Nsanananmu ne Ndze horow

Zion ne Nseraban ekyir bɔbor mfe 40 no, Joseph Young, a nna ɔka nseraban no mu mba no ho no, bɔɔ amandzɛɛ dɛ Joseph Smith kãa dza odzi do yi:

“Enuanom, hɔn mu binom bo efuw me, osiandɛ hom annkõ wɔ Missouri ntsi; naaso hom mma menkã nkyerɛ hom dɛ, nna Nyankopɔn mmpɛ dɛ hom bɔkõ. Onnkotum dze mbanyin duebien ahyehyɛ n’ahenman dze ebue asɛmpa abow no ama asaase do amanaman, na ɔdze mbanyin eduosuon ahyɛ hɔn akwankyerɛ ase dɛ wontsĩatsĩa hɔn anamɔn mu, gyedɛ oyi hɔn fi mbanyin kuw a wɔdze hɔn nkwa atõ hɔ, na wɔayɛ afɔrbɔ kɛse tse dɛ mbrɛ Abraham yɛe no.

“Afei, Ewuradze enya ne Duebien na ne Eduosoun, na wɔbɛfrɛ Eduosuonfo hɔn quorumfo bi so akã ho, a wɔbɛyɛ afɔrbɔ, na hɔnnom a wɔnnyɛɛ hɔn afɔrbɔ na hɔn ayɛyɛdze sesei no, bɛyɛ no ekyir yi.”

“Mber a yedur Missouri no, Ewuradze kasaa kyerɛɛ n’akowaa Joseph na ɔkãa dɛ, ‘Magye wo ayɛyɛdze ato mu,’ na ɔyɛɛ hɛn adom ma yɛsaan bio. Mesanee no m’anyɛnkofo pii bisaa me mfaso a ɔwɔ mu dɛ wɔbɛfrɛfrɛ mbanyin efi hɔn edwuma ho ma wɔakɔ Missouri na nkyii wɔasan, a enyido ara nowɔannkɛyɛ hwee. Wobisaa dɛ ‘Wɔayɛ mfaso ama woana?’ ‘Sɛ Ewuradze hyɛɛ dɛ wɔnyɛ a, ebɛn botae ntsi na ɔdze sii n’enyi do dɛ wɔnyɛ?’ … Mekãa kyerɛɛ enuanom no dɛ wotuaa me kaw yie—akatua a mfaso kɛse ka ho—nyew dɛ mekyɛfã hyɛɛ mã dɛ nyimdzee a menya ber a menye Nkɔnhyɛnyi no tuu kwan ebu do.’’

“Nna menye Nyankopɔn no Nkɔnhyɛnyi no wɔ Zion ne Nseraban no mu. Muhun Nyankopɔn ne nkitahodzi a ɔnye no nyae. Muhun Nyankopɔn no tum wɔ no ho. Muhun dɛ ɔyɛ Nkɔnhyɛnyi. Dza wɔnam Nyankopɔn no tum do daa no edzi kyerɛɛ no wɔ dɛm edwuma no ho no nna ɔsom bo kɛse ma emi na obiara a ɔgyee ne nkyerɛkyerɛ no so.”

“Mber a wɔfrɛɛ Zion ne Nseraban mu mba no nna hɛn mu pii nnhyiaa enyim na enyim da; nna yɛyɛ ahɔho ma hɛn ho na nna pii noara nnhun nkɔnhyɛnyi no da. Wɔatow hɛn apetse, tse dɛ eburow a ɔasɔn do wɔ sɔnee mu, wɔ aman nyina mu. Nna yɛyɛ mberantsɛ, na wɔfrɛɛ hɛn anapaatu dɛ yɛnkɔ na yɛnkɔpon Zion, na dza nna ɔwɔ dɛ yɛyɛ no ɔwɔ dɛ yɛdze gyedzi yɛ. Yefifi Mansin ahorow mu bɔɔ mu boaa hɛn ano wɔ Kirtland na yɛkɔree kɔpoon Zion, dze hyɛɛ Nyankopɔn ne mbrasɛm a ɔdze maa hɛn no mã. Nyankopɔn gyee hɛn ndwuma too mu dɛ mbrɛ Ɔgyee Abraham no ndwuma no. Yɛyɛɛ ewduma kɛsenara, mpo dɛ mber pii no nna etuatsewfo na ekyingyefo bisa asɛmbisa no dɛ ‘ebɛnadze na hom ayɛ?’ Yenyaa sũahu bi a nkyɛ yennkotum enya no wɔ kwan biara [do] dabiarada. Ɔyɛɛ hɛn adom dɛ yebohu nkɔnhyɛnyi no n’enyim, na ɔyɛɛ hɛn adom dɛ yɛnye no tuu kwan akwansin mpempem, na yehun Nyankopɔn no sunsum a ɔnye no reyɛ edwuma, na Jesus Christ ne nyikyerɛ horow dze ma no na nyikyerɛ horow no hɔn mãhyɛ. Na ɔboaa elderfo ahaebien bi ano fi man no nyina mu wɔ dɛm anapaatu no na ɔsomaa hɛn petsee wiadze dɛ yɛnkɔbɔ Jesus Christ n’asɛmpa no ho dawur. Sɛ nkyɛ mannye Zion ne Nseraban mu mba no annkɔ a, nkyɛ minnyi ha ndɛ [wɔ Salt Lake City a morosom wɔ Asomafo Duebien no hɔn Quorum mu]. … Yɛkɔr hɔ no wopiaa hɛn koguu wenyin ture no mu dɛ yɛnkɔbɔ asɛmpa no dawur, na Ewuradze gyee hɛn ndwuma no too mu. Na wɔ hɛn ndwuma na atseetsee nyinara mu no, a ɔtaa dɛ hɛn nkwa wɔ esian mu no, yɛdze gyedzi yɛɛ ewduma na yɛdze tsenaa ase.’’

“Sũahu no a [ye]nyae wɔ Zion ne Nseraban akwantu mu no ho yɛɛ mfaso koraa kyɛn sika kɔkɔɔ.’’