Reirei ao Berita aika Tabu 93

E reirei te Burabeti Iotebwa Timiti, “Ngkana aomata aki kona n ataa anuan te Atua, a bon aki kona ni kinaia i bon irouia” (Teachings: Joseph Smith,40). Ngkai ko reirei taekan te Tia Kamaiu man kamatebwaian Reirei ao Berita aika Tabu 93, taraa te bwai ae ko reiaknna naba ibukim. Te katooto, tera ae ko reiakinna Ibukina man kiibu 3, 12–13, 21, ao 26? Tera koaua aika ti te arona ibukim i nanon kiibu 20, 23, ao 28–29? (taraa naba 1 Ioane 3:2; 3 Nibwaai 27:27). Titiraki aika i mwiina a na kona ni buokiko ni mataata ao ni kamwakurii koaua aika i nanon te mwakoro aei:

• Tera ae nanonaki bwa ko na karekea “te akoi ibukin te akoi” ao n reitinako “man te akoi nakon te akoi”? (kiibu 12–13). Ngkana e na ibuobuoki, ko kona ni wareka “Akoi” i nanon Bwai ni Kairi nakon Koroboki aika Tabu (Gospel Library).

• Tera ae ko reiakinna man te kaotioti aio bwa E kanga te Atua ni buokiko n rikirake ao n reiakinaki? E kanga ataakin aei n roota arorn n tabeakiniia tabeman—ao bon ngkoe?

• Tera ae ko reiakinna bwa “ko na kanga n taromauri, ao … antai ae kam taromauriia”? (kibu 19; taraa naba Bwai ni Kairi nakon Koroboki aika Tabu, “Taromauri,” Gospel Library).

Ko na bae n nooria bwa taeka n aron mimitong, ota, ao koaua a aki toki ni kaoti i nanon te kaotioti aio. Ngkai ko kamatebwai kiibu 20–39 n ae onoti, korei ni karinanii koaua ake ko reiakin iaon bwaai aika taekinaki aikai. Karaoan te taibora n aron aei e na ibuobuoki:

Tera ae ko kunea i nanon kiibu aikai ae kaungako bwa ko na “ukoukora te ota ao te koaua aika a korakora? Bukin tera te ota ao te koaua a tamaroa ni kabwarabwaraan Iesu Kristo? (taraa Ioane 8:12; 14:6). A kanga koaua aikai n roota aron maium?

Ko na bae naba ni korei kakabwaia i aon tokin kawaim ae akea tokina ni kiibu 20, 22, 28, 33–35. Tera te irekereke i marenan berita aikai ao karekean te ota?

Iangoia ni kakaea n “Nakonako n otan te Atua” (Ibukin Kakorakoraia Kairake: Te Kairi ibukin Karaoan Rinerine, 18–21) ni kakaea bwa tera ae ko kona ni karaoia ni karekea te ota ao e kanga ana kakabwaia te Uea ni kakabwaiako. Te witeo “Light and Truth, Mwakoro 1” ao “Mwakoro 2” (Gospel Library) e kona ni katauraoi iango riki tabeua.

Taraa naba “Teach Me to Walk in the Light,” Anene n Taromauri, nambwa 304; Topics and Questions, “Holy Ghost,” Gospel Library.

6:40

6:52

Te tua bwa ko na “bairea raoi oin am auti” (te kibu 43) e aki nanonaki ibukin bairean kabwate ao nnen kunnikai ma bon i aon te anga reirei—ao kamatebwaian—“te oota ao te koaua” (te kibu 42). Taraia bwa e kanga arom n iriira te reirei aei. Teraa taian kakaewenako aika ko kaitarai? Tera koaua n Reirei ao Berita aika Tabu 93 ae a kona n ibuobuoki?

Tera nonoori aika ko karekei man reirei aikai iroun Unimwaane David A. Bednar?

“I nanon au aobiti bon iai te korobanna ae tamnein te onaroka ibukin te wiita. Te korobanna aei e riki man wiin kaai n korobanna—akea teuana ae okoro n tii ngaia ao e bon rangi n tamaroa ke n anainano. Ni koauana, ngkana ko tei ni kaaniko ma te tamnei, te bwai ae ko na nooria bon te been ae baabobo ao e kooora man buraun aika aki baireaki raoi ao n aki kantara. Ma, ngkana ko tabe n keerikaki n raroa nako ma te tamnei, mwin wiin kaai n korobanna akekei a bootaki ao n kabobongaa tamnein te onaroka n wiita ae mainaina are bangaki. Kaai n korobanna teuana ma teuana a botaki n karika te korobanna ae kantara man tamaroa.

“Tataro n utu ni kabane, mwakoron nako kamatebwaian koroboki aika tabu n te utu, ao bootakin te utu n te tairiki bon mwiin kaai n korobanna i aon tamneira. Akea te tai teuana ae na tara n rangin ni katekenano ke n ururungaki. Ao n aron been ake a baabobo n koora n buraun n kanakoraoia i bon i marenaia ao n karika te korobanna ae akea n ai arona, ara botumwaaka ni karaoi baika uarereke e na korakora mwina nakon tamneira. ‘Mangaia are, tai kua ni karaoan ae raoiroi, bwa kam kawenea aan te mwakuri ae korakora. Ao man bwaai aika uarereke e kaoti te bwai ae korakora” [Reirei ao Berita aika Tabu 64:33]. Te botumwaaka bon botona ngkai ti kawenea aan te mwakuri ae korakora n maiura n tatabemaniira ao ngkai ti botumwaaka riki ao n tabeaianga n oin mwengara” (“A Botumnwaaka ao n Ibuobuoki n te Mweenga,” Riaona, Nobembwa. 2009, 19–20).

Taraa naba Henry B. Eyring, “Te Mweenga Are Maeka iai Tamnein te Uea,” Riaona, Meei 2019, 22–25.

• Iangoia ni kaota tamnein te Tia Kamaiu ao titirakiniia am ataei bwa bukin tera e rangi ni kakawaki reiakinan taekan ao iriiran Iesu Kristo. Ngkanne bootaki ni wareka Reirei ao Berita aika Tabu 93:19 ni kakaea teuana bukina ae kakawaki.

• Ko na bae n rinei koaua aika a mwaiti i aon Iesu Kristo ni mwakoro 93 aika a kaungaa nanom ni buokiia am ataei ni kunea ao ni mataata iai (taraa naba “Mwakoro 33: Te Kaotioti i aon Iesu Kristo,” man Karaki man Reirei ao Berita aika Tabu, 126–27, ke te witeo ae irekereke inanon te Gospel Library). Man koaua nako ake ko rinei, ko kona n anganiia am ataei te taeka ke te kibu n taeka ni katebenakoa ngkai kam uaia ni wareki kiibu. Te katooto, Iesu Kristo:

  • E karaoa ana mwakuri te Tama (te kibu 5).

  • Bon Otan te Aonaaba (te kibu 9).

  • Bon te Tia Karika te aonaaba (te kibu 10).

  • E karekei mwaakan karawa ao aonaaba ni kabane (te kibu 17).

  • E mena i rarikin te Atua mai moan te tai (te kibu 21).

  

  1:18

• E katuruturua te Tia Kamaiu teniua te tai i nanon mwakoro 93 bwa ti maeka ma te Atua “mai moana ” (kibu 23, 29, 38). Ni buokiia am ataei ni kunea aio, ko kona ni kaoiia bwa a na wareka Reirei ao Berita aika Tabu 93:23, 29, 38 ao noora te koaua i bon i aoia are e kaokiokaki inanon kiibu aikai. Bukin tera Tamara are i Karawa e tangiria bwa ti na ataa te koaua aei? Ko na bae n titirakiniia naba am ataei bwa tera ae ataia n maiura ma Tamara are i Karawa i mwain ae ti bungiaki. Ni buokiia n reiakina riki ae mwaiti, wareka ma ngaiia teuana ke ae raka riki man kiibu man koroboki aika tabu aikai: Ieremia 1:5; Reirei ao Berita aika Tabu 138:53–56; Mote 3:5; Aberam 3:22–26.

• Kam kona naba n uaia n anenea “I Am a Child of God” ke “I Lived in Heaven” (Aia Boki n Anene Ataei, 2–3, 4) ao maroroakin koaua ake ti reiakin man anene akanne i aon te kantaninga ibukin rokora n te aonaaba.

• Ni buokiia am ataei ni karaoa nanon te koaua i aon te ongotaeka n Reirei ao Berita aika Tabu 93, iangoia ni korei tabeua kiibu man koroboki aika tabu man te mwakoro aei i aon te moti ni beeba. I aon te mwakoro ni beeba riki teuana, korei koaua ake a reirei iaona kiibu aikai. A kona am ataei ni botaki ni mwakuri ni wareki kiibu ao ni katoatoai koaua nakon kiibu ni koroboki aika tabu. A kona katooto n aron aikai ni kaairaki:

  • Te kibu 24: Te koaua bon ataakin bwaai aika bon iai ake ngkoa, n taai aika ngkai, ao aroia n taai aika a na roko.

  • Te kibu 28: I kona ni karekea te ota ao te koaua ngkai I kawakin tuua.

  • Te kibu 37: Ngkana iai irou te ota ao te koaua, I a kona n totokoa te buakaka.

  • Te kibu 39: I kabuaa te ota ao te koaua ngkana I aki ongotaeka.

  Ko na bae n tangiria n tibwa te katooto i aon te koaua are ko a tia n ataia ngkai ko kawakina ana tua te Uea.