Reirei ao Berita aika Tabu 88

Tabeua te bong i mwiin are E anga te kauring ae te buaka e na “bwaro nako aon aaba ni kabane” (Reirei ao Berita aika Tabu 87:2), e anga te kaotioti te Uea are e aranna Iotebwa Timiti bwa “baan te oriwa,” are bon kanikinaean te rau ae bwainaki (Reirei ao Berita aika Tabu 88, atuun te mwakoro, taraa naba Karikan Bwai 8:11). Rinanon am tai ni kamatebwaia te mwakoro 88 n te wiiki aei, tarataraa ana rongorongo te Uea ibukin te rau nakoim.

Taeka aika te oota ao te tua a mwaiti kaokiokaia n te mwakoro 88. Mwaakena ke korei kiibu ake ko kunei iai taeka aikai inanon kiibu 6–67, ao korei baike ko reiakin i aon te oota ao te tua—ao i aon Iesu Kristo. Tera ae ko namakinna bwa ko na karaoia ni karekea te oota ao ni maiuakina ana “tua Kristo”? (te kibu 21).

Taraa naba Itaia 60:19; Ioane 1:1–9; 3 Nibwaai 15:9; Timothy J. Dyches, “Te Ota e Reitaki ma te Ota,” Riaona, Meei 2021, 112–15; Sharon Eubank, “Kristo: Te Ota are E Ota i Buakon te Roo,” Riaona, Meei 2019, 73–76.

Tera taneiai ae a kaotaki nakoim bwa berita i nanon kiibu aikai a koaua? Tera ae ko na karaoia i mwiina ni “kaaniko nakon” Kristo? Iangoia ni karaoa te anene n taromauri “Nearer, My God, to Thee” (Anene n Taromauri, nambwa 100) bwa mwakoron am kamatebwai ao n nebonebo.

Ana tua te Uea ni “katabuingkami” e kaoti uoua te tai i nanon te mwakoro 88 (kiibu 68, 74). “Tera nanon te kibu n taeka aei iroum? Ko na bae n rinanoa tabeua mwakoro n taeka i aan “Kaitiakan” i nanon Bwai ni Kairi nakon Koroboki aika Tabu (Gospel Library). Ti na kanga ni kaitiakaki? Karika te titiraki aio ni kaira am kamatebwai n Reirei ao Berita aika Tabu 88:67–76, ao taui mwiin nonoori n tamnei ake ko karekei.

E tuangiia Aika Itiaki te Uea bwa a na katei “aia reirei burabet” i Kirtland (Reirei ao Berita aika Tabu 88:137). Angiin te kaetieti n mwakoro 88 e reiakiniia bwa a na kanga ni karaoia. Te kaetieti aei e kona naba ni buokiko ni katea … te auti n reirei” (te kibu 119) bon i nanon maium. Ni koauana, ko kona n tarai kiibu 77–80 ao 118–26 bwa katootoon “tein aron mweengam [ke maium] nakon kabotoan te kamatebwai n te euangkerio” ao “te nne ni kamanomano n te onimaki” (Russell M. Nelson, “Riiki Bwa Aomata Aika Itiaki ni Boong Aika Kaitira,” Riaona, Nobembwa 2018, 113). E kona ni kakaongora korean tamnein “tein arom” bwa e na kanga arona, ni ikotaki ma mwakoro n taeka man kiibu aikai ake ko namakinna bwa ko kainnanoi ni karaoi.

E na ibuobuoki naba ukoran taian titiraki aikai: Bukin tera ngkai a kakawaki iroun te Uea te kamatebwai ao te reirei? Tera ae E tangiria bwa N na kamatebwaia? E kanga aron ae E tangirai iai bwa N na reiakinna? Kakaei kaekaan titiraki aikai i nanon kiibu 77–80 ao i nanon “E na kainaomatako te koaua” (Ibukin Kakorakoraia Kairake: Te Kairi ibukin Karaoan Rinerine, 30–33).

Tera ae nanonaki iroum n ukoran te rabakau “n te kamatebwai ao n te onimaki naba”? (kibu 118). Baikara nonoori ae ko karekei n ana rongorongo Unimwaane Mathias Held “Ukoukoran te Atatai Rinanon te Tamnei”? (Riaona, Meei 2019, 31–33).

Tarai naba Topics and Questions, “Seeking Truth and Avoiding Deception,” Gospel Library; “A School and an Endowment,” i nanon Revelations in Context, 174–82.

• Kam kona ni waakina te marooro i aon Reirei ao Berita aika Tabu 88:33 man tuangakiia ami ataei bwa a na marooroakini bwaintangira ake a tia n anganaki—ake a karekei ma te kukurei ao ake ma te nanokawaki naba. Tao a kona ni katea kain ae a karekea te bwaintangira ma te kimwareirei. I mwiina ko kona ni marooro i aon bwaintangira are E anganiira Tamara are i Karawa (n aron ana bwaintituaraoi te Tamnei ae Raoiroi). Ti kanga ni karekei bwaintangira aikai ma te kimwareirei?

• Reirei ao Berita aika Tabu 88:63 iai i nanona taeka ni mwakuri ake a kona ni kaungaira ni karaoi waaki ni kakukurei aika kaunga ni kaungaia ami ataei n ukora tamnein te Uea inanon maiuia. Te katooto teuana, ngkoe ao am ataei kam kona ni iangoa te takakaro ae kam maroroakina te kibu n taeka “ukoukorai ma te kakaonimaki ao are ko na kuneai ” (e kairaki ma katuruturuana) ke “karebwerebwe, ao e na kaukaki”?

• Ni katuruturua ana kakao te Tia Kamaiu ni “kaaniai,” ko kona n tuanga temanna te ataei bwa e na taua tamnein Iesu (n aron te tamnei are ni kabanean te kabwarabwara aei) ni iteran te ruu teuana ngkai ataei ake tabeman a tei ni iteran te ruu are teiterana. Ngkai a tabe am ataei ni iangoi bwaai aika akona ni karaoi n roko ni kaniiaki nakon te Tia Kamaiu, a kona ni keerake nakon te tamnei, ao te ataei are e taua te tamnei e na keerake nakoia ataei ake tabeman. Marooro ma am ataei bwa ko kanga ni kaaniaki nakon te Tia Kamaiu ao E kanga ni kaaniiko. Ko kona naba n anene ma ngaiia i aon taekan te atuu ni iango aei, n aron “I Feel My Savior’s Love” (Aia Boki n Anene Ataei, 74–75).

• Tuangiia am ataei bwa a na tuangko bwa tera te bwai are a reiakinna n te reirei ke n te Moanrinan. Ko kona naba n tibwai tabeua bwaai ake ko reiakin. I mwiina ko kona ni kaotia nakoia am ataei taian taeka aika tera, bukin tera, ao e kangaa. Buokiia bwa a na ukeuke n Reirei ao Berita aika Tabu 88:77–79 ni kakaea bwa tera ae e tangiria te Uea bwa ti na reiakinna. I mwiina bootaki n taraa te kibu 80 ni kakaea bwa bukin tera E tangiriira n reiakinaki ao i nanon te kibu 118 ni kakaea bwa e kangaa aron reiakinara.

• Ngkai ko wareka Reirei ao Berita aika Tabu 88:119 nakoia am ataei, a kona n katea taubukin te tembora ma baia ni katoa tai are a ongo iai te taeka ae “auti.” Kabwarabwara bwa Tamara are i Karawa e tangira Iotebwa Timiti ao Aomata aika Itiaki bwa a na katea te tembora, ke ana “auti te Atua.”

• Ko kona n titirakiniia am ataei n rinei itiua taian taeka ake a kabwarabwaraa mweengaia. Ngkanne buokiia ni kakaea, n Reirei ao Berita aika Tabu 88:119, itiua taeka ake e kabonganai te Uea ni kabwarabwaraa iai Ana auti. Ti na kanga n karaoa mweengara bwa “ana auti te Atua”?