɛkyerɛ 115:5 mu a. Wobotum atsen hɔn nsatseaba mu dɛ ewia ne kan sɛ ekenkan hom nhyerɛn a. Kaa wo mbofra no dɛ hɛn kan no fi Jesus Christ hɔ, na boa hɔn ma wɔndwen akwan horow a wobotum “[a]hyerɛn” dɛ mbrɛ Ɔyɛ no.

• Wo mbofra botum adrɔw mfonyin a ɔkyerɛ Nkyerɛkyerɛ na Ahyɛmudzi 115:6. Mfatoho, wobotum adrɔw ehum a orutu na nkorɔfo rokɔ Asɔrfi mu enya guandɔbea. Bia ehum no begyina hɔ ama ebɛnadze? Agyenkwa N’Asɔr no si dɛn ma mboa? Boa wo mbofra no ma wɔndwen nyɛnko bi, ebusua mu ba bi, anaa fipamfo a wɔwɔ hia mu. Yebesi dɛn botum ato nsa afrɛ hɔn ma woebenya mboa wɔ Jesus Christ N’Asɔr mu?

• To nsa frɛ wo mbofra no dɛ wompetuw dɛ wɔyɛ Newel K. Whitney. Ebɛn atsenkã na wobenya sɛ Ewuradze se hɔn dɛ wongya hɔn edwumadze a wɔayɛ prɔmprɔm ekyir na wontu nkɔ bea fofor bi? (Bia ɔbɔboa dɛ wɔbobɔ “Chapter 41: Trouble in Kirtland,” wɔ Doctrine and Covenants Stories, 158–60 do, anaa video a ɔnye no kɔ do wɔ Asɛmpa Nwoma Korabea no do.) Ber a hom bɔ mu kenkan Nkyerɛkyerɛ na Ahyɛmudzi 117:1–11 no, kã kyerɛ wo mbofra no dɛ wɔmma gyina sɛ wɔtse biribi a ɔbɔboa hɔn ma woenya gyedzi dze ayɛ aso ama Ewuradze a. Ebɛn afɔr na yɛbɔ dze yɛ aso ma Ewuradze? Osi dɛn hyira hɛn?

2:20

• Mbofra dodowara a ekyerɛkyerɛ hɔn adze no bia wosusuar dodow dɛ wɔbɛyɛ edwuma enya sika na woetua ebupɛn du, naaso oye ma hɔn dɛ wobenya ntseasee wɔ mbrɛ ebupɛn du si boa wɔ Ewuradze n’edwuma wɔ wiadze nyinara mu. Susu dɛ edze mfonyin na dwumadzi krataafa a ɔwɔ n’apɔw do n’apɔw do yi mu no bɔboa hɔn ma wɔatse dza ebupɛn du yɛ no ase. (Hwɛ “Chapter 44: Tithing,” wɔ Doctrine and Covenants Stories, 165–66 mu, anaa video a ɔnye no kɔ do wɔ Asɛmpa Nwoma Korabea.) Ɔsor Egya si dɛn dze ebupɛn du dzi dwuma dze hyira No mbofra. Kyɛ w’atsenkã wɔ ebupɛn du ho mbra ho na mbrɛ woesi ehyira wo.

1:33