“Oktoba 6–12: ‘Bae Mi Givim Oda long Evri Samting blong Gud blong Yufala’: Doktrin mo Ol Kavenan 111–114,” Kam Folem Mi—Blong Hom mo Jos: Doktrin mo Ol Kavenan 2025 (2025)
“Doktrin mo Ol Kavenan 111–114,” Kam Folem Mi—Blong Hom mo Jos: 2025
Oktoba 6–12: “Bae Mi Givim Oda long Evri Samting blong Gud blong Yufala”
Doktrin mo Ol Kavenan 111–114
?Yu yu eva gat wan eksperiens we i mekem se yu filim se yu gat tras long yuwan, mo yu filim se yu stap sef long fet blong yu long Kraes—be afta, ol hadtaem blong laef oli traem fet blong yu, mo yu faenem yuwan se yu stap hadwok blong kasembak pis ia we yu bin filim bifo? Wan semmak samting olsem i bin hapen long Ol Sent long Ketlan. I no wan yia yet afta long ol taem we Ol Sent oli bin filim plante samting long saed blong spirit, we i hapen wetem dedikesen blong Ketlan Tempol, nao ol trabol oli kam antap. I gat problem blong mane, raorao long medel blong Kworom blong Olgeta Twelef Aposol, mo ol nara tes we oli mekem se sam Sent oli no stap strong long fet blong olgeta, nomata ol fas eksperiens we oli bin gat.
Yumi no save stap longwe long ol tes; ?so olsem wanem nao yumi save stopem olgeta blong oli no spolem fet mo testemoni blong yumi? Mebi, pat blong ansa i stap long kaonsel blong Lod, we i stap long Doktrin mo Ol Kavenan 112, we Lod i bin givim long taem we fasin blong agens, long Ketlan, i bin stap kam bigwan. Lod i bin talem: “Be yufala i mas mekem hat blong yufala i kam klin evriwan long fored blong mi” (ves 28), “Yufala i no mas agens” (ves 15), “Yu mas mekem yu rere from wok ia” (ves 7), mo “Putum tingting blong yu i stap daon” (ves 10). Taem yumi folem kaonsel ia, Lod “bae i tekem han blong [yumi] mo lidim [yumi]” tru long wanem i save kam agens, mo bae i hilim mo givim pis long yumi (luk long ol ol ves 10, 13).
Ol aedia blong Stap Lanem Samting long Hom mo long Jos
Lod i save “givim oda long evri samting blong gud blong” mi.
Taem we oli kasem yia 1836: Jos i bin gat ol bigfala kaon blong mekem wok blong Lod. Josef Smit mo ol narawan oli bin wari abaot ol kaon ia, mo oli tingting long samfala wei blong pemaot ol kaon ia (luk long seksen heding blong Doktrin mo Ol Kavenan 111).
Taem yu ridim seksen 111, tingting long olsem wanem yu save yusum ol toktok blong Josef—mo ol samting we yu wari long olgeta. Eksampol, wetaem nao yu bin filim lav blong God “nomata long ol krangke fasin blong yufala” (ves 1)? ?Olsem wanem nao Lod i bin helpem yu blong faenem “ ol rij samting” we yu neva ting long ol (ves 10)? ?Wanem nao Hem i bin mekem blong “ oda long evri samting blong gud blong yufala” (ves 11)? Sentens ia: “kwik olsem we yufala i save kasem olgeta,” ?hem i tijim yu wanem abaot Papa long Heven?
Luk tu long Matiu 6:19–21, 33; “More Treasures Than One,” long Revelations in Context, 229–34.
Doktrin mo Ol Kavenan 112:3–15, 22
Lod bae i lidim mi taem mi putum tingting i stap daon mo lukaotem tingting blong Hem.
Thomas B. Marsh, Presiden blong Kworom blong Olgeta Twelef Aposol, i bin harem nogud se Josef i no bin toktok wetem hem, mo singaotem tu memba long kworom blong hem blong prijim gospel long Inglan. Hem i mit wetem profet we i kasem wan revelesen we i helpem Thomas blong putum ol filing blong harem nogud blong hem long saed. Revelesen ia oli raetemdaon long Doktrin mo Ol Kavenan 112.
Holemtaet situesen ia long maen blong yu taem yu stap stadi long Doktrin mo Ol Kavenan 112. ?Wanem nao yu faenem we maet i bin hilim ol filing blong harem nogud blong Thomas? Long ol ves 3–15 mo 22, yu save lukaotem ol ansa blong ol kwestin olsem ia: ?Wanem i fasin blong putum tingting i stap daon? ?Hem i minim wanem blong Lod i “tekem han blong yu” mo i lidim yu? ?From wanem yu ting se fasin blong putum tingting i stap daon i helpem yu blong kasem daereksen we i kam long Lod? Yu save faenem sam moa ansa insaed long “Pattern of Humility” long mesej blong Elda Josef W. Sitati “Ol Paten blong Fasin blong Stap Wan Disaepol” (Liahona, Novemba 2022, 87–88).
Tingting abaot wan we yu save we i gat tingting i stap daon. ?Wanem nao man o woman ia i mekem blong soem fasin blong putum tingting i stap daon? ?Wanem nao yu lanem aot long Sevya abaot fasin blong stap putum tingting i stap daon? Maet yu save faenem ol pikja blong ol taem long laef blong Hem taem Hem i bin soem fasin blong putum tingting i stap daon.
?Wetaem nao yu filim se Lod i bin lidim yu taem yu putum tingting blong yu i stap daon?
Luk tu long Ulisses Soares, “Be Meek and Lowly of Heart,” Liahona, Nov. 2013, 9–11; “The Faith and Fall of Thomas Marsh,” long Revelations in Context, 54–60; Topics and Questions, “Humility,” Gospel Laebri; “Be Thou Humble,” Hym, namba 130.
Mekem Olgeta we Oli Stap Lan Oli Tekpat. Tingting abaot olsem wanem yu save helpem ol pipol we yu tijim blong tekempat oltaem blong stap lanem ol trutok insaed long ol skripja. Eksampol, blong helpem olgeta blong andastanem wanem Lod i talem long Doktrin mo Ol Kavenan 112:10, yu save fasem ae blong wan mo lukaot gud mo lidim hem raon long sam smol samting we i save blokem hem olsem ol jea o ol narafala samting. ?Wanem nao yumi save lanem abaot fasin blong putum tingting i stap daon aot long wanem we oli jes soem?
Doktrin mo Ol Kavenan 112:12–26, 28, 33–34
Olgeta we oli jenisim tru laef blong olgeta, oli kam blong save Jisas Kraes.
Wanem we i tru i we, sam Aposol long 1837, oli bin tanem olgeta agensem Profet, i wan gudfala samting we i mekem yumi tingbaot se, i nomata wanem koling yumi gat o hamas yumi save abaot gospel, yumi mas mekemsua se yumi mekem fasin blong jenisim laef i go long Jisas Kraes, i kam moa strong. Bae yu save ridim Doktrin mo Ol Kavenan 112:12–26, 28, 33–34 mo lukaotem ol trutok we oli save helpem yu blong winim wan tes blong fet o jenisim laef moa fulwan i go long Lod. Maet yu save filim insperesen blong serem wanem we yu faenem blong helpem wan blong mekem fasin blong jenisim, laef i kam moa strong.
Josef Smit i bin “wan wokman we i stap long han blong Kraes.”
Profet Aesea i luklukbak long wan long ol laen blong Jese olsem wan “branj” mo wan “rus” (Aesea 11:1, 10). Long seksen 113, Lod i eksplenem se laen ia, wan wokman blong Kraes, bae i wan tul insaed long wok ia blong pulum ol pipol blong Lod oli kam tugeta wanples long ol las dei ia (luk long (luk long Doktrin mo Ol Kavenan 113:4, 6). Revelesen ia i stap tokbaot gud plante samting abaot Profet Josef Smit. ?Olsem wanem nao hemia mo ol narafala trutok insaed long seksen 113 oli bin leftemap tingting blong Ol Sent long taem blong ol hadtaem ia we oli bin stap gotru long hem long Ketlan? ?Wanem nao yu faenem, insaed long revelesen ia, we i givim insperesen long yu blong stap strong mo gohed blong tekempat long wok blong Lod tedei?
Luk tu long Gaed long Ol Skripja, “Jesse,” Gospel Laebri; 2 Nifae 21:10–12; Josef Smit—Histri 1:40.
Aesea i raetem wan “branj” mo “ol rus” we oli stap kamaot long “stamba blong Jese” (Aesea 11:1).
Blong kasem moa aedia, luk long magasin blong manis ia Liahona mo Blong Ol Yut Oli Kam Strong magasin.
Sam Aedia blong Tijim Ol Pikinini
Doktrin mo Ol Kavenan 111:2, 10–11
Ol samting blong God, oli ol rij samting long mi.
-
Yu mo ol pikinini blong yu i save droem wanem we i kam long maen blong yufala taem yufala i harem toktok ia rij samting. Afta, tugeta, yufala save i ridim Doktrin mo Ol Kavenan 111:2, 10–11 mo talem wanem i defdefren bitwin ol rij samting blong wol wetem ol rij samting blong Lod. (Luk long aktiviti pejblong wik ia.) ?Olsem wanem nao yumi save tekem ol rij samting blong Lod oli gat moa valiu long yumi?
Lod bae i tekem han blong mi mo bae i lidim mi, mo bambae i ansa long ol prea blong mi.
-
Afta we yufala i ridim Doktrin mo Ol Kavenan 112:10 tugeta, tugeta, yu mo ol pikinini blong yu i save singsing “Be Thou Humble” (Hym, namba 130). Mo tu, yufala i save pleiplei wan gem we bae oli stap lidim olgetawan “tru long han” (olsem wan samting we i stap blokem olgeta long rod mo wan bae i lidim olgeta blong gotru). ?Long wanem wei nao Lod i stap lidim yumi “tru long han,” nomata se Hem i no stap ia wetem yumi? ?From wanem yumi nidim Lod blong lidim yumi? ?Wetaem nao yumi bin filim se Lod i stap lidim yumi?
-
Yu o ol pikinini blong yu i save raetemdaon ol toktok blong Doktrin mo Ol Kavenan 112:10 mo putum wan laen andanit long ol blesing we Lod i stap givim long yumi taem yumi putum tingting i stap daon mo tanem yumi i go long Hem. Leftemap tingting blong ol pikinini blong yu blong serem ol taem we oli bin putum tingting i stap daon mo askem help blong Lod mo kasem ansa blong ol prea blong olgeta , o Lod i bin lidim olgeta blong mekem wan gudfala samting (luk long Moronae 7:13, 16).
Wan smol pat blong peinting ia Girap mo Wokbaot, i kam long Simon Dewey
Jisas i wantem mi blong mi lavem evriwan.
-
Yu mo ol pikinini blong yu i save gat wanwan janis blong ridim “Japta 41: Trabol long Ketlan” (long Ol Doktrin mo Ol Kavenan Stori, 158–60). ?Huia insaed long stori i bin mekem ol problem insaed long Ketlan oli go mowas? ?Huia i bin traem blong mekem samting i kam gud moa? Afta, yufala i save ridim Doktrin mo Ol Kavenan 112:11 mo tokbaot from wanem Sevya i wantem yumi blong lavem evriwan. ?Wetaem nao Hem i soem lav long ol pipol we oli no stap kaen long Hem? (eksampol, luk long Luk 23:34). Mo tu, yufala i save singsing wan singsing abaot stap lavem ol narawan olsem, “I’ll Walk with You” (Children’s Songbook, 140–41).
Chapter 41: Trouble in Kirtland: 1837–1838
Doktrin mo Ol Kavenan 112:11–14, 24–26
Olgeta we oli jenisim tru laef blong olgeta, oli kam blong save Jisas Kraes.
-
Afta we yufala i ridim Doktrin mo Ol Kavenan 112:24–26, yu mo ol pikinini blong yu i save tokbaot wanem nao i defren bitwin, stap save nem blong wan wetem stap save olgeta. ?Wanem ol tijing long ol ves 11–14 we i helpem yumi blong andastanem wanem i minim blong save Lod?
Blong kasem moa aedia, luk long magasin blong Fren blong manis ia.