“13–19 Oktoba: ‘Sakrifaes blong Hem Bae I Moa Tabu long Mi Bitim Eni Gud Wok blong Hem’: Doktrin mo Ol Kavenan 115–120,” Kam Folem Mi—Blong Hom mo Jos: Doktrin mo Ol Kavenan 2025 (2025)
“Doktrin mo Ol Kavenan 115–120,” Kam Folem Mi—Blong Hom mo Jos: 2025
Fa Wes, Misuri, i kam long Al Rounds
13–19 Oktoba: “Sakrifaes blong Hem Bae I Moa Tabu long Mi Bitim Eni Gud Wok blong Hem”
Doktrin mo Ol Kavenan 115–120
I bin gat risen blong Ol Sent blong gat hop abaot niufala ples blong kam tugeta blong olgeta long, Fa Wes, Misuri. Taon i bin gro kwiktaem, graon i luk gud tumas, mo kolosap long ples ia i gat, Adam-ondi-Aman, wan ples we i spesel tumas long saed blong spirit long taem bifo mo long fiuja (luk long Doktrin mo Ol Kavenan 107:53–56; 116). Be stil, i mas bin had long Ol Sent blong oli no tingting long wanem we oli bin lusum. Afta long taem we oli ronemaot olgeta long Indipendens, senta ples blong Saeon, Ol Sent tu oli mas ronwe aot long Ketlan, oli lego tempol blong olgeta we oli lavem tumas, we i bin stap blong tu yia nomo. Mo long tetaem ia, i no ol enemi nomo aotsaed long Jos we oli stap mekem trabol—plante longtaem memba blong Jos oli tanem olgeta agensem Josef Smit; we i tekem tu ol fo memba blong Olgeta Twelef Aposol.
Be ol fetful Sent oli gohed blong stap bildimap Saeon, long taem ia long Fa Wes, mo oli no stap lukluk nomo long wanem we oli bin lusum. Oli bin mekem plan blong wan niu tempol. Oli bin singaotem fo niufala Aposol. Oli bin andastanem se, blong stap mekem wok blong God, i no minim se bae yu neva foldaon; i minim se yu “girap bakegen.” Mo i nomata we bae yu mas givap sam samting, olgeta sakrifaes ia bae God i tekem se bae oli tabu, iven “bae i moa tabu bitim eni gud wok[blong yu]” (Doktrin mo Ol Kavenan 117:13).
Luk long Saints, 1:296–99.
Ol aedia blong Stap Lanem Samting long Hom mo long Jos
Nem blong Jos i impoten long Lod.
Presiden Russell M. Nelson i talem se nem blong Jos i, “wan poen we i impoten tumas” (“Stret Nem blong Jos,” Liahona, Novemba 2018, 87). Tingting abaot from wanem nao hemia i tru taem yu stap ridim Doktrin mo Ol Kavenan 115: 4–6. ?Wanem nao nem blong Jos i gat blong go wetem wok mo misin blong Jos?
Luk tu long 3 Nifae 27:1–11.
Saeon mo ol stek blong hem oli givim wan ples blong “haed long strong win.”
Taem yu stadi pikja ia we i gat paoa long Doktrin mo Ol Kavenan 115:5–6, tingting long wok we Lod i wantem long yu, olsem wan memba blong Jos blong Hem, blong mekem i hapen. Eksampol, ?wanem nao yu save mekem blong “girap mo saenaot” o “stap olsem wan flag long ol nesen”? (ves 5). ?Wanem ol strong win long saed blong spirit we yu luksave raon long yu? ?Olsem wanem nao yu faenem “sef ples” tru fasin blong stap kam tugeta? (ves 6).
Luk tu long “Brightly Beams Our Father’s Mercy,” Hym, namba 335.
Jos Ia blong Sevya i save stap wan laet mo wan sef ples long taem blong ol strong win.
Long Lod, ol sakrifaes blong mi oli tabu.
Pikjarem long maen se, yu yu Newel K. Whitney o waef blong hem, Elizabeth, we i stap eksperiensem wan laef we i gat sakses long Ketlan mo afta, hem i askem blong aot. ?Wanem nao yu faenem long Doktrin mo Ol Kavenan 117:1–11 we maet i bin helpem yu blong mekem sakrifaes ia? ?Wanem ol sakrifaes we yu mekem blong God? ?Wanem nao ol ves ia oli tijim long yu abaot huia nao i God mo wanem Hem i stap mekem?
Sakrifaes we Lod i bin askem Oliva Granja i bin defren long ol Witni: Lod i bin givim wok long hem blong stap long Ketlan mo stretem ol faenens blong Jos. Taem we hem i ripresentem Jos wetem tru mo strong fasin, long en, hem i no bin gat tumas sakses. Tingting long olsem wanem ol toktok blong Lod long Doktrin mo Ol Kavenan 117:12–15 i go wetem ol samting we Hem i askem long yu.
Luk tu long “Far West and Adam-ondi-Ahman,” long Revelations in Context, 239–40.
Taeting blong mi i help blong bildimap kingdom blong God.
Ol instraksen long seksen 119 mo 120 i mekem i klia wanem mining blong taeting: yumi kontribiut “wan aot long ten” aot long wanem we yumi winim (o salari) long wanwan yia(luk long Doktrin mo Ol Kavenan 119:4). Be ol revelesen ia oli givim moa bitim wan mining. Lod i talem long Ol Sent se taeting bae i “mekem graon blong Saeon i kam tabu.” Mo sapos i no gat loa ia, Hem talem, “bambae graon ia … i no wan Saeon long yufala” (ves 6). ?Yu eva tingting long taeting long wei ia? ?Long wanem wei nao taem yu stap pem taeting, i help blong mekem yu kam moa tabu, moa rere from Saeon?
?Wanem nao yu lanem aot long ol revelesen ia abaot, olsem wanem ol wokman blong Lod oli yusum ol mane blong taeting? ?Wanem i impoten tumas, long yu, abaot sentens ia “tru long voes blong mi i go long olgeta” insaed long Doktrin mo Ol Kavenan 120
Elda David A. Bednar i givim wan toktok blong eksplenem gud, olsem wanem blong yusum taeting mo ol blesing we i kam taem yumi stap obei long loa ia long “The Windows of Heaven” (Liahona, Nov. 2013, 19–20). Ol kwestin ia oli save help taem yu stadi long mesej blong hem:
The Windows of Heaven
-
?Huia nao i talem olsem wanem blong yusum taeting, afta we oli pem i kam long Jos?
-
Oli yusum mane blong taeting i long wanem?
-
?Wanem i ol blesing we oli kam olsem wan risal blong stap pem taeting? Eksampol, taem yumi stap pem taeting, ?long wanem wei nao hemia i mekem rilesensip blong yu wetem Papa long Heven mo Jisas Kraes i kam moa strong?
-
?Wanem nao yu save lanem aot long invitesen blong Elda Bednar?
-
?Olsem wanem nao yu save helpem ol narawan blong oli gat moa fet long loa ia blong Lod long saed blong taeting?
Luk tu long Malakae 3:8–12; “The Tithing of My People,” long Revelations in Context, 250–55.
Helpem ol narawan blong yusum wanem we oli stap lanem. Iven sapos wan we i wantem pem taeting, samtaem, oli no save olsem wanem blong mekem. Sapos yu stap tijim famli blong yu o wan klas, tingting blong tekem sam taem blong eksplenem olsem wanem blong pem taeting, nomata sapos tru long onlaen o long wan Taeting mo ol Narafala risit. (Luk long Tij Folem Wei blong Sevya, 27.)
Blong kasem moa aedia, luk long magasin blong manis ia Liahona mo Blong Ol Yut Oli Kam Strong magasin.
Sam Aedia blong Tijim Ol Pikinini
Mi mi blong Jos Ia blong Jisas Kraes blong Ol Lata-dei Sent.
-
Blong helpem ol pikinini blong yu blong lanem nem blong Jos mo andastanem from wanem i impoten, tingting blong stap askem sapos eniwan long olgeta i save talem ful nem blong Jos. Afta, yu save soem long olgeta nem we i stap long Doktrin mo Ol Kavenan 115:4 mo mekem olgeta oli ripitim wetem yu. Taem yu mekem olsem, tingting blong stap poenemaot ol impoten toktok mo from wanem oli impoten. Mo tu, yu save luklukbak long “Japta 43: Jisas I Putum Nem blong Jos blong Hem;” (long Ol Doktrin mo Ol Kavenan Stori, 164, o vidio we i go wetem long Gospel Laebri) o singsing “The Church of Jesus Christ” (Children’s Songbook, 77).
Chapter 43: Jesus Christ Names His Church: April 1838
Eksampol blong mi i save helpem ol narawan blong kam long Kraes mo faenem wan sef ples.
-
Ol pikinini blong yu oli maet save ol pipol we oli stap traehad mo nidim wan “sef ples” from “ol strong win blong laef” (ves 6). ?Olsem wanem nao bae oli save helpem ol pipol ia? Tingting blong stap invaetem ol pikinini blong yu blong stanap taem yu ridim toktok ia girap insaed long Doktrin mo Ol Kavenan 115:5. Oli save openem fingga blong olgeta olsem ol laet blong san taem yu ridim saenaot. Rimaenem ol pikinini blong yu blong oli tingbaot se laet blong yumi i kam long Jisas Kraes, mo helpem olgeta blong oli tingting long sam wei we oli save “saenaot olsem we Hem i mekem.”
-
Ol pikinini blong yu oli save droem wan pikja blong wanem oli tokbaot insaed long Doktrin mo Ol Kavenan 115:6. Eksampol: oli save droem wan strong win wetem ol pipol we oli stap go haed insaed long wan bilding blong Jos. ?Wanem nao yu ting se, strong win i ripresentem? ?Long wanem wei nao, Jos blong Sevya i givim help? Helpem ol pikinini blong yu blong tingbaot wan fren, memba blong famli o wan neba we i stap long nid. ?Olsem wanem nao yumi save invaetem olgeta blong faenem help insaed long Jos Ia blong Jisas Kraes?
Long Lod, ol sakrifaes blong mi oli tabu.
-
Invaetem ol pikinini blong yu blong priten se olgeta oli, Niuwel K. Whitney. Bae oli filim olsem wanem sapos Lod i askem olgeta blong oli lego ol wok blong olgeta we i gat sakses mo muv i go long wan niu ples? (Bae i help blong yufala i luklukbak long “Japta 41: Trabol long Ketlan,” long Ol Doktrin mo Ol Kavenan Stori, 158–60, o vidio we i go wetem long Gospel Laebri.) Taem tugeta, yufala i stap ridim 3 Nifae 117:1–11, askem olgeta blong stopem yu taem we oli harem wan samting we bae i helpem olgeta blong gat fet blong obei long Lod. ?Wanem ol sakrifaes nao we yumi mekem blong obei long Lod? ?Long wanem wei nao Hem i blesem yumi?
Chapter 41: Trouble in Kirtland: 1837–1838
Papa long Heven i yusum taeting blong blesem ol pikinini blong Hem.
-
Plante long ol pikinini we yu stap tijim, maet oli yangfala tumas blong winim mane mo pem taeting, be i gud blong oli andastanem olsem wanem taeting i helpem wok blong Lod truaot long wol. Tingting blong stap yusum ol pikja mo aktiviti pej long en blong aotlaen ia blong helpem olgeta blong andastanem wanem i taeting. (Luk tu long “Japta 44: Taeting,” long Ol Doktrin mo Ol Kavenan Stori, 165–66, o vidio we i go wetem long Gospel Laebri.) ?Long wanem wei nao Papa long Heven i yusum taeting blong blesem ol pikinini blong Hem? Serem ol filing blong yu abaot loa blong taeting mo olsem wanem hem i blesem yu.
Chapter 44: Tithing: July 1838
Taem yumi pem taeting, yumi soem fet blong yumi long Jisas Kraes.
Blong kasem moa aedia, luk long magasin blong Fren blong manis ia.