Ol Voes blong Restoresen

“Ol seremoni blong dedikesen ia, oli save praktis long olgeta, be i no gat wan lanwis long wol ia we i save tokbaot hao heven i soemaot hem long memori dei ia. Ol enjel oli kamkamaot long sam, taem evriwan we oli filim se ol tabu pipol blong heven oli stap, mo wanwan hat i fulap long wan glad we oli no save tokbaot, mo i fulap long glori.”

“Wan long ol fas memori blong mi i dedikesen blong Tempol. Papa blong mi i tekem mifala i sidaon long leg blong hem, mo i talem long mifala from wanem bae mifala i go, mo i minim wanem blong dediketem wan haos long God. Mo nomata we mi yang tumas long tetaem ia, mi tingbaot klia taem ia. Mi save luk i gobak long ol yia ia, mo luk, long taem we mi luk Josef we i Profet, i stap stanap wetem ol han blong hem we hem i leftemap i go long heven, we fes blong hem i waet, wota blong ae i stap ron i kamdaon long fes blong hem taem hem i stap toktok long memori dei ia. Kolosap evriwan i stap krae. Haos ia i bin fulap mo ol pikinini oli bin stap sidaon long leg blong ol olfala pipol; sista blong mi i sidaon long leg blong papa, mi antap long leg blong mama. Mi save tingbaot tu ol dres we mifala i bin werem. Maen blong mi i yang tumas long tetaem ia blong kasem ful mining blong evri samting, be taem we taem i bin pas i go, nao moa tingting i kam long mi mo mi talem tangkyu tumas we mi bin gat spesel janis ia blong stap long tetaem ia.”

“Long naet, mi gat miting wetem ol ofisa blong Jos insaed long haos blong Lod. Spirit i bin fulap—mi bin luk glori blong God, olsem wan bigfala klaod, we i bin kamdaon mo i stap antap long haos ia, mo i fulumap haos ia olsem wan strong win we i hariap i go. Mi bin luk ol pis tang, we oli olsem faea we oli stap antap long plante, … long semtaem we oli bin toktok ol nara lanwis mo oli bin talem ol profesi.”

“Oli bin luk plante visen. Wan i bin luk wan pilo o wan klaod i stap antap long wan haos, i saen olsem we taem san i saen long wan klaod, nao i kam olsem gol. Tu narawan oli bin luk trifala man we oli wokbaot insaed long rum wetem ol ki blong olgeta we oli saen gud long han blong olgeta, mo tu, wan jen we i saen gud we i stap long han blong tufala.”

“God i bin stap ia; ol enjel blong Hem oli bin stap ia, Tabu Spirit i bin stap long medel blong ol pipol, … mo oli bin fulap, stat long hed blong olgeta i go kasem andanit leg blong olgeta wetem paoa mo insperesen we i kam long Tabu Spirit.”

“Taem we oli finisim Tempol, mo oli bin dediketem … tufala dei ia, i tufala dei we mi bin hapi moa long laef blong mi. Hym we oli bin raetem blong stret taem ia i, ‘Spirit Olsem Faea I Stap Bon.’ I bin tru se Paoa blong Heven i bin stap antap long haos ia. … I bin filim se hem i bin heven we i stap long wol.”