දහම සහ ගිවිසුම් 88

යුද්ධය “සියලුම ජාතීන් මත වැගිරවෙයි” (දහම සහ ගිවිසුම් 87:2) කියමින් අනතුරු ඇඟවීමෙන් දින කිහිපයකට පසු, ජෝසෆ් ස්මිත් විසින් සාමයේ සම්ප්‍රදායික සංකේතයක් වන “ඔලිව් කොළ” ලෙස හැඳින්වූ, එළිදරව්වක් ස්වාමින්වහන්සේ විසින් ලබාදුන්නා (දහම සහ ගිවිසුම් 88, කොටස් ශීර්ෂය; තවත් බලන්න උත්පත්ති 8:11). මෙම සතියේ 88 වෙනි කොටස පිළිබඳ ඔබේ අධ්‍යයනය පුරාවටම, ස්වාමින්වහන්සේ ඔබට ලබාදෙන සාමයේ පණිවිඩ සොයන්න.

ආලෝකය සහ නීතිය යන වචන 88 වෙනි කොටසේ බොහෝ වාර ගණනක් පුනරාවර්තනය වෙනවා. 6–67 පද තුළ ඔබ මෙම වචන සොයාගත් පද ලකුණු කරන්න හෝ සටහන් කරන්න, එමෙන්ම ආලෝකය සහ නීතිය ගැන සහ යේසුස් ක්‍රිස්තුස්වහන්සේ ගැන ඔබ ඉගෙන ගන්නා දේවල් ලියන්න. ඔබට පෙලඹවීමක් දැනෙන්නේ, ආලෝකය ලබා ගැනීමට සහ “ක්‍රිස්තුස්වහන්සේගේ නීතිය” අනුව ජීවත් වීම සඳහා කුමක් කිරීමටද? (21 වෙනි පදය).

තවත් බලන්න යෙසායා 60:19; යොහාන් 1:1–9; 3 නෙපී 15:9; තිමොති ජේ. ඩයික්ස්, “ආලෝකය ආලෝකය වෙතට ඇලෙන්නේය,” ලියහෝනා, 2021 මැයි, 112–15; ශැරන් ඉයුබැන්ක්, “ක්‍රිස්තුස්වහන්සේ: අඳුරේ දිදුලන ආලෝකය,” ලියහෝනා, 2019 මැයි, 73–76.

මෙම පදවල ඇති පොරොන්දු සත්‍ය බව ඔබට පෙන්වා දී ඇති අත්දැකීම් මොනවාද? ක්‍රිස්තුස්වහන්සේ වෙතට “ලඟාවීමට” ඔබේ ඊළඟ පියවර කුමක්ද?

“නුඹලාව පරිශුද්ධ කරගන්න” යන ස්වාමින්වහන්සේගේ ආඥාව 88 වෙනි කොටසේ දෙවරක් දිස්වෙනවා (68, 74 පද). ඔබ සිතන ආකාරයට මෙම වාක්‍ය ඛණ්ඩයේ තේරුම කුමක්ද? අපි පරිශුද්ධ වන්නේ කොහොමද? මෙම ප්‍රශ්නයට, දහම සහ ගිවිසුම් 88:67–76 පිළිබඳ ඔබේ අධ්‍යයනයට මගපෙන්වීමක් ලබාදීමට ඉඩ දෙන්න, එමෙන්ම ඔබ ලබා ගන්නා ඕනෑම අධ්‍යාත්මික අවබෝධයක් වාර්තා කරන්න.

කර්ට්ලන්ඩ් හි “අනාගතවක්තෘවරුන්ගේ පාසලක්” පිහිටුවන ලෙස ස්වාමින්වහන්සේ ශුද්ධවන්තයින්ට පැවසුවා (දහම සහ ගිවිසුම් 88:137). 88 වෙනි කොටසේ බොහෝ උපදෙස් ඔවුන්ට එය කරන්නේ කෙසේදැයි කියා දුන්නා. මෙම උපදෙස ඔබට, ඔබේම ජීවිතය තුළ “ඉගෙනගැනීමෙන් වූ නිවසක් … පිහිටුවාගැනීමට” (119 වෙනි පදය) උදවු විය හැකිය. ඇත්ත වශයෙන්ම, ඔබට 77–80 සහ 118–26 පද දෙස, එය “ඔබේ නිවස [හෝ ඔබේ ජීවිතය] ශුභාරංචි ඉගෙනීමේ මධ්‍යස්ථානයක්” සහ “ඇදහිල්ලේ අභය භූමියක්” බවට ප්‍රතිනිර්මාණය කිරීම සඳහා සැලැස්මක් ලෙස බැලිය හැකිය (රසල් එම්. නෙල්සන්, “ආදර්ශවත් පසු-දවස්වල සාන්තුවරයින් බවට පත්වීම,” ලියහෝනා, නොවැම්බර් 2018, 113). ඔබ අදාළ කරගත යුතු යැයි හැඟෙන, මෙම පදවල වාක්‍ය ඛණ්ඩ ඇතුළුව, ඔබේ පුද්ගලික “ප්‍රතිනිර්මාණය” කෙබඳු විය හැකිද කියා කටුසටහනක් ඇඳ ගැනීම සිත්ගන්නා සුළු විය හැකිය.

මෙම ප්‍රශ්න ගවේෂණය කිරීමටද එය උපකාරී විය හැකිය: ඉගෙනගැනීම සහ අධ්‍යාපනය ස්වාමින්වහන්සේට වැදගත් වෙන්නේ ඇයි? උන්වහන්සේ කැමති මම කුමක් අධ්‍යයනය කරනවාට ද? උන්වහන්සේට අවශ්‍ය මම කෙසේ ඉගෙන ගන්නවාටද? මෙම ප්‍රශ්න සඳහා පිළිතුරු 77–80 පද තුළ සොයන්න.

ඔබ සිතන ආකාරයට “අධ්‍යනයෙන් තවද එසේම ඇදහිල්ල මගින් වුවත්” ඉගෙනීම යන්නෙන් අදහස් කරන්නේ කුමක්ද? (118 වෙනි පදය). වැඩිහිටි මතියස් හෙල්ඩ්ගේ “ආත්මයාණන් තුලින් දැනුම සෙවීම” යන පණිවිඩයෙන් ඔබ ලබා ගන්නා අවබෝධය කුමක්ද? (ලියහෝනා, මැයි 2019, 31–33).

• ඔබේ දරුවන්ට ඔවුන්ට ප්‍රීතිමත්ව ලැබුණු ත්‍යාග සහ ඔවුන්ට නොලැබුණු අනෙකුත් ත්‍යාග ගැන කතා කරන ලෙස ඉල්ලා සිටීමෙන්, ඔබට දහම සහ ගිවිසුම් 88:33 පිළිබඳ සාකච්ඡාවක් ආරම්භ කළ හැකිය. සමහරවිට ඔවුන්ට ප්‍රීතියෙන් යුතුව ත්‍යාගයක් ලැබීම රඟ දැකිවිය හැකිය. ඉන්පසු ඔබට (ශුද්ධාත්මයාණන්වහන්සේගේ දීමනාව වැනි) ස්වර්ගික පියාණන්වහන්සේ අපට දෙන දීමනා ගැන කතා කළ හැකිය. මෙම දීමනා අපි ප්‍රීතියෙන් යුතුව ලබාගන්නේ කෙසේද?

• ඔබේ දරුවන්ට ඔවුන්ගේ ජීවිත තුළ ස්වාමින්වහන්සේගේ සහභාගිත්වය සෙවීමට ඔවුන්ව දිරිමත් කිරීම සඳහා විනෝදජනක ක්‍රියාකාරකම් කිරීමට ඔවුන්ව පොළඹවන ක්‍රියා පද දහම සහ ගිවිසුම් 88:63 තුළ අඩංගු වේ. නිදසුනක් වශයෙන්, “මා උද්යෝගයෙන් සොයන්න තවද නුඹලාට මා හමුවන්නේය” (අවධාරණය කිරීම් එකතු කර ඇත) හෝ “තට්ටු කරන්න තවද එය නුඹලාට විවෘතකර දෙනු ලබන්නේය” යන වාක්‍ය ඛණ්ඩ සාකච්ඡා කිරීම සඳහා ක්‍රීඩාවක් ගැන ඔබට සහ ඔබේ දරුවන්ට සිතිය හැකිද?

• “මා වෙතට ලඟාවන්න” යන ගැලවුම්කරුවාණන්ගේ ආරාධනය අවධාරණය කිරීම සඳහා, ළමුන් කාමරයේ එක පැත්තක සිටින විට, එක් දරුවෙකුට යේසුස්වහන්සේගේ පින්තූරයක් (මෙම දළ සටහනේ අවසානයේ ඇති පින්තූරය වැනි) ඔසවාගෙන කාමරයේ අනෙක් පැත්තේ සිටින ලෙස ඔබට ඔවුන්ගෙන් ඉල්ලා සිටිය හැකිය. ගැලවුම්කරුවාණන් වෙත ලඟා වීමට ඔබේ දරුවන්ට කළ හැකි දේවල් ගැන ඔවුන් සිතන විට, ඔවුන්ට පින්තූරය දෙසට පියවරක් ගත හැකි අතර, පින්තූරය අතැති දරුවාට අනෙක් දරුවන් දෙසට පියවරක් තැබිය හැකිය. ඔබ ගැලවුම්කරුවාණන් වෙත ලඟා වන ආකාරය සහ උන්වහන්සේ ඔබ වෙත ලඟා වන ආකාරය ගැන ඔබේ දරුවන් සමඟ කතා කරන්න.

• පාසැලේදී හෝ ප්‍රාථමිකයේදී ඔවුන් ඉගෙන ගන්නා දේ ගැන ඔබට පවසන ලෙස ඔබේ දරුවන්ගෙන් ඉල්ලා සිටින්න. ඔබ ඉගෙන ගන්නා සමහර දේවල් බෙදා ගැනීමටද ඔබට හැකිය. ඉන්පසු ඔබට ඔබේ දරුවන්ට කුමක්ද, ඇයි, සහ කෙසේද යන වචන පෙන්විය හැකිය. අප ඉගෙනගන්නවාට ස්වාමින්වහන්සේට අවශ්‍ය කුමක්ද කියා සොයා ගැනීමට දහම සහ ගිවිසුම් 88:77–79 කියවීමට ඔවුන්ට උදවු කරන්න. ඉන්පසු එකට එක් වී 80 වෙනි පදය කියවා, අප ඉගෙනගැනීම ස්වාමින්වහන්සේට අවශ්‍ය වන්නේ ඇයි සහ 118 වෙනි පදය කියවා, අපි ඉගෙන ගත යුත්තේ කෙසේද කියා සොයාගන්න.

• ඔබ ඔබේ දරුවන්ට දහම සහ ගිවිසුම් 88:119 කියවන විට, ඔවුන්ට “නිවස” යන වචනය ඇසෙන සෑම අවස්ථාවකම ඔවුන්ට තම දෑතින් දේවමාළිගාවේ කොත නිර්මාණය කළ හැකිය. ජෝසෆ් ස්මිත් සහ ශුද්ධවන්තයින් දේවමාළිගාවක් හෝ “දෙවියන්වහන්සේගේ ගෘහයක්” ගොඩනැගීම, ස්වර්ගික පියාණන්වහන්සේට අවශ්‍ය වූ බව පැහැදිලි කරන්න.

• ඔබට ඔබේ දරුවන්ට ඔවුන්ගේ නිවස විස්තර කරන වචන හතක් තෝරාගන්නා ලෙස කිව හැකිය. ඉන්පසු දහම සහ ගිවිසුම් 88:119 හි, ස්වාමින්වහන්සේ තම නිවස විස්තර කිරීමට භාවිතා කරන ලද වචන හත සොයා ගැනීමට ඔවුන්ට උදව් කරන්න. අපි අපේ නිවස “දෙවියන්වහන්සේගේ ගෘහයක්” බවට පත්කරන්නේ කෙසේද?