Reirei ao Berita aika Tabu 84

Ngkana ko iangoa te taeka ae nakoanibonga, tera ae roko n te iango? E kangaa mwaakan ana nakoanibonga te Atua n roota maium?

I mwin iangoan titiraki aikai, ko kona n kamatebwaia Reirei ao Berita aika Tabu 84:17–32, n taraa are e tangiriko te Atua bwa ko na ataia ibukin mwaakan Ana nakoanibonga. Iangoia bwa ko na kanga n kabonganai kiibu aikai n kabwarabwara te nakoanibonga ao te kaantaninga iai nakon temanna.

Teuana te bwai ae ko na kunea bwa rinanon te otenanti n te nakoanibonga “e kaotaki raoi te mwaaka n te aro n atua” (tarai kiibu 19–21). Tao ko kona n karinana te otenanti n te nakoanibonga are ko a tia n rinanona (kanoana i nanon Aeniboki n Kabuta, 18.1, 18.2, e kona n ibuobuoki). A kangaa otenanti aikai—ao berita aika a tabu ake raona—n uota mwaakan te Atua nako nanon maium? Tera aron maium ngke arona bwa akea?

E reirei Beretitenti Russell M. Nelson: “Ni kabane aine ao mwaane ake a karaoi berita aika a tabu ma te Atua ao n kawakinii berita aikai, ao ake tau n ira buakona n otenanti n nakoanibonga, a kona n karekea mwaakan te atua” (“Spiritual Treasures,” Riaona, Nobembwa. 2019, 77). Iangoa kamatebwaian ana rongorongo Beretitenti Nelson, kakaei kawai ae ko konaa “korea mwaakan te tia Kamaiu i nanon maiu[m].”

Taraa naba Reirei ao Berita aika Tabu 25:10, 13, 15; 121:34–37, 41–46; Topics and Questions, “Priesthood,” “Joseph Smith’s Teachings about Priesthood, Temples, and Women,” Gospel Library; Aeniboki n Kabuta, 3.6, Gospel Library.

Te taeka n tuea ao te berita ae tabu n te nakoanibonga (taraa Reirei ao Berita aika Tabu 84:31–44) e onoti karekeana ibukiia natiin Tamara are i Karawa ake a katabuaki nakon te aobiti n te nakoanibonga, ma a mwaiti kakabwaia ake a beritanaki i nanon kiibu aikai aika a tauraoi ni kabane ibukiia natin te Atua. Tera berita aikai, ao tera ae tuangira te Atua bwa ti na karaoia bwa ti aonga n karekea?

E reirei Unimwaane Paul B. Pieper: “E rangi n kakaongora bwa te taeka n tuea ao te berita ae tabu [taraa Reirei ao Berita aika Tabu 84:31–44], e kabonganai weabe te Uea kamatoa ao karekea. E aki kabongana te weabe ae kamatoaa. Bon i nanon te tembora are a uaia mwaane ao aine ni butimwaai ao ni karekei ana kakabwaia ao mwaakan te Nakoanibonga ae te Aaron ao te Merekitereka” (“Revealed Realities of Mortality,” Ensign,, Tianuare. 2016, 21).

Ngkai ko kamatebwaia Reirei ao Berita aika Tabu 84: 31–44, iangoia bwa tera nanon n “kamatoaa” ao n “karekea te nakoanibonga. E kangaa ni kaokoro aio man te katabuaki nakon aobitin te nakoanibonga? Tera riki ae karaoia te Uea n kaoko bwa ko aonga n karekei i nanon kiibu aikai? Ko kangaa n karaoa anne?

Tera ae ko kunea ae kaungako bwa ko na kakaonimaki riki ni butimwaea te tia Kamaiu, Tamana, Ana toro, ao mwaakan Ana nakoanibonga?

Taraa naba Reirei ao Berita aika Tabu 121:36–46.

Tera koaua ae ko kunei n Reirei ao Berita aika Tabu 84:43–61 aika a buoka ootam bwa bukin tera ko kainnanoa te teimatoa n kamatebwaia ana taeka te Atua? Taraa te kaokoro i marenan te oota ao te roo ni kiibu aikai; e kanga am “botumwaaka ni kakauongo raoi nakon taekan te maiu ae akea tokina” n uota te oota, te koaua, ao “Tamnein Iesu Kristo” nakon maium? (kibu 43, 45).

Taraa naba 2 Nibwaai 32:3.

Ngkai ko warekii kiibu aikai, ko kona n katebenakoi kawai ake e taekin te Uea bwa E na boutokaiia iai Ana toro. A kanga berita aikai n irekereke ma te mwakuri are E a tia n tua nakoimi bwa kam na karaoi? Te katooto, n te aro raa are berita ake n te te kibu 88 a kakoroaki nanoia i nanon maium?

Tera ae ko reiakinna man kiibu aikai ibukin aron te Uea n kakoroa nanon Ana mwakuri? Tera reirei ao kakabwaia ae ko kunea? Ko kona naba n iangoa aron “karikirakeam n te nimamannei” ibukina bwa ko beku ma temanna ae “korakora n te Tamnei,” n ikotaki ma aomata n am utu.

• N buokiia am ataei n mataata bwa tera te otenanti, tarai tamnein tabeua otenanti n te nakoanibonga ma ngaiia, n aron Gospel Art Book, numbwa. 103–8, ke te iteraniba ni kakukurein te wiiki aei. Tuangiia bwa a na kabwarabwara bwa tera ae riki n tamnei n tatabeua nako. Kam kona naba n bootaki n wareka Reirei ao Berita aika Tabu 84:19–22. Bukin tera Tamara are i Karawa e tangiriira bwa ti na karekei otenanti aikai? Tuangiia am ataei arom n tia n namakina mwaakan te Atua ibukin otenanti ake ko a tia n karekei ao berita ake ko a tia n karaoi. (Taraa naba “Priesthood Power, Authority, ao Keys” in abentekiti A ke abentekiti B.)

• I mwiin warekan Reirei ao Berita aika Tabu 84:77 n bootaki, titirakiniia am ataei bwa tera nanon te riki bwa te rao. Ko kona n marooroa taekan raraom aika a tamaroa. E kanga aron Iesu n kaotia nakoira bwa E tangiriira bwa tina riki bwa raoraona? Ti na kanga ni kaotia bwa ti tangira naba anne? Te kuna n aron “I’m Trying to Be like Jesus” (Aia Boki n Anene Ataei,, 78–79) e kona n ibuobuoki n te maroro aei.

• A na kona n kukurei am ataei n ongora aron aia ibuobuoki mitinare nakoim, am utu, ke am bakatibu n karekean te euangkerio. I mwiina ko kona ni wareka taekan ana berita te Uea are e karaoia nakoia mitinare i nanon Reirei ao Berita aika Tabu 84:88. Tao a kona am ataei n iangoi mwakuri ake a kona n nako ma te kibu aei. Iangoa tibwaan taekan te tai ngke ko beku ibukin te Uea ao ko namakinna bwa E mena iroum, n aron kabwarabwaraana n kibu 88. Ko kona naba n buokiia am ataei n iangoi kawai ae a kona n riki bwa mitinare ngkai. Kakoaua bwa Tamara are i Karawa e buokira n ataa te bwai ae ti na taekinna ngkana ti taetae ma aomata ibukin taekan Iesu Kristo.