Nsanananmu ne Ndze horow

“Wobotum akã tu hyɛ Nyame nsa guado adzeyɛ horow no ho nsɛm, na mbom adasa kasa biara runntum nnkã dɛm da soronko no ho ɔsor nda edzi horow ho nsɛm no emudzi mu. Ɔsor abɔfo puei binom do, na hɔn a wɔwɔ hɔ nyina nyaa Nyame ho atsenka, na dɛw na enyimnyam kɛse a onnyi kabea hyɛɛ akoma biara mã.’”

“Dza mekaa kɔ ekyir ara yie nye Temple no no tu hyɛ Nyame nsa ayɛdze da no. M’egya dze hɛn tsenaa n’aserɛ do na ɔkyerɛɛ hɛn siantsir a yɛrokɔ na worutu fie bi ahyɛ Nyame nsa n’asekyerɛ. Na dɛm ber no nna musuar dze, naaso mekaa dɛm ber no ara yie. Mutum hwɛ ekyir dze dua mfe pii a abɛsen no mu na muhu dɛ mbrɛ muhunii no dɛ Nkɔnhyɛnyi, Joseph Smith, gyina tsentsen na ɔama ne nsa do akɔ sor, n’enyim ahoa, na nyisuwa risian n’afon ho ber a ɔkasaa dɛm da no a ɔayɛ nkaadze no. Ɔyɛ dɛ ma hɔn mu dodowara enyisuwa guar hɔn. Nna fie no mu ayɛ mã ara ma mbofra dodowara tsena tsena mpanyimfo hɔn aserɛ do, m’akyerɛbaa tsenaa m’egya do, na emi metsenaa me nã n’aserɛ do. Mutum mpo kaa ntar a nna yɛhyehyɛ. Dɛm aber no nna m’adwen yɛ mbofra dze a munnkotum enya dza ɔrokɔ do ho ntseasee ara yie, naaso mber rugu mu no, minyaa ho ntseasee nkakrankakra, na ɔyɛ me enyisɔ papaapa dɛ ɔyɛɛ me adom dɛ nna mo wɔ hɔ.”

“Ewimbir no mihyiaa asɔr no mu edzibewdzifo no wɔ Ewuradze ne fie. Nna woehue Sunsum no—muhun Nyame n’enyimnyam, tse dɛ mununkum kɛse, a osian famu na ɔbɛhyɛɛ ofi no do, na ɔdze mframa a n’ano yɛ dzen a ɔrobɔ hyɛɛ ofi no mã. Muhun ogya tɛkyerɛma, tse dɛ ogya a ɔdaa dodowara do, … ber a wɔkãa kasa horow na wɔhyɛɛ nkɔm.”

“Yehun enyido-adzehu pii. Ɔbaako hun mununkum a ɔakata ofi no do, a ɔhyerɛn tse dɛ ewia a ɔrehyerɛn wɔ mununkum do a ɔtse dɛ sika kɔkɔɔ. Beenu binom so hun nyimpa-su baasa a wɔsensɛn dan no mu a wokitsa nsaafee hyɛɛn wɔ hɔn nsa mu, na nkɔnsɔnkɔnsɔn hyɛɛn wɔ hɔn nsa mu.”

“Nna Nyankopɔn wɔ hɔ, no sor abɔfo wɔ hɔ, Sunsum Krɔnkrɔn no wɔ nkorɔfo no finimfin … na Sunsum Krɔnkrɔn no tum na nkenyan hyɛɛ hɔn mã fitsi hɔn tsir n’apampamu dze kesi hɔn ananadze.”

“Wowiee Temple no si na wotui hyɛɛ Nyame nsa [mber] no … nye enyigye nda mapã ebien wɔ m’abrabɔ mu. Ndwom a ɔsɛ fata ma dɛm da no a wɔkyerɛɛw no nye ‘Nyame no Sunsum tse dɛ Ogya a Ɔredzɛw.’ Ɔyɛ nokwar dɛ Ɔsor nkenyan hyɛɛ dɛm dan no do. … Minyaa atsenka dɛ ɔyɛ heaven wɔ asaase do.”