Сургаал ба Гэрээ 106–108

Сургаал ба Гэрээ 106, 108-д Их Эзэн Өөрийнх нь Сүмд үйлчлэхээр дуудагдсан хоёр гишүүнд зөвлөгөө болон амлалт өгсөн. Та Түүний зөвлөгөөг судлахдаа Их Эзэнд үйлчлэх боломжуудын тухай, тухайлбал: тохинуулах даалгавар, Сүмийн дуудлага, гэр бүлийн үүрэг хариуцлага эсвэл сайныг үйлдэх сүнслэг өдөөлтүүдийн талаар бодож болно.

Эдгээр шүлэгт Их Эзэн танд ямар захиас өгсөн гэж та бодож байна вэ? Аль өгүүлбэрүүд танд илүү хамаатай юм шиг байна вэ? Дараах асуултуудыг бодоод үзээрэй.

• Их Эзэн хэзээ танд Өөртөө үйлчлүүлэхээр “ач ивээл (эсвээс тэнгэрлэг тусламж) хийгээд итгэл найдварыг” өгч байсан бэ? (Сургаал ба Гэрээ 106:8).

• Та “бүх үйлүүддээ” бусдыг хүчирхэгжүүлнэ гэдэг нь юу гэсэн утгатай гэж бодож байна вэ? (Сургаал ба Гэрээ 108:7).

Ахлагч Карл Б.Күк Сүмийн хүнд хэцүү даалгавар хүлээн авахдаа өвөг дээдсийнхээ туршлагаас хүч авчээ. Энэ талаар түүний “Үйлчил” захиаснаас уншина уу (2016 оны 10-р сарын Ерөнхий чуулган, х.106–109). Их Эзэнд үйлчлэх боломжийг хүлээн авах талаар үр хойчдоо эсвэл ирээдүйн өөртөө захиа бичээд үзээрэй. Захиандаа ахлагч Күкийн захиас, Сургаал ба Гэрээ 106 болон 108 дээрээс сурч мэдсэн үнэнүүдээ мөн өөрийн туршлагыг оруулаарай.

Түүнчлэн Хэнри Б.Айринг, “Надтай хамт алхагтун,” 2017 оны 4-р сарын Ерөнхий чуулган, х.69–72; Topics and Questions, “Serving in Church Callings,” Gospel Library; “Warren Cowdery” and “‘Wrought Upon’ to Seek a Revelation,” in Revelations in Context, 219–223, 224–228-ыг үзнэ үү.

Их Эзэн Өөрийн “санваарын талаарх илчлэл[ийг]” (Сургаал ба Гэрээ 107, хэсгийн тойм) бидэнд Мелкизедек санваарын анхны нэрийг зааснаар эхэлдэг (1–4-р шүлэг-ийг үзнэ үү). Үүнийг мэдэх нь яагаад чухал гэж та бодож байна вэ? Энэ нэр санваарын талаарх таны бодолд хэрхэн нөлөөлөх вэ?

Санваарын талаар, тэр тусмаа 18–20-р шүлэг-ийг уншихдаа энэ талаар бодоорой. “Тэнгэрийг нээлгэх” гэдэг нь юу гэсэн үг вэ? “Бурхан Эцэг, … Есүстэй харьцаж мөн сэтгэл ханамжтай байх” гэдэг нь юу гэсэн үг вэ? Аврагчийн санваарын хүч болон эрх мэдэл танд энэ бүхнийг хэрхэн боломжтой болгодог вэ?

Алма 13:2, 16; Сургаал ба Гэрээ 84:19–27-г мөн үзнэ үү.

Их Эзэний үйлчлэгчдийг та өөрийн итгэлээр, найдвараар, мөн залбирлаар дэмжинэ гэдэг нь юу гэсэн үг гэж бодож байна вэ?

“Хайрт бошиглогчийг маань ивээгээч,” Дуулал, д.13-ыг мөн үзнэ үү.

1835 онд Иосеф Смит 107-р хэсэг-ийг шинээр дуудагдсан Арван хоёрын чуулгад хуваалцсан (хэсгийн тоймыг үзнэ үү). 23–24, 33–35, 38-р шүлгүүд дээр Их Эзэн тэдний дуудлагын талаар тэдэнд юу заасан бэ? Түүний амьд Төлөөлөгчдийн сургаал, тохинууллаар дамжуулан таны Есүс Христийн талаарх гэрчлэл хэрхэн хүчирхэгжиж байсан бэ?

91–92-р шүлэг-т Их Эзэн Өөрийн ахмад төлөөлөгч буюу Сүмийн ерөнхийлөгчийн талаар заасан. Тэр хэрхэн “Мосетой адилхан” байдаг вэ? (Судруудын удирдамж, “Мосе,” Gospel Library-г үзнэ үү).

Дэвид А.Бэднар, “Миний нэрийг гэрчлэхээр сонгогдсон,” 2015 оны 10-р сарын Ерөнхий чуулган, х.126–130-ийг мөн үзнэ үү.

Их Эзэн Сургаал ба Гэрээ 107:27–31, 85–89 дээр зөвлөлүүдийн талаар юу заасныг ажигла. Зөвлөлийг юу үр дүнтэй болгодог вэ? Та эдгээр зарчмыг сүмийн дуудлага, гэр орон, үүрэг хариуцлагадаа хэрхэн хэрэгжүүлэх вэ?

M.Рассэлл Баллард, “Гэр бүлийн зөвлөл,” 2016 оны 4-р сарын Ерөнхий чуулган, х.49–52; Ерөнхий гарын авлага, 4.3–4.4, Gospel Library-г мөн үзнэ үү.

• Та хүүхдүүдтэйгээ хамт Сургаал ба Гэрээ 107:18–19-ийг уншаад “сүнсний бүх адислалууд” гэснийг онцлон анхаар. Та болон танай хүүхдүүд санваараар дамжин ирдэг адислалуудыг жагсааж болно. Хэн хамгийн урт жагсаалт гаргах вэ гэдэг тоглоом зохиож болох юм. Хүүхдүүд тань тэдгээр адислалыг илтгэх зураг зурж эсвэл хайж олж болно (энэ долоо хоногийн үйл ажиллагааны хуудас-ыг үзнэ үү). Дараа нь та санваарын ёслолууд (баптисм, ариун ёслол гэх мэт) хэрхэн бидэнд Бурханы адислалуудыг авахад тусалдаг талаар ярьж болно.

• Лиахона сэтгүүлийн чуулганы дугаар бүрд Ерөнхий эрх мэдэлтнүүдийн зурагтай хуудас байдаг. Сургаал ба Гэрээ 107:21–26, 33–35, 91–92 дээрх тэдний үүрэг хариуцлагын талаар уншихдаа та хүүхдүүдтэйгээ тэдгээр зургийг хараарай. Их Эзэн тэдэнд эдгээр үүрэг хариуцлагыг өгсөнд яагаад талархдаг талаар та хүүхдүүдтэйгээ ярилцаж болно.

• Хүүхдүүд тань ChurchofJesusChrist.org дээрх General Church Leadership гэснээс Их Эзэний үйлчлэгчдийн талаар илүү ихийг мэдэх боломжтой. Магадгүй хүүхэд бүр нэг удирдагчийг сонгон судлаад нэг нэгэндээ тухайн удирдагчийн талаар зааж болох юм. Эдгээр удирдагч Есүс Христийн жинхэнэ үйлчлэгчид гэдгийг хэрхэн мэдсэнээ нэг нэгэнтэйгээ хуваалц.

• Сургаал ба Гэрээ 107:22-ыг хамтдаа уншсаныхаа дараа та хүүхдүүдтэйгээ Тэргүүн Зөвлөлийн зургийг ээлжлэн бариад Их Эзэний үйлчлэгчид болохынх нь хувьд тэднийг хэрхэн дэмжиж болохоо ярилц.

• Энэ шүлгийн талаар ярьж эхлэхдээ та хүүхдээсээ асгалгүйгээр аяганд ус дүүргэх гэх мэт анхаарал болгоомж шаарддаг ямар нэг зүйл хийхийг хүсэж болно. Анхаарал болгоомжгүй байвал юу тохиолдож болох вэ? Дараа нь Сургаал ба Гэрээ 108:3-ыг уншаад, Их Эзэн биднээс юуг анхааралтай хийхийг хүссэнийг олж мэд. Бид Бурханд ямар “тангаргууд” (амлалт эсвэл гэрээ) өргөдөг вэ? Бид тэдгээрийг сахихдаа хэрхэн илүү анхааралтай байж болох вэ? Та Бэки Крэйвин эгчийн хэлсэн “Хянамгай ба хайхрамжгүй” (2019 оны 4-р сарын Ерөнхий чуулган, х.7–9) захиаснаас хүүхдүүдэд тань гэрээнүүдээ сахихыг урамшуулах хэсгийг хуваалцаж болох юм. “Би зоригтой байна” (Хүүхдийн дууны ном, 85) гэх мэт гэрээнүүдээ сахих талаар дуу дуулж болно.