“Fankwa 1–7: ‘Zion no Nkwagye Ntsi’: Nkyerɛkyerɛ na Ahyɛmudzi 94–97,’’: Bra, Bɛka Mo Do—Dze ma Fie na Asɔr: Nkyerɛkyerɛ na Ahyɛmudzi 2025 (2025)
“Nkyerɛkyerɛ na Ahyɛmudzi 94–97,’’ Bra, Bɛka Mo Do—Dze Ma Fie na Asɔr: 2025
Kirtland Temple, Al Rounds yɛɛ nsaano mfonyin no
Fankwa 1–7 “Zion ne Nkwagye Ntsi’’
Nkyerɛkyerɛ na Ahyɛmudzi 94–97
Tsetseber do no, Ewuradze hyɛɛ Moses dɛ onsi ntamadan “dɛ mbrɛ nhwɛdo a ɔdze kyerɛɛ [no] wɔ bepɔw no do no’’ tse (Hebrewfo 8:5; san hwɛ Exodus 25:8–9). Nna ntamadan no sɛ dɛ ɔyɛ Israel ne sar do nseraban ne finimfin (hwɛ Nkanee 2:1–2).
Afe 1833 mu no Ewuradze hyɛɛ Joseph Smith dɛ onsisi temple, “nnyɛ wɔ wiadze kwan do’’ mbom “tse dɛ nhwɛdo a medze ama hom no’’ (Nkyerɛkyerɛ na Ahyɛmudzi 95:13–14; san hwɛ 97:10). Tse dɛ ntamadan wɔ sar do hɔ no, nna temple no bɛyɛ adzehia tsitsir wɔ Kirtland (hwɛ Nkyerɛkyerɛ na Ahyɛmudzi 94:1).
Ndɛ, temple pii wɔ wiadze nyina mu. Mpo sɛ wonnyi hɛn ekuropɔn ne finimfin a, wɔkyerɛ hɛn kwan kɔ Christ hɔ, ɔno a ɔwɔ dɛ ɔyɛ hɛn abrabɔ n’adze tsitsir. Kaansa temple kor biara yɛ soronko wɔ ne hwɛbea dze, no mu no yesũa nhwɛdo krɔnkrɔn kor noara—ɔsor nhyehyɛɛ a ɔdze hɛn bɛsan aba Nyankopɔn n’enyim. Ayɛdze na ahyɛmudzi krɔnkrɔn horow ma yɛnye Christ nya nkitahodzi na ɔhyɛ hɛn ebusua ebusua dzen “nnyɛ wiadze kwan do” mbom wɔ nhwɛdo no a Nyankopɔn akyerɛ hɛn no do.
Hwɛ Saints, 1:169–70; “A House for Our God,” wɔ Revelations in Context, 165–73 mu.
Adwenkyerɛ horow ma Adzesũa wɔ Fie na wɔ Asɔr
Nkyerɛkyerɛ na Ahyɛmudzi 94; 97:10–17
Mubotum “etu moho nyinara esi hɔ ama Ewuradze.’’
Nkyerɛkyerɛ na Ahyɛmudzi 94 mu no, Ewuradze ma nkyerɛkyerɛ fa worisi edwuma asoɛe adan wɔ Kirtland—ɔfese na ntsintsimii dan. Ebɛnadze na ɔyɛ wo ahomka wɔ dza Ewuradze kã fa adan yinom ho wɔ Nkyerɛkyerɛ na Ahyɛmudzi 94:2–12? Osi dɛn yɛ ntoto ho wɔ dza Ɔkã fa temple ho wɔ 97:10–17?
“Tu ne nyinara si hɔ ma Ewuradze’’ n’asekyerɛ nye dɛn ma ɔwo?
Ewuradze tsẽa hɔnnom a Ɔdɔ no.
Mber a wonyaa nyikyerɛ no wɔ ɔfã 95 no, nna abosoom enum etwa mu fitsi Ewuradze hyɛɛ Ahotseweefo no dɛ wonsi Nyankopɔn ne fie (hwɛ Nkyerɛkyerɛ na Ahyɛmudzi 88:117–19)—na nna wonnyae nnhyɛɛ ase. Hwɛ mbrɛ Ewuradze sii tsentsenn hɔn wɔ nyikyerɛ yi mu? Ibotum mpo akyerɛw fapem a ihu a wɔdze ma nkenyan ntsentsenee no nkorkor. Ebɛnadze na isũa fa Ewuradze ho wɔ kwan a Ɔtsentsenn N’Ahotseweefo?
San hwɛ Nkyerɛkyerɛ na Ahyɛmudzi 121:43–44; D. Todd Christofferson, “As Many as I Love, I Rebuke and Chasten,” Liahona, Esusow Aketseaba 2011, 97–100.
God Loves His Children
Nkyerɛkyerɛ na Ahyɛmudzi 95:8, 11–17; 97:10–17
Temple no yɛ Ewuradze ne fie.
Wɔkãa hɔn enyim dɛ woennsi Ewuradze ne fie wɔ Kirtland ekyir no, Asɔr baanodzifo yii bea bi wɔ ewifuwa haban mu a nna hɔ na wobesi no wɔ. Hyrum Smith, Nkɔnhyɛnyi no no nuabanyin no, ntsɛmara tuu mbirika kɛfaa afona dze hyɛɛ ase dɔw asaase no. Ɔkãa dɛ “Yɛreyɛ ahoboa dze esi fie ama Ewuradze,’’ na meesi enyimpi dɛ mibedzi kan wɔ edwuma no mu’’ (wɔ Teachings of Presidents of the Church: Joseph Smith [2007] mu, 271, 273). Ebɛnadze ntsi na edwen dɛ nna Hyrum n’enyi aber dɛ obesi temple? Dwendwen iyi ho ber a ekenkan Nkyerɛkyerɛ na Ahyɛmudzi 95:8, 11–17; 97:10–17.
Hɛn nda yi mu, Ewuradze “rema temple ne nsii rokɔ do ɔhar do” (Russell M. Nelson, “Focus on the Temple,” Liahona, Ɔberɛfɛw 2022, 121). Sɛ obi bisa wo siantsir a Jesus Christ N’Asɔr sisi temple dodow pii a, ebɛn asɛm na ebɛkã? Hwehwɛ nyiano a oye wɔ:
-
President Russell M. Nelson ne nsɛm a ɔdze bɔ temple afofor dawur (tse dɛ “Now Is the Time,” Liahona, Esusow Aketseaba 2022, 126).
-
“Why Latter-day Saints Build Temples” (temples.ChurchofJesusChrist.org).
-
“Temple horow’’ video no (Gospel Library).
What Is a Temple?
Ibotum dze Ahotseweefo no hɔn mbɔdzembɔ dɛ wobesi KIrtland Temple no atoto wo mbɔdzembɔ dɛ ebɛyɛ ahoboa enye Ewuradze enya mfaso sũahu wɔ temple ho. Ibesi dɛn botum akyerɛ ihia kor noara Hyrum Smith tsee ho nkã wɔ Ewuradze ne fie krɔnkrɔn ho? Mfatoho, ebɛnazde na ibotum ayɛ a ɔbɛyɛ tse dɛ erodɔw asaase no, dɛ mbrɛ Hyrum yɛe no? Ebɛn afɔrbɔdze na etse nkã dɛ Ewuradze pɛ dɛ eyɛ? (hwɛ Nkyerɛkyerɛ na Ahyɛmudzi 97:12).
San hwɛ “Holy Temples on Mount Zion,” Asɔr Ndwom, nkanee 289; Topics and Questions, “Holy Ghost,” Gospel Library.
Hyrum Smith rodɔw asaase ama Kirtland Temple.
Nkyerɛkyerɛ na Ahyɛmudzi 97:8–9
“Mebɛgye hɔn ato mu.’’
Dwendwen mber bi a wɔgyee wo to mu—anaawɔanngye wo annto mu—wɔ kuw bi mu ho. Osi dɛn nye dza ɔwɔ Nkyerɛkyerɛ na Ahyɛmudzi 97:8–9 sɛ anaa ɔyɛ nsosonee fi ho a ɔkyerɛkyerɛ fa dza Ewuradze bɛgye wo ato mu n’ase kyerɛ ho? Ebɛnadze na edwen ho dɛ Ewuradze robɔ mbɔdzen dze mfatohodze no a ɔwɔ nyiyimu 9 rekyerɛkyerɛ wo?
San hwɛ Erich W, Kopischke, “Being Accepted of the Lord,” Liahona, Esusow Aketseaba 2013, 104–106.
Yɛ sunsum mu bea ma adzesũa na nkyerɛkyerɛ. “Sunsum Krɔnkrɔn no,’’ Jesus bɔɔ anohoba dɛ, “ɔbɛkyerɛkyerɛ wo ndzɛmba nyina” (John 14:26). Ntsi no sɛ woara ankasa rusũa anaa enye binom rusũa o, ma ɔnyɛ wo ehiadze dɛ ebɔto nsa afrɛ Sunsum no. Ndwom krɔnkrɔn, mpaabɔ, na nkitahodzi ɔdɔ mu nyinara botum aboa ma enya asomdwee, sunsum mu tsebea a Sunsum Krɔnkrɔn no botum akyerɛkyerɛ wo nokwar no.
Nkyerɛkyerɛ na Ahyɛmudzi 97:18–28
Zion nye “hɔn a hɔn akoma mu tsew.’’
Ma ahotsweefo no a wɔwɔ afe 1830 mu no, nna Zion yɛ bea. Nyikyerɛ wɔ ɔfã 97, Ewuradze tserɛɛw ne nkyerɛkyerɛmu dze kãa nkorɔfo a—“hɔn akoma mu tsew’’ ho asɛm (nyiyimu 21). Ber a ekenkan nyiyimu 18–28 no, ibotum dɛ sɛ erekenkan a edze nkyerɛkyerɛmu yi sesa kasafua Zion. W’akoma mu bɛtsew n’asekyerɛ nye dɛn ma wo?
San hwɛ Moses 7:18.
Epɛ adwenkyerɛ horow bi aka ho a, hwɛ bosoom yi Liahona na For the Strength of Youth [Ma Mbabun enya Ahoɔdzen] dawurbɔ krataa mu.
Adwenkyerɛ horow ma Erekyerɛkyerɛ Mbofra
Nkyerɛkyerɛ na Ahyɛmudzi 95:8, 97: 10–17
Temple no yɛ Ewuradze ne fie.
-
Ama eenya nkyerɛmu kakra fa ɔfã 95 na 97 ho no, ibotum nye wo mbofra no akyɛ “The Kirtland Temple” wɔ Doctrine and Covenants Stories for Young Readers (Gospel Library; san hwɛ Saints, 1:210). Wo mbofra no enyi bɛgye dɛ wɔrepetuw dɛ wɔroboa ma woesi Kirtland Temple no (worutwa dua, wɔdze hamɛr robɔ mprɛgow, wɔrutwuw afasu ho, na dza ɔkekã ho). Ibotum asan dze Kirtland Temple mfonyin akyerɛ hɔn, tse dɛ ma ɔwɔ apɔwdo yi mu no, ber a ekenkan Nkyerɛkyerɛ na Ahyɛmudzi 95:8 dze akyerɛkyerɛ wo mbofra no siantsir a Ewuradze pɛ dɛ yesisi temple.
The Kirtland Temple
-
Wɔabɔmu akenkan Nkyerɛkyerɛ na Ahyɛmudzi 97:15–16 ekyir no, ɔwo na wo mbofra botum nye hɔn ho akyɛ siantsir a temple no yɛ adze tsitsir ma hɔn. Ibotum asan nye mbofra no abɔmu atow ndwom ma aboa wo mbofra ma woenya obu nkãtse ama Ewuradze ne fie, tse dɛ “I Love to see the Temple’’ (Children’s Songbook, 95). Ebɛnadze ntsi na temple no yɛ krɔnkrɔn?
Nkyerɛkyerɛ na Ahyɛmudzi 97: 1–2, 8–9, 21
Zion nye “hɔn a hɔn akoma mu tsew.’’
-
Ebɔboa wo mbofra ma wɔatse dza kasafua tsew n’asekyerɛ botum ayɛ wɔ Nkyerɛkyerɛ na Ahyɛmudzi 97:21no, wobotum abɔmu ahwɛ gyirase a nsu a n’enyi tsew gu mu na wɔdze adze bi akã nsu no ho a ɔbɛma ɔayɛ fĩ (tse dɛ dɛtse anaa muoko). Ebɛnadze ntsi na ohia dɛ nsu yɛ krɔngyenn? Nkyii wo mbofra no botum akenkan nyiyimu 21 na wɔdze hɔn nsatseaba ato kasafua tsewdo. Hɛn akoma no mu bɛtsew n’asekyerɛ nye dɛn? Nyiyimu 1–2 na 8–9 botum ama adwenkyerɛ horow bi. Agyenkwa no si dɛn boa ma hɛn akoma mu tsew?
Ɔsor Egya pɛ dɛ m’akoma mu tsew.
Nkyerɛkyerɛ na Ahyɛmudzi 97:8–9
Ewuradze hyira nkorɔfo a wonye No sie ahyɛmudzi.
-
Ana wo mbofra no nyim ahyɛmudzi horow a yɛnye Ewuradze yɛ sɛ wonuma hɛn anaa wɔ temple mu a? Hwɛ dɛ enye hɔn bɔbobɔ ahyɛmudzi horow no do ber a erekenkan Mosiah 18:9–10, 13 anaa General Handbook, 27.2. Wɔnye hɔn ho nkyɛ mbrɛ hom risi per dɛ “[hom] [bɔ]bɔ afɔr [e]dzi [hom] ahyɛmu do no’’ (Nkyerɛkyerɛ na Ahyɛmudzi 97: 8).
-
Ibotum ato nsa afrɛ wo mbofra no ma wɔadorɔw mfonyin afa dza Nkyerɛkyerɛ na Ahyɛmudzi 97:9 kã ho asɛm no ho. Ber a wɔkyɛ hɔn mfonyin no, kã mbrɛ Ewuradze esi ehyira wo dɛ isie wo ahyɛmudzi ho asɛm. Nhyira yinom si dɛn yɛ tse dɛ eyɛ “dua a wɔatsɛw no … esutsen pa ho?”
Epɛ adwenkyerɛ horow bi akã ho a, hwɛ bosoom yi Nyɛnko dawurbɔ krataa mu.