Сургаал ба Гэрээ 84

Санваар гэсэн үгийг бодоход таны санаанд юу орж ирдэг вэ? Бурханы санваарын хүч амьдралд тань хэрхэн нөлөөлдөг вэ?

Эдгээр асуултыг тунгаан бодсоныхоо дараа Сургаал ба Гэрээ 84:17–32-ыг судлаад, Их Эзэн танаас санваарын хүчнийх нь талаар юу мэдээсэй гэж хүсэж байгааг олоорой. Та хэн нэгэнд санваарыг мөн үүний зорилгыг тайлбарлахдаа эдгээр шүлгийг хэрхэн ашиглаж болохыг бодоод үзээрэй.

Та санваарын ёслолуудаар дамжуулан “бурханлаг чанарын хүч илэрхийлэгддэг” (19–21-р шүлэг) гэдгийг олж мэдэх болно. Та өөрийн оролцож байсан санваарын ёслолуудаа жагсааж болох юм (Ерөнхий гарын авлага, 18.1, 18.2 дээрх жагсаалтууд тус болно). Эдгээр ёслол мөн эдгээрт хамаарах гэрээнүүд хэрхэн таны амьдралд Бурханы хүчийг авчирсан бэ? Эдгээр зүйлгүйгээр таны амьдрал ямар байх байсан бэ?

Ерөнхийлөгч Рассэлл М.Нэлсон бидэнд “Бурхантай гэрээнүүд байгуулж, сахидаг, санваарын ёслолуудад зохистой оролцдог эмэгтэй, эрэгтэй хүн бүр Бурханы хүч чадлыг шууд хүлээн авах боломжтой” хэмээн заасан (“Сүнслэг эрдэнэс,” 2019 оны 10-р сарын Ерөнхий чуулган, 82). Ерөнхийлөгч Нэлсоны захиасыг судлахдаа “Аврагчийн хүчийг амьдралдаа олж авах” арга замуудыг хайж олохыг бодоорой.

Сургаал ба Гэрээ 25:10, 13, 15; 121:34–37, 41–46; Topics and Questions, “Priesthood,” “Joseph Smith’s Teachings about Priesthood, Temples, and Women,” Gospel Library; Ерөнхий гарын авлага, 3.6, Gospel Library-г мөн үзнэ үү.

Санваарын тангараг болон гэрээ нь (Сургаал ба Гэрээ 84:31–44-ийг үзнэ үү) санваарын албанд томилогдсон Тэнгэрлэг Эцэгийн хөвгүүдэд онцгой чухал хэдий ч эдгээр шүлэгт амласан адислалуудын олонх нь Бурханы бүх хүүхдэд боломжтой билээ. Ямар ямар амлалт байна вэ? Тэдгээрийг хүлээн авахын тулд Бурхан биднийг юу хийхийг хүсдэг вэ?

Ахлагч Пол Б.Пайпэр “Санваарын тангараг болон гэрээнд [Сургаал ба Гэрээ 84:31–44-ийг үзнэ үү] Их Эзэн хүртэх ба хүлээн авах гэдэг үйл үгийг ашигласан нь сонирхолтой юм. Тэр томилох гэсэн үгийг хэрэглээгүй билээ. Ариун сүмд эрэгтэй, эмэгтэй хүн хамтдаа Аароны болон Мелкизедек санваарын аль алиных нь адислал хийгээд хүчнээс хүртэн, хүлээн авах боломжтой байдаг” гэж заажээ (“Revealed Realities of Mortality,” Ensign, Jan. 2016, 21).

Та Сургаал ба Гэрээ 84:31–44-ийг судлахдаа, санваарыг “хүртэх” ба “хүлээн авах” гэдэг нь ямар утгатай болохыг тунгаан бод. Энэ нь санваарын албад томилогдохоос юугаараа ялгаатай вэ? Эдгээр шүлэгт Их эзэн таныг өөр юуг хүлээн авахыг урьсан байна вэ? Та үүнийг хэр хийж байна вэ?

Аврагчийг, Түүний Эцэг, Түүний үйлчлэгчид мөн Түүний санваарын хүчийг хүлээн авахад илүү итгэлтэй байхад юу танд урам зориг өгдөг вэ?

Сургаал ба Гэрээ 121:36–46-г мөн үзнэ үү.

Яагаад Бурханы үгийг тогтмол судлах хэрэгтэй болохыг ойлгоход туслах ямар ямар үнэнийг та Сургаал ба Гэрээ 84:43–61-ээс олж мэдсэн бэ? Эдгээр шүлэгт гэрэл болон харанхуйг эсрэг тэсрэг байдлаар дүрсэлснийг анхаар. “Мөнх амьдралын үгсэд хичээнгүйлэн анхаарал тавих” нь хэрхэн таны амьдралд гэрэл ба үнэнийг, мөн “Есүс Христийн Сүнсийг” авчирсан бэ? (43, 45-р шүлгүүд).

2 Нифай 32:3-ыг мөн үзнэ үү.

Та эдгээр шүлгийг уншихдаа, Өөрийн үйлчлэгчдийг дэмжинэ хэмээн Их Эзэний хэлсэн арга замуудыг олж мэдэх боломжтой. Энэ амлалтууд нь Түүний танаас хийгээсэй гэж хүссэн ажилтай хэрхэн холбогдож болох вэ? Жишээлбэл: 88-р шүлэг дээрх амлалтууд таны амьдралд хэрхэн биелсэн бэ?

Та эдгээр шүлгээс Их Эзэн Өөрийн ажлыг хэрхэн гүйцэлдүүлдэг талаар юу олж мэдсэн бэ? Та ямар ямар зөвлөгөө болон адислал олж мэдсэн бэ? Мөн та гэр бүлийнхнээсээ “Сүнсэнд хүчтэй” хэн нэгэнтэй хамт үйлчилснээр “номхон дөлгөөн байдалд сэнхэрч” байсан тухайгаа бодож болно.

• Хүүхдүүддээ ёслол гэж юу болохыг ойлгоход нь туслахын тулд Сайн мэдээний зургийн цуглуулга, д.103–108, эсвэл энэ долоо хоногийн үйл ажиллагааны хуудас зэрэг санваарын хэд хэдэн ёслолыг харуулсан зургуудыг үзүүлээрэй. Зураг болгон дээр юу болж байгааг тэднээс асуу. Дараа нь хамтдаа Сургаал ба Гэрээ 84:19–22-ыг уншиж болно. Яагаад Тэнгэрлэг Эцэг биднийг ёслолуудыг хүлээн аваасай хэмээн хүсдэг вэ? Ёслолуудыг хүлээн авч, гэрээнүүдийг байгуулсан учраас Бурханы хүчийг мэдэрсэн тухайгаа хүүхдүүддээ ярь. (Хавсралт A эсвэл хавсралт Б дэх “Priesthood Power, Authority, and Keys” гэснийг мөн үзнэ үү.)

• Сургаал ба Гэрээ 84:77-г хамт уншаад, найз байна гэдэг нь юу гэсэн үг болох талаар асуу. Та мөн өөрийнхөө сайн найзуудын талаар ярьж болно. Есүс биднийг Өөрийнх нь найзууд байгаасай гэж хүссэнийг бидэнд яаж мэдүүлсэн бэ? Бид ч мөн үүнийг хүсэж байгаагаа хэрхэн харуулах вэ? “Би Есүс шиг байхыг хичээнэ” (Хүүхдийн дууны ном, 40) гэх мэт дуу ярилцахад тань тус болно.

• Номлогчид хэрхэн танд, таны гэр бүлд эсвэл таны өвөг дээдэст сайн мэдээг хүлээн авахад тусалсныг хүүхдүүддээ яривал тэдэнд таалагдах байх. Дараа нь та Сургаал ба Гэрээ 84:88 дээр Их Эзэн номлогчдод ямар онцгой амлалт өгснийг уншиж болно. Хүүхдүүд тань энэ шүлэгт тохирох үйл хөдлөл бодож олж болох юм. Их Эзэнд үйлчилж байсан талаараа мөн 88-р шүлэг-т дүрсэлснээр Тэрээр тантай хамт байгааг мэдэрсэн үеэ хуваалцаад үзээрэй. Мөн та одоо номлогч байж болох арга замуудын талаар бодоход хүүхдүүддээ туслах боломжтой. Бусадтай Есүс Христийн талаар ярих үед Тэнгэрлэг Эцэг бидэнд юу хэлэхээ мэдэхэд тусалдаг болохыг гэрчил.