Ɔbɛsɛ 6–12: “Mibesiesie Ndzɛmba Nyinara Yie ama Hom”: Nkyerɛkyerɛ na Ahyɛmudzi 111–114,” Bra, Bɛka Mo Do—Dze Ma Fie na Asɔr: Nkyerɛkyerɛ na Ahyɛmudzi 2025 (2025)
“Nkyerɛkyerɛ na Ahyɛmudzi 111–114,” Bra, Bɛka Mo Do—Dze Ma Fie na Asɔr: 2025
Ɔbɛsɛ 6–12: “Mibesiesie Ndzɛmba Nyinara Yie ama Hom”
Nkyerɛkyerɛ na Ahyɛmudzi 111–114
Ana enya sunsum mu sũahu bi pɛn a ɔmaa inyaa awerɛhyɛmu na wo gyedzi sii pi wɔ Christ mu—naaso nkyii abrabɔ mu atsetsee sɔɔ wo gyedzi hwɛe, na ihun woho dɛ iridzi aper asan enya asomdwee no a idzii kan tsee no a? Biribi a ɔtse dɛm sii Ahotseweefo a wɔwɔ Kirtland no do. Sunsum a ohuei wɔ Kirtland Temple no ne tu hyɛ Nyame nsa som ase no ekyir no, oenndzi afe kor mpo na ɔhaw ahorow maa no mu do. Sikasɛm ho ahokyer kɛse, wentwiwentwi wɔ Duebien no hɔn Quorum mu, na nsɔhwɛ binom so maa Ahotseweefo mu binom hɔn gyedzi hihimii, hɔn sũahu a wodzii kan nyae no ekyir no mpo.
Yennkotum ekwetsir nsɔhwɛ horow, ntsi yebesi dɛn bɛma wonnkohunahuna hɛn gyedzi na hɛn dasee? Bia nyiano no ne fã bi no, wobohu no wɔ Ewuradze n’afotu a ɔwɔ Nkyerɛkyerɛ na Ahyɛmudzi 112 mu a, wɔdze mae ber a abɛbrɛsɛ a ɔwɔ Kirtland ruhur no. Ewuradze see dɛ, “Hom ntsew hom akoma ho wɔ m’enyim” (nyiyimu 28), “Mma hom nntsew etua” (nyiyimu 15), “Bɔ w’asen do wɔ edwuma no ho” (nyiyimu 7), na “Brɛ woho adze” (nyiyimu 10). Sɛ yedzi afotu yi do a, Ewuradze “bosuo [hɛn] nsa mu agye [hɛn] taataa” edua abɛbrɛsɛ mu aba ayarsa na asomdwee mu (hwɛ nyiyimu 10, 13).
Adwenkyerɛ horow ma Adzesũa wɔ Fie na wɔ Asɔr
Ewuradze botum “esiesie ndzɛmba nyina ama [me] yieyɛ.”
Bodu afe 1836 mu no, nna Asɔr no abɛdze kaw kɛsenara ber a wɔreyɛ Ewuradze n’edwuma no. Ekaw yinom ho asɛm haaw Joseph Smith na binom na wɔdwendween akwan ahorow a wɔdze botua (hwɛ Nkyerɛkyerɛ na Ahyɛmudzi 111 no ɔfã tsir no).
Ber a ekenkan ɔfã 111, susu mbrɛ Ewuradze ne nsɛm a ɔkãa kyerɛɛ Joseph no bɛfa woho—na ndzɛmba a ɔhaw wo ho. Mfatoho, ebɛn mber na atse Nyame no dɔ “ɔmmfa ho dɛ ɔyɛ a [e]yɛ dza ɔmmfata” (nyiyimu 1)? Ewuradze esi dɛn aboa wo ma ehu “ahonyadze” a enyi nnda (nyiyimu 10)? Ebɛnadze na Ɔayɛ “esiesie ndzɛmba nyinara yie ama wo” (nyiyimu 11)? Ebɛnadze na kasasin “wɔ ahoɔhar mu a hom botum dze agye no” kyerɛkyerɛ wo fa Ɔsor Egya ho?
Hwɛ Matthew 6:19–21, 33; “More Treasures Than One,” wɔ Revelations in Context, 229–34 so.
Nkyerɛkyerɛ na Ahyɛmudzi 112:3–15, 22
Ewuradze bedzi me kan ber a mohwehwɛ Ne pɛ ahobrɛadze mu ara.
Ɔyɛɛ Thomas B. Marsh, Asomafo Duebien no hɔn Quorum no ne President no yaw dɛ Joseph Smith, ɔannye no anndwen ho no, ɔfrɛɛ no quorum mba beenu dɛ wɔnkɛkã asɛmpa no wɔ Ngyeresi Aborɔkyir. Ohyiaa Nkɔnhyɛnyi no, a onyaa nyikyerɛ a ɔboaa Thomas ma ɔdze n’ayawdzi no too nkyɛn. Dɛm nyikyerɛ no wɔakyerɛw no wɔ Nkyerɛkyerɛ na Ahyɛmudzi 112.
Fa dɛm asɛm yi to w’adwen do ber a isũa Nkyerɛkyerɛ na Ahyɛmudzi 112. Ebɛnadze na ihu a bia ɔdwedwee Thomas n’ayawdzi a ɔtsee no? Nyiyimu 3–15 na 22 mu no, ibotum ahwehwɛ nyiano ma nsɛmbisa tse dɛ: Ebɛnadze nye ahobrɛadze? Ewuradze “bosuo wo nsamu” agye wo taataa n’asekyerɛ nye dɛn? Dɛn ntsi a edwen dɛ erebrɛ woho adze boa wo ma inya Ewuradze no kwankyerɛ? Ibotum ehu nyiano binom so wɔ “Pattern of Humility” wɔ Elder Joseph W. Sitati’s n’asɛm mu “Patterns of Discipleship” (Liahona, Ɔberɛfɛw 2022, 87–88 akã ho).
Dwen obi a inyim no a ɔyɛ ahobrɛadze ho. Ebɛnadze na nyimpa yi yɛ dze kyerɛ ahobrɛadze? Ebɛnadze na isũa fi Agyenkwa no hɔ fa erebrɛ wo hoadze? Bia ibotum ehu N’abrabɔ mu mber a Ɔkyerɛɛ ahobrɛadze ho mfonyin.
Ebɛn mber na atse dɛ Ewuradze rema wo kwankyerɛ ber a abrɛ wo hoadze?
Hwɛ Ulisses Soares, “Be Meek and Lowly of Heart,” Liahona, Ɔberɛfɛw 2013, 9–11; “The Faith and Fall of Thomas Marsh,” wɔ Revelations in Context, 54–60; Nsɛngyinado na Nsɛmbisa, “Humility,” Asɛmpa Nwoma Korabea; “Be Thou Humble,” Hymns, nkanee 130.
Enye adzesũafo inya nkitahodzi. Dwen mbrɛ ibotum bɔboa nkorɔfo a ekyerɛkyerɛ hɔn adze ma wɔdze hɔnho ahyɛ kyerɛwsɛm nokwar adzesua no mu ara yie. Mfatoho, ama wɔaaboa hɔn ma wɔatse dza Ewuradze kãa wɔ Nkyerɛkyerɛ na Ahyɛmudzi 112:10 ase no, ibotum dze adze akyekyer obi n’enyiwa na ahwɛyie mu ara esuo ne nsa mu egya no ma wɔanantsew edua ngua na ndzɛmba binom so a osiw kwan mu. Ebɛnadze na yesũa fi ɔyɛkyerɛ yi mu a ɔfa ahobrɛadze ho?
Nkyerɛkyerɛ na Ahyɛmudzi 112:12–26, 28, 33–34
Hɔn a wɔasakyer ampaara no ba bohu Jesus Christ.
Nokwar dɛ Asomafo mu binom wɔ afe 1837 danee tsĩaa Nkɔnhyɛnyi no yɛ nkaadze pa dɛ Asɔr mu ɔfrɛ biara a yɛwɔ no anaa mbrɛ yesi nyim asɛmpa ho nsɛm mmfa ho no, otwar dɛ yɛyɛ ahwɛyie ankorankor dɛ yɛbɛnyɛn hɛn nsakyeree aba Jesus Christ hɔ. Bia ibotum akenkan Nkyerɛkyerɛ na Ahyɛmudzi 112:12–26, 28, 33–34 na ahwehwɛ nokwar horow a obotum aboa wo ma edzi gyedzi ho nsɔhwɛ do konyim anaa asakyer yie aba Ewuradze hɔ. Bia ibenya nkenyan dɛ ebɛkyɛ dza ehu no dze aboa obi fofor ma wɔahyɛ hɔn nsakyeree ba Christ hɔ no dzen.
Nna Joseph Smith yɛ “akowaa wɔ Christ ne nsamu.”
Nkɔnhyɛnyi Isaiah frɛɛ Jesse n’asefo no mu ɔbaako dɛ “mfɛwee” na “ndwow” (Isaiah 11:1, 10). Wɔ ɔfã 113 mu no, Ewuradze kyerɛkyerɛɛ mu dɛ asenyi yi, Christ akowaa, bɛyɛ okunyin wɔ Ewuradze no nkorɔfo hɔn mboaboa ano wɔ nda a odzi ekyir no mu (hwɛ Nkyerɛkyerɛ na Ahyɛmudzi 113:4, 6). Nkɔnhyɛ yi kyerɛ Nkɔnhyɛnyi Joseph Smith ara yie. Nokwar yi na binom so a ɔwɔ ɔfã 113 mu no sii dɛn hyɛɛ Ahotseweefo no nkuran ber a wɔsɔɔw begyabegyayɛ wɔ Kirtland no? Ebɛnadze na ihu wɔ nyikyerɛ yi mu a okenyan wo ma ehyɛ dzen na ekɔ do dze woho hyɛ Ewuradze n’edwuma mu ndɛ?
Hwɛ Kyerɛwsɛm no Kwankyerɛ so, “Jesse,” Asɛmpa Nwoma Korabea; 2 Nephi 21:10–12; Joseph Smith—Abakɔsɛm 1:40.
Isaiah kyerɛwee faa “mfɛwee” na “ndwow” a ofi “Jesse dusin” (Isaiah 11:1) no mu ho asɛm
Epɛ adwenkyerɛ horow bi aka ho a, hwɛ bosoom yi Liahona na For the Strength of Youth [Ma Mbabun enya Ahoɔdzen] dawurbɔ nkrataa mu.
Adwenkyerɛ a wɔdze Kyerɛkyerɛ Mbofra Adze
Nkyerɛkyerɛ na Ahyɛmudzi 111:2, 10–11
Nyankopɔn ndzɛmba botum ayɛ ahonyadze ama me.
-
Ɔwo na wo mbofra botum adrɔw dza ɔba hom adwen mu sɛ hom tse asɛmfua ahonyadze. Nkyii hom botum abɔ mu akenkan Nkyerɛkyerɛ na Ahyɛmudzi 111:2, 10–11 na hom dze asaase do ahonyadze atoto ndzɛmba a ɔyɛ ahonyadze ma Ewuradze ho. (Hwɛ dapɛn yi dwumadzi krataafa.) Yebesi dɛn ama Nyame ne ndzɛmba asom hɛn bo ara yie?
Nkyerɛkyerɛ na Ahyɛmudzi 112:10
Ewuradze bosuo me nsa mu agye me taataa na Ɔama me mpaabɔ ho mbuae.
-
Hom abɔ mu akenkan Nkyerɛkyerɛ na Ahyɛmudzi 112:10 ewie no, ɔwo na wo mbofra botum abɔ mu atow “Be Thou Humble” (Asor Ndwom, nkanee 130). Wobotum so edzi agor no a “wosuo hɔn nsamu” nkorkor na wodzi hɔn kan (tse dɛ kwan a ndzɛmba bi siw no). Ewuradze si dɛn “suo hɛn nsamu” dze dzi hɛn kan, wɔ ber mpo a ɔnnkã hɛnho wɔ nyimpadua mu? Dɛn ntsi na yehia Ewuradze ma oedzi hɛn kan? Eben mber na yɛatse nkã dɛ Ewuradze ridzi hɛn kan?
-
Ɔwo anaa wo mbofra botum akyerɛw nsɛmfua a ɔwɔ Nkyerɛkyerɛ na Ahyɛmudzi 112:10 na hom etwitwa nhyira horow ase a Ewuradze dze ma hɛn sɛ ahobrɛadze mu ara yɛdan kɔ No hɔ a. Hyɛ wo mbofra no nkuran ma wɔnkyɛ mber a wobisaa Ewuradze hɔ mboa ahobrɛadze mu na wonyaa hɔn mpaabɔ ho mbuae, anaa ogyaa hɔn ma wɔyɛɛ papa bi (hwɛ Moroni 7:13, 16).
Arise and Walk [Soɛr na Nantsew] n’afã bi, Simon Dewey yɛɛ nsaano mfonyin no
Nkyerɛkyerɛ na Ahyɛmudzi 112:11
Jesus pɛ dɛ modɔ obiara.
-
Ɔwo na wo mbofra botum afa mber akenkan nkorkor efi “Chapter 41: Trouble in Kirtland” (wɔ Doctrine and Covenants Stories, 158–60 mu). Woana na ɔwɔ asɛm no mu a ɔmaa Kirtland haw no no mu yɛɛ dzen? Woana na nna ɔrobɔ mbɔdzen esiesie no? Nkyii wobotum akenkan Nkyerɛkyerɛ na Ahyɛmudzi 112:11 na wɔakasa afa siantsir a Ewuradze pɛ dɛ yɛbɔdɔ obiara. Ebɛn mber na Ɔkyerɛɛ dɔ ma nkorɔfo a wɔbɔɔ no etsirmɔdzen? (Mfatoho, hwɛ Luke 23:34). Hom so botum so atow ndwom a ɔfa erodɔ binom ho, tse dɛ “I’ll Walk with You” (Children’s Songbook, 140–41).
Chapter 41: Trouble in Kirtland: 1837–1838
Nkyerɛkyerɛ na Ahyɛmudzi 112:11–14, 24–26
Hɔn a wɔasakyer ampaara no ba bohu Jesus Christ.
-
Hom akenkan Nkyerɛkyerɛ na Ahyɛmudzi 112:24–26 ewie no, ɔwo na wo mbofra botum akasa afa nsonsonee a ɔda inyim obi ne dzin na inyim hɔn ntamu. Ebɛn nkyerɛkyerɛ a ɔwɔ nyiyimu 11–14 na ɔboa hɛn ma yehu inyim Ewuradze n’asekyerɛ?
Epɛ adwenkyerɛ horow bi aka ho a, hwɛ bosoom yi Nyɛnko dawurbɔ krataa mu.